📖 ZKIZ Archives

敗象 老狐狸

在逼不得己下寫出這篇文章，點解？老狐貍近期不止一次收到讀者問我點解呢輪唔寫文，甚至全民媒體的老編都SEND個EMAIL問老狐貍點解少左咁多文，係咪工作或者其他關係 (可能老編以為老狐貍已經發左達)，近期既文章由以前一星期幾篇，少到宜家幾個星期都唔見一篇，故此特別寫番呢篇文話俾大家聽老狐貍仍然「未發達」同「健在」。

老狐貍唔係唔想寫，正如我回覆全民媒體老編一樣，近期個市咁好，個個都係「股神」，我呢D貪圖肉碎既狐貍仔又點可以同D唔怕死既大媽鬥呢，因為佢地無路捉，既不睇基本因素，又不睇圖表分析，近期甚至唔睇人民日報，只係相信大陸A股係牛市，睇下個日D報紙佬講D乜，格隆滙、雪球吹D乜就奮勇地撲向呢D股既懷抱，一開市就升3-4成起錶，睇你撲唔撲，更甚既係每日幾隻升一倍。

我同意近期好多爬格仔既財經作者都搵到食，因為實在太多人跟了，(點搵食?自己想想就明了，老狐貍不想俾人揼)，小弟偏偏唔會做埋D咁既野，中長線想搵隻平既股票好難搵 ，至於短期，大家如果有跟進過老狐貍專頁既都會知我既短線炒作，所以個人短期內搵唔到好的材料去下鑊，又唔想係降低質素的同時，所以寫少左。大家可以放心，只要老狐貍一日未餓死，我都會不時搵下有無野亂講一通，唔怕死的就埋黎聽下。

好多人或者會問，個市炒完未？

跟據傳統智慧，個市係炒完既時候你地係永遠無辦法知的，所以每一位投資者可以做的就係做好風險管理，同控制註碼，不要ALL-IN，如果有大家有留意小弟的操作，我的現金水平永遠唔會去到零，少於20%現金水平我已周身唔安樂了。可能你地有會話，咁個20%你留黎煲醋咁，係架，所以老狐貍的倉位平均每年目標回報有20% – 30%已經好好了，不過咁，今年狐貍倉都升左1倍既。

咁至於幾時至炒完？

老狐貍同D行家吹過水，通常個市見頂之際往往出現以下情況，小弟稱之為敗象，大家不妨參考一下。

1.     周街股神

2.     唔係做股票的朋友俾番冧巴我，往往仲贏得多過我

3.     炒郵票，炒銀紙

4.     娛樂場所無曬位

5.     股市單日大上大落幾個巴仙，成交創出新高

6.     財經報紙股創出新高

7.     有朋友 辭職炒股

8.     大孖沙抽水集資

好彩地，現時只出現的情況1-4情況，老狐貍所講的娛樂場所講的是夜晚至旺的地方，一般去到BOOK 都BOOK 唔到位的時候，即係個個金融佬都發曬達揮霍了，就要好小心。

至於港股成交，老狐貍仍然相信是次牛市最大成交可能會高達3,000 億元(好多咩？國內一天20,000億元人仔成交了)，所以未到全行慢機都應該未見頂。至於財經報紙股創新高，雖然近日又有策略王、投資王，但睇上市隻經濟日報市值仍只得9.5億，應該未到高峰。

最毒的有朋友辭職炒股，老狐貍身邊有朋友確係全力炒股，但佢辭左幾年了，並唔係今個浪，今個浪則未見，可以放心。而另一個大孖沙抽水，呢D   old money家族可以威左咁多年，睇市必定有一手，好彩地亦未見其出手，暫時仍見安全既。

至於老狐貍，相信短時間仍然集中短線炒作，請多留意小弟不時上載的文章，謝謝。

老狐貍

如大家有興趣，歡迎大家加老狐貍的FANPAGE交流下啦

https://www.facebook.com/oldfoxfanclub

靴子落地 老狐狸

在之前的文章中，老狐貍說過因為周街股神，好股難尋故減少寫文，而老狐貍被公司公司委了一個大PROJECT要做，在開始之前的這兩個星期順手清一清假期，昨天 (9/6/2015)亦偷得浮生和狐貍太太到深圳走走，誰不知又一次不在公司的時候遇著跌市，幸而老狐貍其中一只持有的創業板股仔滙能集團(8105.HK)突然起動，大幅減輕了中船防務 (317.HK)和雅高控股(3313.HK)帶來的受傷，亦順手套利令自己的現金水平上升至30%。

昨晚回家一看，原來好多莊家股和股仔都跌得頗為厲害，跌市當然要搵跌市的理由，有D口痕友會話，昨天沽盤突然湧現，所以帶來了跌市，好似好有道理咁，咁不如話沽盤大過買盤，所以推冧個市啦。

