ZKIZ Archives


中環在線:揸鑊鏟唔怕炒ibanker轉行開餐廳 李華華

2009-01-12  AppleDaily


 

金 融海嘯投資銀行界首當其衝,裁員減薪不絕於耳。從事投資銀行工作13年的梁維君(Angela),雖然早於07年中股市興旺時已轉行,開其樓上餐廳,但依 然受金融海嘯冲擊,因食客減少而蝕錢。佢笑言:「o依家每日中午返嚟,睇吓多唔多客取消booking,已經知道嗰日個市升定跌。」轉行前,Angela 喺金榜融資做到資本市場部董事總經理。佢想當年話最好景係97年,淨係花紅已經等於3年薪金,但追deal(交易)、8日去10個國家做路演、同客戶周旋 等工作壓力,實在不足為外人道,加上覺得做投行其實冇專長,所以一直希望轉行。

98年曾開私房菜

Angela唔係飲食業初 哥,98年玩票性質投資第一代私房菜,之後又投資西餐廳,前年成功報讀一個管理中菜館嘅課程後,毅然轉行,一擲200萬喺上環開樓上fusion餐館 「twyst」,做全職老闆。「收到信話收我讀個課程時,我仲喺英國做緊路演,即刻打電話返香港,向老闆辭職。」認真有型!不過一開始就撞板。一間餐廳大 廚最重要。佢喺洲際酒店請咗5個師傅幫手打理餐廳。以為有品質保證,點知大酒店同小餐廳廚房運作完全唔同,酒店大廚只負責做菜,設計菜式同採購食材由其他 人處理,小餐館嘅大廚就要萬能。「當時位大廚淨係識煮,結果我要幫手買餸,其他嘅嘢都要我理!」佢苦苦支撐一個月後,炒咗5個師傅,重組班底,幾個月後, 餐廳終於有錢賺,成績理想。

海嘯殺到餐廳蝕錢

不過,金融海嘯舊年9月殺到,直接影響中環客源。Angela坦言10至11月 客量明顯減少,要蝕錢。好彩12個月有聖誕節撐住,恢復盈利。雖然經濟同生意前景唔明朗,但佢一啲都唔悲觀,仲打算主動出擊,「以前多數靠口碑,09年打 算設計個網站,利用電郵做多啲推廣,希望留住一班熟客。」Angela話:「最近見到舊同事,個樣好愁。如果o依家我仲做緊投行,可能好大壓力,唔係我要 炒人,就係要俾人炒!」佢慶幸自己離開呢個壓力圈,發展另一個事業,仲打算學做甜品,多一門技能。李華華[email protected]
 
PermaLink: https://articles.zkiz.com/?id=5253

中環在線:曹sir轉行揸鑊鏟 李華華

2010-11-05  AD

 


 

寫財經專欄寫到 發達、人稱「老曹」嘅曹仁超,自從宣佈今年底金盤封筆後,大家都好關注佢嘅去向,華華就覺得,佢個「勢」仍然咁好,就咁告老歸田咪好寂寞?所以應該會有啲 搞作,而華華嘅直覺真係冇錯!路邊社權威人士同華華講,曹sir將會摺高衫袖揸起鑊鏟,親自坐盤搞基金,最近佢仲周不時響中環四圍蒲揀office呢!

呢 單嘢華華自然要搵當事人求證啦!曹sir默認咗會搞fund做生意,咁係佢自己獨資定孖人夾份又或者幫朋友手呀?佢話要先賣個關子,事關o依家雙方律師仲 響度deal緊,條件仲未斟掂數,所以家陣仲未簽約,不過,開fund啲前期工作,好似租寫字樓同埋請人會密鑼緊鼓進行,但佢話唔想俾人知道佢底牌,暫時 都係神秘啲好,希望最快下個月可以成事、明年初開檔,目標梗係focus響中國大陸喇。

四圍揀office搞基金

以曹Sir叫座力加埋40年炒股經驗,佢一吹雞,大批擁躉會叩門畀錢,唔知個fund受唔受華華呢啲平民玩嘅呢?

