ZKIZ Archives


操盤手札記:五窮月吼滬迪士尼股

1 : GS(14)@2016-05-08 01:53:36

今日立夏,正式告別陰晦嘅春季,希望港股都告別陰霾啦!五一長假後復市,港股5月第一個交易日就見you sell I sell,齊齊sell in May,恒指出現一支大陰燭,昨日再嚟多支陰燭,加上放假前嗰支陰燭,呢三支燭完全插穿呢一輪升浪嘅上升軌,大市轉弱。恒指昨日裂口低開,20580與20688間嘅下跌裂口,相對4月13日20546與20716間嘅上升裂口,形成巨大島形頂,發出更為利淡訊號。昨收20525,跌151點或0.7%,三日累跌862點或4%。連日跌市,主因係日圓累街坊。日圓急升,借日圓套息交易拆倉,遇上日股假期休市,港股成為急於平倉大戶嘅提款機。恒指自2月12日低位18278反彈至4月28日高位21654,升了3376點。喺調整市,黃金比率0.382倍、0.5倍及0.618倍被視為三級支持。呢一浪若回吐0.382,將見20364;若回吐0.5,就見19966;若回吐0.618,則見19567。再回落的話,要小心唔係調整,而係新跌浪開始。不過,後市又唔使睇得太淡,雖然千禧至今16年中有11年應驗「五窮」,但今年有兩個變數:一、據講中央將於3個月內宣佈「深港通」開通日期;二、MSCI將於6月公佈是否納入A股,5月尾料有春江鴨。今個月想入市的話,宜揀防守股,始終5月偏淡嘛!我從不諱言係好息之徒,喺我眼中,防守股必然係高息股,有高息做護盾,防守力強好多。高息股不外乎內銀股、公路股,預測息率普遍超過5厘,但內銀資產質素堪憂,近日傳出嘅「銀監會82號文」將令不良資產暴露無遺,高息係糖衣毒藥,我寧願揀公路股,心水係食正上海迪士尼概念嘅江蘇寧滬高速公路(177)。寧滬高速上周五收市後派首季成績表,按年多賺18%,營業收入增3%,當中路費收入增5%。首季財務狀況顯著改善,經營活動產生之現金流量淨額大增53%。上海迪士尼將於本周六開始試業,6月16日正式開幕。寧滬高速連接南京上海,車流量必受帶動。德銀預測上海迪士尼營運後,將令寧滬高速今年純利提升2%,往後每年更可提升5%。按彭博綜合券商預測,寧滬高速今年每股盈利料升21%,皖通高速(995)持平,成渝高速(107)、滬杭甬(576)、深高速(548)則分別跌6%、9%及27%。至於預測息率,分別為5.1%、4.7%、3.3%、5.4%、4.1%。點睇都係寧滬高速跑贏!該股昨收10.6元,可候回至10元買入。割柑人本欄逢周四刊出





來源: http://hk.apple.nextmedia.com/financeestate/art/20160505/19598189
操盤 手札 五窮 窮月 月吼 吼滬 迪士尼
PermaLink: https://articles.zkiz.com/?id=299824

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019