投資股市：鐵江現貨(一) 阿牛
http://hk.myblog.yahoo.com/yomagyomag/article?mid=2630
鐵江現貨
鐵江現貨，中文叫『鐵貨』，母公司Petropavlovsk簡稱PLC，在英國主版上市，喺俄羅斯嘅礦務公司，開採釩鐵鈦礦；同我地隻中國鐵鈦，業務一樣。阿牛厚面皮啲講，即喺我地『行家』。
公司點解叫鐵江現貨，又點解叫IRC，阿牛睇晒成本招股書都唔明，都唔知I喺乜，R同C又喺乜，淨喺知道同『期貨』『現貨』喺冇關係嘅。公司現在投產嘅鐵礦全部來自一個礦坑：Kuranakh。礦石生產之後，就做正常嘅選礦，研碎，然後就賣去中國黑龍江，或者『想』運去海港出口，賣埠。下面幅地圖就喺招股書裡面提供嘅。
礦場在中俄邊境，冇幾遠嘅左上角，寫住Kuranakh嗰度。不過幅地圖冇提供一樣好重要嘅嘢：比例尺。
佢撞啱阿牛，咁佢唔好彩喇；因為佢唔劃，立即就引起懷疑，引阿牛搵幅正規地圖嚟度佢。經量度後，原來礦場離開海邊，右下角嘅大港口Vladivostok，即喺海參威，成二千幾公里遠！
大家知唔知二千幾里有幾遠？
答案喺遠過香港去北京。如果坐火車去，普通慢速度要兩日。所以上面話『想』運 出口，都喺想吓好喇，因為運到港口，運費已經貴到叫救命，都唔駛賣囉。雖然招股書都幻想喺近啲嘅Sovetskaya Gavan，俄羅斯政府可能起個新港口，不過咁嚴重嘅幻想，都喺當冇好啲囉。而且運嚟中國嘅礦沙，有冇港口，都喺靠陸路運輸，鐵路先喺正經，有冇新港口一 啲關係都冇。
我地中國鐵鈦運礦石都喺講最遠三、兩百里路，近嘅一百幾十里，二千里，即喺鐵江要運好幾倍咁遠。所以鐵江由礦場，就算近近地運去黑龍江的估計成本，都高達83.72美分/乾公噸。相比之下，澳洲礦是36.17美分，巴西礦是28.65美分。簡單嚟講即喺鐵江貴三倍。當然，澳洲同巴西嘅礦要再坐船坐車先運到中國，最後加加埋埋，可能抵消番鐵江條數。招股書都特別僻一頁計條數出嚟，證明佢地運費唔喺特貴。
不過佢地都要承認，隨著中國鐵路不斷改善，海路到中國的澳洲和巴西礦石，由大連港上岸之後，運到黑龍江的運輸成本將會逐年漸漸下降，但喺俄羅斯的西伯利亞鐵路，就日漸殘破，運力和運輸成本都會日趨惡劣。在風險因素一欄，公司都披露：
『本集團營運十分倚重俄羅斯鐵路公司經營的鐵路貨運網絡，俄羅斯的國有基建設施發展時期主要在蘇聯及前蘇聯時期興建，並且最近15至20年未獲得充裕資金修護。俄羅斯鐵路系統不斷惡化，軌道車缺乏，容量有限而有中斷風險，如果未能於其後三年改進軌道車輛，可能導至可運作的軌道車輛短缺。倘於Sovetskaya Gavan的港口擴建並不進行，本集團的營運會隨著項目的生產增加而更倚賴俄羅斯鐵路系統。』
一言蔽之，將來運輸會越來越麻煩，越來越大鑊。
點解講嚟講去淨喺講黑龍江呢？因為啲鐵根本賣唔遠，除左賣去黑龍江之外，送禮自奉都冇乜用，賣去外國，吹水嘅啫，運費咁貴根本冇可能。所以佢同中國嘅鐵廠簽晒約，掛左勾，全部喺賣嚟中國嘅喇。
投資股市：鐵江現貨(二) 阿牛
http://hk.myblog.yahoo.com/yomagyomag/article?mid=2631
投資股市：鐵江現貨(二)
黑龍江喺中國最北嘅省份，黑龍江嘅哈爾濱大家一定聽過，再北就喺大興安嶺同俄 羅斯接壤。呢度亦喺滿清嘅發祥地，『白山黑水』就喺最佳形容。山喺白嘅，因為長年積雪，水喺黑嘅，因為太陽光唔夠，而且日照角度低，斜斜地照埋嚟，而唔喺 頭殼頂照落嚟，加上好早就天黑，所以連河水都照唔通，啲水望落去黑monk monk。