老狐貍左思右想，不外乎都係幾個原因：

1. A股未能入MSCI

今日大家都知A股暫時未納入MSCI，其實金融界一早已經預期呢個情況，所以呢個跌市的原因實在有點牽強，要做對沖的一早做了，還會等昨天才做嗎？

2. 政改風險

相反，呢個風險老狐貍確實有點擔心，大家不要揣測老狐貍的政治取向，我的投資理念係「有奶便是娘，有錢便更強」，我相信有錢就有選擇，作為一個投資者，幾時都會擔心D錢投資左係一個會有動盪的城市，如果我預期過同唔過都會有班人出來佔領，「妖」亂民生，影響股市，我都會減一減持啦，常理吧？

本來老狐貍都想增持多點現金，但由於估計個市無咁快會回，加上放假心重，所以慢左，呢次係完全抵死既。

3. 收緊融資融券

相比以上兩點，我覺得近日國內銀河證券、廣發證券收緊兩融比較更大，可能有人話收大陸水關香港鬼事咩，但大陸投資者充斥香港股市，收緊兩融呢個意識形態更加令大陸投資者收一收手，大陸投資者最怕的人踩人就係咁樣引發的，所以你見跌得勁的都係細會莊家股，藍籌只係跌個幾百點，我D朋友已經WHATSPP我要生要死雲雲，更有朋友話要死都唔係咁易，因為係IFC排隊條人龍已經好長了。

4. 韓國MERS

呢點或者會係黑天鵝，但相信短期內對股市的影響未必太大，但大家不要掉以輕心，慢慢留意住事情發展吧。

我知大家又會問咁應該點好，老狐貍覺得呢次跌市或者可以用第1，3點去解釋，但始終政改所帶來的風險仍未消除，即係話有人向你扔了一隻靴，當你未見第二隻靴出現時都要小心點啊，否則被扔中了一隻後再中第二隻都幾傷架，近期未有好目標時或者靠邊站都係一個好的策略呢！

如大家有興趣，歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍

給中港投資者的信 老狐狸

各位親愛的投資者：

一切安好嗎？近期大市的波動令你們受傷了，情況好轉了嗎？心理上適應了嗎？老狐貍明白的確有很多初入股場的小股民重創了，早前「少年股神」的出現，不是給你們一個警號了嗎？下一次若然再見他們的縱影，不妨要小心一點啊！

大家可能懷疑老狐貍是否被熊哥哥啃了呢？為什麼早前完全沒有出文呢？正如早前的文章提及，當時老狐貍發覺通街股神，個個一見「供合配送」呢D組合就死撲爛撲，個個都寫文出書，老狐貍呢D老人家見到都知係時候收收手，轉為炒DAY TRADE的多，長期持有的少，雖然小弟近期都擦傷了一點點，狐貍倉全倉計較高位也跌了約10巴仙(主要係輸係隻中船防務上)，以小弟持有的小型股組合而言，相比跌幅仍然在可控範圍之內。

為什麼蟄伏咁耐唔出文的老狐貍又出文既？一般而言，狐貍係冬天係比較怕死同怕凍的生物，冬天食飽後當然開始冬眠啦，其間都會因唔食野而減磅 (倉位下跌)，去到冬去春來，狐貍一家都要出來搵食了。有留意開老狐貍專頁的朋友都應該有留意，老狐貍本人和永遠只在執死雞的狐貍太太都分別出手了，因為春天應該不遠了。

傳統上股市有「五窮六絶七翻身」之說，中港股民剛苦苦的捱過了傳統的「六絶月」，正如陳奕迅的名曲「K歌之王」一樣，而這個六月股市真的是「絶得不能絶，絶對溶掉了很多股民」，市場由中國A股未能納入MSCI指數時開始作出調整，隨後的新股、集資潮，多次傳出的限場外配置，限制兩融等消息，亦有著名國際基金經理指該時間為沽空深成指的最佳時間，加上希臘與歐盟就債務問題爭吵不休，令上証指數由5000多點下跌至跌穿「牛市開始」的4,000點，亦同時令香港的恆生指數由五月下旬的28,400點下跌至6月29日的25500點才有開始喘定，個別中小盤的股票下跌一半舉目皆是。

近期的市況確實令不少投資者心灰意冷，但請大家冷靜一下，中央在重手同時減息降準，加上中証監的言詞反映出中央要的是慢牛市，故在未能確定進入熊市之時，務必要抖擻精神，檢討一下之前的成敗，重新建倉才是皇道。

某位「高手」說中國是最大的莊家，係呢一點老狐貍絶對讚同，以現時中國的經濟規模，無論軟硬實力都不是香港可比，中國的目標是與美國和歐盟三權鼎立的影響力，以上證4,000點的牛市起步位，現在可謂「還原基本步」，早前有分析指中國希望的慢牛市是把樓市的資金分流到股市，把資本市場的力量去處理各地方和企業的債務問題，所以在各大型央企、金融機構集資的政治任務完結前應不會就此完結，大家可以見到這段時間國內不同的權力機構都出招支持股市，當中包括央行的降息降準，中証監的言論和對融資補倉規限的放寬，中央匯金的用銀彈買貨，甚或其他官方喉舌的言論等等，以中國的對政策的執行力，老狐貍仍然是有信心的，所以狐貍家族都支持大市，分別「出手」了。

