| ||||||
左 丁山經營小型公司，收入不多，支出項目十隻手指數得晒，每年二月就可以將盤數交畀核數師核數報稅，但每年都要到八月初先至可以收到完整嘅核數報告。點解要 咁耐？理由甚多，可以數到嘅有：（一）核數師係中型會計師行，業務唔錯，每年核數以大公司、中型企業為先，我哋啲小公司排最後； （二）會計師行人手不足， 經常換人，新人又要問番、查番舊賬； （三）總有啲數目要第三者確認，如應收未收賬、應付未付賬，但因數目不大，第三者往往不大重視，確認需時。 好彩左丁山 一早心中有數，每年十一月已知一年生意賺蝕多少，核數師報告係正式報告啫，唔過時報稅交稅嘅話，就一於冇計用幾多時間先至可以「宣佈業績」。上市公司就唔 同，宣佈業績要限時限刻。港交所上市科主管在立法會對財經事務委員會講高調，話所有上市公司有六十間會計師行核數，已有足夠資源，保證上市公司如期宣佈業 績，假如公司可以提早宣佈嘅話，「延長董事禁售期」嘅影響不大，全年冇七個月禁售咁長。可惜冇議員追問： （一）上市公司有幾多間； （二）六十間會計師行之 中，四大（畢馬威、羅兵咸、安永、德勤）佔咗幾多成核數生意？有冇九成？其他五十六間是否只係陪襯物？ （三）四大會計師行有冇向港交所提供保證，如果佢哋 客戶全部要求在二月中宣佈業績，四大是否可以應付得嚟？據港交所統計，市值逾百億元嘅大企業之中，超過三成在年結後九十至一百二十日（三至四個月）先至可 以宣佈全年業績，中小上市公司之中，此比例接近八成，至於中期業績（不需核數），也在半年結後六十至九十日先至發佈。中國企業在港上市後清一色係由四大會 計師行核數（投資銀行界都知道，唔用「四大」會惹來更多監管人員嘅發問），而國企業務散佈全國，全部以十二月底為年結日，對「四大」嘅人力需求至為緊張。 一啲教授學者及港交所上市科以為延長公司董事禁售期可以鼓勵公司提早宣佈業績，不無「何不食肉糜」之嘆。 | ||||||
| ||||||
昨 日講到賓架C一位二十年前朋友因受馬多夫之害，在紐約自殺，其實呢位自殺嘅法國經紀投資顧問未必係為錢，而係為咗面子。有頭有面之貴族，重面子多於重視金 錢，尋死往往係向所有老友講一聲「對唔住」而已。 金融海嘯發生之後，歐美自殺之金融界高層不只一個，去年九月廿五日（雷曼於九月十五日破產）有一位 Kirk Stephenson，係一個對沖基金Olivant嘅營運總裁，因為雷曼就係呢個基金嘅主要經紀，基金嘅股票存放在雷曼，呢位先生受壓力太大，就揸車到 西倫敦白金漢火車站，等到火車到站，佢就跳落車軌自殺死咗。上一個月，瑞士著名私人銀行Julius Baer嘅行政總裁Alex Widmer自殺，銀行拚命解釋佢哋嘅CEO自殺與銀行業務無關。紐約與倫敦嘅銀行界不停裁員，已留意到員工嘅情緒問題，大銀行嘅人力資源部發現，男職員 受不住壓力，比女職員更具尋死傾向。 原因簡單不過，銀行界男士往往視自己為精英、叻仔、搵錢天才，特別係嗰啲坐在交易室嘅dealers或 traders（交易員），佢哋每日工作緊張，一兩秒之間就要決定追揸沽，而呢個決定可以影響銀行利潤，所以在好時年，佢哋覺得自己得到巨額花紅，為老婆 買靚鑽石，為自己買多架靚跑車，為家庭買多第二間、第三間住宅就係自己「才能」嘅證據。