📖 ZKIZ Archives

像我這樣多疑的人 人在中環

http://manincentral.blogspot.com/2012/05/blog-post.html
三色台晚上播《三國》，係最近我每晚必追既劇集。

我算係個《三國》迷，同好多朋友一樣，愛上《三國》係因為打機。KOEI公司出既三國電腦遊戲，係我自己其中一個最重要既少年回憶。

然而細個讀《三國》，係為左方便自己打機。但係同一個《三國》既故事，長大之後透過各種媒體，不斷番睇又番睇，每次睇完，都有一d新既領會。特別做生意之後，自己成為左老闆，商場如戰場，對故事各個情節既感受，就更深。

*****

人總是敗給自己

早幾日，我響我老豆屋企食宵夜吹水。電視機剛剛播緊《三國》。老豆指住個電視話：「仔，你睇你，你同阿曹操一樣呀，多疑到死呀。」

我老豆同我性格好唔同。我老豆係個「賭徒」，做人永遠係一鼓作氣向前衝，打死罷就果隻。我就剛剛相反，做事總係左諗又諗，懷疑下呢樣又懷疑下果樣。 老豆嫌我做人多疑，佢講左好多年，佢話終有一日呢個多疑既性格會害番我自己。

曹操係大野心家，而且智慧過人。我都想好似佢咁，有咁既頭腦同識見。不過我反而記得戲裡面曹操曾經咁樣評價過自己：「成也多疑、敗也多疑。」

「多疑」這種性格特質，我估一般人都會認為係一個「有問題」，又或者係負面既性格特質。然而我卻傾向覺得，「多疑」本身並冇特別屬於正面或者負面既本質， 問題在於你點樣去運用呢一個性格特質。事實上，我覺得人總係喜歡斷章取義，習慣將不同既性格特質粗疏地定性為「好」與「壞」 ，但事實卻並唔係咁樣。絕大部份既性格特質，本質上其實都係「中性」，冇所謂好、壞之分。只係不同既時間，不同既場合，不同既運用方法，同一個性格特質， 會引發出南轅北轍既結果。像「多疑」，提起呢個特質，總係讓人諗起「唔信人」、「冇親信」、「孤寡」得結果，但「多疑」的人做事通常小心謹慎，而且凡事都 會做出許多不同的假設，好讓自己有多手準備。 我是個自認多疑既人，呢個性格特質，響過往既日子裡面讓我嘗過唔少甜頭，同時也因為同一個性格特質，讓我輸過唔少。是好是壞，講唔到既。

有些人喜歡叫人去「改掉」某些佢地歸類為「唔好」既性格。我有時覺得荒謬，查實，性格可以「改」既咩？我其實就唔係好相信。但係成長既過程，不斷累積人生 經歷，運用同控制自己性格特質既能力，卻會隨之而增強。或者咁講，我唔相信，當我人生閱歷越黎越多既時候，我會由一個原來好多疑既人，忽然變成唔再多疑。 但係幾時要「格外多疑」，幾時可以稍稍放鬆一點，憑住經驗，會掌握得更加得心應手。又或者當我又再疑神疑鬼既時候，點樣處理自己既心情，會更得懂得自我調 節。

人總係喜歡敗在自己既性格手上，特別係果d曾經為你帶來成功既特質。點樣好好運用，點樣收放自如，大概係一生人都學唔完既學問。

不道德的boot 人在中環

http://manincentral.blogspot.hk/2012/06/boot.html
響公司茶水間見到IT部既David：「喂，光仔仲未病好牙？仲未返到工？」

強國三天賤男遊 人在中環

http://manincentral.blogspot.hk/2012/06/blog-post_09.html
到強國出差，旅程只是短短三天，卻接連發生了三件讓我印象深刻的事。