小弟明白炒股是痛苦的，「買了怕輸，贏了怕沽得早食唔盡」，這就是股票市場，遊戲規則如此，「優勝劣敗」在此非常現眼報，正如小弟一個朋友常掛係口邊一句：「你唔輸我點贏呀？」，明白了嗎？若果這點痛楚你忍受不住，還是把錢留住買iBOND吧！

希望你們能快點抺乾眼淚再上路，春暖花開，沿途還有很多好風光呢！

祝大家股運亨通。

老狐貍上

財經寓言故事一則 老狐狸

係好耐好耐之前有三條茂利A、B、C，佢地有個共通點，就係靠食老本，係屋企門口收下保護費，或者係名勝附近屈下遊客咁搵食，但始終成 日三餐不繼，最後因為「大樹好遮蔭」，趁佢所住個區有個社團大佬正在招兵買馬，就加入左佢地個社團。

A、B、C三兄弟原本諗住有乜事就可以搵社團出手，就高高興興的加入社團，阿C諗住以後有大佬照住，仲借錢開左個奧林匹克公園，以為可以威威給各話事人睇，而阿A同阿B仲仍然洗腳唔抺腳，結果借下借下就欠下社團一大筆錢，由於當時社團個字頭巖巖建立不久，為免有辱字頭，加上見佢地手下眾多，故大佬仗義幫佢地頂左條數。

細佬C一一看在眼內，平時只係幫大佬睇住下個公園既工作，手下又不多，卻仍然同D爪牙大吃大喝，又要出糧又要福利，連阿公的收入都盜用不特止，又學阿A同B咁欠下社團一屁股數，搏大佬都會好似幫阿A同B咁幫佢，誰知大佬見細佬C對社團毫無建樹，爪牙亦少，仲得罪左社團內最有影響力的話事人，大佬都唔敢幫佢頂數，就下令細佬C要快D還錢，就算唔還都要交代下點樣還。

點知細佬C同佢D爪牙就借勢發窮惡，就好「民主」地問下D細既還唔還好，D細既當然啋你都傻，總之你糧要出、福利要有、又要唔駛我做同還錢我至同你傾，搞到社團大佬同個得力話事人一肚火，個社團既收入即時大打折扣，殊不知原來個社團都係外強中乾，佢都要靠隔離區既社團「東方不敗」去支時，但「東方不敗」近期同霸主「猩猩旗」開緊戰，搞到成個區域民不聊生，事件仍然在發酵之中。

如果我係霸主「猩猩旗」，病左咁耐之後剛康復，點都要話俾人知邊個至係龍頭，樂得見你地有咁衰得咁衰，仲唔借勢做努力挑撥咩，加上巖巖咬住左你，仲唔屈得幾多得幾多咩?

如果我係「東方不敗」，現在一定先睇住自己個地盤，至少保存番係東方同南方海邊既優越地位，不同你地爭一日之長短，保存實力為上，理得你隻猩猩係度嘈，大不了唔買你個D呃人既借據，睇下邊個死先。

如果我係個社團大佬，為保住社團尚在，我一定會好好教訓呢個小朋友C，殺雞儆猴，一來唔會有以後的D、E、F出現，又可以KEEP到其他有錢人的支持，繼續收其陀地。

最可憐既係遠在東方的一眾小嘍囉，洗錢又無份，只係買下大佬既資產，唔明遠方細佬C搞出黎既事居然要佢地埋單，甚至大佬「東方不敗」連葵花寶典的招式盡出亦未能把「猩猩旗」的打手幹掉，搞到近日民不聊生，身家暴跌。

估唔到以上既故事近日升級為國際大事，令好多小朋友反應不過來，借大了去玩被斬倉，出現了人踩人事件，釀成悲劇。

老狐貍建議大家只好靠邊站，有得食就食，有得玩就玩，唔好望住部機，只要唔欠人週身債，有工做，有大佬睇住下損手好快會復原，以現時的基本因素，東方門下既資產，尤以香江資產而言絶對係抵買，反正都要過日子，開開心心的過吧，不要想太多了。

老狐貍

如大家有興趣，歡迎大家加老狐貍的FANPAGE交流下啦

https://www.facebook.com/oldfoxfanclub

雨後陽光 老狐狸

今次的跌市終於令到好多新入行的投資者、年青「股神」損手，當然市場仍有某位讀書少又癡曬脷筋都仍然要開咪的股神話反手沽左期指冚番輸左既幾千萬中的1/3，但呢位EXCEL神公信力有限，唔知點解仲有人信，但不得不承認呢個浪確實令到好多人無褲著。老狐貍雖然條褲仍然係度，但都被呢個浪沖到褲頭帶都鬆曬，不得不死執住個褲頭，否則真係醜死街坊。

經過今次的跌市，都係時候檢討番個理由，不外乎都係兩個：

希債危機令到脫歐

如果你係為人父母既，點會教個小朋友平日好食懶飛，靠借錢度日，債主臨門就撒賴唔還債，仲叫人借多D，否則唔同你一齊玩？偏偏係D所謂「發達福利社會」就可以發生，如果我係個債主，你唔再俾番D野我抵押我真係唔會再啋你。

