ZKIZ Archives


我主場:李治廷戀冰冰唔怕瘀

1 : GS(14)@2013-09-08 13:57:10

http://hk.apple.nextmedia.com/entertainment/art/20130908/18413510
在電影《一夜驚喜》中李治廷飾演痴情男,愛上了范冰冰飾演的上司米雪,在現實同樣與范冰冰譜戀曲的李治廷,早已洩露這段姊弟戀的端倪。

「佢內心世界幾可愛」

                問現年26歲的李治廷跟年齡有差異的范冰冰有沒有發展可能?他說:「我哋幾啱key啱嘴形囉!呢樣係我最大驚喜,開戲時都驚㗎,喂!范爺,係咪先,咁大氣場嘅女演員,但估唔到咁啱key,雖然我啲國語唔鹹唔淡,又覺得OK喎!大家嘅興趣幾似,笑點又幾似,拍得幾有默契,但你話係咪啱我就隨緣囉!」會否介意姊弟戀?他笑說:「我覺得乜嘢戀都唔係問題,最重要係咪真有愛情存在囉,唔好介意太多同愛情冇關嘅事。愛情好純潔,你信就會搵到真愛,唔應該擔心同顧慮咁多。」
那麼外觀是否重要?李治廷說:「我覺得先望見個樣再入內心世界,外觀唔係最重要,但我信相由心生,個樣令我舒服至會去發掘佢內心世界。」有否發掘范冰冰內心世界?他揚言:「佢內心世界幾可愛,因為拍戲,點都會瞭解啲,佢其實幾細路女,你估唔到,我當初都嚇一嚇,我對佢認識主要喺廣告,雜誌封面好勁吖嘛,好女神級嘅女仔,覺得好難接觸、好遠,但原來私下同佢傾偈傾戲,深入瞭解呢個人,會覺得佢好多嘢仲簡單過我,譁!原來我細佢咁多,但我諗嘢諗多啲。」

「兩個人入咗件事」

                  時機似乎已經降臨,兩人上月被網友目擊同遊布吉,李治廷更親吻范冰冰額頭。愛火有蔓延至幕前之勢,兩人合體宣傳時玩得興起,公然互抱對方,李治廷抱起范冰冰時情深對望,勝過甜言蜜語。
李治廷亦坦承拍攝時情不自禁愛上了范冰冰,他說:「有一場戲有一剎那,係有感覺,講我去佢屋企,同佢道別,個感覺好真好特別,演戲永遠追求呢種感覺,個嚇係有囉,兩個人入咗件事,導演未叫cut,仍然喺嗰個世界入面。」回到現實有愛上她?他迴避說:「做戲一定要,呢個我喺佢身上學,有次佢寸我,佢唔知我做音樂,佢聽到我唱歌,就叫我唔好拍戲去寫歌,我講笑:『范小姐,我演戲係咪好差?』佢話唔係,但希望我可以再真啲,我點會唔真呀,佢話你試嚇再投入啲再拎個心出嚟,嗰刻我好努力拎個心出嚟擺喺部戲度,最後發覺真係唔同,我又發覺點解佢演戲咁好呢,佢好執著真誠呢樣嘢。佢有幫我開啟演技,最意外係我有概念大演員有個演戲方式,眼見同真實係兩回事,佢私下好平易近人,唔係女神,係鄰家女孩,呢樣感染到我,我下次要好真好真。」

「唔使介意俾人拒絕」

                                    李治廷在《一》片中不介意姊弟戀,現實中會否勇敢去愛?他說:「以前我冇咁勇敢,但拍完呢部戲受感染,愛情好純潔,唔可以諗瘀唔瘀,唔去諗面子,係咪上司同姊弟唔係咁重要,真係鍾意嘅話,唔使介意俾人拒絕,阻礙一段美好愛情發生。我以前好典型同理性,會考慮追求對象同我啱唔啱key、朋友點睇、或者父母會唔會鍾意,有冇發展可能、工作有冇時間見面之類,城市長大男女都會去諗呢啲嘢,同我朋友唔啱key會嗌交就唔好,呢啲諗法搞到我錯失愛情機會。我而家儘量想放低呢啲睇法,純粹用心去感受世界,不過講就易,真正做到都好難。搵到啱嘅人,想試嚇放低框框勇敢去愛。」
主場 李治 廷戀 戀冰 冰冰 冰唔 唔怕 怕瘀
PermaLink: https://articles.zkiz.com/?id=283722


ZKIZ Archives @ 2019