滿洲人未入關之前，在關外撈邊行嘅呢？
大家多數會答：佢地喺遊牧民族。
錯嘅。
遊牧民族都有啲羊馬，遊嚟遊去，但喺滿洲人連呢啲動物都養唔到，因為環境惡劣；牧都冇得遊，滿洲人只有做獵人，靠通山走打野獸。所以呢度環境有幾惡劣，可想而知。
而家就梗唔喺咁，好好多喇。不過黑龍江亦唔喺富庶嘅省份。哈爾濱市如果計人均收入，全國排81，去年喺RMB745一個月，黑龍江省，如果全國計，佢嘅收入喺三十一個省和自治市中排第二十，成績屬中下。
作為一個鋼鐵銷售市場，阿牛就覺得黑龍江省非常一般，新建設唔喺冇，但唔喺特 別多；而且中國東北自己都生產大量礦物。大家如果記得日本仔侵華時，攞左東北嘅礦產資源之後，就冒險發動太平洋戰爭，因為佢地諗住有左中國東北，資源都已 經夠用。後來當然發覺冇石油喺另外一個至命弱點，但喺發覺時都已經太遲了。
好喇，下面就喺哈爾濱嘅全年氣溫，大家可以睇到每年有一半時間喺零下嘅。Kuranakh比哈爾濱再 北啲，再內陸啲，而且礦山喺高地，所以更冷，氣候更差。如果大家仲記得阿牛分析中國鐵鈦，就會記得鐵礦喺露天開採的，所以即喺話，有半年時間要在零度以 下，露天採礦。零下都未喺問題，仲會落雪同埋結冰，而且啲機器要冬天在零下十度操作，幾個月後夏天就在二，三十度氣溫操作，對機器損害很大，分分鐘修理機 器都修到你暈陀陀。由於環境惡劣，所以連員工都要請雙倍，因為啲工人不能回家，要做滿一個月，先放一個月假，然後先番得屋企見老婆。公司亦多次提及自己擁 有一隊有經驗嘅開採團隊，呢樣嘢亦喜亦憂，因為只要班人唔扭計，唔跳槽，咁就好地地，如果有乜伊郁，跳草裙舞，咁就大鑊喇。零下二十度，人留在室外，先唔 好講有冇生產力，要保住條命，幾個鐘後行得番入嚟，都喺一門學問，唔喺人人掂㗎。啲工人如果走左，搵邊個做呀？
礦採到之後，跟住就要用水用電嚟鍊礦。阿牛睇落佢地嘅電力，問題不大，但喺水源就缺啲，連員工嘅飲用水，都要由附近鄉莊用小水管引過嚟。
講到呢度，大家都可以想像到當地運作嘅情況，就喺有啲工人在冰天雪地中，下午 三、四點已經要開探射燈，挖啲石頭出嚟，剷上架運礦車，先運去揀礦廠，用機器研碎，篩選，之後又搬番上車，轉去火車站等轉上啲老爺火車度，行幾日，運到嚟 中國邊境，清關進口，然後運去黑龍江嘅某處，等候進廠提鍊。
開完礦之後，工人落左班就番宿舍，煮嘢食，唱民歌同跳土風舞。
定喺番宿舍飲酒食煙，賭錢同打交呢？
投資股市：鐵江現貨(三) 阿牛
http://hk.myblog.yahoo.com/yomagyomag/article?mid=2632
鐵江現貨，上市集資三十至四十億。上市嘅錢，喺用嚟開發公司第二個礦坑，該個礦坑在一個叫Kimkan的地方，因為當地的前期工作已經做好，可以開採了；但喺：
公司已經斗零都冇。
咁Kuranakh嘅一號礦呢，點解賺唔到錢呢？原來2008年Kuranakh一開始投產，就撞啱鐵礦價錢下降，由於缺乏競爭力，於是唯有停產，一切停頓，減少損失。今年初開始由於鐵礦石價格節節上升，所以公司捲土從來，從新投產。
公司自成立到現在，成盤數都喺蝕嘅；最叻就喺Kuranakh剛投產時，嗰年好少少，今年個預測喺全年唔會蝕多過九千五百萬美元，即喺大約七億幾港元！
上市集資得嚟嘅錢喺用嚟給Kimkan投產，同埋處理種種『財務及會計義務』的，簡稱減債。