唔知再落去會點了，幸好，暫時都叫做傾得掂，可以移除一座大山先啦。

國內股市急挫，未能找到原因

國內不停出招，但未能對癥下藥，亂石投林，未能對癥下藥，最終出到銀彈(要國家系統去買)和子彈(要公安去查)，最終叫做知道問題所在為場外配置，並有說限定場外配置最遲月底清場。而令港股大跌的原因則為國內甚多上市公司申請停牌，以為可以避過跌市，情況就好似當年香港停市四日一樣，國內投資者被追孖展數，無得沽情況下只好狠狠地沽出港股中其愛股，在沽壓甚大而買家忍手下，令所有有流通性的股份無情被隊，人踩人事件重演。

作為一個「愛國愛港亦愛錢」的投資者，老狐貍非常相信國家維穩決心和執行力，雖然在經驗尚淺下有點驚惶失措，但由於涉及維穩和主權，故必得大火力去令市場穩下，故老狐貍當時亦有身體力行下用最後資金買入中船防務(317.HK)，有跟進小弟網誌的都應很清楚。

在用重火力支援下，市況終於定下來，老狐貍相信現為安全日子，在有可能影響國家金融穩定下必定嚴陣以待，特別是在七月十七日星期五，當日為中國三大股指期貨結算日，相信相關機構必定全力護盤，慎防淡友發圍。

由於是次事件敲響警號，國家系統必定會在事件完結後整頓相關挑戰主權，引入危機的金融部份。

那是一個好機會嗎？

近期在美上市的中資股退市欲回歸A股，中証監雖口說新股上市審批不會減慢，但在風雨飄搖下必定會自行「調整」上市速度，兩個因素下香港殼股將繼續有價有市。如果大家記得香港早前的賣殼潮嗎？一切緣自之前的限制新股上市潮，令港殼值錢。

老狐貍大膽估計，只要中國經濟不出太大的系統性問題，像之前中資類股份純因市場流動性拖垮情況下，可以放膽買入港殼，執筆日(7月14日)小弟仍見有樂視入股北青傳媒(1000.HK)，股價單日曾急升55%，亦有螞蟻金服旗下基金入股華耐(1020.HK)，所以國內企業在港買殼的音樂椅遊戲仍然繼續。

至於買什麼？你們每一位都比小弟叻，應該有點心得吧？再不就打開一個月前的財經板，睇下當日D財演唱過邊隻但又跌左好多落黎的股份吧，或者比較下早前某知名國內網站的「港A股」名單，相信當中必定可以找到亮點 (大前題係沒有特別的系統性風險出現)。

老狐貍呢期仍然忙到甩碌，一方面要處理早前講過的新PROJECT，又要寫文，最重要係大家係小F弟FP見到我的新玩具，以一個係呢方面既白癡黎講，係要D時間去學習同處理呢。

最差的出現了，以後都會一天比一天好的，加油啊！

老狐貍

如大家有興趣，歡迎大家加老狐貍的FANPAGE交流下

https://www.facebook.com/oldfoxfanclub

尊師重道 老狐狸

一代亞洲股神東尼(Tony Measor)過身了，作為一個曾經係同一層樓工作的後輩，對呢一位努力不懈工作的前輩作出敬禮，不單是其投資意念的清晰和執著，更多的是作為一位多人追隨的股壇前輩，卻永不會「見好唱好」或為其他莊家所利用，老狐貍對此真心讚許，東尼的離開確是投資界的損失，希望東尼可以R.I.P。

小弟一向非常尊敬給自己「上一課」的朋輩，就算是大罵小罵，只要罵得正確，言之有物，有的放矢，老狐貍冷靜下來只會受教，暗說一句：「罵得好」，正如帶老狐貍出道的「領頭大哥」，可能有人會覺得他的學歷不高，但對當年初出茅廬的老狐貍確實幫助不少，直到現在，我們也不是茶聚，交換「心得」。

這就是中國人的傳統美德：「尊師重道」。

就係呢幾日，從電視報章中看到港大就委任副校長一事，學生會一班「暴民」衝入會議室作出「佔領」，對各委員作出指罵，以粗口大罵各與會人仕，人身攻擊，阻其離去及接受醫療的權利，這點老狐貍覺得非常痛心，決定寫這篇文章，不吐不快。

先不論校委會的決定如何，或者其決定是否滿足到「學生會」的訴求，老狐貍相信作為本港最高學府的校委會人仕，皆為香港各行業最頂尖，無論其學術或專業成就、人生經驗和閱歷之廣亦無可批評，絶對可以代表各階層，平衡各方面的利益。可恨的所謂「大學生」，二十多歲年紀，只讀過幾年通識教育，考入大學後自以為羽翼已豐，學貫中西，作出挑釁行為。本來作為大學生，善意討論絶對不是壞事，但見其有預謀式的衝入會議室、圍堵、佔領、漫罵、阻止別人離開、妄顧他人接受治療的權利，只準人家接受其意見，那是什麼大學生行為？講粗口很好嗎？罵人家「人渣」，委員們作了什麼大惡事呢？那你們又是什麼？大聲指罵很對嗎？你們有足夠資格批評人家呢？

此外，一群學生對校方決策層作出如此行為，尊師重道嗎？人家受傷了，說人「插水」，阻人接受治療，你們人道嗎？用人群圍堵粗口爛舌，你們有接受過教育嗎？說什麼覺得接受佔領係正確方式，你們的腦袋正常嗎？

