📖 ZKIZ Archives

肉餅在茶餐廳、酒樓都食得到，在香港只有「屏山老地方」比較出名。廿三歲老闆劉治煇與拍檔阿Joe曾經想過做特色串燒、沙爹牛肉漢堡，「嗰啲市場上已經有，唔夠新鮮，加上肉餅可塑性大。」阿煇搞搞新意思，配上蟹蓋、果醬、芝士這些元素，想出三十二款的肉餅專門店「肉餅哥」，吸引傳媒報導後迅速竄紅。窮小子阿煇夢想要成為另一個楊貫一，肉餅哥便是他追夢要發達的第一步，「我依家係小試牛刀，唔會諗淨係開一間！」

這間位於荃灣聯仁街，鄰近工業區的小店，由地鐵站出發，要步行十多分鐘，再隨時要排上兩小時，但無阻慕名而來的客人。以龍蝦、帆立貝、鮑魚、鵝肝這四款九十八元特色肉餅吸客，其餘午市四十八元，晚市五十八元，全部可煎可蒸。肉餅哥靠綽頭彈出，味道亦有一定水準，才成為OpenRice三月份好評餐廳十強的第二位。阿煇指以前工作的廚房有六個「鑊」，他離職前已升至第三鑊，「第二隻鑊個師傅五十幾歲，第四隻鑊都四十歲。我上位咁快因為班師傅肯教我嘢，所以我學得好快。佢哋唔係鍾意賭馬就爛飲酒，我最初人工六千五，都用幾千蚊請佢哋飲酒，又會俾幾百蚊夾份買馬，贏就師傅嘅，輸就我嘅。」根基打得好，阿煇不甘再打工，於是選擇開鋪。荃灣鋪只是一個起步，他急於三十歲前能夠成名，「三十而立，如果我廿幾歲就有一番事業就成功好多。」阿煇本來預計鋪頭最初要守，儲到一定客源才會有錢賺，不過經媒體報導後大排長龍，午市賣二百多份肉餅，晚市四百份起跳。做到甩轆但卻有很多意料之外的事令阿煇三月白做無錢賺。「冷氣都搬咗四次，食環署話唔可以放上天花，就搬番落嚟。之後業主立案法團就投訴我僭建，同我講升高二點五米就得。升高咗食環又話我放到咁高，要入圖則o架喎。」結果額外花多了萬多元。而旺丁不旺財的主因是出菜太慢及貨源不穩定，最後阿煇將問題一一解決，就即月賺九萬。

穩定來貨：

生意好，阿煇卻大吐苦水，「頭一個月預計每日賣到五十斤豬肉，大概百多塊。《蘋果日報》報導完一下子跳升幾倍，每日賣到六百幾塊，排隊排到塞住旁邊大廈入口。」生意急升之際，盈利卻全貼給食材供應商，最吸引的龍蝦預計一日賣到五十隻，點知轉個頭就賣晒，「原隻龍蝦肉餅賣九十八元一份，拆肉混入肉餅，將兩個蟹鉗放面，我七十幾蚊買隻龍蝦返嚟，都無得賺幾多。唉，有一晚我要打電話叫海鮮檔老闆開門，我百一蚊同佢買五十隻，蝕住做！」又有一次澳洲龍蝦缺貨，他被迫用較貴沒有鉗的本地龍蝦，「要成百五蚊隻，個客仲要投訴無鉗！」當時未找到穩定供應商，街市的海鮮檔又坐地起價：「好似夾埋咁，依間無龍蝦就嗰間有，個價佢話幾多就幾多。」經過頭一個月，預計到龍蝦大概每日要一百五十隻，每日向批發商取貨就不用再被坐地起價。豬肉是肉餅的靈魂，阿煇用了五花腩與前赤（前腿肉）兩個部位，肉碎混在一起再手打至「起膠」，「肉餅要夠香一定要有豬油，但肥豬肉質素唔穩定，所以我用五花腩。但怕手切唔夠碎，俾客人食到成嚿肥膏，所以買用機打碎嘅。選用前赤就因肉味夠濃，合而為一後既有油香亦有肉味。」不過豬肉每斤十八元，供應商忽然說人手成本提高，加至每斤廿二元，「合作咗一個星期，人手成本就高咗？我星期一至四每日賣到百五斤豬肉，週末二百多斤。每斤加四蚊，每月就加二萬幾蚊。」不過為保持質素一致，阿煇惟有繼續用，最近已成功爭取減至每斤二十元，慳到萬多元。

出菜快一倍：

起初入貨被人鑿一筆，出菜慢亦是死因。阿煇坦言當時出一份肉餅要近廿分鐘，「你知香港人啦，要佢等咁耐，直頭搬埋我阿媽出嚟。當時飯可以轉烏冬或者漢堡，不過烏冬要淥，漢堡要烘脆，太花時間，所以停咗做。」不過廚房只有四個人，雖然減少了工序，但始終趕不上速度。阿煇為頭半小時準備的肉餅，十五分鐘就賣光。因此阿煇高價多請了六個人，「啲人見我個場咁爆，唔敢做呀。樓面市價萬二，我出到萬六。廚房市價萬五，我出到萬八，因為我要有技術嘅師傅，佢哋要同時煎十塊肉餅，火候要控制得好。」人工雖然高了，但可以做多幾輪客，阿煇計過數覺得值得。花了錢請人，亦要充分運用人手做好準備，「唔好以為獨沽一味做肉餅好快，因為肉餅嘅餡唔同要分開做，唔同茶餐廳好多嘢可以預先整定，好似乾炒牛河全程用熱水坐熱保溫，一夾出去就食得。」蒸肉餅比較簡單，蒸十二分鐘便可，若客人選擇煎肉餅，便要在蒸好後額外煎香兩邊。經過一個月時間，阿煇大致摸清客人的需求，幾樣主打如龍蝦肉餅每日一定過百份，金沙蛋黃七十份左右，流心芝士約六十份，「大路嘅肉餅先放啲去蒸，有單好快可以煎香上碟，依家十分鐘出到菜。」阿煇笑說還要多謝香港人夠識做，「啲客見你咁多人，好快食完就走，唔會坐一兩個鐘。」

