利世民：誰的大茶飯？
1 :
GS(14)@2012-04-19 22:24:27http://www.sharpdaily.hk/article/fin/20120419/80341
「要唔要沽定啲1號、12號同16號呀？」噚日一朝早就有朋友打畀我。「點解？大亞灣核泄漏呀？」未醒嘅我，有少少混亂。「《蘋果日報》頭版，恒隆（101）陳啟宗爆料，話地產霸權以後無大茶飯呀？」朋友話。
「陳啟宗？有危機意識，一早就攞美國護照，不過有危機意識嘅人對未來悲觀少少都好正常啫。」我算係個悲觀嘅人，終於遇到對手囉。不過，地產霸權無大茶飯食？我唔信。
陳啟宗都會贊成：「做地產，你估咁易呀？」80年代初，恒隆試過帶頭，一口氣做9個地鐵沿線項目。點知撞正前途問題，加上美國聯儲局將息口夾到超高，港紙流走，香港資產價格急跌，恒隆成手貨，不過好在底夠厚，捱過呢一浪。83年後，香港有聯滙，美國聯儲局又放番鬆，香港資產價格又再升過。可惜，恒隆已無復當年之勇。否則，今日地產霸權頭三名，可能會唔同晒。其實連恒隆經咁多歷史性事件，之後又咁保守，今日都仲係咁富貴。大茶飯？陳啟宗要求高啫。
「唔係喎！如果新特首大增土地供應，地產霸權排位會唔會變呢？」朋友問。
土地供應可以點增加呢？舊區重建，又怕班廢青話要保育。開新區，根據香港規劃思維，人口多就一定要鐵路；鐵路，冇廿年都唔使旨意。真係諗唔到土地供應可以點增加喎。
「你又知新特首唔會特事特辦？鐵路，即上馬！舊區，要拆就拆！你都知啦，呢位特首……」朋友問。
如新政府真係大量開闢新區，持大量土儲但無辦法大事發展嘅幾大地產商，就真係可大展拳腳。如鐵路有新搞作，香港第一大地展商，港鐵（066）真係發囉！可惜， 恒隆唔可以好似以前一次過幾個站咁樣去發展。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：畢菲特係美國隊長
1 :
GS(14)@2012-04-20 22:22:48http://www.sharpdaily.hk/article/fin/20120420/80952
前日好多人都講畢菲特被驗出前列腺癌件事。其實對一個80開外嘅老人家，肺炎分分鐘危險過前列腺癌。無論如何都希望佢老人家好似佢自己話齋有100%嘅精力，好似邵爵士做到100歲。畢竟現代醫學技術越來越好，畢菲特講嘅亦唔係全無可能。
「不過佢咁大年紀，唔諗繼任人問題，都應該退休享清福。」唔少人講。退休享清福？唔通要佢日日打橋牌？信我，上帝唔會批准呢個申請。如果搵到自己鍾意嘅事，係唔會退休。最諷刺係越係成功嘅人，越無諗過退休。
成功，唔淨係錢咁簡單。一個人如工作上搵到意義，根本唔會諗退休。畢菲特同李嘉誠真係好等錢使咩？唔好話呢世使唔晒，佢哋對落三代都可能使唔晒。點解仲要做？好簡單，佢哋享受自己嘅工作。
最成功嘅學者同藝術家都無話退休。運動家就有啲唔同，因身體問題先退休。不過如可繼續跑落去，佢哋都會跑。幾十歲嘅叔叔嬸嬸，跑馬拉松、游渡海泳，就出於一種動機：享受。
究竟乜嘢令畢菲特咁享受呢？睇番畢菲特08年金融海嘯嗰幾年，人人陷於恐懼，佢就做白武士；借50億美元畀高盛，3年間，連本帶利賺37億；借錢畀GE，買鐵路Burlington Northern Santa Fe等，佢老人家話係兒時夢想。
不過，畢菲特從心底裏就係Captain America，佢對美國精神嘅信心係發自內心。好似88年佢入股可口可樂，當時可口可樂正陷衰落危機，畀百事追擊，新產品又唔爭氣，但畢菲特就落注呢個美國概念。結果90年代蘇維埃瓦解，可口可樂前面忽然有一大片藍海，the rest，was history。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：貸款看美國經濟
1 :
GS(14)@2012-04-25 23:34:46http://www.sharpdaily.hk/article/fin/20120425/82861
1、學生貸款：8670億美元
2、汽車貸款：7340億美元
呢兩條數，就係今時今日，美國人比較大嘅負債，亦係好多經濟分析師，用來了解美國經濟嘅參考數字。連埋信用卡欠款，每個美國人欠落7397美元，粗粗哋計，大概係一個人嘅兩、三個月收入。任何數字，用全國人口計平均值之後，好多問題都變到好似無乜問題。事實上，好多政府亦係用呢個方法去計數。不過，呢個心態，亦都意味着經過政府嘅神奇機器，又叫做財富再分配，就可以將成個國家嘅痛苦平均攤分。事實上，美國欠學生貸款嘅人數，大概4000萬人，換言之，每宗學生貸款嘅平均結餘係21600美元。事實上，讀名校，又或者專業，例如醫生律師，欠落嘅學生貸款，分分鐘係呢一個平均值嘅4至5倍。