如果講基本因素，就甚為惡劣；2008年已經證實左，鐵礦價稍為下跌，鐵江就要停產，可見佢嘅開採成本，貴到乜嘢程度。人地啲礦場，價錢差就最多賺少啲，吊吓鹽水，捱過左再算；鐵江一撞到鐵礦跌價就直情摺埋，十分恐怖。
所以：
1)長線嚟講，呢隻嘢前景認真麻麻。
2)同我地嘅中國鐵鈦比，完全冇得揮。不過多一隻鐵礦股上市，多左話題，對我地隻鐵鈦，應該有正面幫助。
3)俄羅斯股票，在港上市的有486俄鋁Rusal，但大家唔多捧場，股價麻麻。
4)呢輪嘅新股非常當炒，好似隻隻都得。
5)但喺，聽講李嘉誠，長實同馬世民竟然入股做基礎投資者，而且股份禁售六個月。
嗱，阿牛又考吓大家，如果你喺基礎投資者，你會點呢？
首 先，間公司長遠落去，真喺唔知會點，長期投資就未必制得過，所以唯有睇中短線。首先唔好俾佢跌，更加不能破發，否則啲股評人，你一言，我一語，數晒啲弱點 出嚟，咁就死得喇，永不超生。所以一上市就要護盤，頂住個雞頭，一路向上。由於佢只喺三、四十億企業，唔喺農行咁大，要頂住都唔喺乜嘢困難。跟住得閒搵啲 『友好』，寫吓文章介紹吓，到Kimkan礦投產又當新前景，吹行佢，啲股民知Q咩，又唔做功課，多人話好咪買囉。到個股價升得好好地，比發行價高出幾 十%，咁就慢慢滲啲貨出嚟。
即喺有得搏，但唔喺實得。升起嚟，有一倍利潤都唔出奇。
* * * * * * * * * * * * * * * * * * * * * *
阿牛策略：行家上市，認購一手，以表支持。瞓身頂頭鎚，你唔好預我。
睇定再算。
投資地產，樓市：阿牛好心煩 阿牛
http://hk.myblog.yahoo.com/yomagyomag/article?mid=2802
投資地產，樓市：阿牛好心煩
點解心煩呢？
因為陶冬先生又出嚟喺imoney話樓市長升長有。
如果換左第二個講，阿牛睬佢都儍。但喺陶大師講，唔睇清楚都唔得。
陶先生主要論點，就喺『錢平』，一厘息就借得到錢，所以資產會越炒越貴。而且應該五年都唔會點加息。錢喺錢行冇息，所以啲人要買樓保值。
阿牛睇完之後，都喺唔信，都喺覺得樓市要跌。
1) 息平 ≠ 借到錢。
美國早幾年可以咁大個次按泡沫吹得起，錢可以借俾啲完全還唔起嘅人，皆因三個理由。第一，因為亂借錢呢個行為，喺由國家，到企業，到員工一層一層推落嚟，公開鼓勵；就算員工明知遲早『賴嘢』，一樣唔怕，因為上面嘅上大人全力支持，唔駛自己上身。
第二，因為大家眼見呢啲垃圾，局然包裝好之後，可以用高價賣斷去國外，作為次級債券，個膽更大。
第三，做得多，做得濫，分花紅仲分多啲；咁你做唔做吖？
反觀香港，銀行界喺穩陣好多嘅，呢啲危險嘢，政府同銀行高層都唔贊成，亂咁嚟，到爆左煲就等炒魷都得喇。做得多亦冇大舊花紅分，咁搏嚟托呀？所以漸漸當啲樓越來越貴，審批就更加嚴格。銀行喺唔會放水嘅，啲人根本借唔到錢買啲啱佢住但喺超貴嘅樓，唔喺利息平貴嘅問題。
阿牛又講番最鍾意講嘅娶老婆。有啲女仔，質素之高，簡直人見人愛，不過佢冇話嫁俾你喎；個女仔唔喺個個嫁嘅，唔喺你鍾意就得，人地揀得好嚴，你冇資格呀。慳啲喇。
呢樣嘢有根據喎，因為最近越嚟越多agent，銀行搵人轉按，搏做生意。因為新做樓宇按揭，漸漸難做，揾啲以前樓價低時買落嘅業主，風險低，生意更好做。
2) 香港人 ≠ 鬼佬
中國人同美國人比，中國人亂駛錢嘅比例，相對少好多。早幾年美國人加按物業，多買物業，其實背後唔喺真喺諗住投資，只喺吐多啲錢出嚟大花筒，嘆世界而已。