橫 掂傾開偈,循例都問曹sir貼士喇!奉行「有智慧不如趁勢」嘅佢大派定心丸,估未來兩年港股仲係牛市:「聯儲局QE2擺到明要創造一個升勢,你睇淡友都要 轉軚,所以千祈唔好造淡!」而相對港股,佢更加睇好A股,「未來10年,中國消費市場會爆炸性上升,賺錢機會多的是……」大家收到未?

李華華


PermaLink: https://articles.zkiz.com/?id=19054

【母女對調3】阿女逆齡扮阿媽 買漏葱倒瀉湯搵唔到鑊鏟

1 : GS(14)@2017-05-18 02:14:52

母女調換身分,由女兒Jace洗衫抹地煲魚湯,陳媽媽笑言:「試過你就知味道!」

阿女逆齡扮阿媽 洗衫抹地煲魚湯

買餸、煲湯、洗衫、抹地,這些似乎是「係阿媽至做」的事,換作由平日衣來伸手、飯來張口的女兒負責,結果會怎樣呢?「我覺得會善後得好辛苦。」只見陳媽媽嘖一聲,反了個白眼,「會好混亂,要抹廚房,好辛苦咁做多次。」彷彿腦內已滿是女兒手忙腳亂快把廚房炸掉的畫面。陳媽媽雖非全職家庭主婦,家務卻由她獨自打理。她笑言丈夫和女兒Jace是「妲己」,「好似癱咗咁坐喺度唔郁!」於是,今次她藉着與女兒交換身份的機會,安排了三項任務給Jace完成,無非想女兒明白:「唔好成日倚賴阿媽啦,阿媽都好攰㗎!」



陳媽媽給Jace的三項任務,皆為她平日獨自負責的事。

第一任務是行街市買餸,媽媽提示要和檔主溝通,也可用平價買到靚貨。

第二任務是煲魚湯。Jace在廚房手忙腳亂,不禁慨嘆為何平時阿媽教煲湯時不聽書。

第一項任務是去街市買白鰂魚。陳媽媽邊寫任務紙,邊露出一抹「今次仲唔死」的奸笑,「咪以為好易啊,其實我都唔識揀靚嘢。去到街市要有禮貌同檔主溝通,佢哋就會幫你揀靚嘢。」Jace甫接過任務便一臉疑惑,「白鰂應該係魚吧?我連白鰂係點樣都唔知,試試吧。」平日甚少下廚的Jace,曾陪同媽媽去街市買餸,知道菜檔、魚檔的位置,中途雖忘了買葱,不過正職為主持的她發揮親和力,哄得菜檔主買薑搭條葱之餘,更從魚檔主那兒取得煲魚湯貼士,成功買齊材料,返家煲湯!不過廚房才是真正戰場,「我媽唔鍾意我行入呢個範圍,就算我會煮某啲餸,佢都會話:『你都唔識,等我嚟啦。』佢覺得我會搞到個廚房好混亂。」看來Jace確實了解媽媽的擔憂,而陳媽媽也確實了解女兒。只見Jace不但忘了買必備的魚袋,更倒瀉熱湯、弄掉番茄、被熱油燙到,在廚房內尖叫連連,「我媽見到咁樣應該會擰晒頭。」