Day 1

到步後到酒店Check-in。Front Desk前有一位二十出頭，樣子漂亮既女孩子。女孩子一身名牌裝扮，挽住個值十萬以上既手袋，同酒店既職員理論。

酒店職員同佢講，酒店既房租以經好耐冇俾，所以佢地唔可以再俾呢位女孩子番入去住。

女孩子聽完之後，發晒爛渣，所表現出黎既態度，跟佢一身富貴既裝扮，形成好大既對比。

女孩子打左個電話，大概係打俾佢「男朋友」。

女孩子跟電話裡面既「男人」話：「如果你今晚都唔幫我交房租，我今晚就去揾你老婆，將我地既關係爆俾佢聽 。」

「爆我地既關係都不特止…」女孩子越講越火滾：「我仲會爆埋你同你秘書既關係俾佢聽…」

女孩子鬧得越黎越大聲，酒店lobby裡面既人都被佢既聲線「吸引住」。

「仲有我個妹呀！」女孩子的情緒近乎失控：「你唔好以為我唔知你搞過我個妹呀！佢一早同我講晒啦！」

我心裡計一計數。電話裡面果位男仕，首先係自己既老婆，跟住係果位響酒店「被拖欠」房租既女孩子，然後係男仕自己果位秘書，再跟住仲有果位女孩子既妹妹，同一時間，一共四位，剛好湊夠一檯麻雀。

「先生，你既房間準備好。房間在12樓…」Front Desk既職員跟我說。

我轉身離開酒店大堂上去自己既房間。心諗，如果我既check in手續辦得再耐一d，會唔會聽到仲有第二檯麻雀出現？

*****

Day 2

響酒店訓既第一晚，睡眠質素奇差。

第二朝一早， 約左當地既律師有事要傾。見面地點響佢地既律師樓。

我跟律師在會議室內開會，忽然聽到出面傳黎兩把聲撕力竭既女聲在爭吵。

我從會議室既玻璃窗望出去，看見了一對中年夫婦，跟一個年輕既女人在爭吵。

中年男人指住那位年輕女孩子，然之後跟自己既太太說：「老婆，真係唔關我事架！係呢個女人勾引我之嘛！」

太太聽完這句話，就二話不說地一巴冚落年輕女孩子的臉上。年輕女孩子自然也不甘示弱，也回敬了一巴。情況一發不可收拾。兩個女人於是乎就打起黎，又扯頭髮又拉衫。坐響會議室內既我，以為自己響度睇緊女子泥漿摔角。

我問跟我一起坐在會議室的那位律師，到底發生甚麼事。律師答：「果位年輕女孩子係我地本律師樓既職員，亦都係果位男仕既二奶。今日大概係果位男仕，帶埋太太上黎捉小三吧。」

律師的語調很淡然，一副見怪不怪既模樣。我則聽唔明白：「一個男人帶住自己個老婆，去捉拿同自己有染既二奶？」

兩個女人響律師樓既reception大打出手，惹來律師樓既職員紛紛離開自己既工作崗位，走出去圍觀。強國既特色係，逢親有呢d「大事」發生，總會惹黎一大班人剝住花生圍觀，但又冇一個人會行出黎勸交。

至於果位中年男人，響自己既大婆同二奶開始埋牙摔角之後，佢就斯斯然咁坐響reception旁邊既梳化上，翹起雙手，面露微笑，跟圍觀既律師樓職員，一齊「欣賞」呢一場摔交。

*****

Day 3

酒店既冷氣太凍，我將佢調到最細，但室內既溫度依然凍到好唔舒服，害我又再多一個輾轉反側既晚上。

早上起來，返到去自己響國內既辦公室，同當地既GM見面開例會。

GM向我匯報左近一個月，公司所發生既事情。

最後一件匯報既事，係男同事A被開除了。

「點解會開除男同事A?」我問。

「因為女同事B、C、D都不約而同向我投訴，佢地曾經被男同事A非禮。」GM說得很淡然。

「真的嗎？」我用我那半咸淡的普通話說：「是真有其事還是被人屈呀？」

我覺得很奇怪，男同事A做了差不多兩年，一向沒有甚麼大問題，怎麼忽然會變成了一個咸豬手？

「除左男同事A被開除之外…」GM吸了口氣：「女同事E也自己請辭了。」

「Huh？」我怪叫：「發生左乜事呀到底？」

「是否真的有非禮行為我倒不太清楚…」GM那口流利的普通話，跟我的「港式國語」有很大既對比：「但是男同事A，同一時間分別追求女同事 B、C、D卻是我們都知的事。 」