請問閣下有冇識得朋友，加按啲錢嚟嘆世界㗎？我估少之又少；如果有啲咁朋友，最好盡快同佢割蓆。
香港人買樓喺100%投資，唔喺玩嘅。個樓市一路升，買樓嘅人一路計數，真喺毛都數清；點會諗唔到啲嘢已經貴得滯，唔應該再買吖。所以一諗到前景情況不明，大家就會停手，唔似鬼佬咁，仍然照買可也，因為醉翁之意不在酒，唔掂咪俾左件貨銀行囉，銀主盤好閒喎。
3) 存定期冇利息 ≠ 會買物業
廿年前我地講『老人』，嗰批唔識字㗎，十年前嗰批『老人』識字但唔識英文。今時今日，六十歲嘅人，喺戰後出生嘅人嚟。七十年代經濟起飛，就喺佢地做嘅，佢地識英文㗎！
六十幾歲人，識買澳元，人仔，財息兼收；完全冇難度。揀隻五厘息嘅股票，賺價賺息，比比皆是。買的士，炒股票，大有人在。
因為銀行定期冇利息，不知所措，迫住要買舊磚頭，收三厘租，唔識有乜其他選擇，好少喇。
等同你話細路女只識玩洋娃娃；細路仔只識玩玩具槍，點會吖，唔好咁戇居喇。
明天繼續。
投資地產，樓市：阿牛好心煩(二)
http://hk.myblog.yahoo.com/yomagyomag/article?mid=2809
4) 今時 ≠ 往日
今一朝嘅投資人，好多都經歷過97同 沙士，見識廣博。新人唔喺冇，喺比例越嚟越少。個理由喺而家嘅後生仔揾唔到錢，工資已經好耐冇漲過，喺以前，叻啲嘅後生仔，三十歲左右就有能力買樓。阿牛 第一間樓喺廿七歲買嘅，屋企斗令資助都冇。而家嘅普通後生仔，基本上冇乜可能咁嘅年紀，買到自己第一間屋。而家替代左我地後生仔，『新嚟新猪肉』 嘅生力軍， 喺國內同胞；但喺，不論佢地嘅注碼多大，新仔就喺新仔，新仔就多數會賴嘢；阿牛估計佢地將會喺今次嘅『炮灰』。
你估有錢買避彈衣，唔駛死呀！
或者你會話，有炮灰得喇，樓市照升。
錯 嘅，以前後生仔做炮灰，樓市跌，佢地蝕錢肉赤，但喺守得住，供得起，因為按揭時喺小心計過嘅。而家如果用國內資金做炮灰，跌市時，未必守得住，可能互相踐 踏。國內嘅錢，啲來源可以復雜到你唔信，亦唔知佢地個心諗乜，佢地啲反應同我地唔同嘅。加上佢地投資豪宅，如果一賣跳樓貨，震撼好大。
國內人排隊，為免俾人打尖，喺後面熊抱住你都咁死嘅，前面嗰個亦唔介意你抱住佢。你得唔得？
5) 買唔番 ≠ 唔會賣
阿牛今日名下已經冇晒物業，不過『關聯 』性物業就仍然有。其中一間六百呎，五年前買值百五，而家值三百五。呢啲半新舊，大屋苑，幾十座，一梯八伙，正是典型家庭居所。供左五年，尚欠銀行九十萬；如果賣左佢就袋兩百六。
呢筆錢對一個小家庭，不無引誘。兩百六萬，只要每年賺到厘半，連埋本來每月嘅供款，就可以在同村租番間一模一樣嘅。超過厘半，就有得落袋。
有啲人如果受唔住誘惑，一個唔覺意，就可能會賣左佢。但喺攞住啲錢，就未必買 番，因為喺以前，如果五年冇換樓，就一定儲到啲錢，賣左樓就會覺得需要改善環境，作為人生過程嘅一部份。但喺當今，一個家庭五年都儲唔到錢，比比皆是，儲 到而唔敢用左佢，更加喺正常反應。改善居住環境呢樣嘢，己經俾香港人剔除左出生命以外，你唔換樓，住得屈質，冇人笑你，人人都體諒你，認為你踏實。今時今 日，環境嘅改善，已經由upgrade住所，變左年年去幾次旅行，大家覺得咁仲實際。
而家去旅行已經唔喺個地方『以前去過未』，而喺『今年去左未』。
6) 今日長升長有嘅藉口 ≠ 以住長升長有嘅藉口
以前長升長有嘅藉口喺：人工年年加10%，買左樓，供得幾年後就唔會覺得辛苦。