第三任務是洗衫抹地,除消毒液似乎倒得太多,其他總算做得有板有眼。

Jace很了解媽媽口是心非的個性,「佢飲完魚湯一定好多嘢講,可能佢內心好開心嘅,但唔會係行sweet嘅路線。」

至於最後一個任務洗衫抹地,相比下似乎容易得多。陳媽媽投訴Jace經常更換衣服,卻不幫手清洗,讓她一日要洗兩三次,「好誇張!何況晾衫都係一門學問,所以等佢洗次衫,就唔會再換衫換得咁密。」只見Jace一手抽起洗衣籃,將衣服放進洗衣袋分類,似乎做得有板有眼。話口未完,她盯着消毒液沉思,低聲說:「唔理喇,就咁啦。」就直接把消毒液灌進洗衣機,盡顯豪氣。嗯,腦海裏已想像到那陣濃烈氣味。「叮噹!」是媽媽回來檢驗成果的時候。Jace把魚湯裝進暖水壺,原來這是平日媽媽為懶得翻煲湯水的Jace和爸爸常做的事,「佢煲好湯後,一係我哋即時喺屋企飲到,一係通常我都唔喺屋企,所以佢會裝入暖水壺,等我夜晚返到屋企用暖壺飲熱湯。」盛起熱騰騰的湯,撲鼻而來一陣魚鮮味。陳媽媽嚐了一口,初步給予正評:「齋飲湯唔睇過程都算合格,不過過程乾唔乾淨就唔知啦!」讓媽媽翻看過程,阿媽說女兒怎會用鉗煮魚,女兒反駁說找不到鑊鏟,阿媽沒好氣道:「你睇你幾愛呢個家,鑊鏟放喺邊都唔知!」你一言我一語,十足冤家打情罵俏,笑聲此起彼落,好不熱鬧。想起女兒事前預想媽媽的反應:「佢一定好多嘢講,可能佢內心好開心嘅,但唔會係行sweet嘅路線。」這次扮媽媽後,應該體驗到做媽媽的辛酸了吧?Jace卻搖頭稱否,「我做一次咋嘛,抱住玩樂心態,當然覺得好玩開心,但媽咪每日都做同樣嘅事,咁多年都係,我係唔會明白嗰種不斷重複做嘅辛苦。」女兒擔心自己和爸爸經常工作至夜深才返家,獨留媽媽做完家務看電視,讓她倍感寂寞。陳媽媽卻一臉不以為然:「OK嘅,我會自娛㗎嘛!」女兒的豪氣爽朗,明顯深得媽媽真傳。從前母親節,Jace甚少送禮,卻總會畫下心意卡一張,送給媽媽,陳媽媽開玩笑道:「係呀佢好孤寒㗎,送呢啲要使錢呀嘛。」Jace續說:「心意嚟㗎,有無搞錯。」媽媽遂認真道:「係,物輕情義重,好多人好羨慕。」今年母親節,有甚麼想和媽媽說的?Jace一手搭着媽媽膊頭,撒嬌說聲:「媽咪I love you。」媽媽點了點頭,仍是慣常的一臉冷酷,別過頭道:「得㗎啦,收到。」心裏應開出花來。記者:封愷瑜、鄧天蔚攝影:張志孟、蕭志南2017果籽繼續認真知味。識買惜用。行以求知。好事多為。重修舊好。緊貼果籽報道,即like:http://fb.me/AS.AppleDaily




來源: http://hk.apple.nextmedia.com/su ... t/20170515/20021452
PermaLink: https://articles.zkiz.com/?id=333418

【飲食籽】影星保鑣轉行揸鑊鏟 流動私房菜總廚愛被讚

1 : GS(14)@2017-11-05 17:32:30

梁浚銘(Leo)在2015年由保鑣轉行為流動私房菜廚師。

【飲食籽:識飲惜食】「係啊,我以前做過保鑣。」正在專心烹調美食的私房菜行政總廚梁浚銘(Leo)回應記者的疑問。雖然現年三十七歲的 Leo現已為私房菜行政總廚,但原來他曾經做過保鑣,更保護過不少明星。