更甚的是在網絡上亦有如老狐貍般的表達意見，居然引來圍攻，說什麼：「你讀過大學了嗎？回去好好讀多幾年書再說吧！」，這是什麼說話？現在大學學位氾濫，有大學學位已不是什麼「巴閉」的事，請不要再說這些說話了，只會貽笑大方。

老狐貍明白這篇文章可能會引來不少「意見」，但老狐貍我手寫我心，雖然有點離開小弟平時的財經話題，卻是小弟放在心中的說話。

年青人，你們是香港未來的希望，請先努力學習，務實工作，踏實做人，不要把香港的機遇拱手相讓其他城市啊！

老狐貍

看！財技就是這樣練成的 老狐狸

老狐貍之前曾說過每次牛市都會有新的股神和新的財經雜誌，這次牛市當然出左唔少股神啦，然而在七月初的股災後，有傳個別股神條泳褲已被他人拾獲並棄置在堆田區，這是每個大浪必經的階段，當每位泳手可以係個海入面玩左幾個大浪都仲著條褲，方為大師傅。

至於財經報紙和財經雜誌則仍然不多，老狐貍留意到的是《六合投資王》和《港股策略王》。呢兩份報章雜誌的班底大致都係一樣，只係出版的日子和定位有所不同，《港股策略王》以周刊方式每逢周五出版，由於呢本雜誌的部分作家小弟也認識，故每週都會買一本以表支持。

老實說，老狐貍認同呢本雜誌辦得不錯，從最初出書時的紙封面，到最近一期的過膠封面，由最初係中環區一本難求，到現時接近大部份書報攤有售，每本內容亦可以邀請到不同的名人作封面，當中包括娜姐(周秀娜)和最近期的詹仔，廣告亦開始多了，反映出本書的搞手的確有人面和有腦筋。

今日從交易所資料得知，惠陶(8238.HK) 以500萬元入股港股策略王20%。惠陶主要從事中文雜誌的出版，當中包括《名車誌》、《搵車快報/購物王》等6本本地雜誌，是次購入股權的動作似乎亦屬合理的投資。

回想一下，記得某大師級財經作家講過投資一本雜誌的資金只是數百萬元，在成功出了約30期後以$500萬元出售了20%股權，反映《港股策略王》呢本雜誌已由升值至$2,500萬元。當然大家可能未必認同呢本書的價值，正如買賣樓宇一樣，原業主覺得值1,000萬，買家必定覺得不值，在討價還價的同時，只要市場的同類單位有一個賣了1,100萬元，則市場便會覺得此類單位必定不止值1,000萬了，現在有投資者「真金白銀」買了20%的「購入價」，就反映出本書已「升值」至2,500萬了，老狐貍對此非常佩服，但明白其旗手及多名作者均為股場打滾多年的財技派高手，則不覺得出奇了。

記得自惠陶上市以來，多篇文章均對此股作出多篇「多頭」的建議(國內寫法)，近期更身體力行在此雜誌上下廣告，只要《港股策略王》能在出版初期取得「利潤」，估值可以估得更高，其實下廣告所需資金不大，加上這本雜誌的運作成本亦不會太高，取得利潤實在不難，這正是一家便宜兩家著的好方法。

這亦是為什麼公司希望上市的原因，一為公司變為公眾公司(“Public company”)，大股東可以免除很多責任，另外公司股份流動性增加，令價值上升，而更重要的一點是原本100蚊的盈利，以10倍P.E計，就變成了1,000蚊的估值，如果係創業板就更爽了。

明白了嗎？

老狐貍

如大家有興趣，歡迎大家加老狐貍的FANPAGE交流下啦

https://www.facebook.com/oldfoxfanclub

大時代給大家的教訓 老狐狸

回想這個「中國熱」的大時代巨浪，一切源自中國A股升浪帶起，令香港國企指數由去年中約10,500點左右升至最高約15,000點，香港恆生指數亦由同期的約22,000點起步升至約28,500點，大家又如以往出現過的多個大浪中的炒得如癡如醉，把過去很多著名投資者提示過的敗象均拋諸腦後，總會說「今次是例外」等說話，至今大市爆破，筆者很多朋友很羨慕老狐貍至今仍然是「正數」(托大家的鴻福)，紛紛致電給我問如何打算，但輸了就輸了，小弟一己之力當然做不到什麼，只能以此文章警惕各投資者日後應註意的地方。

老狐貍曾多次於不同文章提及一個成功的投資者不是只一個浪中炒得牛，贏得多就是一個叻仔，要知道股票市場就是一個專收「叻仔」的乾坤袋，你一時「時來風送騰皇閣」加上「心口有個勇」可以令你於大浪中贏得名和利，但炒股最難的地方是「退」，如何在退潮中仍有褲著至係重點，能在多個浪中都可以贏，幾個潮中仍然屹立不倒的方為「大師傅」。