開鋪靠自己：

阿煇開鋪出資六十萬，他自豪說全靠自己，「我之前好積極搵錢，駁住返兩份工，每日做十五、六個鐘，加埋都有二萬蚊，另外有同事想放假我又會賣年假俾佢，賺多少少。」因為他有一個夢想，「係誇張，但我想做到楊貫一，廚房佬出身，但個個都知佢有錢。我喺香港出世，又無父蔭，所以對錢會有渴求，覺得錢俾到安全感我。」當時他在餐廳落場時，會留意日經、道指，返通宵更到早上收工，在回家路上就落盤買牛熊證，「以前恒指高過一個位，多數都升，跌多過幾十點就買熊，我升幾格就走，都唔會擺隔夜，慢慢就滾存咗幾十萬。」阿煇預計年半回本後，便會開分店將生意再發大，他得戚話唔怕人抄，「我已經諗好晒之後嘅發展，我腦入面已經有幾百個款，個個月轉款都得，之後又會加入京式、新疆式，唔單只豬肉，仲會有牛、羊、酥皮，唔怕有人抄，因為我一定轉得快過佢。」

開業資料（3/16）租金：$240,000（3按1上）裝修、廚具：$500,000頂手費：$200,000雜費：$160,000總投資：$1,100,000

營業資料（4/16）營業額：$786,900租金：$60,000入貨：$300,000人工：$263,000（10名員工）雜費：$73,000盈利：$90,900

撰文：孫樂祈攝影、攝錄：關永浩[email protected]

過往《壹盤生意》賺得多的商鋪，老闆們都「踢晒腳」，攝影師必定會影到人山人海。今次的眼鏡店「形品」，經營四年，現時月賺十萬，卻是門可羅雀，鋪頭全日做幾個客生意，空閒得很，四十五歲的夫婦檔老闆余文偉Andy與庾佩珊Kitty，大部分時間都是抹玻璃櫃、眼鏡片，間中聯絡客人。形品賣較有特色的手造眼鏡，其中最多的是日本品牌「金子眼鏡」，平均二千五百元一副。並非自由行最愛的Dior、Gucci，故自由行大減仍無損生意，「我哋九成係本地客，唔似大街幾十萬租，靠自由行的鋪頭，做本地客先長做長有。」悶聲發大財的兩人多次期望記者少提他們的盈利，「唔好講咁多我賺錢呀，業主睇到會加我租呀！」四年間慢慢累積熟客，才有今天的成績，「依家有四千幾個熟客，每年仲有大約一成五增長。」

Andy大學畢業便開始其視光師生涯，由第二年升上經理一職，隨後二十年中一直原地踏步。到八年前他遇上新老闆朱生，令他有機會自立門戶，「朱生俾機會我接觸鏡行、處理入貨，嗰時開始知道來貨價，公司點樣先賺到錢。」眼前升職依然無望，於是便與做推銷員的妻子拍住上，於旺角銀行中心開鋪，以為會一帆風順，「開鋪前我接觸開嘅代理都話會供貨俾我，結果大部分反口，其後知道我找到數先肯俾貨我。」一年後生意開始穩定，便被業主逼遷，選擇搬到現鋪，位處於香港的核心地帶旺角的外圍，在麥花臣球場斜對面，「選呢間鋪因為門口可以停車，又近黑布街，車主整車前後，可以停低入嚟睇。而且旁邊就係老牌客家菜泉章居，附近好少鋪頭，等位的食客有機會過來。」

轉型手造眼鏡

不過Andy大呼生意慘淡，因頭一年接連有大廈維修與重鋪地下水管工程。生意遲遲未上軌道，搬鋪後頭兩年，兩人沒有放過一天假，加上潮牌無特色，不用專程到形品購買，故此兩人決定改變定位專賣手造眼鏡。轉賣手造眼鏡除了有特色，盈利亦較為穩定，「大牌子每年出兩、三次新款，一出新款，舊款就唔值錢，我哋其實知大概賣到幾多，不過每個牌子最少要入七十幾副，所以好多時都要減價清貨，三四折咁平賣，賺頭蝕尾。」

手造矜貴月製二百

手造眼鏡很矜貴，因一位師傅每月製作不足二百副，不能以機器量產，因原料「賽璐珞」易燃，以機器量產的過程會有過熱引發火災的風險。而製成品的彈性與強度很高，而且製作後拋光。但這些高價商品有錢都未必買到，「佢哋唔想影響自己公司形象，所以唔係俾錢就買到。」幸運地，日本手造眼鏡品牌金子眼鏡，其高層路過形品，覺得鋪頭門面、視光師合乎要求，主動邀請形品購買。因有金子眼鏡認同，其他手造品牌如歐洲的Lindberg、Mykita就較易購入，「歐洲代理見我哋有金子眼鏡，我又應承會放佢嘅品牌喺最當眼位置，終於一間一間傾得成，慢慢將舊有的潮流品牌淘汰。」

入平實貨

做零售業最忌責貨，尤其這些幾千元貴價商品，「我哋入貨好小心，入錯咗就無錢入新貨啦。」為求貨如輪轉不責貨，Kitty入貨大多選擇黑色、啡色等可以返工、見客的顏色，「最緊要戴得舒服，平實唔好誇張。誇張款客人戴上去笑吓影張相就放低，好少有人買，尤其我哋嘅客人大部分係專業人士。」平實亦有其潮流，例如上年流行粗框眼鏡，今年流行幼框，他們會根據報章、雜誌的介紹，了解今季潮流。Kitty統計過每十款才有一款，需要半年至九個月才賣出。