「下？」我又忍唔住怪叫：「男同事A有老婆架喎。」

「說得沒錯…」GM點了點頭：「上個月還添了丁，是個很可愛的小男孩。 」

我嘆了口氣，心想這裡到底發生了甚麼事，點解男女關係會亂作一團。

「 那麼女同事E呢？」我問：「做乜要辭職？」

「 她說…」GM也嘆了口氣：「她也被男同事A非禮了。」

跟女同事B、C、D所不同既係：B、C、D響聲稱被男同事A「非禮」之後，都先後跟男同事A發展過「戀情」。而女同事E，則是唯一由此至終都選擇「拒愛」的女生。

OMG。

例會之後，我急不及待跳上出租車，飛奔到機場去，很想盡快離開這個地方。

強國，有時真的讓我很開眼界。

祝大家有個愉快既週末。

假如我的公司沒有我 人在中環

http://manincentral.blogspot.hk/2012/06/blog-post.html
投資響你創立既公司既人， 到底係咪你既朋友呢？

係 : 係因為你同佢地「理論上」係坐埋一條船。大家既利益，係綑縛埋響一齊。

唔係：係因為大家對對方都有猜忌。大家既關係，係純粹建基於金錢同利益之上。假如是但一方懷疑對方將自己既利益凌駕於彼此既共同利益之上，一不留神，關係就會破裂，大家一齊沉船。

《三國》裡面阿魯肅話，「友」固然唔需要對付，「敵」其實亦唔難應付，只有「亦敵亦友」既人，先至係最難搞。

*****

人工貴

最近我俾人投訴人工太貴。emm，咁無可否認我係全公司裡面人工至貴既人。至於值唔值，永遠都只會係一個冇結論既爭辯。

代表投資者果幾位會計師，時不時就會對我作出d咁上下既challenge。我見怪不怪，亦唔會因為咁動怒。 畢竟佢地背負住Client俾佢地既使命， 職責所在，提出質疑在所難免。

我反而覺得，同佢地爭論貴與唔貴，自己到底值唔值咁既價錢，其實並無意義。真正有意義既，係你面對佢地呢d質疑時所表現出黎既態度。

*****

假如我的公司沒有我

假如真係要討論， 一個人響一間機構裡面「值唔值」某一個價錢，除左睇下外面市價係點之外，最直接既，就係幻想一下，假如機構一下子冇左你呢個人，間公司仲掂唔掂，運作會唔會因為冇左你而出問題。 嘩，原來公司冇左你會冧既，你仲唔係重要到不得了？

如果呢個邏輯係正確的話，咁我絕對係一個唔重要，亦唔多值依家果份糧既一個冗員。事實上，我好清楚，今日公司如果冇左我，運作絕對唔會有問題。 經過左咁多年之後，我亦清楚，好多同事對公司既日常流程比我仲要純熟 。係呀，公司冇左我，係真係一d問題都唔會有。響咁樣既情況之下，投資者會懷疑你既存在價值，但我卻對現在公司呢一個狀況非常之自豪。事實上， 我比任何人都清楚，你創立既公司，由起初 「冇左你半日都唔得」，蛻變成今日「冇左你都冇乜所謂 」，係件絕對值得引以自豪既事，而並非一個要努力向幾位會計 師解釋同證明「自己對公司有幾重要」既scenario 。

*****

不如辭退CK


我同佢地一樣，係公司既主要股東。 我尊重董事局既所有決定。我跟幾位會計師講，提議佢 地advise佢地既client，響董事局裡面將我既職位罷免。講真，我其實冇問題，如果我人工真係太貴，而Board又覺得慳左我份人工真係會幫到公 司既話，我查實覺得離開真係冇乜問既 。大前題係，你地要真係咁樣認為至好。

