萬南 二五中環 金融界組團 北上睇NBA
1 :
GS(14)@2015-10-18 23:19:04http://www.metrohk.com.hk/index.php?cmd=detail&id=293185&search=1
好多香港人鍾意睇NBA，但現場睇就未必有機會，難得上星期日快艇同黃蜂兩隊深圳打季前熱身賽，再加上籃球之神佐敦兼黃蜂班主都有到，所以門票晨早賣晒，情況就好似Madonna演唱會飛咁一票難求。
萬南有個上市公司老闆，怕且都係炒十幾張靚位門票返，預埋小弟上去睇，張飛面價都要三千幾銀人仔，可能好多觀眾唔熟NBA規矩，所以大會透過熒光幕介紹打法，感覺相當奇怪。
萬南入到去四圍望，發現唔少財經演員聯同幾位上市公司老闆齊齊上睇波，感覺就好似喺中環咁不停撞到朋友。講番場波，因為有靚仔華人林書豪在陣，每逢佢出場，零舍多女粉絲狂叫，而佢老闆佐敦更勁，包括萬南在內好多粉絲見到佢同觀眾揮手，已經開心到飛起。
萬南 二五中環 陸羽夥計利是和味
1 :
GS(14)@2016-01-10 17:35:01http://www.metrohk.com.hk/index.php?cmd=detail&id=299738&search=1
唔少生客去陸羽飲茶，都有類似嘅經驗，地下夥計趕你上一樓，點知一樓叫你去二樓，二樓又推番你落地下。因為陸羽地方有限，飯枱梗係留畀貼士好疏爽嘅熟客啦。萬南有次農曆新年同大老闆去食飯，親眼見識到佢點派利是，除咗全部侍應永不落空，洗碗清潔工都輪流出嚟講恭喜發財，嗰刻先知道陸羽原來有咁多夥計。
萬南突然講陸羽，因為今個星期有單案完咗，所以先至放膽講，話說陸羽有位前會計，非法收供應商回佣兩年幾，金額多達一球以上，竟然無人察覺，後來良心發現自爆出嚟，最終判監兩年。件事喺陸羽茶客早已有傳，大家笑言原來陸羽回佣咁和味，更議論紛紛點解冇人發現，睇嚟第三代傳人Tony都要返多啲舖頭坐鎮咁話喎。
萬南 二五中環 樓神幼園生 齊齊去旅行
1 :
GS(14)@2016-01-18 02:16:07http://www.metrohk.com.hk/index.php?cmd=detail&id=300279&search=1
嚟到1月中，好多老友終於放完新年長假正式開工，飯局先至算係齊人。操盤搵食嘅A君就同屋企人去咗幾轉旅行，諗住叉足電先返香港掃貨，結果避過1月初大冧市，要劏雞還神咁話喎。A君話今個長假之中，有個Trip好特別，係跟讀維多利亞幼稚園K3囝囝學校坐郵輪去台灣旅行。
由於A太專心湊仔，A君唔多理家庭事，心諗咪又係普通遊學團，上到船先知原來學校慶祝50周年，包全球第4大郵輪「海洋量子號」，可以容納4千幾人，足以畀所有學生同家長一齊去旅行。至於旅費就有平有貴，由幾千蚊到十幾萬都有，對於畀仔女讀維多利亞家長講，濕濕碎啦。
A君話5日4夜郵輪上，日頭大家就同自己細路玩，到咗夜晚大人未，就船上困獸鬥自己搵節目，佢話估唔到長實地產(1113)執董「樓神」趙國雄(圖)都船上。而佢自己亦都同好幾位家長傾到熟落，其中有兩位係專業人士，更應承畀嚿錢佢做投資，令到佢呢個旅程喜出望外。
萬南 二五中環 上市公司離奇失竊
1 :
GS(14)@2016-01-18 02:18:26http://www.metrohk.com.hk/index.php?cmd=detail&id=300279&search=1
中國投資基金早前(1216)自爆有人涉嫌挪用公司3千萬人仔，星期三終於復牌，結果即日喪插接近兩成，好多散戶當堂變蟹。有做開核數嘅老友話，而家上市公司愈來愈多古靈精怪招，睇少眼都隨時出事。就好似有間呢兩年上市嘅家品公司為例，幾年前高薪請咗呢位老友去睇數，負責整靚盤數申請上市，但做落發現好多問題，照簽分分鐘入赤柱坐幾年，決定早閃早着，留呢個機會畀肯博嘅人上位。