專攻日牌歐牌

平時每月各品牌都會入十幾副眼鏡，通常三月、八月、九月Andy都會暫停入貨，因為四月香港有眼鏡展，十月日本，十一月歐洲，他要儲備子彈掃新貨，「歐洲品牌Lindberg平均二千蚊，我入百五副，都要三十萬，而且佢哋無數期，要先找數，都幾大壓力。」而店鋪的現金流與貨物大概保持在一比二，眼鏡框保持約一百萬，現金流保持五十萬，以確保能夠隨時入貨。

熟客生意

兩位老闆都四字頭，做生意亦回歸基本步，靠親切感贏得熟客信任。首先是要打開話題，「我會等客人行咗一個圈先行過去介紹，其間同佢傾偈，有幾個話題好易中。有無養寵物，依區有邊間食肆好食，有無去旅行。通常都可以講落去，近排日圓跌番，邊間酒店好住之類。」Kitty之前做連卡佛的推銷員，認人成為她的職業技能，採訪期間，Kitty的確能說出每一個客人的名字，「我講得出佢個名，記得佢配過咩眼鏡，咁會有親切感。你剛才見到廿幾歲的阿森，做工程生意，佢配幾次都係圓框眼鏡，所以我問佢又配圓框呀？佢就知道我記得佢。」為此Kitty不請員工，決定夫妻檔一起開鋪。在成功的背後，他二人頭兩年都沒有放假，到今天也只每月放假一天。

開業資料（3/11）租金（兩按一上）：$180,000裝修：$600,000入貨：$120,000儀器：$50,000總投資：$950,000

營業資料（5/16）營業額：$500,000 租金：$60,000 入貨：$200,000 人工（兩名老闆）：$70,000雜費：$50,000 盈利：$120,000

撰文：孫樂祈攝影：關永浩攝錄：關永浩[email protected]

訂造手機殼、上衣的本地品牌Casetify、Snaptee，生意遍布全球。去年尾廿八歲的黎鈞國（Quinn）照辦煮碗，與三個拍檔合夥，將設計平台放在日本機械錶上，創立Eoniq，半年間facebook與Instagram專頁中已經有超過十四萬like，月賺十萬元。生意有成績，父母理應感安慰，但在他家人眼中卻是：「你唔為自己諗，都為下一代諗！做生意好大風險。」辭職創業的念頭，在家中激起千重浪，全因他之前月入九萬元。

Quinn會考後到海外升學，於史丹福大學機械工程碩士畢業後，先後於「顧問界的高盛」McKinsey中任職顧問、跨國個人電腦生產商HP中任產品經理，月薪九萬元，亦有大好前途，「我當時個直屬上司高我五級，中間有好多位俾我升，而且七年間做得好，一般可以跳出去做VP（副總裁）。」薪高糧準，前途一片光明，父母難免極力反對他辭職，對他說：「咁辛苦栽培你，拮据嘅情況下都花幾百萬，送你去美國讀書，有學歷、有好工，你走去創業，咁係浪費晒我哋嘅心血！」但他堅持將他的興趣化成事業。往日花錢買錶拆，今日砌錶賣。客人在網上頁面選擇錶殼的顏色、錶面款式、錶面圖案、指針粗幼等項目。他每天重複將錶肉放入錶殼，再放入刻上客人設計的錶面，裝上時分秒針，最後蓋上玻璃罩。

三招facebook宣傳

一個新品牌，賣二百多美元一隻錶，並且能夠每月賣近三百隻，成功在於Quinn識玩社交媒體。至今半年間，facebook與Instagram兩個社交媒體均有十四萬followers，最初他什麼方法都用，「follow其他品牌嘅follower、送錶俾ＫＯＬ（網絡紅人），不過大牌子成本低，派十隻返一隻都有賺，我哋做唔到。」試過不同方法，還是賣廣告生意增長快，很多網店指facebook賣廣告成效逐漸減低，Quinn直指：「只係香港社交媒體marketing太廢，我搵過幾間公司，差唔多要我教番佢哋做。」Quinn有三大策略玩facebook。第一：唔好hard sell。「你目標係要俾好嘢人睇，多人睇自然有人買嘢，唔好不停叫人買錶。post內容夠唔夠好，你睇吓幾多人tag朋友就知。」第二：文青風。「返完工咁辛苦，都係想輕鬆吓。隻錶大特寫好悶，我發現最吸引人睇，係在錶旁邊加杯咖啡，背景白雪雪，有時加啲乾花，感覺好lifestyle。」第三：tag得夠細。「同樣係年輕情侶、未來一個月周年紀念或者生日、有上亞馬遜網購，分別tag鍾意錶同手作嘢，結果可以好唔同。你好難估邊個會有反應，要tag細啲，多試不同tag。」成功吸like之餘，亦吸到金，Quinn說他每月都用十多萬賣廣告，「因為有成效，平均用三十蚊美金，就有一個人買錶。」現時生意兩成香港，八成海外，而其中大部分是東南亞國家。成功俘虜他們，Quinn認為是他擊中當地人的消費習慣，「我有朋友喺印尼，佢話大部分富起來嘅人，因為經歷過貧窮，心底裡覺得要節儉，所以比較少買貴嘢，但其實佢哋買買吓中價貨都使唔少錢。」

