萬南 二五中環 Hooters襲港 中環人期待
1 :
GS(14)@2016-07-24 17:17:26http://www.metrohk.com.hk/index.php?cmd=detail&id=314803&search=1
以性感女郎做賣點嘅美式餐廳Hooters，喺中環老蘭嘅本港首間分店裝修得八八九九，照計好快就開張，呢排經過門口都見唔少麻甩仔望吓入面。其實香港有好多金融界精英，以前都喺花旗國浸過鹹水，對Hooters好有感情，而家喺某大上市公司做HR高層嘅A君，話當年去美國讀書，大鄉里出城去Hooters，見到成批美女侍應，塊面竟然紅晒。
之後A君成日幫襯Hooters，十年前知道拉斯維加斯開咗間主題酒店，即刻飛去當地體驗。當佢知道餐廳喺香港開舖，已約齊當年一齊喺美國捱薯仔嘅老友去想當年。佢笑笑口話作為HR行內人，除咗想食飯睇吓女仔，仲好有興趣想知佢哋點樣招聘人才。
萬南 二五中環 最紅富二代曲線報父恩？
1 :
GS(14)@2016-08-07 02:28:14http://www.metrohk.com.hk/index.php?cmd=detail&id=315887&search=1
正當中國首富王建林旗下嘅萬達商業(3699)計劃從港股私有化、並尋求喺A股上市之際，首富之子、被稱為「最紅富二代」嘅王思聰，原來喺資本市場同時有動作。王思聰有份投資嘅創業板股、喺本港經營中高檔餐飲嘅飲食概念(8056)今日就會上市，唔知佢係咪打算將呢間公司嘅餐飲業務，同老竇旗下嘅商場搞合作呢？
根據招股文件，飲食概念配售2億股，相當於公司已發行股份25%，定價$0.45，而早喺2014年底，王思聰全資持有嘅私募基金Prometheus Capital，就已經用3,112萬元買入一批可換股債券，行使後相當於8,088萬股，佔公司上市後10.11%股權，禁售期6個月。堂堂中國首富之子吼隻創板股仔，萬南估佢可能早有部署。
大家諗吓，萬達旗下有成180個商場，面臨網購衝擊下，商場要吸客，以中國人「民以食為天」嘅文化，就梗係要吸引有特色嘅餐飲啦，而飲食概念呢間公司，就正係專注向中高消費能力客戶提供各式佳餚，話唔定上市後會進駐各大萬達商場，如果能夠打入大陸市場，收入分分鐘出現幾何級數增長！
不過以上都係萬南估吓啫，不如睇近啲，又估吓上市儀式有咩人出席好過啦。以王思聰高調嘅作風，話唔定今日會有好多靚女喺交易大堂出沒，話唔定仲會有知名女星撐場現身，大家不妨八一八！
萬南 二五中環 員工宿舍買少見少
1 :
GS(14)@2016-08-07 02:29:02http://www.metrohk.com.hk/index.php?cmd=detail&id=315887&search=1
早兩日睇報紙，發現德昌電機(179)近期連環沽出多個天水圍嘉湖山莊(圖)單位，令萬南好奇點解土炮老牌廠佬會不務正業炒樓呢？於是查吓問股壇百事通，先知原來德昌廿幾年前，用咗兩億向發展商掃入百零個嘉湖山莊單位，一直用作普通員工宿舍，但由於愈來愈多生意北移，宿舍需要減少，於是陸續放售套現，聞說依家只沽剩十零伙嘉湖。
萬南對員工宿舍好有感情，事關在下童年於仍未上市嘅周大福(1929)九龍城員工宿舍生活，記得當年樓下就係金舖，屋企人喺樓下賣金飾，仲要公司包午餐，過時過節大老闆彤叔又醒唔少嘢，屋企慳番唔少生活費。到大咗先知，原來以前好多周大福門市係自置物業，早年興全幢咁買，樓上冇用又怕租畀陌生人打金舖主意，於是益夥計做宿舍。
香港地價咁貴，愈來愈少上市公司提供員工宿舍，有都留畀高層做豪宅居多，普通打工仔宿舍買少見少。反而唔少外資同中資公司，為方便聘請外勞喺香港打工，都會租埋宿舍，其中奧運站一帶屋苑係集中地，有經紀話起碼有幾百個單位租畀大公司，唔怕有租霸。
萬南 二五中環 碎股黨出沒 搵潤啤着數
1 :
GS(14)@2016-08-07 02:29:45http://www.metrohk.com.hk/index.php?cmd=detail&id=315887&search=1