講開啲古靈精怪招，近期爆出股東決裂嘅山水水泥(691)(圖)仲離譜，公司上個月罷免一班董事之後，新進場嘅管理層自然第一時間去公司查數啦，點知搵勻全公司都唔見咗部分數簿及公司印鑑，新管理層覺得唔妥，向幾位被罷免董事查詢又冇正面回應，於是向警方報案，據聞警方會從有人偷數簿角度展開調查。
萬南 二五中環 恒隆請秘書 要似范冰冰？
1 :
GS(14)@2016-01-24 22:56:01http://www.metrohk.com.hk/index.php?cmd=detail&id=300839&search=1
恒隆地產(101)老闆陳啟宗(朗尼)，一向講嘢相當風趣，舊年以藝人范冰冰(圖)嚟形容旗下內地商場有幾咁高質素，今年再接再厲，再加埋荷李活型男畢彼特落去，大讚佢嘅場似足范冰冰同畢佬咁正，即使內需唔多掂，都唔愁冇租客。
其實唔單止朗尼陳冧范冰冰，好多內地公司嘅老闆都係佢嘅粉絲，早排萬南去上海見客，老闆帶咗一個秘書及一個私人助理出嚟食飯，佢哋係戴黑超，着到似藝人多過行政套裝，睇真啲真係有幾分似范冰冰。
老闆後來講笑話，依家內地好流行請「范冰冰」做秘書，咁先代表有頭有面，做嘢得唔得反而係其次，正式唔打得都睇得。佢問我香港有錢佬興請邊類型秘書，我答中女居多，佢差啲噴酒呆咗。
萬南 二五中環 新煮意陷 息魔陷阱
1 :
GS(14)@2016-01-24 22:56:33http://www.metrohk.com.hk/index.php?cmd=detail&id=300839&search=1
有睇開本欄，都知萬南頻頻「關注」新煮意(8179)呢間公司，在下唔係同佢哋有仇，相反更不時幫襯旗下酒樓季季紅(圖)食有米豬，記住係去藍地總店，比其他分店好食多多聲。新煮意舊年股價勁插水，依家公司市值跌剩只得兩億，證明股東用腳投票，唔妥佢哋兩單收購同業發記及十八座狗仔粉嘅刁。
新煮意上個月底配股，伸手籌咗2,700萬，以為會用嚟擴展生意啦，點知一個屈尾十，竟然花咗大半呢筆錢炒股，上月底開始密密掃建行(939)，點知一買即跌，愈跌又愈買，最終累積用咗超過1,500萬掃咗3球建行，平均買入價每股$5.02，暫時帳面已經輸咗百零萬，唔知要賣出幾多萬隻有米豬，先賺得番呢筆數。
又或者你會話買建行係大藍籌，現價又有8厘息咁高，相當吸引喎。但萬南依然認為新煮意不務正業，尤其係啱啱先問股東攞錢，要買建行，散戶唔識自己買咩？再講，8厘息係假設今年派息會維持不變，不過舊年內銀生意難撈，盈利能力肯定大不如前，萬南夠膽人頭博芋頭，今年內銀肯定會削減派息，結果買內銀就好似跌入息魔陷阱，最終愈買愈多中伏。
萬南 二五中環 一早沽清人仔 I.T前CFO終平反
1 :
GS(14)@2016-02-09 02:55:30http://www.metrohk.com.hk/index.php?cmd=detail&id=301916&search=1
藍籌股恒隆地產(101)上星期公布咗份麻麻哋嘅業績，全年純利倒退57%賺51億，其中一個原因係人仔貶值，令佢哋出現44億元匯兌虧損。人仔不停咁跌，老實講好多喺內地有資產嘅公司都捱打，相信3月業績期陸續有類似慘輸人仔個案出現。
舊年8月人仔開始跌，I.T(999)率先宣布將12億做開定期嘅人仔斬纜，換番做港幣，造成一次過虧損6千萬兼發盈警，當時被外間鬧爆，仲傳I.T嘅CFO曾慶㓋(Eymon)被祭旗因而下馬。如果而家睇返轉頭，Eymon真係硬食呢單嘢，事關公司決定做人仔定期，早喺佢14年上任前已經開始。
再講，Eymon斬䌫人仔嘅時機，其實靚到無得頂，當時人仔突然單日大幅貶值2%，之後再陰啲陰啲咁跌，相比依家又再跌多咗5%，換句話講已經幫I.T.輸少3球。有熟Eymon朋友話佢為此都走得唔多愉快，不過依家心情平復，仲返咗新工添。
萬南 二五中環 私有化恒地？ 四叔梗No way!