今個浪中出現過什麼賣殼潮，湧現了什麼財技派股神，電視臺重播神劇「大時代」錄得高收視等等，當然現在睇番舊史係無用，但「前事不忘，後事之師」，雖然沒有兩個相同的股市，但殊途同歸，大家都可以從中回想下自己是否忽略了一些敗象，令你走避不及，老狐貍明白可能當中會觸及痛處，但都建議大家以此檢討一下。

(1) 朋友的推介

記得在千禧年的升浪中，老狐貍之所以可以全身以退，全因踫到了一位「天使」，他不是大家想像中的美麗女子，而是一名以勞力賺取收入的粗眉大漢，他在該大浪中炒輪贏了好幾百萬，他跟老狐貍說要辭職全身投入股市，就在翌日老狐貍把全倉連同現貨也沽掉，只炒day-trade渡日，最終令老狐貍避過一劫，而該位「天使」最終把原有的本金也全數輸掉。

在2015年的升浪中，老狐貍雖然遇到另一位天使 – 老狐貍的多年老友，但卻不懂脫角。他是一名從事貿易的生意人，平常吃喝玩樂，無一不是最好的，家中亦有一名專業人仕的矯妻，以去只買賣大藍籌，炒親股票都輸的「黑腳雞」，但在今年初他給老狐貍一隻股票，小弟不以為然，最終該朋友賺了4倍，老狐貍揼心不已，雖知股票市場收到風無買後爆升，是人生最痛苦的事，結果老狐貍也小註跟了那朋友買了幾只細股，小弟最終止蝕離場，但朋友在加大註碼後持有至今，輸掉八成的投資額。

故事教訓係當一個layman都俾貼士你時，真的要小心，其實類似的故事之前已經發生，只不過該主人翁是遇上擦鞋童，真妙。

(2) 銀行劵商死機

在今個升浪中曾經出現部分銀行和劵商系統出現「遲緩」，點解死機會和大市見頂有關係呢？

要知道香港大部份的散戶投資者主要經由銀行或乙丙組劵商買賣股票，當然該些公司的系統有一定的BUFFER 以通過監管要求，但每次可以令該類公司死機的交易量，反映出散戶的瘋狂程度足以令其慢機，而散戶向為市場生態的「小魚」，大戶又點會唔好好把握機會呢？

(3) 新一代「股神」的誕生

老狐貍小學時就讀一所天主教小學，當年最喜歡上的其中一課是宗教科，因為該科沒有功課，上堂只係聽老師講下「創世紀」、「摩西分開紅海」等故事，老狐貍記得老師講及末世時會有好多「假先知」，而就係呢個浪中大家可以見到，有些不學無術、目不識丁之輩，在媒體上吹噓自己如何以EXCEL賺了幾千萬，又開班授徒雲雲，每位慢慢由入門班讀入中班，中班讀完又高班，之後實戰班，結果佢地CAP曬你D水，大家就聽埋一大堆錯曬既「財技」，夠末世未呢？

未夠？有報章指出某「副總裁」級的財演，不停吹噓某股份當日的股價仍低於上市價，說會做好雲雲，卻犯了最低級錯誤，原來該股已經拆細了，如果大家聽了該建議就祝君好運了。

可能有人會話筆者亦是財演(我亦真的在某些只在彈劾他人的網站中見過)，但小弟一不收錢，二不亂寫，所講過的必定細讀，你可以說我寫得不好，但不要把我和財演扯上關係，我亦真心希望有能者可以寫得更中肯，更有質素。

(4) 財經雜誌的湧現

老狐貍記得曾在文章中指出每一次浪頂會有很多新的財經雜誌湧現，大家應該見到至少3 份類似的報章雜誌，當中一份仲賣左25%俾某上市公司，盡顯其財技。老狐貍不是說其內容寫得不好，而係客觀地指出愈多財經雜誌同時出現和大市的關係而已。

(5) 投資比賽的關註

近月多份報章雜誌曾舉辦多次模擬投資比賽，請來多位「名家高手」作模擬買賣，勝出者可得獎金，這類比賽的確非常「吸睛」，而做成被建議的股份更加被追捧，莊家還不上下其手？

無論如何，事實歸事實，大家不要憧憬短期內大市重回高位給大家走了，但是否要止蝕？筆者一直覺得大家投資應以自己的承擔程度出發，以往筆者常說「笑莫笑、悲莫悲」，一切以平常心出發，投資不是請客吃飯，以不影響到日常生活所需現金流為大原則。

至於大市，是抵，但是否底老狐貍就不知了。一點可以供大家參考的是第一季時市場/大行一起高呼恆指30,000點，結果如何？大行沽貨不會說給你知的，直至大家知道已經太遲了。

現時大家又話最差時18,000點了，那大家又會點睇呢？唔識睇唔緊要，量力而為，控制註碼就是決定勝負的先決條件。

最後一點，「等待」也是策略的一種，老狐貍名言：「唔贏唔緊要，千萬不要輸」，只要多留意，多有自己思考，大家也必定可以在下一浪做個贏家。

如大家有興趣，歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍

再談我最愛的板塊 – 證券殼 老狐狸

亞太區股市前兩天終於出現較為像樣的反彈，恆指反彈逾1,300點，若大家有留意小弟的專頁或上一篇文章，曾指出前幾天全世界一致睇淡，但大市成交不足，反映大戶並無對手，那一刻報章、朋友個個愁雲慘霧，食不下咽，老狐貍叫大家抱住「笑莫笑、悲莫悲」的心態去投資，指出那一刻大市是抵，但未知是否就是底，建議勇者控制註碼出手，而怕死的朋友，等待也不是罪 ，因為輸才是罪。