用日本錶減退貨

Quinn自中學開始拆錶研究，拆過百多隻錶，再重新組合。他運用以前拆錶的經驗，分別拆開日本與大陸錶肉仔細研究，外表較平凡的日本錶肉，在防震方面贏九條街，「大陸嘢一跌，個軸就彎甚至斷。日本錶肉唔單止軸唔彎，佢個齒輪鬆鬆哋，我用手郁佢都識彈番轉頭，一般震盪唔會影響到時間。」因Quinn貪平買過一批大陸錶肉，大部分送出去都「打回頭」，「大陸錶肉一百蚊，日本起碼二百。大陸錶肉平得嚟打磨又靚，好多客都唔揀日本貨，要大陸貨。但原來得個樣，一跌就壞。」他測試過兩批錶肉，用泡泡膠紙包着錶掉到地上，結果唔使講都知，「大陸貨跌一兩次就壞，日本貨我用力掉，錶帶螺絲都斷埋都無事。」轉用日本貨後，「打回頭」的次數大減八成，少於一成會退貨。但同日本人做生意一向麻煩，「佢個貨期要九個月先有，我無可能等到，亦估唔到九個月後賣幾多。撞啱近排市道唔好，好多賣錶公司之前買多咗錶肉，依家放番出嚟。」日後零售市道回暖，向賣錶公司買錶肉的成本或會增加。

Custom錶是雙刃劍

作為初創企業，Quinn還有一堆問題要解決，最大特色，亦是最大弊病，是要客人設計，「客人無信心自己設計得靚。」Quinn眉頭一皺，「唉！因為我哋啲錶千幾蚊，唔似一件衫幾百蚊！如果出嚟唔靚好嘥錢。而且香港人太忙，無時間慢慢設計，所以一般外地訂單設計得比較靚。」創意真的不是每個人都有，所以Quinn預先設計一批錶面，「對自己有信心嘅，佢可以選由零開始自己設計；無信心嘅，佢可以由四十款設計揀心水款式，再改動成自己鍾意嘅。」另一困難是要做獨一無二的手錶，等一個月時間，Quinn道出困難並非工序多，「要儲單呀！錶面設計我交俾廠做，但佢唔接太細訂單，所以要等夠單先送去。如果我單量夠大唔使等，一個星期就可以交到貨啦。」生意上的困難未解決，幸好家人的矛盾已化解，「我送咗隻自己設計嘅錶俾爸爸，佢收到好感動。錢係賺得比以前少，不過佢依家都支持我，間中會同我傾吓生意有咩地方可以改善。」

開業資料（10/15）租金$4,000 入貨、網頁設計$936,000 儀器$50,000 雜費$10,000 總投資$1,000,000

營業資料（06/16）營業額$500,000 人工*、入貨$385,000 租金$15,000 盈利$100,000

* 7個全職員工

撰文：孫樂祈攝影：鄭樹清攝錄：廖健昌[email protected]

北區雙非、水貨問題嚴重，「中港大戰」一觸即發，但有危就有機。「雙非兒童」成了香港人的恐慌，亦為教育事業造就無限商機。三十九歲的李沛霖(Bosco），明白「強國」遍地黃金的道理，早在七年前就籌備在深圳開辦專為跨境學童而設的「智高教育中心」。他先在上水租廉價村屋教導新移民學生，幾個月後再北上找鋪位。專攻跨境學生市場。為了解內地家長需要，自己更親自搬到福田居住，成為半個「強國人」。補習社標榜「港式教育」，除了採用「港」式裝修外，更表明全部聘請香港老師，吸引一眾內地家長。現時補習社因供不應求更密謀在羅湖再開分店。由小學體育老師搖身一變，成為過百名學生的「雙非補習天王」，Bosco直言政府叫停雙非「無有怕」：「呢度仲有好多單非，好多香港學校都鍾意收跨境學童，我對生意好有信心！」

記者到福田分校訪問，雖然正值暑假，但仍有不少在深圳居住的學生上課。補習社位於口岸對面住宅區不遠處，而補習社的裝修明顯比上水店落本，與香港連鎖補習社差不多。記者亦親自「試堂」約半小時，發現課堂都以廣東話為主，工作紙及圖書都是用繁體字。他解釋不少學童幼稚園已經學習，溝通沒有大問題：「佢哋其實都唔抗拒，係家長有時聽唔明廣東話，要用番普通話同佢哋溝通。」記者發現小朋友跟香港學生差不多，他們以小組形式上課為主。到了中午十二時，家長亦陸續接小朋友回家，丈夫為港人的劉太指：「福田呢邊好多我哋呢類型家庭，呢度啲老師好有耐性，好細心。」劉小朋友更搶答：「上星期阿sir仲帶咗我去香港遊船河！」而Bosco亦指，內地的小童不算難教，對於港人十分關心的家教、如廁問題，他就指：「就算係香港小朋友都要慢慢教，一開始的確有小朋友唔係咁習慣，一係將好多廁紙丟落廁所又唔沖，但細個開始教，同家長解釋番啲小朋友都肯聽。」

廉租上水村屋做踏腳石

Bosco教院畢業後，在元朗區小學教了兩年，主要負責體育、數學、電腦等科目，對於老師的「薪高、糧準、假期多」，他反而覺得嫌悶，兩年後轉職銷售工作，間中到私人機構擔任老師，每月收入曾經達十萬元。但數年後見市道轉差，開始想辦法轉型：「嗰時開始想做生意，諗過教番小朋友，但人工使得七七八八，就邊進修邊做part time。」儲了三年錢，他就用了七萬多元在上水村屋開第一間補習社：「見到新聞講咁多內地學生落嚟，我唔做多，做少少已經好夠。」。他坦言由於一開始不用聘請老師，大部分裝修都由自己動手，「貪佢呢個位近兩間小學，補習社又唔多，有一定需求。」由於成本低，外觀難免有點殘破，但他指：「我覺得家長最重要都係教好佢啲小朋友，課室靚唔靚都係次要，呢度附近都有兩間小學，但補習社唔算多，所以生意唔難搵。」為了更了解內地家長需要，Bosco在開補習社不久，就搬到深圳福田居住，「嗰陣時上水都已經好多學生新移民o架啦，但係兩邊生活始終都有啲分別。」他表示，深圳開補習社的門檻比香港低，不夠一年已開第一間分店：「用咗一個暑假就裝修好第一間鋪，當時係喺住宅單位，我就間開一間間房嚟做課室。」