1 :
GS(14)@2016-02-09 02:55:56http://www.metrohk.com.hk/index.php?cmd=detail&id=301916&search=1
呢排有大行出報告，吹四叔李兆基有機會私有化恒地(012)，消息一出即刻股價炒咗上去，但據經常喺大有錢佬身邊田田拍馬屁為生嘅人認為，寫呢份報告嘅分析員一係想搵個理由炒恒地上去，如果係咁就係醒目仔，否則佢只係讀死書計死數嘅人，完全唔明大孖沙嘅心態。
馬屁高手認為，四叔私有化恒地機會係零，因為呢間係佢嘅旗艦，冇咗市值過千億嘅公司，大孖沙會覺得好無面，更加有可能令到佢哋打唔入國際性嘅富豪榜。
話畀大家知，其實好多有錢佬好鍾意睇富豪榜，更會叫秘書儲起呢啲雜誌。馬屁高手仲話四叔就算想私有化，系內仲有大把公司畀佢㨂，總之一定唔係恒地，而呢一個邏輯，亦適用於其他大孖沙，「肯肯定」唔會搞旗艦公司。
萬南 二五中環 「槍手」太認真 純官一頭霧水
1 :
GS(14)@2016-02-29 02:48:06http://www.metrohk.com.hk/index.php?cmd=detail&id=303268&search=1
香港過千間上市公司，每年年報例必要撰寫主席報告，但萬南相信少過百分之一係由主席親自撰寫，通常都交由IR做槍手代筆，所以行文千篇一律，照單執藥，唔少Hea做槍手更認為反正冇乜人會睇，索性攞番舊年份報告出嚟，更新數字同頭尾幾句又循環再用。
正正因為咁嘅原因，上星期有傳媒發現新世界(017)新鮮出爐主席展望，純官以大文豪歌德名句「生命當屬生存者所有，生存的人應為改變時刻做好準備。」於是好奇問純官引用呢句，點知佢一頭霧水，經職員一番提場，先尷尬話唔係佢親自寫，係公關照大約意思搞的。
若果要親自撰寫主席報告嘅大孖沙，一定係恒隆地產(101)主席陳啟宗，每年閉關嘔出來，所以閱讀性最高；紅籌中信(267)主席常振明亦都有鋪執筆癮，更以自己耍家嘅圍棋比喻經營環境。至於細價股之中，包浩斯老闆黃銳林更曾做過老師，寫得一手好文，曾經寫「(本公司)既已跨出第一步便絕無退縮之理，我們志比天高而明乎千里之行始於足下。」可能黃生近年較忙，已搵人代筆居多。
萬南 二五中環 財爺Fin tech 真．貼地
1 :
GS(14)@2016-02-29 02:48:30http://www.metrohk.com.hk/index.php?cmd=detail&id=303268&search=1
財爺曾俊華(圖)新預算案出街，派糖減稅唔再多講，單係佢話鼓勵業界研究Blockchain 技術應用喺金融業，已經夠畀一百個Like佢，證明財爺堅貼地。好多人對Blockchain一頭霧水，呢種技術已經喺比特幣運行咗一段時間，好多投行早已知係好嘢，紛紛搵人開發研究。
簡單啲講，大家現時用信用卡簽帳，簽完之後發卡銀行同商戶所屬嘅銀行都要搞一大輪認證先可以對到條數，交易平均要幾日先可以完成收款，當中耗用不少人力資源從中處理。但如果用Blockchain的話，高手話只需幾粒鐘便可完成交易，銀行慳番好多，屬於破壞性創新，足以推冧好多舊科技。
Next Page