點知海嘯沖起千層浪，佢哋嚐到炒魷滋味，焗住要賣樓賣車，證明自己 係失敗者，面子非常非常難受。於是銀行在辦公室設立「Health Care Centre」，其實係心理治療中心，為職員服務，但好多男僱員唔肯入去，因為去咗就被其他人視為弱者，有見及此，銀行將「保健中心」搬到其他地方，但一 樣好難有男僱員預約服務。一啲職員話：「最大心理壓力唔係來自炒魷，而係唔知聽日、後日自己會唔會被炒？」等候裁員消息之時，心情往往最為複雜、惶恐。 | ||||||
| ||||||
校 友會舉行午餐例會，請校友之中嘅投資專家講○九年投資展望。去年一月例會之中，銀行投資總監A叫校友在下半年不要買股票，特別係要與本地銀行股講拜拜。當 時佢講得婉轉，因要避嫌，唔好畀人鬧佢唱淡同行也。事隔一年，大家知道了，總監A靈過鬼，可惜嘅係，有幾多人聽完之後會記得晒，而跟住行事呢？知易行難， 此之謂也！於是星期三之午餐例會，爆到瀉，近九十個校友湧至，馬主H又笑蝕。原來校友會午餐二十幾年前開始，由馬主H籌辦，已經收每位二百元，盈餘虧損都 歸校友會，但後來校友會議決交由馬主H承辦，自負盈虧，一辦二十年，每位餐費二百元歷久不變，以今日中環金鐘酒樓之價錢，主辦人當然係笑住嚟蝕。 點解唔加 價呢？超過二百元嘅話，新畢業校友覺得貴嘅嘞。總監A對校友，雖然講得含蓄，已經相當坦誠，一字記之曰「避」，避之則吉，今年風險因素太多。經紀K就從大 勢睇，話明年大市一旦升破萬六點，一於請君離場套現無失拖。點知當日股市上午已經跌，下午開市後繼續跌，星期四又跌，一萬六千點可望不可即，○九年升幅冇 晒咯。經紀K話今年之走勢會係L型，賺錢會好難。基金P發言，贊同經紀K之言。外滙經驗豐富之能源G話佢現在服務於能源公司，不便評論能源股，但以佢在紐 約、東京、蘇黎世等大銀行炒外滙之經驗睇，○八年之海嘯，破壞力空前，世界股滙市場一定唔會在幾個月之內就回復正常，太平無事，叫大家唔好輕信唱好言論。 到地產W出場，佢一樣唱淡樓市，認為樓市未見底，一定要到失業率升上至7%，破產潮，買樓撻定潮出現之後，樓市先會見底，到時慢慢揀貨都未遲。 馬主校友嘆 曰：「到時我哋仲有冇錢去揀貨呀？」地產公司大執董W立即出嚟補充，話佢以發展商角度睇，市道未必咁壞，認為有調整冇大跌！以上各位發言人士，都係財經界 知名人士，大都抱投資審慎態度，今年千祈唔好做清兵勇。 | ||||||
| ||||||
碰 到兩位女強人，都係管理商場嘅一姐。香港商場管理人之中，女強人特別標青，男士比唔上，阿姐多過阿哥。左丁山曾以此問過一位管理顧問（又係女士），佢話現 在管理大型商場，唔止物業管理咁簡單，管理人要識得捕捉市場潮流，人流管理，人流特點（旺角、中環、尖沙嘴之人流各有分別，品味不同），再從中領悟要點， 安排商場嘅客戶組合，租戶雖則以名牌連鎖店為主，但必須有一啲變化，避免千篇一律，否則行Ａ商場見到一批招牌，行Ｂ商場又見到同一批招牌，商場嘅吸引力持 續性未免單薄一啲，最後仲要不時動腦筋搞節目，迎合大事（如世界盃、京奧、萬聖節、聖誕節等等），以吸引區內外人士特別到商場一行。還有，有啲商場搞歐陸 feel，有啲搞日本主題，不一而足。 