結果就在淡水大鱷在無對手下，只有自相殘殺，互挾淡倉，令指數急升，以大股為上升龍頭，接下來個別股仔開始異動，又係狐貍睡醒時。

回想今年有兩隻股份令小弟至今仍然係正數，如果大家係老朋友的話，當然知道小弟所講的是華富國際(952.HK) 和雅高控股(3313.HK)。華富國際今年為今年貢獻了逾倍的回報，而沽出後持有最重倉的雅高控股則為小弟避過了大部份跌浪，當然不安份守己的我仍因為手多多而為劍氣所傷，幸而仍可以笑住同大家分享。

在未知未來有何板塊跑出之時，又係還原基本步的時後，睇一睇小弟的老本行 — 最愛的證券股，睇下會唔會有咩機會。

雖然呢幾個月大市忽高忽低，但行內的收購合併似從未停下來，可以講大有大玩，細有細玩，近期較大型的收購/或曾被收購的包括：

老狐貍深信，國內來港收購香港上市證券殼的潮流並未過去，相反，只要大股東意興闌珊，又或遇到好價錢，又好難忍手唔賣，但只要有心想賣，似乎都可以輕易易手的。現時在大市有望深調下值搏率上升，似乎又係做下功課的時候，小弟深信X銀國際，Y證中國等國內金融巨頭將會主導香港的證券市場。

筆者今次列4隻仍然雲英未嫁的上市證券殼俾大家選秀，排名不分先後：

717.HK 英皇證券 (9月10日收市價$0.61)

其為英皇系的證券上市公司，英皇系近年動作多多，亦曾有出售新傳媒(708.HK)予恒大的優良紀錄，故相信以楊氏的網絡，要把此公司賣主好人家確實不難，一切只在乎作價問題，而公司牌照齊全，亦曾在上一跌浪前有多宗財技動作，似已埋下伏線。

2015年3月: $0.5 配售13億股

4月: $0.5 供股，2 供1 (13.16億股)

7月: $0.88 配售5億股

8月7日: $0.63 配2.3億舊股予一間中國最大的金融機構之一 (見下圖)

以執筆日(9月10日收市)$0.61計，買入價仍低於該金融機構的入股成本。

集團今年動作多多，多次以$0.5左右價錢成功配售，以其年內高位$2.03，最低$0.43，心水青的大家單單係值搏率已可以賭一下了，若然該金融機構的胃納大一點，想要多點股份的話，股價又會如何呢？

821.HK 滙盈控股 (9月10日收市價$1.73)

集團於8月初正式出通告指與潛在投資者有初步討論出售股權，或最終令控股權出現變動(見下圖)。只要襄王有心，以其牌照整全下，要轉手可以話不難，只係此股份在呢個跌浪調整唔多，真係要有D勇氣至得，但係今次所講的4隻股份之中，只有呢隻可以出到通告，似乎係最接近岸邊的一隻，至於搏唔搏，大家自行決定。

年內高位$2.96，低位$0.58

510.HK 時富金融 (9月10日收市價$0.36)

時富系為老狐貍過往的愛股之一，佢以往佢兩母子每年多兩年就抽水一次，令狐貍家族都得很好的營養，只係今年3月時，由於小弟醉心於華富國際，沒有炒賣當時獲國內泛海控股(000046.SZ)以每股$0.37 洽購的時富金融，曾最高炒至$1.13，最終因過不了股東大會投票而告收購失敗，股價最低跌至$0.25。

此事件有兩點值得註意：

1. 大股東關生仍然有心出售，只係在華富能以高P/B出售股份予民銀國際下，關先生當然有D唔抵得林老闆套現得咁開心啦，故此唔肯收如此低價，亦可以話佢下次要賣的價格必定超過上次的$0.37。

2. 上次買野失敗既泛海控股當然唔係泛泛之輩，佢亦會參考市價再向其他公司埋手，所以市場的買家仍在，只係目標係邊個而已。

最後一點老狐貍覺得有D玄機，上次出售失敗後，其母公司時富投資(1049.HK)宣佈以$0.4每兩股供一股，老狐貍心地唔好，猜測若然上次有人在高位套現後，想趁低位收一收D貨，可以在下次出售時再糊出一舖「國士無雙」，豈不快哉？ 此為一舉兩得，可以供錢，又可供乾，三個字：「無銀得輸呀」。

619.HK 南華金融 (9月10日收市價$0.091)

南華金融為四隻中最先一隻曾經洽隻股份，但於去年9月宣佈失敗，反映出其大股東亦有心出售，公司狀況理想。後於本年5月宣佈一連串行動，先和系內公司南華置地(8155.HK)訂立協議書，向其出售南華資產管理 (其實呢個牌值D錢，唔明點解會咁做)，同月，以每股$0.1，2 供1 發行25.14億股。