梁浚銘(Leo)的廚師路,在2013年時曾亮起紅燈,因為經濟壓力,他不得不放棄當廚師,轉為收入較高較穩定的保鑣,「那時(做保鑣)真的很少機會下廚,當時我真係覺得失落,因為要面對經濟壓力,所以惟有咬實牙關做保鑣。」 Leo曾在2013至2015年間,擔任保安及保鑣工作,他憶述最難忘的,是曾保護過荷李活影星Titus Welliver,「電影《變形金剛4》來香港拍攝,我就負責保護Titus Welliver,當時經歷過一個好深刻的片段。」原來這件事,就是曾上香港各大報章港聞版的「《變形金剛4》土瓜灣再遇惡霸收陀地」事件。「有一間電器舖用雪櫃、洗衣機等攔住所有主要出入通道,我當時係第一個負責保護明星嘅人,我就推開啲雪櫃、洗衣機等物品畀明星入去,呢個時候,電器舖就問我拎錢(點解拎錢?)佢要我賠錢囉,話我推跌佢嘅雪櫃、洗衣機。」Leo回憶當時的情況說。由收入穩定的保鑣,轉做收入不穩的流動形式私房菜廚師,Leo表示,想找回自己的價值,「因為我覺得煮食物係會畀人欣賞,有個價值,我做保安、保鑣那兩年好沉悶,好多時都覺得自己係為咗份工作而工作,冇乜價值,唔會被人讚,我係好鍾意被人讚嘅,我煮食物出來,會被人讚喎,久而久之我就回歸廚師路。」

不喜困在廚房 收入跟做保鑣相若

開舖頭是很多香港人的目標或夢想,不過Leo卻堅持不會開餐廳,要一直做一個流動私房菜廚師,「因為開一間餐廳要困在廚房,我唔想困在廚房,正統廚房成日都趕住出餐,好少可以同客人交流,比較沉悶,我鍾意接受新挑戰同見唔同的人和事,所以比較鍾意流動性嘅廚師工作。」流動廚師,應該甚少人聽過,Leo因為一次機緣巧合,認識到MobiChef的創辦人,邀請他加入成為流動私房菜廚師,「我覺得流動私房菜廚師好大挑戰,可以畀我見唔同嘅老闆去接工作,所以我好興奮咁加入咗呢個平台。」大家係可以透過MobiChef搵各個不同的私房菜廚師,包括Leo。成為流動廚師,猶如一般的自由工作者,收入非常不穩定,「一個月梗係接唔到三十日啦,金錢上收入同做保鑣時相若,不過工作量可以自己調整,因為一般預訂我們都有十二人或者兩圍人的數目,而收費是以人頭計,所以我用數量去搭夠番一個job。」見識上,流動廚師確比傳統廚師多,Leo有一個非常誇張的經歷,「真係好震撼,去到一個地方,望埋去好似有幾萬呎嘅屋,有前後花園、泳池、停車場、籃球場、網球場,跟住屋企仲有成十個八個工人,當時係煮一圍嘅,但佢之後再叫我去煮就煮兩圍。」大家一定會很好奇流動廚師怎樣帶工具,如何準備晚餐吧,Leo說:「工具的話,我一般都會準備一個冰箱、小型拉車及自己用嘅刀,通常一定會拎食材,食材就係自己私人秘密武器,我仲會帶埋食用嘅花同一啲舊米,呢啲就係我嘅秘密武器,而準備時間,通常等得嗰啲,好似海鮮、菜,就要即場發揮,如果可以做定先,例如汁水,通常會做定先攞去,我多數會在出餐前最少三個鐘到達現場準備。」


任職保鑣時的Leo(左),右邊是《變形金剛4》演員Titus Welliver。

陳村粉蒸大閘蟹糕



查詢:https://www.mobichef.hk/採訪:黃希文攝影:劉永發(部份圖片由受訪者提供)編輯:陳慧玲



來源: https://hk.lifestyle.appledaily. ... e/20171102/20201315
PermaLink: https://articles.zkiz.com/?id=343815

【飲食籽】殘奧金牌劍手轉揸鑊鏟 每月一次客串煮私房菜

1 : GS(14)@2018-03-06 03:47:26

現在Ben每月一次在退休人士開的私房菜做客席廚師。左為「柴門」老闆Curly。

【飲食籽:識飲惜食】「我小時候第一個志願是做飛機師,第二個志願是做警察,傷殘原來是做不到,第三志願是做廚師,理論上做到,但實際上是很困難。」今年58歲的崔文輝(Ben)說。Ben在8個月大時確診小兒麻痺症,雙腿肌肉萎縮行動不便,加上脊骨彎曲症,令脊骨鑲滿螺匙及鋼枝。他曾經是游泳和劍擊港隊代表,在劍擊上拿過兩次世界冠軍,和一次奧運金牌,43歲退役後走上廚師這條路。