而家長升長有嘅藉口喺：息口幾年都唔會加。
以前每年加10%人工基本上由七十年代，到1997從來未令人失望過。即喺過五年，一個人嘅人工喺會由二萬變三萬，都未計會升級，加官進爵。十年後就變四萬幾。所以今日供60%人工，即喺萬二蚊，五年後供萬二，就喺人工40%，十年後就只喺濕濕碎嘅25%，你話喺咪唔錯呢？喺咪唔怕買樓，唔買就笨喇。
而家話利息五年唔升，都喺得95%肯定，而且五年後加息機會喺機乎100%。今年揾二萬，五年後，你估你有冇級升呢？你估人工加左幾多呢？可以有二萬五，已經好好。都未計通漲同可能失業，供樓壓力，基本冇乜點減到。所以五年內，幾乎一定要賣樓。
結論就喺，以前你買樓，幾年後越嚟越供得舒服，完全冇賣嘅必要，樓市升又好，跌又好，仲可以多買一間。今日買樓，你知道幾年後，你完全唔會舒服左，大量加息之前就最好賣左佢再算。最好就喺賣左之後，等樓價跌時再買番。呢個喺唯一『轉身』嘅辦法。
即喺有條死線劃左喺幾年後，要儘量死線前攪掂，然後要黑心望佢跌，跟著先買得番。
以前喺真喺估啲樓價會不停上升，因為通漲不停升緊，年年一成；所以策略要『盡早入市』，同『有咁大買咁大』。
以前咁正面嘅心態，樓市都有起有跌。
而家咁負面嘅心態，你話樓市會唔會長升長有吖？
等如我同你在迪士尼玩，八點鐘會放煙花，梗有靚嘢睇。又等如我同你在荒野玩，八點鐘就會有豺狼食人，梗有人要死。
兩個心情同唔同呢？
廸士尼，你都有機會廢事同人迫，唔睇煙花，早啲走番屋企。
有豺狼嗰度，ASAP走喇。
投資港股：鐵江現貨(四) 阿牛
http://hk.myblog.yahoo.com/yomagyomag/article?mid=2786
投資港股：鐵江現貨(四)
Blog友，股代周瑜先生，今晚俾左個留言阿牛，話：
市場消息，俄國礦企鐵江現貨<01029.HK>擬將招股價由原來每股2.2至3元，降至每股1.8元；大股東亦不會配售舊股。
公司原計劃發售13.25億股，當中包括2.55億股舊股。按此計算，集資額由原來最多39.75億元降至19.26億元。
好大獲呀
呢段嘢喺AAstocks今日中午嘅新聞稿。當中最後嗰句喺阿周先生嘅comment，阿牛估佢個『獲』字打錯啫，應該喺『鑊』先至啱。照估計阿周先生意思喺『大乜鑊』 。而唔喺『大收獲』。冇問題，睇得明就得喇。
不過阿牛反而覺得未必喺『鑊』，應該真喺『獲』都未定。
首先鐵江招股，最近嚟計都怕且喺至醜樣嗰隻，大家應該都有聽聞過。咁如果我喺管理層，就橫豎都喺囉，一定用上限訂價，賣到盡，然後good水鬆人。喺有料到嘅，攞左錢，努力做嘢，用行動証明俾大家睇；喺冇料到嘅，呷左水，番俄羅斯慢慢meat。
咁點解要降定價，減街貨，連『先舊後新』配股都放棄埋呢？
答案喺：想炒起佢。
但公司連斗令都冇，咁點炒呢？
即喺話庄家另有其人。
大家話乜人呢，喺咪策略性股東最有可能呀！
阿牛都講過，間嘢啲料咁差，首要條件就喺不能俾佢破發，否則永不超生。要唔破發，就要死頂著；所以HKD1.8就好頂過HKD3.0好多。HKD1.8炒上HKD3.0就喺升60%，如果HKD3.0發行，死頂著HKD3.0就只喺叫做在發行價徘徊，用嘅錢就差不多；但喺你話邊樣好聽啲吖？
我估鐵江同策略股東有『默契』，即喺超額多少，就幾錢出，唔超額又點，好差又點點點……