我跟佢地私底下講，假如我唔撈，我其中有兩位下屬，都可以隨時takeover我既duties， 而且能力勝任有餘。佢地既人工， 應該都會比我平。又假如佢地響公司以外有心儀人選，feel free to bring it up to the Board ， 人選適合而又平過我的話，我會以董事與股東既身份，投票贊成辭 退CK，並支持佢地心目中既新人頂替 。

這件事發生響兩個月前。早陣子公司開左一次Board Meeting，剛才提過既那個提議，到最後幸運地還是沒有被人提出過。

whew… 好彩唔駛失業，執番身彩。

零OT之謎 人在中環

http://manincentral.blogspot.hk/2012/06/ot.html
早上返工，朋友forward左呢條link俾我。

頭痕同事的今時往日 人在中環

http://manincentral.blogspot.hk/2012/06/blog-post_20.html
我記得以前初初出黎做生意既時候，其中一個經常遇到既問題係，有d同事會非常計較自己工作既多與少。經營環境每日都響度變，有時無可避免會需要改動一下同 事工作既內容同份量。我自己既標準係，你一日有八個鐘頭時間賣左俾公司。我如果將更多既工作交俾你，而呢d額外既工作又唔會令到你不能夠準時收工既話，你 就唔應該有太多投訴囉。之不過，好多年輕既同事就唔係咁諗。即使佢地依然係返八個鐘，收工依舊準時都好。多左野做就係多左野做，佢地覺得唔抵、唔公平。我 等仆街老細居然響冇加佢地人工既情況之下，安排左「更多」既工作俾佢地。

創業之初，面對部份比較「計較」既同事，係我其中一樣覺得最頭痛既事情。呢一類讓我頭痕既同事，響十年前左右我遇到得比較多。近幾年反而好少撞見。呢一類 頭痕同事既特點係「計較」，但工作能力其實OK。計較既根本係「錢」，儘管不情不願，但俾多些少錢，有時就的確能夠解決問題，讓佢地乖乖地接受新既工作安 排。

近幾年既年輕同事，我其實已經好少見到有好似剛才所提及既「計較」特質。每一代人都有每一代人既特性，少左「計較」也許係件好事，但變得更頭痕既，係佢地面對新工作時，應付壓力既能耐。

以前假如我有一件額外既工作想交俾一個同事做，最頭痕既，係怕佢會覺得唔抵同唔公平，覺得自己「蝕左」，影響工作表現。但講到尾，你將件事交到佢手，即使 萬般不願意幫你捱義氣，但佢地到最後還是能夠幫你完成。今天當我遇到同一個處境時，最頭痕既，以經唔係怕個同事嫌自己蝕左，而係擔心，同事響「情緒」上真 係會頂唔順。近呢幾年，我時不時就會收到有同事「壓力大到喊」、又或者「屈到病」既報告。我有時撫心自問，我公司既工作，真係大壓力到咁既地步？我曾經遇 過一次咁既經驗：同事A告左幾日病假，佢手頭上既工作被逼暫停。但客戶打俾佢既電話，總要有個人幫手接。同事B平時跟同事A工作得最緊密，於是我就安排左 同事A既extension飛左去同事B果度暫時代接。

同事B面有難色，但亦都唔敢拒絕我既要求。我跟同事B講：「最緊要幫同事A take down客人既contact，然後等過兩日同事A返黎處理就得架啦。你自己唔駛直接處理架。」

我以為係一件簡單到不得了既事，點知果晚接近放工時間，同事B居然忍唔住喊左出黎。大家擔心佢係咪受左d乜野委屈，殊不知佢話，今日要負責幫同事A接客人既電話，覺得有極大既壓力…壓力大到，忍唔住喊左出黎。

我見到呢個情形，當堂O晒咀。我心諗，乜d客人既call，真係難應付到咁？抑或同事A有太多客戶搵佢，一時之間令同事B既工作量大增，搞到應接不下，淚灑office？

我連忙將今日客人既call log data拎左入房double check…忙嘛…同事B今日大概因為呢一件額外既「差事」，聽多左三個電話，而平均每個call既歷時，唔到五分鐘。