港產老師吸客

Bosco透露，由於深圳補習社的老師不少都在小學任教，在港常用的易拉架派傳單、郵寄通函在當地都不太普及，他在收生時都遇到一定困難：「佢哋興介紹，好好彩第一個家長都係拎到傳單話想試吓，當時心諗有第一個就OK，只要我單對單用心教就足夠。」他自言因第一個學生較聰明，令他的家長對學校有信心，吸引其他學生報名，他更向昔日學生埋手：「當時知道十幾年前有個學生嘅侄仔係單非童，嗰時我就主動介紹佢嚟補習社試堂。」深圳補習社由九月開辦，短短兩個月已經吸引近二十名學生報讀。他指最大的原因莫過於用香港老師做生招牌。其中雙非家長謝太指：「個仔其實日日咁早起身都幾辛苦，但係始終香港教育好啲，揀呢度因為全部都係香港老師！」Bosco解釋：「我之前教開書都好清楚，如果唔熟個課程會好難教。」他坦言薪金較貴之外，有部分香港老師都不願到深圳工作：「主要都係年輕人，佢哋會同我講，深圳好似有啲危險，我都盡量會搵住喺元朗、上水嘅人，搵機會約上嚟食餐飯，睇吓個環境，佢哋多數都接受。」

雙非媽有辣有唔辣

不少港人都直指不少內地人行為不文明，但Bosco反指，不少內地家長對補習老師都十分尊敬，港媽也望塵莫及：「香港家長意見會比較多，而內地家長就好有禮貌，見面一定打晒招呼，同埋佢哋一報咗，就好少會轉學校。」Bosco笑言內地家長很少「怪獸家長」，但有時亦太過縱容子女：「好似依家放暑假，佢哋多數都會帶仔女返鄉下，但一走就到十月先返嚟繼續補，到考試就會問我點解會退步。」他指最辛苦反而是向他們解釋香港教育制度：「佢哋會好擔心，好似學校老師一打嚟就好驚，手冊寫咗個欠字又好徬徨，其實可能只係簽漏咗個名。」他更分享有聽過內地家長為了子女入讀較好的中學，打算「走後門」送禮討好老師，並指這行為在內地相當普遍：「就算過時過節月餅嗰啲我都唔收，甚至諗住升中時送俾中學啲老師，打好關係，我哋都要解釋番香港唔興呢啲嘢，千祈唔好咁做！」他指，近年「雙非潮」吸引了不少港人在深圳開補習社，競爭愈來愈大，但他指「單非」成風，對生意前景充滿信心：「依家有幾個學生都喺羅湖住，計劃喺嗰邊開，就算截停咗雙非，呢批學生都可以教到中學，到時可以發展喺深圳讀書嘅學生。」他更透露自己「以身作則」已在福田置業，正打算與深圳居住的女友結婚：「到時我個仔都會係跨境學童啦！」

開業資料（05/2009）

租金：$18,600（兩按一上）裝修：$26,000器材：$6,400雜費：$24,000

合共：$75,000

營業資料（06/2016）

營業額：$350,000租金：$44,000工資#：$190,000雜費：$24,000盈利：$92,000

*所有分店#共15位員工，其中11位為全職老師

撰文：梁延宇攝影：鄭樹清攝錄：林志謙[email protected]

香港寸金尺土，公屋輪候時間極長，上得到樓的一群自然開心得拍手，但同時要接受不能養寵物的規條，被迫跟毛孩無緣也無分。九十後的楊紹廷（Roy）與張永燊（Vincent）正是這樣的一群：「我本身住公屋，而Vincent屋企有老人家對狗敏感，所以我哋兩個完全係無養貓狗嘅經驗。」身為寵物界門外漢的二人，卻於三年前誤打誤撞成立了「PetBB」，由在網上賣貓狗用品，到現在跟八名寵物美容師及超過二十個寄宿家庭合作，逐步建立寵物王國。「年資同經驗當然重要，但非最重要一環，最緊要係我哋有無心。」此盤生意目前不單月賺近五萬，更為二人跟貓狗重新牽上紅線，過着「俾狗圍」的生活。不擺老闆款強調平等關係

初次與二人見面，只見Roy拉着載滿美容用具的沉重皮箱從地鐵站急步走來，對同行的美容師照顧有加。「我哋同美容師係合作模式，老實講無佢哋都唔成事。」是日上門為玩具貴婦狗——奶茶沖涼剪毛，Vincent表示通常只在接待新客時才會跟隨上門，以便對新服務的狗隻有多點了解。剪毛收費按寵物品種及大小而定，大狗約三百八十至四百三十元，細狗則是二百二十至三百元。除了基本護理如剪甲、清淚腺、肛門腺和拔耳毛外，還設全剷、半人手及全人手剪，後者剪法則有造型之分。「就以史納沙為例，會有飛馬裝、耳機裝，貴婦狗就會有熊啤裝。」但Vincent指主人非每次也能如願。「都要先了解狗仔本身嘅毛質係點，就如太貼服嘅毛髮就剪唔到爆炸頭。」對於時下有不少主人為靚為出眾而紛紛幫寵物毛髮染上七彩顏色，二人則異口同聲說：「唔建議！染色點都會對狗毛多少有傷害。」可見他們「愛狗心切」。