如果阿牛估啱，在上市前兩日就有人出暗盤價高HKD1.8兩成，即喺兩個一毫半。在大家猶疑之際，一上市就高開兩成半，即喺兩個二毫半，然後死頂住，中午炒上兩個三毫半，下午鬆鬆手，由得佢跌番落兩個一毫半收市。跟著連續幾日，漸漸炒上二個七，等街貨歸邊後凍結在兩個半左近，遲啲搵機會再推高一浸出貨。
如果真喺咁，阿牛個部署將在上市前一天，十三號星期三，先用亂炒基金嘅全部錢，買入893中國鐵鈦。因為十四號一早，鐵江上市如果上升，893多數陪跑，升番二、三個%。咁十四號上市日，近中午先沽晒啲893套現，夾賺佢幾%，有幾多執幾多。跟著下午收市前，三點九，全部錢買入鐵江，大約HKD2.15。跟住等一等，揸幾日，HKD2.6左右賣，賺四毫半子；加埋鐵鈦嘅大約3%，共賺24%。
不過有好幾個情況要注意：
1) 如果暗盤價唔得，就唔入893，寧願放棄3%，等上市再決定玩唔玩。
2) 如果上升唔夠預期咁多，就照買，不過『止賺點，按比例調低』。
3) 如果第一日收市升太多，多過30%，即喺兩個三毫半，就完全唔買，因為怕水位已經唔多，寧願拉倒放棄。
4) 如果買入後麻麻地，唔炒上兩個六，而個市又唔好，就分分斬倉叫停。不理賺蝕。
呢鋪喺咪幾有趣呢。
P.S. 少少修正：只要暗盤價出左，確認高兩成，就可以買893，廢事893炒高左，買貴嘢；唔一定十三號買，早啲都得。
P.S. 2010/10/9 鐵江延期上喎，麻麻地喇，新股嘅氣氛越嚟越差。
投資港股：鐵江現貨(五) 阿牛
http://hk.myblog.yahoo.com/yomagyomag/article?mid=2880
投資港股：鐵江現貨(五)
隻鐵江本來今日星期四上市，而家有變，要從新認購，下星期四先上市。咁多事實，咁多攪作，個樣就似模似樣，似有人『做嘢』。雖然講fundamentals，鐵江就得啖笑，但喺股市唔喺講fundamentals嘅，特別喺短線的時候。
呢幾日嘅新股麻麻地，前兩日上市嘅2266麗悅，同1733永暉焦煤，齊齊插水。永暉比招股價跌9%；麗悅招股價HKD2.2，但第一日收市HKD1.88，即喺低14.5%，喺今年除左873國際泰豐之外，首日跌最多，最難睇嘅一隻新股。
呢隻股票喺035遠東發展分拆出嚟嘅。佢引起阿牛注意喺因為佢又有兩位本地策略性投資者，一位喺四叔李兆基先生，另一位喺鄭裕彤先生，每人入股一億。
在上市之前，嗰一兩日都有消息佢暗盤價低招股價三、四%，其實咁樣對個上市價，已經有啲啟示，但喺又好似冇乜人擔心，可能因為隻股票個profile本來唔差，在香港、大陸、同東南亞有三千幾間酒店房，做遊客生意。呢樣嘢阿牛就覺得有關人士疏忽左啲，凡事都唔應該咁托大，小心啲得㗎！
佢集團其中一間本地酒店就喺麗悅酒店，位處灣仔。阿牛睇過佢個homepage，一間普通房得18平米，喺好細好迫嘅一種房，都要人USD277一日，寬頻加USD20，然後再加一服務費，共HKD2550一日！如果有人住，就真喺都幾好賺㗎。我地平常住嘅酒店，細晒都有30平米一間房，呢個差唔多喺國際默認嘅雙人房標準。18平米，細得好誇張㗎喇，連行李喼都放唔落；麗悅仲勁嘅就喺，15平米『標準房』都有，但價錢阿牛就查唔到。
好喇，第一日，股價自由發揮之下，變左咁樣：
雖然嗰日個市上升二百幾點，結果隻2266都喺低收一成半。跟住到左第二天，報紙都賣埋，話唔喺好靚，咁於是乎引起『各方好友』嘅關注，在第二日大市下跌嘅情況下，逆市炒高7.45%，收市報HKD2.02。所以：輪到隻鐵江，就真喺暗盤唔好低開，否則千祈唔好跟。當然如果暗盤高開，就照原本計劃，買入鐵鈦打頭陣。