同事B喊左大約十分鐘，直到時鐘踏正六點鐘，同事抹乾眼淚，離開公司放工去了。

果個畫面，響我心裡面留低好深刻既印象。一個二十幾歲，受過高等教育既成年人，因為要幫忙接多三個電話，而搞到壓力爆煲。我覺得簡直匪夷所思。

我心諗，如果有得揀既話，我寧願棟響面前既，係個好似以前會跟我斤斤計較既同事，起碼你知道，錢係可以解決問題。

班底敵人 人在中環

http://manincentral.blogspot.hk/2012/06/blog-post_22.html
June響我公司做左近十年，上個月向我請辭。每個生意人背後，都總會有一個自己信任既班底。June絕對係我班底裡面其中一個「核心成員」。

「我提議升Vicky。」同樣響我身邊接近十年既Amy說：「Vicky係個聰明女，跟其他同事關係又好，親和力夠。升佢既話，應該最少同事會覺得不滿。」

「Vicky今年幾大？」我問。

「老細，我知你想問乜。」Amy陰陰咀笑：「放心，雖然Vicky上年結左婚，不過據我所知，佢應該短期之內都冇計劃要生小朋友。」

我既工作團隊裡面，幾乎清一式係女性。唔係特別唔想請男人，只不過我身處既行業，一向都係陰盛陽衰。十年過後，現在跟我工作得最緊密既班底，亦變成左全女 班。對我黎講，一間公司有適量既turnover，係正常而且健康既事，但同樣既準則，卻並唔適用於老闆既親密班底之上。呢個班底如果唔穩定，公司既運作 都會有麻煩。打工仔成日都會鬧d管理層肥上瘦下，發生咁既情況，除左響「上層」既人員貪得無厭之外，老闆希望盡可能維持自己既班底穩定少變動，我覺得係個 更大既原因。

不過任憑你對呢個班底裡面既人幾好，俾佢地既人工有幾吸引都好，有d情況你都係冇可能將佢地留得住。之前Kelly一直同我合作無間，行家不斷高薪向佢招 手佢都不為所動。殊不知，佢老公一個遲來既外派升職機會，就讓Kelly頭也不回地放棄自己所有既事業，跟左老公離開香港。「老公」同「老細」要揀，傻既 都知道一定係揀「老公」啦。我明白我冇辦法留住佢繼續幫我手，只好接受。

June臨離開之前，特登抱左佢幾個月大既BB返Office同我地「見面」。BB女幾cute架，不過個樣就似乎同阿June唔多似。我望住BB女，心諗：「唉，咪就係你搞到我又少左個好幫手囉…」

好多女人生左小孩子之後，事業心會一下子從高峰跌落低谷。呢樣我係過來人，我近距離親眼目睹，我自己老婆響生仔前後，佢事業心既轉變。June佢嫁得唔 差，老公都搵到錢，可以容許June過賺錢買花戴既生活。June初初黎我公司做，係個中學畢業冇耐，屋企環境麻麻地既小妹妹。努力工作既佢，升下高d， 升下又高d，臨走既時候，佢head住既department，佔左公司接近四成既「人口」。睇住一大班人，壓力自然有，咁佢又有個錫佢既老公，再加埋生 左個女，於是，疊埋心水相夫教子，做其幸福少奶奶。

Kelly同June既離開，emmm，我心裡面其實挺矛盾。一方面我覺得我好應該戥佢地開心，畢竟家庭對女人黎講，先至係佢地既終生事業。但另一方面，十年黎所建立出來既既默契同信任，一下子就要離開自己，縮骨既我總係覺得有d唔抵。

「OK…」我心呼吸：「照你意思，升Vicky替阿June啦。」

我望望眼前既Amy，心諗：「能夠留住響我身邊超過十年既班底成員，怕且都只係剩返你囉…」

Amy望見我眼光光咁望住佢，似乎感受到我響度諗緊d乜，於是笑左笑：「老細，放心。我又唔鐘意細路仔，我老公又搵唔夠等我唔駛做，睇怕我都係有排響度繼續捱架啦。」

你係至好講，嘿。

祝大家有個愉快既週末。

第三次試驗作 人在中環

http://manincentral.blogspot.hk/2012/06/blog-post_27.html
財團老細晨早call我同拍檔，話想約個meeting。