金融界好多叻人，見到實食冇黐牙嘅機會當然唔會錯過，最新例子係華潤啤酒(291)(圖)大折讓供股，由於優先畀碎股超供湊夠一手，於是大批久未出動嘅碎股黨又出嚟玩，以多個名義各持1股，博大霧額外供1,999股。以昨日收市價計，每個戶口輕鬆執6千零蚊，假設每人拆做5個戶口，接近零風險袋3皮嘢。
老友股神M向來食大茶飯，今次都有參與做碎股黨，佢早兩日去合和嘅過戶處，發現九成排隊人士都係搞潤啤供股，工作人員可能知道大家都係供1,999股，費事佢哋問長問短，索性提供模擬支票，畀人照抄寫幾多銀碼。M哥話好多師奶股神都係拎個背心膠袋去過戶處，入面袋滿股票非常疊水，佢仲話佢哋集團式經營，以前靠供碎股搵落唔少。
萬南 二五中環 廖創興第三代 做創投中間人
1 :
GS(14)@2016-08-14 16:40:43http://www.metrohk.com.hk/index.php?cmd=detail&id=316461&search=1
生於大富之家，相信係唔少人嘅夢想，但即使「贏在起跑線」，如果後天唔努力，亦唔代表一定成功。萬南最近認識到廖創興家族第三代成員廖德城(Paul)博士，佢本身係一名IT專家，為家族企業服務，但喺家族持有嘅創興銀行賣盤後，就決定利用自已嘅長處開拓個人事業，仲取得唔錯成就㖭。
廖德城之前喺加拿大攻讀工程物理學，攞到博士學位之後，曾經喺軍工企業做嘢，有機會接觸美國國防部技術，浸咗一排之後，就加入家族嘅創興銀行助拳，主要負責番自己強項資訊科技部門嘅工作。不過，隨着越秀集團喺2014年收購創興銀行，Paul就成立自己嘅公司SMART Social Mind Analytics (Research and Technology) Limited，仲早人一步，喺金融科技(FinTech)同埋大數據(Bigdata)搵到唔少商機。
Paul仲話，離開咗家族公司，令佢有更大空間發展個人事業，所以最近就連創投基金都搞埋，希望利用自己喺銀行業積累嘅經驗同人脈，以中介人身份為初創公司尋求發展資金，亦同時為市場資金尋求合適投資機會。佢仲話，喺美加等地，創投公司獲資助項目嘅成功率往往只有10%，但投資者都唔介意回報低，幾大都畀機會人哋試咗先！睇番香港喺創投方面嘅發展落後人哋一條街，唔知我哋嘅創科局局長，幾時會落實推出講咗好耐嘅創科創投基金呢？
萬南 二五中環 3,000畢業生爭做合和MT
1 :
GS(14)@2016-08-14 16:42:13http://www.metrohk.com.hk/index.php?cmd=detail&id=316461&search=1
每年好多大公司都會請MT(見習生)，當然畀得起錢嘅大品牌，自然寧舍多後生仔女爭入去，但萬南發現老牌地產公司合和實業(054)，舊年竟然有接近3千人報名考佢哋嘅兩年MT Programe！根據某國際HR顧問公司做嘅指數，量度MT心目中嘅好公司，5分最高合和有4.1分，喺眾多香港土炮公司之中得分最高。
合和究竟有乜咁把炮呢？原來佢哋呢幾年積極吸納新血，搵咗個年輕有為嘅Garrick負責呢壇嘢，佢好知年輕人心態，經常走入大學甚至中學演講，最重要唔Hard sell合和，貼地咁將個Talk騷搞得好有趣，又會請後生仔女鍾意嘅名人嚟幫手分享，近期就有坤哥吳業坤、大埔Lulu、同埋加入咗興業證券嘅前新聞主播周嘉儀同年輕人傾偈，確實令合和洗脫一陣老土氣味，令後生仔女想投身呢間公司。
合和搞咁多大龍鳳，或者你會以為實要花好多錢啦，但據萬南收到風，唔計合和要請員工組成呢Team人，佢哋搵嘉賓原來都係碌人情牌，全部唔收錢捱義氣嚟，所以搞咗咁耐，額外開支只係兩皮嘢，效果相當好。聽聞合和太子胡文新好Buy呢個計劃，期望呢批MT日後帶出新思維，令合和更年輕化。
萬南 二五中環 759執笠「子烏虛有」
1 :
GS(14)@2016-09-04 21:48:53http://www.metrohk.com.hk/index.php?cmd=detail&id=318145&search=1