好喇，假設真喺低開，其實喺可以考慮撈底，因為各位策略性投資者，仲蝕得金過我地，跌得太低，好多『各方好友』會關注，於是乎股價有機會反彈。
035遠東發展，喺邱氏家族嘅。佢地呢家人嘅慳儉，俾阿牛印象好深。首先喺好耐好耐以前住過佢地嘅長洲華威酒店；都已經一九九幾年代；阿牛第一次見到香港有酒店熄晒燈，熄晒冷氣慳電。
第二，早幾年，阿牛睇過佢地有個樓盤叫清水灣山莊，啲樓喺以『清水樓』形式交吉；人地啲示範單位天花龍鳳嚟呃人，佢個示範單位，就俾間清水樓你睇，成個厠所爛容容，幾乎鋼筋都睇到咁滯，印象深刻。
第三，阿牛睇過一篇專訪，講佢老爺，邱德根先生；佢屋企大廳有一排戲院用嘅『彈摺櫈』，喺拆元朗最後一間戲院時，攞番屋企嘅。阿牛以為老人家念舊，都好正常啫，因為邱老先生喺做戲院起家嘅。點知佢自己話俾記者聽：
『啲櫈唔喺好爛，仲坐得，唔好掉左佢，咪拆返嚟自己坐囉。』
唔記得話俾大家聽，麗悅酒店即喺新華社舊址嗰度，跑馬地墳場在佢後面，唔夠廿呎。
投資港股：鐵江現貨(六) 阿牛
http://hk.myblog.yahoo.com/yomagyomag/article?mid=2902
尋日講隻麗悅上市，佢個模式其實喺好值得我地花多幾分鐘，睇清楚作為鐵江下星期上市嘅借鏡。
我地又睇番佢幅圖。
首先隔夜嘅暗盤價低招股價~4%，即喺HKD2.1左右。咁一開市咪再俾人質低多4%試兩蚊囉。呢度其實有兩樣嘢，第一，真喺千唔著萬唔著，唔應該俾暗盤價插水。第二喺，個股價咁近兩蚊，呢啲整數喺重要心理關口。如果隻股票歷史夠耐，守得好穩，呢啲就喺支持位；但喺而家喺新股，兩蚊就喺阻力位。
結果第一口價開左HKD1.99，跟住都未見過兩蚊。所以鐵江貶值去到HKD1.8，其實喺好事嚟，有腦嘅行為，變左兩蚊個位喺『上破』，唔喺『跌穿』，如果血肉長城守得住兩蚊個位，咁就好穩陣。
講番嗰日隻麗悅，俾人喺咁質，質到中午已經散晒，最差喺上午臨收市，衰到HKD1.76。下午一開市，其實有人嘗試頂住，一路由兩點半買到三點，買番上HKD1.9，大家睇成交量都睇到，嗰半個鐘喺做左好多成交。 HKD1.9條血肉長城整好之後就守住，到臨收市，再不惜代價守住個九嘅關口。
問題喺呢度喇，假設隻鐵江一模一樣，咁我地講左第一日下跌，喺唔追入嘅。到收市跌十幾%，究竟買唔買得過，搏反彈呢？
阿牛建議就唔好制喇，因為如果有料到，第二日喺會強勢出擊，第二日買都未遲。
到左第二日，就要密切留意開市價。第二日如果有人『做嘢』，咁就一定高開；我地第二朝高開先買都未遲。當日高開，一定唔會好多，可能幾分錢，但喺一日流流長，開市做左個靚位之後，有排頂，有排守，所就冇咁快炒上嘅喇；要到臨收市先郁㗎喇。
咁我地仲要睇住佢喺咪守得住開市價，定喺虛火。如果守得住，中午收市前就買貨。
我地又睇下第一日跌9%嘅永暉焦煤。
佢第一日就有啲唔同，佢一開市，跌到HKD3.36，跟住俾人急速買番上HKD3.5，然後守住，喺下午番嚟三點半過後先守唔住，俾人沽到HKD3.38。
佢第二日又喺高開番，然後成日守實，下午就炒上HKD3.6。
所以遇啱上市唔靚嘅，第一日就唔好諗佢，第二朝先睇佢有冇高開，同守唔守得住，先決定買唔買。
假如買左，又幾時賣呢？
到左第三日，兩隻嘢，基本都冇晒力，一隻上升HKD0.02，另一隻跌HKD0.02。所以阿牛建議，到第二日，下午三點四十五分，就合埋眼，冇眼睇出貨。