Meeting裡面另一個party，係某某private equity fund既consultant。早前個consultant話，可以俾d advise我，點樣可以增加公司響potential investor眼中既value。

我係個只懂做實業既古老石山，對呢個行業既「顧問」，不嬲有些少偏見。唔係俾面existing既shareholder，呢d明知係「廢UP」既meeting，我真係睬你都傻。

一如所料，Consultant講左一大堆行外人聽落會覺得似曾曾，但其實係「阿媽係女人」既「經營之道」之後，又拋左一大堆數字，以示自己做左功課。廢UP左大半粒鐘之後，Consultant忽然對我同高佬拍檔既背景好有興趣。

「emmm，你地既背景，potential investor會好有興趣架。」Consultant一副正經咁講：「投資者都希望，投資落一個有能力既管理團隊之上嘛…」

佢首先問高佬，有關佢以前既學歷同工作經驗。我呢位高佬拍檔，呢方面絕對係出得廳堂見得人。名牌大學既高材生，畢業後響跨國公司既工作經驗，而且職位唔低，Consultant一路聽一路微笑點頭。

「Mr. CK，How about you?」Consultant將視線移向我。

「我就差得多啦，哈哈。」我搖了搖頭：「我響大學幾乎畢唔到業，好彩最後果年professor放生我，如果唔係連將沙紙都攞唔到。」

Consultant呆了呆：「emmm，咁工作經驗又如何？」

「大學畢業之後，我第一件事就去借錢做生意，冇經驗當然係失敗收場。」我笑左笑：「說來慚愧，之後我做左好幾年sales，轉左好多份工，但係每次我都總 係一個成日做唔到數既銷售人員。儲左幾年錢，於是又再嘗試做生意，日頭打工，夜晚做自己生意，咁既日子過左大半年，點知又係失敗收場。直至後來撞返高佬， 我覺得佢會係個不可多得既好拍檔，機不可失，於是出盡千方百計氹佢落撘，拉佢陪我出黎再創多次業。呢次係我第三次既創業作品，亦係你依家所睇到既呢一間公 司。」

Consultant跟財團老細互望了幾眼，我估我既答案應該唔多讓佢滿意。我唔知Consultant心目中有d乜野盤算，亦唔知佢打算點樣「包裝」拍 檔同我呢兩位「創辦人」。我唔知果d所謂potential investor眼中，創業既人係咪都有某一種特別既樣子同背景，個個都好似Mark Zuckerberg咁款，但我自己身為過來人，最明白會創業既人，其實都只係普通過普通既普通人一個。

拍檔十年 人在中環

http://manincentral.blogspot.hk/2012/06/blog-post_29.html
拍檔同我係舊同學。最近有一次舊同學聚會既時候，其他同學對我地兩個「居然」做左partner足足十年而相安無事嘖嘖稱奇。

「相安無事？」我笑：「爆過唔知幾多鋪冇講你聽遮。」

我冇講大話，特別係頭果幾年，為左公司既大方向以至芝麻綠豆既小事，開過唔知幾多次拖。經歷過N次大吵之後居然都冇拆到夥，係緣份。拍過檯拍過櫈之後大家 依然仲係好朋友，係運氣。去到近幾年，大家都老左，收左火。呢d爆鑊亦已成過去。諗返轉頭我地以前鬧過既事，好多時候都係得啖笑。

生意夥伴係一個超奇怪既組合，比一對「戀人」既關係仲要複雜。拍檔關係，係一段夾雜住友情同埋利益，信任同猜疑既矛盾relation。我認識好多做生意 既人，頭腦精明而且眼光獨到，但佢地既生意卻做唔大做唔長，問題就係發生響佢地點樣去handle佢地既partner。生意過程裡面，做partner 既9成9都會有唔同既意見。意見不合既結果，絕大部份都係拆夥收場。檔生意都仲未湊大，兩個(或幾個)拍檔就散檔，檔生意當然係做唔大做唔長。響社會裡打 滾得時間長，就越發覺要響呢個現實社會裡面贏，最重要既並唔係你有幾「叻」，而係面對種種問題既時候，你到底有幾「韌」。這個「韌」，包括你忍唔忍得住， 響同partner吵完鋪勁既之後而唔嗌拆夥。