聽都聽到頭暈，管新型商場要日日動腦筋，特別留神在議員競選期間，叫啲老鼠放假，唔好出現，否則畀候 選人捉到一隻半隻，如鼠王芬咁，大做文章，商場公關部門就想喊咯，邊間商場夜晚關門後，冇老鼠蟑螂出現吖，左丁山都想知！管理顧問對左丁山下結論：「女士 心思縝密，識得睇細微嘢，而且購物人士以女士為主，故此商場老總係女士，一啲都唔奇，好自然啫！」 左丁山甚少行商場，某日 早放工，坐火車返屋企，趁有些少空閒，落車走入商場行一轉，幾乎做咗大鄉里，因為呢間商場經歷一場大裝修，間隔跟以前好唔同，連最熟悉嗰間麥當勞、佐丹奴 都唔知去咗邊。行行吓，經過一間時裝店，醒起老闆係一位校友，八卦心起，打電話問佢生意如何，銷售有無受金融海嘯影響，校友老闆話：「你想我點講？銷量以 價錢計，有微升，因為賣貨多咗，賣貨多，就因為十一月已經大減價，啲GP冇晒，你話我好定唔好吖？」一時之間唔識答，問佢何謂GP，佢話即係gross profit（毛利），GP冇晒，並非等於零，而係GP本來有七成嘅，現在得番兩三成或更低，咁就死火啦。左丁山聽餐廳羅講得多，餐飲毛利如果冇七成，要 冚到舖租、人工、水電煤就會幾辛苦！賣時裝嘅毛利得兩三成喎，純利會係負數啦，諗明咗，就明白校友老闆係咁呻呻呻。但商場業主根據佢哋嘅銷售增長數字，話 有加租空間喎！ | ||||||
| ||||||
新 的一年已至，回顧○八年，已經往事如煙，○八年係一九六七年暴動之後，香港人最驚心動魄嘅一年，比二○○三年沙士，一九八七年大股災，一九八九年天安門民 運，一九九七年金融風暴猶有過之。驚心之處，在於上半年一片好景，大家迷信北京奧運一定好，春天內地發生雨雪災，五月四川大地震，我哋仍然好鎮定，大力捐 輸救災，豪氣豪爽之至；點知京奧過後，踏入九月，美國帶起金融海嘯，兩個月之內，全球陷入衰退，珠三角工廠大裁員…… 到咗年尾，金融界仲未自雷曼風波脫 身，財經界就陷入「延長董事禁售期」之熾熱爭論，難怪經紀Ｋ對左丁山講：「我自一九七四股災中出道以來，到o依家歷盡股壇滄桑，可謂不虛此生。最好彩嘅， 就係仲未死得！」○八年怪事奇事大事之多，發生之快，令人應接不暇，透不過氣來。方七月初，高官請咗左丁山吃飯，傾通脹問題，講如何紓解小市民之通脹煩 惱，佢話本地內需太強，係通脹原因之一，點知到咗九月中，同一高官已經要講吓如何救市、刺激內需，前後兩個月，高官急急轉軚，誠始料所不及。新年期間，馬 場之內，見到一啲政界財經界大人物，講起○八年九月之後，無不苦笑，大家最怕講Hedge與Accumulator（對沖），記得去年七月油價高企之時， 某報社論大罵大公司管理高層收取高薪不知對沖，降低成本，逼市民接受高價。 好嘞，好多公司老早頂唔順高油價、高商品價、高航運船租，紛紛對沖，點知全部摸 頂，蝕到眼光光。現在啲高層管理人員提對沖而色變，講都唔敢講。反而一間巴士公司去年頂住高油價，猛咁蝕，但最近兩個月，油價大幅度回落，公司賺得滿意， 消息人士話：「全靠冇對沖！」世界上邊度有水晶球o架，只有事後孔明，香港啲議員最叻就係放馬後炮嘅啦。○八年做生意，有如賭一鋪，夠膽在七八月唔做對沖 者，年尾笑得最甜，一早依照書本理論，以為審慎地管理成本而對沖者，竟一敗塗地。世界上有冇公平呢回事？現實世界係冇嘅，○八年將一切傳統投資智慧推 翻，○九年係反思年，大家最好坐定定希望有錢剩。 | ||||||