曾開過餐廳 為生計揸夜更的士

「廚師路有幾難行?首先不能出去打工,因為不會有人請你。」有冇嘗試找過?「冇!即等於做警察,我都可以嘗試去警察部,問他請不請我,但你知道是多餘。一般廚房設計是讓廚師站立工作。廚房又濕滑,我企不穩,所以一滑便好容易跌倒。」唯一方法便是自己開餐廳。「廚房設計到是最適合我的,好辛苦才找到可移動的高椅,坐上去和普通人高度差不多,較靈活,亦有助手幫忙搬運。」他舉例說:「普通廚師煲水,會將水放入煲內,然後整個抽起放上爐,我不夠力,只好先將吉煲放上爐,再逐次倒水。」私房菜經營三年最終結業。「我搞私房菜是想自己煮,他(合夥人)覺得我不適合入廚房,可能覺得我太麻煩,這樣合作已無意思。」現在Ben每月一次在退休人士開的私房菜做客席廚師,由於是老闆個人物業,無賺錢壓力。「柴門」老闆梁振剛(Curly)說,「現在他工作的桌子下面執空些,等輪椅可以埋到位,都是一些改動,純粹想與Ben以交流方式創作菜式,不會特別麻煩,每次做菜時都會預多些時間出來。」採訪期間,Ben正預備15人晚餐,早在三日前開始準備,客人中有不少曾是私房菜的舊客。客人Noble說:「拿金牌的人,意志力很強,無人阻到他,他總有些別出心裁想法。」Ben有一味自創菜式,叫「李察醬吞拿魚雞」。「我師傅曾經說過,如果你可以將一些普通材料煮得好吃,才是好廚師。像湯渣是食之無味,棄之可惜的東西,我便想可否用湯渣變成一道好食的菜式。」以煲過的雞髀肉拆碎混入特製醬料,吃落有吞拿魚的味道。「我的醬和XO醬有點不同,如果XO醬是高級白蘭地,有更高級的白蘭地叫『路易13』及『李察』,起名要改最架勢的名字。」醬以洋葱、蒜、蝦米、菜脯、辣椒、乾葱、瑤柱及指天椒,比XO醬香辣。「我不是正式師傅出身,到過不同國家比賽,吃過不同國家食物,如果好食,我會問侍應可否介紹廚師給我認識,從中學到很多菜式。」追求理想,亦要面對現實。「做夜更的士司機純粹是賺錢為生,每日約有1,000元收入。客人上車不知道我是傷殘人士,車有些改裝,像手掣拉上來是油門,按下去是煞車,以手代替腳踏。但相比起做私房菜,人家讚你食物好食,更有滿足感。」


香荽蝦餅,全蝦膠混入芫荽、蝦籽及蝦米粉。

Ben最拿手是整鮑魚,要花上三日時間整。

李察醬吞拿魚雞,以煲過的雞髀肉拆碎混入特製醬料,吃落有吞拿魚的味道。


香蕉松子仁乾果雪糕芝士餅,香蕉味不算濃,松子仁乾果很脆口。


示範餐單:蘋果雪梨蜜

李察吞拿雞配意大利式麵包泰過泰式豬頸肉配青檸辣汁香荽蝦餅黑松露田園沙律鮮人參竹笙乾貝螺頭燉湯鮑汁扣日本遼參鮑汁燜花膠花菇38頭皇冠吉品乾鮑伴四蔬墨西哥海蝦鮑汁撈蝦子麵香煎安格斯Prime牛小排香橙雪芭香蕉松子仁乾果雪糕芝士餅梅子水果印度奶茶12位起每位$988(加一服務費)


facebook: CmOn柴門記者:何嘉茵攝影:伍慶泉、鄧鴻欣、劉永發(部份圖片由受訪者提供)編輯:彭錦明



來源: https://hk.lifestyle.appledaily. ... e/20180305/20320459
PermaLink: https://articles.zkiz.com/?id=349342

Next Page

ZKIZ Archives @ 2019