「退一步海闊天空」呢個道理被人講到好濫，我敢肯定，每一個準備同拍檔拆夥既生意人，身邊都總會有好心既朋友用呢句說話黎勸佢。佢地聽完勸告，但依然堅持 「唔退半步」，唔係佢地唔明呢句說話既道理。實情係，你會擔心，當你選擇「退一步」既時候，所換黎既結果並唔係預期中既「海闊天空」，而係拍檔會因為你既 退讓而「得寸進尺」。人都係會有猜疑，但係呢個時候往往都只係一念之差，就決定左你既生意能唔能夠繼續落去。捱得過，換黎既通常會柳暗花明，不過生意既環 境好似一個熱到發滾既廚房一樣，讓人頭腦都不能清醒。

生意代表拍檔之間既「共同利益」，開始既時候我自己都係咁諗。但當大家日積月累地將時間同心血放落呢盤生意之上，生意就慢慢變成不單止係利益咁簡單，而係 一d彼此價值觀既體現。咁講好似好抽象，但當時間耐左，維繫住拍檔間既關係，最有力既原素，並唔係甚麼友情、利益又或者信任，而係守護價值觀既決心。

離隊宣言 人在中環

http://manincentral.blogspot.hk/2012/07/blog-post.html
因為雲佩斯宣報唔同阿仙奴續約，尋晚我渡過左一個失眠既晚上。

坦白講，故事既發展並唔係太過意外，不過作為球迷，我總係期望會有奇蹟既發生。

阿仙奴七年無冠，變成左其他球迷恥笑既對象。然而呢幾年，每年都有球隊主力被人高薪挖角。離隊既球員都堅稱，離隊並唔係為錢，而係認為去到其他球隊能夠比留響阿仙奴更容易得到獎牌。

人總係喜歡佔據道德高地，球星都係人，自然同樣有呢個傾向。

事實上，除左上年費比仔減人工返巴塞之外，其他選擇離隊既球星，去到新球會都會得到大幅加薪。佢地知道，阿記永遠都冇能力出到果d有石油背景既老細能出既 人工，作為一個都只係打份工既「打工仔」，人地俾高幾倍人工你，你點會唔心動？我從來都覺得一個「真小人」會比一個「偽君子」更值得人去尊重，「為左想賺 多d錢所以我想跳糟」，呢個理由我覺得其實絕對係冇問題。邊個唔想賺多d丫講真，我反而會更加敬重你既「坦白」。但野野都賴話自己只想「贏獎牌」，又或者 「發展方向跟理想有分歧」等等，仲要煞有介事兼理直氣壯咁講話「同金錢冇關」，講到幾咁有型咁，講真，我就唔buy囉。

*****

「我離隊係因為我想贏獎牌」，呢句說話既潛台詞係，我留響度就一定贏唔到。我覺得個感覺係，好似有條友黎你公司見工，佢同你講佢舊公司有幾唔掂，留返響度 一定冇運行，所以佢要諗辦法跳糟。或者係真既都未定，但一個「員工」響受到「公司」多年栽培而成材之後，對住外人講呢一番說話，我覺得其實係一件有點「冇 品」既事。你想跳糟冇問題，但你可以選擇對外沉默一d，感覺上會比較有「風度」。當然我更加明白，球星選擇「開聲」，主要係想老細放自己「快d走」，遲d 都唔想，因為外面有好世界等住自己。

我係阿記既球迷，呢篇文章自然有好多情感成份在內，立場亦「理所當然」地側埋一面。然而一個球員選擇離開，我覺得同商業機構裡面一個同事想跳糟一樣，冇乜 大不了，跳糟亦唔係d乜野殺人放火既罪行。不過我覺得，每個人響離開「舊舖」既時候既方式，特別容易顯示左一個人既品格同智慧。好多時候，其實係可以做得 得體一點，坦白一點。