| |||||||||||||
恒 生指數於一月二日開出紅盤，根據《蘋果日報》資料，過往十年之中，每逢年初第一個交易日嘅升跌，可以預測該年恒指嘅全年升跌，十年有八年準確。呢啲預測當 然冇乜科學性，就好似美國股市根據每年一月尾「超級碗」決賽結果而預測升跌咁樣，不過你唔好理，準確性係有啲嘅。左丁山夠以為買騎師王就買韋達得啦，點知 連輸三次，搭沉船。有時睇見人哋講得幾準，自己攞錢落去跟風，就會立即損手損腳，人哋就係啱啱呢次唔準，冇得解釋。在馬場碰到過年後就回家休息嘅經紀 A（今時今日，大家都知道股市經紀回家休息一輪，充吓電先，係邊一回事）。 經紀A話自己有時間刨馬兼專心做散戶玩即日鮮，so far so good喎，希望佢全年都掂啦。經紀A畀貼士左丁山：「嗱，既然買韋達熱門都輸幾勻，你不如博一博買八號仔，有得諗o架。」八號仔？不禁嚇咗一跳，願聞其 詳。經紀A話：「我o依家係散戶一名，要冒吓風險，賺取差價。憑自己獨立分析，發覺現在有機會做arbitrageur，就係八號仔嘅私有化價錢係四元五 角，提價後講明鐵價不二，冇得再加，但一月九日之收市價仍然係三元七角二仙，差價達七角八仙，如果我以三元七角二仙買入，以四元五角賣畀收購方 （offeror），咪賺硬21%，今年○九年全年玩股都未必賺到21%呀！」 佢一輪嘴講完，左丁山消化幾分鐘之後，立即反問：「唓，邊有咁大隻蛤乸隨街 跳o架，如果市場估計電盈私有化實掂，根據有效率市場理論（efficient market），八號仔股價應該已經升到四元五角減除利息成本，即係應該在四元或以上，但o依家仲係做緊三個七毫二，即係市場話私有化機會比較低啦，你因 住買入之後，徒勞無功，仲可能輸突。」經紀A立即講出一套數字支持佢嘅立論，話八號仔值博率高過買韋達做騎師王，明天再寫。 2009-01-13 AppleDaily
| |||||||||||||
| 2009-01-20 AppleDaily | ||||||
上 星期一、星期二本欄經紀A講交易套利，就係買定電盈（八號仔）股票，轉名後就在二月四日出席股東特別大會，贊成私有化，賺取股價差額。當日之差額係七毫 八，與私有化價格比較，可賺21%（未計交易費用）。點知道，又有咁啱嘅，上星期一德意志銀行出咗一個報告，推介買入電盈，唔知係唔係咁樣，電盈股價逐漸 攀升，上星期四去到三元九角二仙，創兩個月新高，於是股價與私有化價格嘅差額縮窄至15%左右。 經紀A打電話嚟埋怨：「你 寫嚟做乜呢，隻蛤乸冇咁肥咯。」點關左丁山事呀，德意志係大行，人哋有影響力至真，況且德意志嘅客戶以機構投資者為主，話唔定啲基金睇完報告，大手買入 呢。問經紀A：「究竟電盈成交額多唔多o架？」經紀A話：「我當然有研究啦，你估盲目買入嘅咩。現在搵呢啲數字好易嘅啫，上網就可以搵齊，據我記錄低，由 雷曼破產，電盈股價大跌計起，即係話電盈股價一路低於四元嘅成交額，累積去到近二十億九千一百萬股，都幾多o架。睇番私有化文件，電盈小股東持有近三十五 億股，大股東持有餘下股票，大股東既然要私有化，一定唔會賣股，加加埋埋嚟講，粗略啲可以話近六成二街外股票已經易手，其中有冇叻人低買高賣，我唔識計， 但以常理猜度，買入呢六成二街外股嘅投資者投機者，無論散戶或基金，都會在股東特別大會投贊成票啩？ 