剪毛期間奶茶不時四處走動，活像一名坐不定的頑皮小孩，只見美容師羊咩不時以溫柔聲線安撫着牠，更細心地解開奶茶重重打結的毛髮，不久後成功令其乖乖坐好。「試過去外邊鋪頭剪，佢哋會將門關上，隻狗叫到癲咗都唔理。」奶茶主人Mandy指上門剪毛令她放心得多，而只有廿四歲的羊咩同樣表示找PetBB合作能讓她放下心頭大石。「自己鍾意對狗多過對人，有佢哋幫手安排及調停同客人嘅誤會，自己可以專心致志地剪毛。」PetBB目前與八名美容師合作，全部不過三十歲。「自己都係後生就會知，好多嘢唔係單睇年紀。」聽着羊咩清脆的剪刀聲、看着奶茶享受其中的表情，就知道他們沒有看錯人。

廿四小時「交帶」服務讓毛孩父母放心

「以前有客人問我哋，咁後生做得兩三年，交隻狗俾我哋會唔會好大件事？」香港地愛貓狗之人何其多，說是寵物其實更像親生骨肉。年紀輕加上是門外漢，在開店初期確實難以說服一眾毛孩父母，服務惟有更人性化，切合主人所需。「我哋之前搵嗰間寵物酒店，基本上係唔會話俾我哋知佢哋已放狗及已餵食，又無監錄攝影，講真一定會擔心。」金成與太太跟愛犬拉布拉多啫喱一同生活，數月前因家中裝修而需為啫喱暫覓住所，結果找上了PetBB作長達四個月的寄宿服務。主人要在狗隻入住前先填好有關寵物習慣的問題，以了解其習性及健康。「狗酒店係有探訪時間，變相我哋放工想去睇佢都好困難，但Vincent佢哋其實廿四小時去都得，又唔使困籠，三餐同放狗都會WhatsApp相同影片俾我哋。」寄宿服務完結，但PetBB跟啫喱的緣分才剛開始；目前主人金成仍有使用每小時一百八十元的放狗服務。「始終拉布拉多出咗名精力充沛，要每日放電。」訪問當天只見「跳跳扎」的啫喱樂於跟在Vincent左右，毫無生疏之感。希望寄宿的毛孩日益增多，自然需要找來更多寵物家庭。PetBB目前跟超過二十個家庭合作，並規定每個寄宿單位最多養三隻寵物及在入住前預約一次見面，以保障雙方。「我哋本身都好鍾意養狗，俾狗仔嚟寄宿就好似識多個朋友咁。」本身家中有兩隻貴婦狗的Marco最長試過有狗仔來寄宿十天。Roy指寄宿服務同樣是按狗隻品種而定，按日數收費，大狗收費約四至五百元一天，再跟寵物家庭六四分賬。「目前利潤最多嘅都係寄宿，每月平均有三十單。」

自稱寵聖及寵俠互相惡搞儲人氣

「其實我同佢自出世就識，佢係我媽嘅鄰居，我仲喺肚時佢已經一歲，後來又先後讀城大嘅同一科，我而家廿五歲真係識佢足廿五年。」Vincent跟Roy是打架打到大、每隔兩分鐘就絕交一次的典型男孩，常把周星馳的經典對白掛在口邊，以互相取笑為樂。「我哋嘅風格同其他店有唔同，我同Roy都係比較搞鬼，會喺網上分享好多日常嘅片段，完全唔關寵物事都唔奇。」就如星爺在《家有囍事》中所出現的「無定向喪心病狂間歇性全身機能失調症」一樣，以寵俠自居的Vincent跟寵聖Roy不時互相惡搞拍片上網，最經典包括在愚人節時，Vincent在沖涼後被Roy以雞蛋拍頭的爆笑片段，令PetBB在Instagram儲得二萬二千名粉絲，成功增添大家對兩人的印象。「當初單喺Ig賣寵物用品係蝕錢，但唔想認輸就試咗寵物美容，反應幾好就慢慢去增加服務，結果行到今時今日。」PetBB最近新加了免麻醉洗牙服務，同樣大受歡迎，更計劃把辦公室搬到村屋去，除了能增添寵物寄宿的地方，最重要是兩人可以光明正大地養狗。

開業資料（13年8月）租金上期$18,000按金$36,000入貨$10,000裝修$30,000網店$3,000總投資$97,000

營業資料（16年10月）營業額$130,000分佣 ＃$60,000租金$18,000廣告$2,000雜費$2,000盈利$48,000＃寄宿及美容服務需與美容師及寵物家庭分佣

撰文：黃綺敏攝錄：關永浩

[email protected]

香港出名行頭窄，家長心目中子女可成功入大學讀「神科」，子女打機一向被視為「嘥時間」，但近年不少電競比賽獎金豐富，加上周邊商品長賣長有，市場龐大，「玩物喪志」早已過時。今年二十三歲的「機迷」譚兆泓（阿Q）早在中學時已看清即使能上大學，都是「打死一世工」的事實，立心自行創業，上年樹仁大學final year時，籌備開設網店HKQ gamers，決心在網上賣遊戲機及光碟。他先到腦場任職promoter，建立人際網絡，之後用兼職錢買遊戲光碟，邊玩邊「儲貨」，利用二手遊戲為自己的網店建立聲譽，之後更模仿「達哥」開台打機，多方面宣傳自己網店。現時網店開業快近一年，每月已吸引四千名熟客。其中特別版遊戲碟、遊戲周邊商品最賺錢。最厲害的是近日熱賣的任天堂遊戲機Switch，大鋪玩具反斗城推出後一個月都只能入五十多部，而阿Q早着先機，先行購入二十部吸客，成功為網店打響名堂。現時店鋪月賺三萬。收入不比專業人士差，但阿Q指收入多少並非最重要，最重要是天天能繼續打機：「唔好成日諗返office工，日做夜做搵得萬零兩萬蚊，先至無前途！」