咁賺幾多呢？
5%至7%。
辛苦一個晏晝，搏一個反彈，薄切一片，喺得咁多喇！ 
投資港股：鐵江現貨(七) 阿牛
http://hk.myblog.yahoo.com/yomagyomag/article?mid=2920
我地今日又睇吓另一隻股票。
呢隻喺遲一日十四號上市嘅956新天綠色能源。公司喺在河北攪天然氣分銷的，兼且攪埋風力發電，喺熱爆嘅環保能源範疇。隻嘢超額就超好多倍，喺今年第四大凍資股票，十分受投資者睇重。之但喺雷聲大雨點小，未上市已經潛水，暗盤價比招股價的HKD2.66低一成，得兩個四；結果上市捱足一日，努力守足一日，以HKD2.64微跌收市。
佢個招股價其實訂得唔錯，HKD2.66。嗰六毫六子，在五毫過少少，下破兩蚊十分困難，就算衰到貼，都喺好似而家咁低開一成；在兩個四呢啲位其實都好難鏟落兩蚊，咁樣容易防守好多。相反，要上破三蚊，就喺13%，唔喺太難，如果上左之後，跌番落嚟嘅機會唔大。
當日下午，佢已經好努力咁盡量想扯高收市，不過都喺差少少，達唔番到招股價HKD2.66。到左第二日，佢都喺高六分錢開市，開二個七；之但喺到下午，佢就波平如鏡，冇左尋日嗰兩隻股票嘅升幅。
所以如果我地好似昨日咁，在第二日中午入左市，到下午，就原全冇升幅，連我地原本鐵板燒嗰一片薄切牛肉都冇埋，淨番塊鐵板。
即喺食白果！
阿牛就建議白果都照食，在第二日收市前了斷左佢，最多蝕使費。如果唔狠下決心，就分分鐘要長揸，即喺中長線投資落隻股票度。我地原本喺冇意圖咁樣做，亦都唔覺得隻嘢喺我地長線投資嘅對象，只不過喺想趁上市時，兵荒馬亂，揾少少著數。
千萬不要搞錯自己意圖。因為有另外一種食物等緊我地：
食薄牛肉定喺食白果，喺個天安排俾我地嘅。
食蕉喺自己攞嚟嘅。
P.S. 阿牛行開幾天，暫時覆唔到大家嘅留言，敬請原諒。
投資港股：鐵江現貨(八) 阿牛
http://hk.myblog.yahoo.com/yomagyomag/article?mid=2927
講左兩日新股上市，講左啲低開守唔到招股價嘅弱勢股。今日講吓高開嘅強勢股。
十三號嗰日有三隻新股又上市，最靚喺580賽晶電子電力。招股價HKD1.76，暗盤高開近兩成，上市首日以HKD2.5收市。當日開市已經有兩個二毫七，跟住一直向上，基本上一直炒上，冇乜點回過，只喺中午稍為定一定，下午再升4%。全日低位喺開市嘅兩個二毫七，最平穩喺中牛十一點半至十二點，守在兩個四毫二，接近成半個鐘。
到左第二日，十四號，小裂口高開五分錢，做HKD2.55，跟住就做左全日高位HKD2.63，接住慢慢回落，全日最低喺十一點嗰陣，做左十分鐘兩個四毫幾，跟住好緩慢同輕微咁上升，上番兩個半樓上，一直到收市。收市喺HKD2.53，叫做守住股價，但喺升幅欠奉，乏善足陳；第二日基本上冇貢獻。
我地如果同嗰兩日恆生指數比對一下，就見到指數都喺『V』字型。楊丞琳都話喺。
中午十一二點最低。所以賽晶股價，基本吻合大市走勢，只不過加多一個上升成份在內而已。
驟眼睇吓，我地想揾個位入市，揾個位出貨，執番一片『薄牛肉』，跟本都好困難。如果細心望落去，第一日開市嗰陣，如果可以衝入去掃貨，喺可以買到兩個四樓下嘅貨。咁樣到第二日收市賣貨，賣兩個五毫三，都有7.5%，算喺有啲執吓。之不過，大家得6分鐘時間！手快有，手慢冇。
如果我地睇吓昨日講隻新天，一樣有咁情況，開市有幾分鐘急速扯高。新天就有14分鐘；大家執生喇。
Next Page