如果通過私有化，大家就立即有錢賺。如果唔通過，電盈 股價跟大市波動而下跌，咪全部坐艇？你估會開邊瓣？」純粹計數，呢批在四元以下，多數在三個幾買入電盈股票嘅投資者，投票取向應以贊成為主，唔似同錢鬥 氣，但係呢個年頭怪事頻頻出現，唔敢猜度電盈私有化之結果。意想不到嘅滙豐股價大跌特跌，美國銀行股價大跌，都會發生，加拿大最大電訊設備公司 Nortel Networks竟會破產，股價由二○○○年科網股泡沫期嘅加元1,245跌到一月十四日之加元0.12元（跌咗99.99%），總市值由高峯期之三千六 百六十六億加元縮到剩番一揸沙，啲聰明人有冇辦法預計得到？ | ||||||
| ||||||
昨 日講加拿大公司Nortel Networks Corp.之慘情，資料來自彭博通訊社。彭博報導，Nortel（譯作北電網絡）申請破產保護令，震驚加拿大，傷盡加拿大人之心靈，點解會咁樣呢？原來北 電係北美洲最大之電信設備製造商，在二○○○年，每年營業額高達二百八十億加元，僱用九萬三千名員工，在全球一百五十個國家有生意據點。咁大一間公司，堪 稱巨無霸，喺一九九九年，北電股價升咗四倍，到咗二○○○年，股價（經調整股價分拆後）高達一千二百四十五加元，總市值達三千六百六十六億加元， 因為咁 大，北電一隻股票佔咗多倫多交易所三百綜合指數嘅三成七，令加拿大基金經理大感頭痛，呢隻股咁大市值，比重咁高，唔買唔得，如果唔買，會俾投資者痛罵，但 係另一方面，加拿大法律禁止股市基金買入任何一隻股票嘅比重超過基金資產嘅一成，咁就煩啦，如果基金買入嘅北電佔基金資產5%，但北電佔指數37%，咁北 電繼續上升嘅話，基金就一定跑輸大市。點知科網股爆破後，北電股價如江河日下，直至最近申請破產保護令，股價跌到加元十二仙為止。北電股價大跌，令所有加 拿大基金、退休金損失慘重，對加拿大人之影響，遠遠嚴重過電盈股價下落對香港人之影響。現在知道，北電在一九九九年做假數，誇大銷售額，操控二○○○至二 ○○三年之盈利，曾被美國證監會罰款三千五百萬美元，此外又在九九年與二千年盲目併購Bay Networks（六十九億美元）與Alteon Web Systems（五十七億加元）。 北電之管理層既無能力，又做假數，昧於科網發展形勢，其敗固宜。香港人往往責己嚴，崇洋寬，成日話外國制度好，外國監管 好，外國公司誠信比香港好，所以香港監管制度要更加嚴，要延長禁止董事買賣股票期真係搵嚟講！加拿大一間所謂世界級公司，原來金玉其外，敗絮其中，加拿大 證監會又曾做過乜嘢事？加拿大人持有北電股票者，完全蝕清光。香港好彩，仲未見有一間衰到咁嘅藍籌公司。 | ||||||
2009-01-22 AppleDaily
| ||||||