Tree根的威力真係無遠弗屆，由佢開創嘅「子烏虛有」認真深入民心，就連零食店759阿信屋嘅母公司CEC(759)都受感染。早幾日網上謠傳阿信屋就快拉閘執笠，搞到公司要喺港交所(388)披露易刊登自願通告，強調肥主席林偉駿冇講過公司執笠，相關言論係「子烏虛有」，結果當然被人笑到面黃，仲話熟讀毛語錄嘅林老闆冇理由中文咁差。
結果CEC翌日再發另一張新通告認錯，承認擺咗烏龍，糾正係想講「子虛烏有」，仲要加多句深表抱歉結尾。呢單嘢只屬小事一宗，並唔係關公災難，老實講隔幾日好多人都未必記得，難得CEC肯火速認錯，抵讚。
或者你以為有錯要認好正常啫，咁都讚似乎有啲誇張喎？大家有所不知，其實好多上市公司通告都有唔少錯漏，有啲離譜到銀碼單位都寫錯，有陣時遇上係萬男認識的公司，都會多事開聲話畀公司高層聽，點知佢哋回覆根據港交所規定，如果要改正錯處，必須另發新通告，到時會令更多原本唔知出錯嘅人，反而留意得到，於是選擇唔理便算囉。
萬南 二五中環 青島控股按樓食大茶飯
1 :
GS(14)@2016-09-04 21:49:22http://www.metrohk.com.hk/index.php?cmd=detail&id=318145&search=1
啱啱政府公布私人樓宇售價連續攀升4個月，證明揸磗頭真係大有錢途，可惜好多上市公司揸咗一籃子物業只識收租，未有好好發揮磚頭嘅功效。但最近萬南發現青島控股(499)有料到，公布將太古城在內嘅一批總值8億幾嘅物業按畀銀行，套現咗一大筆錢，以備新嘅發展機會食大茶飯。
可能有人話上市公司要錢，大可伸手供股集資啫，但咁做會降低每股盈利，小股東未必Like，更何況而家按揭息口咁低，今個星期銀行更互相劈價，平到推出H加1.4釐按揭計劃，絕對係唔借呻笨格局，難怪有高人話青島控股財技頂呱呱，識得利用市場平錢幫公司錢搵錢。再睇公司大股東係青島市政府直屬投資公司，底子夠雄厚，市值卻只得區區5億，至於股價呢排已經築底企穩，中短期走勢不俗。
2 :
Clark0713(1453)@2016-09-04 22:46:28499 ?
萬南 二五中環 卓悅逆市擴張 翻兜旺角巨舖
1 :
GS(14)@2016-10-09 23:35:36http://www.metrohk.com.hk/index.php?cmd=detail&id=320727&search=1
早幾日遇到資深舖位投資者黎永滔，問佢點睇租務市場，佢估計最差時候應該已經過咗，開始有啲實力公司趁租金回落，重新物色靚舖擴充。就以佢旗下旺角MPM文華商場(圖)為例，對正朗豪坊入口，又喺港鐵站隔籬，人流旺爆，5年前由美國大型服裝連鎖店GAP以320萬天價承租地舖至2樓，點知經濟轉差，連GAP都頂唔順，決定提早走人，之後丟空咗9個月租唔出。直到最近，佢將地舖連一樓啱啱租咗畀卓悅(653)，地方總共8千呎，月租160萬。
原來呢個舖同卓悅好有淵源，租畀GAP之前，上一手租客就係卓悅。萬南問過卓悅老闆葉俊亨，佢大讚呢個舖位置唔錯，趁而家租金回落，等咗幾個月，慢慢等到租金由260萬，逐步回落至160萬，認為價錢合理，先至翻兜租呢個優質舖。
葉老闆原來同業主黎永滔好熟，以前租過好多黎生嘅舖，黎生亦好明白零售業難做，所以肯以較相宜價錢租畀卓悅。對於可幫股東慳到每月一球，葉生話總算有所交代，佢仲話人縮佢谷，遇到優質筍舖會繼續擴充，藉此可以令卓悅長遠發展更加健康。
萬南 二五中環 MDRT一哥 友邦「還拖」
1 :
GS(14)@2016-10-09 23:36:05http://www.metrohk.com.hk/index.php?cmd=detail&id=320727&search=1
上星期萬南寫兩大保險公司爭認係MDRT第一，引發業內大討論，大家睇完保誠(2378)廣告，包括萬南在內，都以為佢哋今年贏咗友邦(1299)，得到香港冠軍。點知友邦立即「還拖」，向各界澄清自己先係冧把溫，仲要搵埋美國MDRT總會投訴，並獲總會確認自己喺一哥(圖)。
萬南據聞呢單嘢仲有手尾跟，友邦似有其他動作做，例如要求保誠澄清等等，不過統統未落實。至於事件另一主角保誠，究竟點解會搶認第一呢？暫時未見有回覆，就連自己經紀都唔知點樣答客人，大家不妨買定花生吧。
Next Page