📖 ZKIZ Archives

【關仁隱事】「海外佳麗」拍戲替身代勞

1 : GS(14)@2017-01-23 07:45:17

早排「偷食大哥」發炮鬧啲強國演員耍大牌兼得個樣，埋位拍個大頭做個表情就收工，人前就扮辛苦。其實偷食大哥呢個情況喺內地演藝圈已經好普遍，尤其係拍套劇都收億億聲嗰班一線演員，更加係變本加厲，單係「海外佳麗」一個人就有四、五個替身，除咗必要嘅大特寫佢自己親身上陣之外，其餘所有鏡頭都係替身代勞，基本上個人到片場打個轉就閃人，但就收幾千萬人仔片酬，認真唔負責任。撰文：關仁




來源: http://hk.apple.nextmedia.com/entertainment/art/20170122/19904708
PermaLink: https://articles.zkiz.com/?id=323683

【關仁隱事】「阿木」大細超得罪奀茄

1 : GS(14)@2017-01-29 10:31:40

土炮導演「阿木」專開拍中低成本電影，冇能力拍大片，又貪拍啲低成本地道小品易搵老細投資，所以就算個市唔多好，都密密有戲開。不過一直有得撈嘅阿木，最近就俾個奀茄唱佢做人太過大細超，話佢乜嘢都插手想佔番一份，但又顧唔掂咁多，就好私心只係顧住自己佔最大份嗰部戲，而唔理啲細嘅死活，結果係顧此失彼，兩邊都唔討好，成績慘淡，仲要連啲奀茄都話唔想再同佢合作。撰文：關仁




來源: http://hk.apple.nextmedia.com/entertainment/art/20170129/19911867
PermaLink: https://articles.zkiz.com/?id=324608

【關仁隱事】太陽開工要排場

1 : GS(14)@2017-02-05 10:55:43

內地每年開拍嘅電視同電影產量需求多，但真係受歡迎嘅演員其實唔多，演員唔夠用，稍為紅啲嘅寸嘴囂屎就不在話下，要求仲越嚟越多，周不時為咗面子爭排場。「名導」都同關仁呻，話見過「太陽」一個人就要求要有4至5架化妝車，加一間休息室，雖然身邊助手一大班，但又唔見益吓人畀助手私人享用，反而要人全天候圍住喺身邊服侍佢，但佢得一個人，又坐得幾多個地方呢？一句講晒，咪就係貪得無厭囉。撰文：關仁




來源: http://hk.apple.nextmedia.com/entertainment/art/20170205/19918085
PermaLink: https://articles.zkiz.com/?id=325547

【關仁隱事】陽木多要求激嬲老闆

1 : GS(14)@2017-02-12 13:52:37

香港仔「陽木」喺香港撈唔掂，後來去咗台灣，近年再轉到內地發展。估唔到反而畀佢拍咗套劇集人氣急升，仲簽咗名導嘅公司，之不過佢就當正自己係天王巨星，派頭大到嚇死人。上年有部香港主導嘅合拍片搵陽木，「泡菜靚仔」都有份演出，套戲拍完後要影海報，佢竟然要求帶自己攝影師嚟，電影公司當然唔肯啦，因為紅如「影帝」同「天王」都唔會有咁唔合理要求，初時佢企硬話唔影，公司老闆就嬲到唔影就罷，後來佢見電影公司唔就範，咪死死氣影番囉。撰文：關仁




來源: http://hk.apple.nextmedia.com/entertainment/art/20170212/19925437
PermaLink: https://articles.zkiz.com/?id=326543

【關仁隱事】姐仔NG玩西多士

1 : GS(14)@2017-02-19 13:59:44

「西多士」效忠公司幾十年，最後因為做得唔開心而離開。雖然西多士咁多年嚟都係做綠葉角色，但竟然有個上咗位嘅姐仔，因為怕比西多士搶戲而出陰招。聽聞西多士多年前同一位上咗位嘅女主角做對手戲，嗰場戲係一場內心戲，冇演技絕對死得嗰種。事前做足工夫嘅西多士好投入咁拍，睇到在場工作人員幾乎拍爛手掌，點知突然間嗰位姐仔見西多士搶晒戲，於是特登玩嘢係咁NG，明挫西多士銳氣。雖然嗰位姐仔不停同西多士講對唔住，但呢件事令到西多士今時今日都好清楚記得。撰文：關仁




來源: http://hk.apple.nextmedia.com/entertainment/art/20170219/19932817
PermaLink: https://articles.zkiz.com/?id=327025