其供股反應非常熱烈，反映於$0.1價位有相當吸引力。

最吸引的一點為其市值不足7億元，簡直係半賣半送，以其供股價$0.1，年內高低位分別為$0.255及$0.07，其水平$0.09左右可以說相當吸引，只希望呢個賣殼潮未退，就可以高位食糊。

其實呢4隻各有各的beauty之處，當然賣唔成的風險尚在，但只要有其中一隻成功出售，則「一人得道，雞犬升天」，以個市調整到得21,500點，我又唔係好怕死喎。

至於邊一隻？我又唔會作出呢d建議住，或者遲d再講講我的目標吧。

好耐無寫過篇咁長既文章了，有點心力交瘁，又要抖抖先。

如大家有興趣，歡迎大家加老狐貍的FANPAGE交流下啦
https://www.facebook.com/oldfoxfanclub

老狐貍

(此文章只為個人的紀錄，不構成任何投資推介及遊說，投資可升可跌，有一定風險，請向閣下的持牌投資顧問作咨詢)

擲死投資者的故事 老狐狸

這星期大市似乎想找個位置站穩，然而股仔市場卻大起大落，市場炒鬼茶餘飯後都在討論緊證監會同港交所想規管創業板上市問題。

事件引發點主要在之前某只貨乾主板股份在單日炒至過百億市值後，市場一直都在留意住監管當局對該次事件的反應，但由於無聲無氣，大市又跌到死死下，部份市場人仕餓得太耐，就把檔口開在監管更加鬆的創業板上。

究竟呢次事件有D咩人輸錢呢？老狐貍近日聽左兩個例子：

第一個例子為老狐貍的一名年青同事，名牌大學會計系畢業，在第一隻創業板高空擲物事件 (#8369 立基工程上市第二日)，膽粗粗拿了一半的老婆本係約$0.26買了20萬股，之後一直面青口唇白咁望住佢跌到約$0.231，早已嚇到心驚膽跳的他在第二日一早在約$0.31沽出，約贏了1萬大元，當日更輕鬆的找女朋友吃個行政午餐慶祝，第二天見該股衝上了$0.8，即面紅耳赤地破口大罵，完全唔記得當日曾嚇破了膽，並揚言下一隻一定要捉到隻勁的。

唔怕你精唔怕你呆，最怕你唔來就係股市的寫照，好快呢名後生仔睇報紙見到某系財演說應力控股(8141.HK)是立基第二，佢睇曬所有資料後即時財技派掌門人上身咁話必掂，把上次的連本帶利係約3蚊邊買了2萬股，後來大家當然知道發生咩事，至今老狐貍個位同事仍然係度望鄉，唔知佢女朋友知道後點算。

第二個例子為一名資深炒家，他以炒股起家，在2004年曾贏了一層「愛都大廈」並持有至今，現在一間最多炒家聚集的「甲組行」打躉，又係在立基工程上市的第二天，在約$0.3幾左右開始收集，每次幾十萬幾十萬排出來買，卻遭當日的主要沽家見有買盤就「當仁不讓」咁隊穿曬所有支持位，直指向$0.25，以該名老手的紀律，佢只會短聚，絶不過夜，加上最怕佢停牌，就係未穿大位的$0.26沽清，據佢所講短短十幾分鐘輸左幾十萬，真係搵個明星gathering都可以了。

睇完呢兩個例子，可能你會話邊個叫你貪心喎？這個當然，邊個「炒」股票唔貪心呢？但點解會引發咁多人討論呢？

(1) 不公平戰場

以現行的創業板上市規則，只要找到足夠人頭，可以以全配售方式去俾d「友好」，呢d友好手頭有批平貨，自然聽聽話話，待股價mark到幾十倍的天價，上升幅榜後引起各散戶炒家註意，再狠狠地擲落黎，而一眾散戶和炒家則赤膊上陣，浴血戰場，由於死狀恐佈，引起監管的關註。

而該公司的持分者，贏了一筆後公司的controlling 仍在，可能到上市一年後，輕則再集資，甚或賣殼去再食埋尾糊，由於此類business model搵到食，加上近年「財技派」盛行，個個得半桶水時就個個中伏，相關人仕則贏到嘔。

(2) 財演以財技股來包裝

如之前所講，近年財技分析變為主流之一，而各財演明顯地分黨分派地「分析」相關股份，在其專欄或所屬雜誌上品評一下，引起得幾滴水或最多半桶水的投資者如蟻附壇去買入，死傷慘重。

其實近日報章或市場都在討論呢幾隻焦點股，點解？其實好易理解，因為人性係輸的唔忿氣，沒份贏的唔抵得，贏大錢的幾十人得罪全世界，咪會被口誅筆伐咯。

老狐貍同意現在的規管的確係有所不足，但小弟常常講，買之前都望下間公司做乜，咩價上市好喎，如果你乜都唔睇去短炒，都要定好止蝕，或者好好控制註碼，財不入急門，唔好用救命錢或借錢去玩呀。

(按：老狐貍又再放假旅行去，又要暫停一下)

老狐貍

如大家有興趣，歡迎大家加老狐貍的FANPAGE交流下啦

https://www.facebook.com/oldfoxfanclub