ZKIZ Archives


楊受成傳5億洽購亞視

2014-05-22  NM

 

最鍾意將陳年節目重播又重播嘅亞洲電視,現實裡又重播另一戲碼:賣盤疑雲。最近商界流傳願意做白武士嘅係英皇集團主席楊受成,佢作價五億向大股東黃炳均洽購亞視。呢位王征遠房親戚一○年購入亞視超過五成股權,買入佢全數股份,即可成為亞視最大股東。

亞視前執行董事盛品儒曾經向本刊爆料,王維基開價六億向主席王征斟購亞視,之後亦傳過有紅色商人向王征出價,但最後不了了之。據聞呢兩單「刁」傾唔成嘅一個主要原因,係王征獅子開大口,對住準買家企硬高價(有說係十億),一個仙都唔肯減,搏最後一鋪食到盡。

好想快啲甩身嘅亞視另一股東查懋聲家族,將王征嘅舉動看在眼裡,早排終於出手,入稟申請亞視清盤之餘,仲向王征追討連本帶利兩億幾可換股債券嘅款項。商界中人分析指呢招係想向王征發出明確訊息:「請勿拖延、盡快賣盤。」結果近日出現楊受成叫價五億(較王維基開價更低)嘅新說法。

記者問亞視現任執行董事葉家寶,佢話無聽過楊受成收購亞視,亦無聽過有亞視股東想賣股份。英皇集團企業傳訊部就答得相當曖昧,只係話有關洽購亞視嘅傳聞,「本集團暫未能作出任何回應」。

王維基密密搞購物網

記者上星期五去文華東方酒店做嘢,下晝五點見到久未露面嘅港視主席王維基,佢哋一行四人入咗去酒店cafe傾談,其中兩位女士似係Ricky嘅同事。記者八卦,聽到Ricky主要用英文同佢隔籬嘅男士傾偈,睇嚟都係為港視轉型製作購物頻道同其他人洽商。Ricky真係好忙,因為一個鐘頭入面,佢已經至少兩次走咗出去講電話。本刊問港視公關Ricky同人傾乜,公關話Ricky近排全力籌備購物頻道,馬不停蹄約見各路人士,有新消息會再公佈。

陳克勤偷食「女師父」?

未娶妻嘅民建聯立法會議員陳克勤,同任職金融界嘅女友拍拖多年,不時被追問婚訊,今年二月佢又俾傳媒逼問婚期,當時佢話自己好有誠意,但要雙方都有共識先得,暗示對方唔肯嫁,仲話唔方便講拍咗幾耐拖,怕女友以為佢逼婚。不過,早排有高登仔聲稱喺旺角撞到陳克勤,跟人稱「女師父」嘅英皇女藝人Kimberly Shum岑紫生同行,兩人仲一齊行去停車場,唔通克勤同金融界女友已經甩拖?Kimberly透過經理人回覆本刊,話當日只係同克勤食lunch,兩人只係普通朋友。陳克勤不約而同以「普通朋友」嚟形容同對方嘅關係,又話兩人經朋友介紹認識,當日只係相約喺旺角一間酒樓飲茶。問佢擔唔擔心女朋友呷醋,佢話「唔係咩問題,大家普通朋友啫。」咁佢打算幾時結婚?佢話唔答私人問題。

郭炳湘派金牙大狀旁聽

前政務司長許仕仁涉貪案,呢個星期一審到第八日,有金牙大狀之稱嘅資深大律師清洪喺開庭前半個鐘突然到場。原來清洪係新地前主席、郭炳湘嘅法律顧問。清洪聽咗一個鐘,已經頂唔順行出法庭,皺曬眉同記者呻:「咦!乜咁悶嘅?」郭炳湘唔係本案證人,清洪話雖然要向郭炳湘匯報,但唔係好想日日嚟法庭。問佢郭炳湘對於案件有咩意見,佢當然封口。上星期母親節,郭炳江、郭炳聯一家人同郭老太喺四季酒店食中菜慶祝,郭炳湘無去,細佬郭炳江話︰「(大哥)好多地方去。」幾日之後,有傳媒影到郭炳湘喺中環都爹利街出現,原來係去清洪嘅大律師樓商量案件。大律師鄧皓明呢日亦陪清洪出現,有傳媒話有被告以一千至三千萬「包起」個別星級大狀足足三年,等佢哋專心打好呢單案,不過鄧皓明認為價錢高到難以置信,報導有啲水分喎。

楊受 受成 成傳 洽購 亞視
PermaLink: https://articles.zkiz.com/?id=100845

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019