以現今嘅就業環境，美國有一大班人，尤其係中產專業人士，根本無可能買樓。至少，唔可以好似過去十幾廿年咁，搬出去市郊住獨立屋。02至05年，呢一類市郊獨立屋最吃香，亦係最炒得。結果，o依家最慘嘅，亦係呢一啲區域。按照現時情況，只要上面講嘅中產下流情況睇唔到明顯改善，之前一浪嘅獨立屋蟹貨，將會繼續蟹落去。一直拖累美國地產數據，好大程度上亦係呢類供應。
自08年金融海嘯後，美國人慢慢開始調整生活模式。09年之後，人口流動開始多，最主要仍然係由一個大城市，搬到另一個大城市，尤其係東西兩岸。
除此之外，綜合各種正式同非正式數據，美國嘅80後，越來越住得近城市中心，亦由獨立屋，改去住Apartment同埋Townhouse。亦越多越多人依賴公共交通。呢個轉變，意味着美國汽車業同汽車貸款都持續受壓。事實上，當就業市場回升，睇汽車銷售同貸款就可以反映出來。今後睇美國數據，可能要將呢個新嘅現象考慮在內。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：你不知道的鐵路霸道
1 :
GS(14)@2012-04-30 22:48:39http://www.sharpdaily.hk/article/fin/20120430/84498
Facebook上面，見到一張四格圖，寫住：「樓，買不起；車，搭不起；飯，吃不起；龕，死不起。香港人，了不起。」
每次有呢一類圖，總有人會Share。點解？因為佢哋想話畀全世界知：「政府錯，社會錯，所以，佢哋今日咁嘅環境，並唔係佢哋廢。」有人話：「政府係土地唯一供應者，樓價貴，梗係政府錯啦！」畀塊地你，你就可以住？呢個世界就係有人「賴依芙」。填海、移山、舊區重建，永遠都有一班反發展廢青，出來話要保育。
要起高啲，又話屏風樓；起得遠，又嫌棄。其實根據香港嘅規劃模式，所有新區發展，一定要鐵路配套。運輸署有個好好聽嘅叫法：鐵路優先。呢個規劃模式，幾乎令到港鐵成為香港唯一嘅新區地產發展商。任何交通規劃只靠一隻交通公具，太霸道啦！好似將軍澳，就快會無晒過海巴士。可惜，競爭法管唔到鐵路霸權。最重要係，鐵路霸權，令到香港發展新區嘅速度超慢。
不過，我又唔係反對港鐵做地產。相反，我覺得地產補貼交通，不但公道，直頭係世界級公共政策一絕。每次去美國的智庫講Talk，我都一定講香港點樣用呢招減低政府庫房負擔。鬼佬聽完，個個點晒頭，偏偏係香港班九流政客，一聽到地產兩個字，就即刻神經緊張，喊打喊殺。老實講，如果唔係有地產補貼，你哋班從來都唔搭鐵路嘅政治演員又逢加必反，最終邊個畀錢？納稅人？點解一個從來都唔去南區嘅天水圍人，要分攤港島南線嘅建築費？
我唔係針對港南線。例子只不過係想話畀大家知，凡事都有代價。上蓋物業補貼，用者自付，係最公道嘅一個方法，亦都係香港車費相對低嘅原因。永遠都有人話搭港鐵貴。究竟佢哋用乜嘢標準呢？用紐約、倫敦、東京、巴黎同華盛頓比，我會話，港鐵嘅質素同價錢，真係蔗渣價錢，燒鵝味道。
講起燒鵝。班未來社會棟樑話食唔起嘅，係人家金牌燒鵝飯。唉，唔食燒鵝飯，駛唔駛死呀？樓貴，等吓囉？骨灰龕？到時先算啦！大不了叫屋企人將骨灰灑落維港。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：飲食業大財團玩晒？
1 :
GS(14)@2012-05-03 23:11:31http://www.sharpdaily.hk/article/fin/20120503/85570
香港未來社會棟樑學外國廢青，整張「香港人的選擇？」，放大堆Logo，大家樂、稻香、美心等，然後自我麻醉：「畀大財團玩晒，小市民無得揀。」另一邊廂，中環人討論翠華上市。唉，未來社會棟樑呀，究竟你哋幾時先肯將心智從屯門、馬料水釋放出來，接觸現實世界？好心上openrice.com睇吓，究竟香港飲食業係咪畀大財團玩晒啦！
講開飲食業，剛有間日式餐廳麻布茶房全線結業。唔通八佰伴翻版？日本經濟真係咁差？問過飲食業中人，先知道香港麻布茶房係特許經營，係本地資金。點解全線結業？租金太貴？知情人士話肯定唔關租金事，因為佢哋租落嘅地方，絕大多數係幾家比較識做搞商場嘅場。