【關仁隱事】媾女王撇女扮傷心

1 : GS(14)@2017-02-26 13:24:05

媾女王換畫好似換衣服，之前佢識咗新女友，兩個一撻即着已過電，得閒去對方屋企過夜，估唔到纏綿遊戲唔夠一年貨仔就冷卻，初時兩人越嚟越少聯絡，最後你唔嚟搵我，我唔主動搵你，無聲無息就分咗手，現代愛情故事連拜拜都慳番，玩心知肚明就算。不過，媾女王為免俾人唱花心，就喺人前扮好鬼傷心，仲搵人陪佢借酒澆愁，扮晒癡心情長劍！撰文：關仁




來源: http://hk.apple.nextmedia.com/entertainment/art/20170226/19940319
PermaLink: https://articles.zkiz.com/?id=327139

【關仁隱事】姐姐難忍老友出賣

1 : GS(14)@2017-03-05 09:34:58

「姐姐」喺呢個圈入面，出名好注重個人私隱，多年嚟都係同嗰班朋友玩，因為怕俾人利用。前幾年，姐姐同有米男友發展地下情，諗住去外國玩幾日，點知行蹤咁都曝光，佢就懷疑係身邊人爆料，嬲到要同對方割席。最近，姐姐又忽然有新戀情，傳佢睇中「老藕」，仲不避嫌兩個孖住出巡，周圍見班老友。點知呢單戀情，好快傳開，又觸動到姐姐嘅神經，認為有人想宣傳，而借佢過橋，嬲咗一齊玩嗰班朋友。撰文：關仁




來源: http://hk.apple.nextmedia.com/entertainment/art/20170305/19947743
PermaLink: https://articles.zkiz.com/?id=327890

【關仁隱事】陸哥管理差連累小歌后

1 : GS(14)@2017-03-26 15:38:22

「小歌后」曾經患過抑鬱症，年紀小小已經經歷好多，可能唔想再受太大壓力，所以同公司約滿後都冇再續約，轉簽「陸哥」。陸哥?家喺內地吃得開，又有自己公司，但內部就好混亂，關仁有次同公關朋友傾偈，佢哋就鬧爆陸哥公司班人冇品。原本簽晒合約應承畀小歌后出席一個商演，點知活動前幾日先話畀人知撞期去唔到，擺明想一鑊蹺起人。公關嗰邊當然嘈到拆天，話要封殺埋陸哥，仲要周圍唱衰佢哋，咁梗係驚啦，最後安排小歌后快閃亮相，然後走人。撰文：關仁




來源: http://hk.apple.nextmedia.com/entertainment/art/20170326/19969970
PermaLink: https://articles.zkiz.com/?id=328903

【關仁隱事】媽媽捧公主辣火頭

1 : GS(14)@2017-04-09 10:49:41

歌手「公主」同經理人「媽媽」，係情侶已是公開嘅秘密，近排公主難得有戲拍，媽媽當然努力幫愛人上位，爭取曝光機會。不過最衰媽媽假傳聖旨，因為套戲同時有幾位演員，知名度都高過公主，所以為咗唔畀記者冷落愛人，媽媽喺套戲開鏡拜神嗰日，竟自行安排電視台做訪問，當現場公關冇到。事後仲同記者講，如果想同其他演員做訪問可以搵佢，前提當然要同公主一齊做。聽聞電影公司方面知道後好嬲，除咗取消公主一場演出，仲諗住第時宣傳都唔預佢。撰文：關仁




來源: http://hk.apple.nextmedia.com/entertainment/art/20170409/19984334
PermaLink: https://articles.zkiz.com/?id=329827

【關仁隱事】8爺霸氣嚇窒後輩

1 : GS(14)@2017-04-16 14:41:13

「8爺」縱橫娛樂圈幾十年，每次出現都霸氣十足，好多新入行嘅後輩，見到8爺都戰戰兢兢，其實8爺份人好鬼風趣又幽默，仲好識得講笑話搞氣氛㖭，有時又會寸吓啲後輩同記者仔。話說有次喺一個活動上，有個記者仔竟然膽粗粗咁問8爺攞聯絡電話，點知8爺一句得埋去，佢話：「攞我電話？的士佬都有啦，乜你唔知㗎咩！」關仁喺隔籬聽到嗰陣陰陰嘴笑，果然薑係老嘅辣，8爺呢招真係高呀！撰文：關仁




來源: http://hk.apple.nextmedia.com/entertainment/art/20170416/19991309
PermaLink: https://articles.zkiz.com/?id=330759
Next Page
ZKIZ Archives @ 2019