訪問期間，阿Q應攝影師的要求「開台」打機拍攝，短短五分鐘，已吸引十多人同時觀看，更留言：「今日做乜咁早開台？」記者見他玩遊戲時十分投入，玩上難度較艱深的遊戲「仁王」時，不斷與觀眾討論「打佢啦」、「太耐無玩、唔記得啦」、「拎道具啦」。「打氣聲」此起彼落，攝影師表示拍攝已完成他亦不為所動，直至成功過關。「每晚俾個時間自己輕鬆吓，又可以介紹吓邊隻好玩，邊隻中伏就唔好買，睇我打機嘅人多數都係啲客。」他表示。

實體店炒價劣行創商機

阿Q直指，自己賣的遊戲不一定最平，「但肯定唔會要客食炒價」，他直指不少遊戲店經常坐地起價，辜負了一班game迷，不少都轉到他的店購買，「我係一出新game就即買嘅人，好似啲game一出，中午十二點，可能賣緊四百蚊，我食埋個飯都已經加廿蚊，一收工七點，又加多廿蚊。」據了解，不少實體店都見遊戲暢銷，就會不斷加價至斷貨，更甚者即使之前顧客已落訂，亦會用種種原因向他們「施壓」加價，心急玩遊戲的機迷亦無奈接受。內地人來港炒樓炒鋪風氣盛行，但阿Q直指，原來他們連遊戲光碟也一樣「狂掃」，助長炒風，「好多時啲鋪頭話無貨，其實留俾大陸人買，因為佢哋一買就買好多隻。」他解釋，由於中國對入口的遊戲內容有嚴格管制，「血腥少少都唔得」，加上不少中文版遊戲只限港台出售，造就他們來港掃貨。而遊戲光碟船期平均都要一個月時間，買不到就要等新貨或二手，令店鋪「長炒長有」。阿Q坦言，自己開店原則之一就是堅持不「炒價」，「講到明係幾多錢就幾多錢，跟番代理商都有建議零售價，一知道幾時出就開post問客要唔要，但係唔使俾訂金，有貨第一時間喺港鐵交收。」

避熱門商品減競爭

現時年輕人開網店，都是以賣食物、飾物、波鞋為主。不少人都以為現時手機遊戲盛行，加上網上娛樂眾多，賣遊戲機及光碟好似「out out哋」。阿Q則持相反意見，「以前細個玩PS2，都無錢打機，到依家搵到錢，加上翻版少咗好多，打開機嘅人都會肯俾錢。」他指現時客人主要是剛出來社會工作的年輕人及家長，男顧客佔九成，「好似我咁，玩開大作嘅手機game始終都滿足唔到，玩開嘅好難話唔玩就唔玩！」事實上，現時網店較少賣遊戲光碟，他面對的對手主要是信和、黃金等實體店。訪問期間正值平日上班時間，但阿Q電腦的WhatsApp響個不停，最少有十名客人同時訂貨，他表示現時平均每日都有五、六十單，最多近三百單，由於客量大，要聘請兩個員工專門回答顧客問題。送貨方面，他在facebook專頁會更新每日到各港鐵站的時間，亦會安排員工在港鐵站候命，方便客人隨時交收。顧客之一的CK就指：「本身自己想放game，IG掃掃吓就發現呢間，之後就開始買埋一份，呢度最好就係送到去最近的港鐵站，出去買來回車錢都要十幾廿蚊啦。」他指阿Q不時都會推優惠，「慳慳埋埋都食到餐飯。」

白做三個月建商譽

網店在上年六月開張，他自言開業成本全都是自己積蓄，唯一靠「父幹」的，就是將太子一個丟空的三百呎單位做倉，「我老豆做年宵，呢度都係用嚟放公仔，依家俾咗我用嚟放game同做直播，但最衰呢度部?成日壞，出入成日要行樓梯。」他一開始以二手game交易為主，他坦言頭兩個月幾乎「白做」，為的就是建立網店知名度。到了九月第一隻足球大作《FIFA17》，成功吸引大批客人，「我就搞買得多有優惠，好多人夾埋十一個成隊波咁買，加上嗰時啲客好心急，而我送到去港鐵站就有優勢。」阿Q坦言，開業頭兩個月因業務太繁忙，沒有時間打機，於是他決定「寓工作於打機」，在網上開台打機，順道宣傳自己網店。他坦言：「我每一隻game都知玩啲乜，個客問到好唔好玩都答到。」他續指，現時不少遊戲廠商都對不好玩的遊戲大事宣傳，令不少顧客不幸「中伏」，「開台就有呢樣好，等啲客睇過先買，就算訂咗見唔好玩想唔要，我都OK。」他指，若客人購買遊戲後不幸「卡關」，他亦樂意於WhatsApp進行協助。

「有咩工可以長期打機？」

不少機迷都慨嘆投身社會後，打機的時間少之又少，自言大學時經常通宵打機的阿Q就指：「唔好成日諗住返office工，我覺得無前途，搵得嗰萬零兩萬蚊就一世，咁搏一搏好過啦。」他指，由於現時訂貨及送貨都有員工幫忙，令他有更加充裕的時間打機，「試過做live，一打就打足兩日，凌晨四、五點俾觀眾叫醒。」他自豪地表示幾乎沒有其他職業可配合他的打機時間，「純粹為咗搵錢嘅，做金融嗰啲更加多，但唔係自己興趣。」至於未來目標，他卻堅持做網店，「其實依家打機嘅人差唔多都會上網，客源都夠，反而想規模再大啲，好似上次賣Nintendo Switch先入到二十部，規模再大啲可以入更加多貨，我都要同客講唔好意思。」