業主明白要保持好嘅Tenant Mix，個場先會旺，所以只會趕走做唔好嘅舖，免得嘥地方兼做壞個場。麻布茶房過去幾個月甚至有人洽購，應該算好生意嗰隻。
不過，就算好生意，麻布茶房員工原來一早已經無糧出。但係成班人竟然留守到最後一日，之前洽購嘅老闆，覺得班員工有義氣，所以特登打本開一條新嘅日式餐廳線，成班請過去。政客淨係識鬧僱主無良，不過其實資本主義都有人情味。
利世民
利世民：歐洲死局
1 :
GS(14)@2012-05-04 23:34:58http://www.sharpdaily.hk/article/fin/20120504/86345
每次有人問我，點睇後市，除咗話我唔想，亦唔識預測未來，我都會加句：「歐洲除主權債務危機，經濟衰退帶來最大嘅問題，就係樓市令銀行資產負債表再收縮。但今時今日，已無任何國家有能力去救銀行。愛爾蘭，可能係歐洲最後一個出手救銀行嘅國家。o依家嘅情況繼續落去，我擔心歐洲會陷入一個災難性嘅結局。」
「你又話唔預測未來？」有人問。無錯，人總會諗未發生嘅事。心態上，我會不斷告誡自己，預測中咗，係好彩，錯咗，係理所當然。
除此之外，我亦會盡量從風險角度去諗，究竟自己會唔會因為一啲突發嘅事情，一鋪清袋。正所謂唔怕一萬，至怕萬一。如果賺少啲可以保命，我寧願保命。我認我係超保守嘅投機者。
無法用財政擴張注資社會
08年雷曼之後，市場資金突然湧去美國，對聯滙下嘅香港，當時最大嘅即時影響，係資產價格下跌。
今日歐洲亦發生類似情況：資金湧去德國買債，對其他歐元區國家，其實就係走資，國內資產價格一定有下調壓力。
資產價格萎縮惡性循環，再加上主權債務危機，而且各歐元國家已經無可能用財政擴張注資社會，又無貨幣政策做大信貸，我好難想像歐洲呢一關點過。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：金融才俊的邏輯
1 :
GS(14)@2012-05-10 23:42:18http://www.sharpdaily.hk/article/fin/20120510/88350
2 :
abbychau(1)@2012-05-11 13:10:11利世民:
昨日，我arm arm 行過街市，聽到有個賣魚佬講話有條友仔叫做金融才俊，係你。哈哈……我當堂嚇咗一跳，然後得啖笑。呢個世界，居然有人自稱為才俊，咁即係分明當我流唧！嗱！我就叫利世民，你炒股票都要日日check 住個價啦，我睬你都嘥氣，我淨係出文嘅，呢啲就叫特異功能。呢度有篇稿，只要我輕輕一捽，就即刻變為一隻皺咗嘅稿，因為我未發功呀嘛，發咗功登出嚟都得。你話我講嘢無厘頭，我夠話你訓醒戇九九咯。望咩呀﹖條氣唔順呀﹖發個輪嚟大家研究下。當然，你要補番一百幾廿萬過我就唔在講㗎啦。啤咩呀？出文唔使錢呀？抄底我聯絡電話係香港︰3345678，我再重覆一次係香港︰3345678。你唔搵我我無所謂，因為呢啲係你嘅損失。十點鐘後唔好打嚟，因為我瞓咗！
3 :
GS(14)@2012-05-11 22:53:02
你睇得太多啦
利世民：香港教科書點解咁貴
1 :
GS(14)@2012-05-12 15:20:00http://www.sharpdaily.hk/article/fin/20120511/88847
「香港教科書咁貴，不如搞電子出版！」覺得書貴，因印刷貴，電子出版就平，呢種諗法係錯嘅。教科書貴，因雙重壟斷；第一重，源於教育局審批機制；第二重，因學生唔買教科書，會畀老師罰。再講，家長畀錢科主任揀書，誘因錯配，點可以唔貴？教科書出版商，係Rent-seekers（尋租者），唔抵可憐。始作俑者教育局竟扮唔關自己事，就更可恥。
「不如政府統一印教材教科書，家長咪唔使畀人剝削囉！」不過咁樣只係將香港教育水平再倒退，得不償失。其實教科書不嬲都貴，但點解過去十年爭拗咁大呢？未搞課程本土化之前，課程內容結構同國際接軌，香港學生，尤其高中生，可選擇嘅書好多。大家記唔記得ELBS？又平又正。就算當年我讀經濟，除教科書，又睇大教授《賣桔者言》，仲有佛老《Free to Choose》、Hirshleifer嘅《Price Theory》等。
課程本土化，加上廣東話教學，學生只可睇中文教科書，選擇受制，消費者梗係畀人劏啦。其實有公開試，香港教科書出版商，大不了轉型做雞精書。雞精書平又正，具競爭力。同一班人，結構分別有少少，市場結果可非常唔一樣。
利世民
Next Page