上 市公司主席K請吃晚飯，地點就在佢嘅集團屬下酒樓，招呼自然周到，如果我哋自己去都有咁高水準，真係非幫襯不可。主席K對上市規例極為熟悉，律下屬甚嚴， 曾分拆業務上市，當時佢下令IPO之前及之後嘅六個月，即係成年咁耐，董事局成員與管理高層都唔准買賣公司股票，而佢哋嘅業績發佈期當然跟足港交所要求。 既然係咁，港交所上市委員會之「延長董事禁售期」措施，對主席K集團全無影響，但主席K聲言反對到底，究竟為乜？主席K講：「為咗原則而已，上市公司董事 亦有買賣股票權利、不容剝削。紐約與新加坡都冇如此禁售期條例，要求上市公司董事自律而已。港交所上市委員會不受港交所董事會管轄，係一個獨立王國，自己 訂出一啲超越倫敦紐約嘅條例，不管上市公司反對，令人不平則鳴。嗱，講諮詢，反對意見多過贊成意見，你哋上網可以睇到反對嘅公司呈交好多理由，但贊成嘅公 司以中資為主，全部只係Yes而無陳述理由。我問過一間中資公司高層，為何贊成，佢話中國公司唔可以反對政府，佢以為港交所上市委員會就係等於港交所，而 港交所就係政府！」 大家聽到，為之噴飯，中國企業即使來到香港上市，仍然緊守不能反對政府之原則，十分愛國。反對派雖然多過贊成派，上市委員會就話反對派 了無新意，抹去不提，只聽啲淨係識「Yes」嘅意見，怪事也。主席K又話中資公司好鍾意諮詢文件第十七條，就係允許上市公司董事會內不須硬性規定有一個會 計師，中資公司最難搵到合資格會計師做董事，故此全部贊成第十七條諮詢議題，但又恐怕反對其他諮詢，會節外生枝，故此順便全部都贊成埋。好多嚴肅事，講明 內情就得啖笑！主席K話以延長禁售期嚟「威逼利誘」上市公司縮短業績發佈期完全係多餘，如果要達到預期效果，何不正式縮短發佈期至三個月之內，等啲核數師 做到失魂！ | ||||||
| ||||||
主 席K嘅公司嘅核數師係四大會計師行之一，之前呢間大行有人對記者講，話如果實施延長董事禁售期，佢哋可以為上市公司做快啲，縮短業績發佈期。主席K請食飯 之時同我哋講：「我同核數師合夥人好熟啫，我同佢講過有冇辦法縮短我哋集團嘅業績發佈期，佢面有難色，話要小心策劃先至得，你估真係話咁易咩！」對記者講 咪易囉，叫下屬開OT唔好返屋企都幾易啫。 肥仔K有位同學讀完會計系就入咗D行，年幾前辭職不幹，做咗警察幫辦，對肥仔K話：「I want my life back!」香港會計師行目前根本唔夠人，做多啲IPO就要壓榨員工工作時間，如果他日真係實施縮短發佈期，核數師行為咗生意，自然乜都話得，但啲夥計做 到面無人色，睡眠不足，冇時間拍拖，就完全冇人理。有埋季度報告嘅話，會計行業更係健康高危行業，醫療保險費要畀多啲。好多人盲目追求要提高公司透明度與 高效率，殊不知高透明度與高效率嘅背後代價就係會計與核數人員嘅身心健康，呢一點相信坐在電腦前寫稿批評他人嘅David Webb唔會理會嘅。 主 席K指現時上市公司董事買賣股票數量不多，港交所都話總額少於市場總成交之百分之零點七，微不足道，對股價毫無影響。加上董事買賣，申報甚嚴，倘若與股價 敏感消息有關連，一定受質疑，水洗不清，而涉及內幕交易嘅話，更會被刑事檢控，會坐監。用延長董事禁售期嚟阻止董事內幕交易，根本不合邏輯。 為 今之計，主席K認為港交所總裁周文耀提議合理，就係將季度業績報告、禁售期與縮短發佈期三者一同向市場諮詢，等各方面都有下台階，免政府難做。左丁山話， 可惜吖，周總裁對上市委員會毫無影響力，委員會內啲洋人唔聽嘅話，佢都冇符。關於季度業績呢件事，次按風暴發生後左丁山在《金融時報》評論版已睇過唔少英 美專家批評季度業績逼使啲CEO短視，董事會為短期（一季）業績而迴避長期改革。人哋睇出發佈季度業績之不良後果時，香港就話照抄，何其淺見也。 | ||||||