創業錦囊

開網店請老人有着數1. 不要吝嗇請員工，自己一腳踢，公司難以發展。2. 未來香港人口老化，加上長者搭港鐵有優惠，成為將來送貨員的一大趨勢。3. 若客人已落訂，必須如期發貨，「無貨無論點都要搵到有」。4. 顧客「轟炸式」message，都要盡快回覆，他解釋試過有些看似無聊的話題，最後可能是一筆大生意。

撰文：梁延宇攝影、攝錄：廖健昌[email protected]

投身手機平台掘金，真正賺錢的人不多，但一批少女透過直播，卻創造出無限商機。這批美少女看準網上社交平台的直播熱潮，變成無本生利的賺錢工具。她們日夜瘋狂玩直播自己生活細節，催谷自己人氣兼吸納粉絲。原來，當粉絲數目達到一定人數時，便會有產品商或廣告公司找你合作，在直播中替產品賣廣告，這樣便能賺到廣告費。25歲的Katie，便是靠玩直播賣廣告而賺錢。她的Facebook有超過五萬名追隨者，她每玩一小時直播，便可賺到五位數字廣告費。她又說，試過一個月賺到四萬元，收入十分可觀。除了賣廣告，原來在一些手機應用程式玩直播，也會有錢賺，因為這些直播apps有禮物機制，粉絲所送的虛擬禮物，直播可以跟營運商拆賬兌換金錢。而近來，亦開始有直播apps營運商出錢請人玩直播。這種網上真人騷，為一班喜歡玩直播的年輕人提供另一個賺錢機會。打工以外，靠自己也可以找到一條財路。

「我覺得直播係一個好新興行業，只要做到人氣高多人睇，就會有客戶邀請你喺直播時賣廣告，就會有錢。」近一年來，本地出現了一批「直播女」，專門靠在社交平台玩直播，替不同客戶宣傳產品賺取金錢，二十五歲的Katie是其中之一。她說這份工很新穎，適合她們這一代。

乜都直播谷人氣

本來在網店做零食買賣的Katie表示，初初也是貪得意才入行。她說剛起步時，也捱了不少苦，「最初係無錢嘅，因為初起步觀眾唔多，好少粉絲（支持者），基本係零收入。」為了催谷人氣，那時Katie日日玩直播，「乜都直播一餐，好似無無聊聊唱歌，又或最近買咗乜嘢衫，或是玩咗乜嘢遊戲，好玩嘅都會介紹。」玩了大半年，Katie以可愛和搞笑為綽頭，開始多網民認識，超過五萬人追隨她的Facebook，「多咗粉絲睇我直播，就開始有產品商或廣告公司搵我合作。」多數推銷哪些產品呢？「之前多數係推銷電子遊戲，有時又會推銷美容產品，多數直播一小時。」有時更會在街頭玩直播，「之前玩一個手機遊戲時，我係喺街頭直播，因為要捉精靈，不斷跑都辛苦o架，哈哈哈。」

最多月入4萬

至於廣告客戶落單的收費，Katie說會以時間計算，「依家多數以分鐘計算，由三十分鐘至兩小時不等。」她又說每單工作收費都不同，因為要因應粉絲數目，「你粉絲愈多，客戶自然願意俾多啲。」Katie以自己有五萬粉絲為例，通常每次直播一小時，就有五位數字收入，「五位數字頭啦，萬零蚊囉。」試過一個月最多賺多少呢？「加起來都有幾萬蚊，三、四萬啦，唔係太方便講實際數字。」她說直播比較新興，所以客戶也不會太穩定，「我覺得暫時都唔能夠當作正職。」除了替產品在社交平台直播賣廣告外，Katie又說在一些手機應用程式玩直播後，也會有錢賺，「呢啲直播apps有禮物機制，如果有粉絲送虛擬禮物俾你，好似金幣或公仔之類，你可以跟營運商拆賬兌換金錢。」至於拆賬比例，Katie說每個直播apps都不同，「可能有啲係拆一半，即一人一半，有啲就四分一。」

大陸少女月入十萬

Katie稱，直播apps在台灣和大陸十分流行，不少女孩子都投身做「直播員」，因為當地的粉絲十分大方，很樂意送虛擬禮物給「直播員」，「我識好多內地做直播嘅女仔，好多都月入超過十萬港元。」她又說，香港玩直播apps去賺錢的女孩子，對比台灣和大陸是比較少，「大陸同台灣會有公司專門簽人玩直播，會有底薪，當然唔同啦。」其實近幾個月，本地一些直播apps營運商，已開始聘請女孩子玩直播，時間由四十五分鐘至一小時，薪酬每個平台不同，由百多元至數百元也有，「所以我會覺得未來數年，直播賺錢會愈來愈盛行的。」而任職化妝師的Natalie，也會每星期玩兩次網上直播，她不是替商品賣廣告，直播內容只是講自己的生活點滴和工作情況，她希望透過直播來提高自己的知名度，「玩咗直播後，好明顯多人識咗。試過有次喺街，有個男人突然叫我個名同我打招呼，佢話有睇我嘅直播。」她又說，雖然暫時找她化妝的客人沒有大幅增加，但機會是多了，「起碼搵我傾合作嘅人多咗，收入自然有機會增加。」如何建立自己粉絲，她們都說首先要有耐性，起碼要用半年以上時間，日播夜播，去捕捉觀眾心理，這樣粉絲人數才會愈積愈多。

撰文：程志康攝影：王晴、韋平[email protected]