【馮仁昭四圍超】一日飛三轉穿梭歐美 猷君速遞見公主
1 :
GS(14)@2016-02-11 10:21:25■猷君同Kimmy拍拖短短時間，幾乎喺全球每個角落都搵到佢哋嘅蹤迹。互聯網圖片
賭王四房孻仔何猷君同新加坡富商、西甲華倫西亞班主林榮福千金Kimmy Lim（林慧俐）拍拖個幾月，已經蜜遊澳門、新加坡同香港。由於猷君要返波士頓麻省理工開學，而Kimmy就返新加坡，搞到猷君要捱眼瞓，半夜起身同女友玩facetime，校啱新加坡時間5點20分打去，冧爆女友。
Kimmy空中傳情
猷君今個農曆年飛咗去拉斯維加斯同班朋友過年，不過浪漫嘅佢原來已經計劃咗點同Kimmy過首個情人節。佢噚日喺Ig貼圖，騷咗一張由波士頓出發，到巴黎轉飛華倫西亞嘅機票，原來佢約咗女友去西班牙拍拖，相信平時咁鍾意睇波嘅佢，應該會去睇華倫西亞主場嘅比賽過節。
■猷君貼咗張機票相，仲話自己係一日連飛三程搵女友，相當甜蜜。互聯網圖片
■Kimmy喺飛機上面拍片，睇嚟係飛緊去蜜會男友。互聯網圖片
■猷君新年飛咗去賭城拉斯維加斯，話咁快又起程飛去西班牙。
其實猷君已經開咗學，為咗兼顧學業同拍拖花盡心思，佢喺Ig以「公主」、「The One」形容女友，更留言此行原來係一日飛足三轉：「我的周二：早上從拉斯維加斯飛回波士頓，上幾節課，把這周所有剩下的功課做完，然後飛往巴黎轉機去瓦倫西亞（華倫西亞）找公主殿下。」同一時間，Kimmy亦喺snapchat上放咗一條坐飛機嘅視頻，更笑言so tired，估計佢飛緊去西班牙同男友會合。撰文：馮仁昭
來源:
http://hk.apple.nextmedia.com/entertainment/art/20160211/19486124
馮仁昭四圍超：收3卡鑽戒訂婚蔡雪瑩做猴年新娘
1 :
GS(14)@2016-02-16 08:11:07■蔡雪瑩喺Ig貼相宣佈結婚，見到佢手上嘅3卡求婚鑽戒好耀眼。互聯網圖片
有高登「至索主播」稱號嘅無綫前新聞小花蔡雪瑩，以及宅男女神黃美棋喺情人節齊齊「封盤」，雪瑩BB同上市公司太子爺朱威霖（William）訂婚，美棋BB就公開承認同有線主持鍾健威（Ray）嘅戀情，對唔少宅男嚟講，呢一個情人節肯定雪上加霜！
■William食住燭光晚餐，以鮮花鑽戒抱得美人歸。
雪瑩BB同William拍拖未夠一年，但William就好心急咁同雪瑩BB求婚，以3卡鑽戒同鮮花攻勢打動女友下嫁。前晚雪瑩BB同男友喺尖沙嘴半島酒店食西餐慶祝，其間佢喺facebook上載戴住3卡巨鑽嘅拖手相，仲有張雪瑩BB攞住鮮花同男友合照相，笑住留言話男友會愛佢一世，冇耐雪瑩BB仲喺Ig貼相宣佈訂婚。馮仁昭噚日打畀雪瑩BB恭喜佢，問到男友求婚過程，佢話：「都係嗰啲行嘢啦！我哋食西餐，食食吓佢話：『其實有啲嘢想同你講……』之後求婚。」咁幾時結婚？佢話：「應該今年會擺酒！」求婚戒指係咪3卡？雪瑩BB就話唔知：「我哋好認定對方，佢問我如果汽水蓋嫁唔嫁？我話我都會嫁嘅！」撰文：馮仁昭
來源:
http://hk.apple.nextmedia.com/entertainment/art/20160216/19492301
馮仁昭四圍超：周杰倫哈仔 魔法對決
1 :
GS(14)@2016-02-18 08:55:51電影《非常盜》（Now You See Me）2013年上映時非常賣座，以魔術作為題材風靡全球，片商開拍續集《非常盜2》（Now You See Me：The Second Act）已定今年6月10號喺北美上映。除咗原班人馬謝西艾辛堡（Jesse Eisenberg）、活地夏里遜（Woody Harrelson）、Dave Franco、麥克雷法路（Mark Ruffalo）之外，續集仲加入咗「哈仔」丹尼爾拉德克里夫（Daniel Radcliffe）、Lizzy Caplan同埋周杰倫。
■「哈仔」丹尼爾喺《非常盜2》預告片大施魔法。劇照
舞動甫士型爆
電影喺上年拉隊到澳門取景，月前已公開首個長約一分鐘嘅預告片，除咗謝西艾辛堡等人上演魔術表演，麥克雷法路喺澳門亦有打鬥戲份，但就唔見周杰倫，有傳佢只係客串扮演古董店老闆。不過，噚日公開一系列宣傳海報終於解開謎團，同時推出美版及內地版，唔止有齊幾位主角嘅單人照，周杰倫亦以魔術師造型亮相！幾位主角喺藍色燈光折射到玻璃鏡面下，盡顯魔術奇幻世界，周杰倫擺出型格舞動甫士，而演學院派魔法師嘅丹尼爾就單手飛起啤牌，有如魔術老手一樣。時隔三年，神秘「天眼」再次出現喺海報右下角，上集每位魔術師都收到一張啤牌邀請卡，「天眼」標誌似暗藏玄機。撰文：馮仁昭
來源:
http://hk.apple.nextmedia.com/entertainment/art/20160218/19494881
Next Page