無綫台慶先嚟「送大禮」羅鈞滿宣佈離開大台
1 :
GS(14)@2016-11-22 00:24:47前晚就係無綫嘅49歲生日，個個大台藝人都去到參加呢個盛會，但係就唔見一個人。講緊嘅，就係早前衰醉駕被停牌同判一百小時社會服務令、俾大台掟入雪櫃嘅負皮王羅鈞滿。羅鈞滿效力無綫8年、09年參加無綫電視第23期藝員訓練班，畢業後成為無綫電視藝員；2013年於《星夢傳奇》進身終極決戰最後五強，於第一回合被淘汰，但亦因為咁，令佢聲名大噪。作為一個念舊嘅人，羅鈞滿雖然人在雪櫃，但亦不忘向一力提攜嘅無綫報恩，噚晚喺facebook送一份「大禮」畀無綫，就係宣佈自己離開無綫喇，嘩，揀人哋台慶嚟宣佈啲咁嘅嘢，真係好「得體」。其實羅鈞滿都有用啲好感性嘅字眼去包裝，佢喺facebook話：「八年來，每年都參與台慶。由第一年以訓練班身份在台慶跳舞，第二年有幸抽中一百萬大獎，到近年有份參與趣劇、在開幕式唱歌、苦練飛躍道等等，每一年都有幸在電視城度過。八年光陰飛快，羅鈞滿也是時候離開母校，出去看看世界！他日學成，定回饋每一位賞識過我的前輩們。」其實如果羅鈞滿唔係揀噚日台慶打啲咁嘅嘢，唔知有冇人留意得佢冇去台慶呢？咁喺台慶宣佈離開嘅羅鈞滿會去邊呢？咁就要講一講亞視喇，亞視因財政混亂、資金不足，今年4月1日不獲續牌，最近有傳協盛協豐入股亞視，而協盛協豐又入股星淘娛樂，唔知之後仲可唔可以做超級負皮王呢？
來源:
http://hk.apple.nextmedia.com/entertainment/art/20161121/19840893
慧嫻為學業暫別樂壇陳法拉棄大台到紐約讀戲劇
1 :
GS(14)@2016-12-10 03:45:29「民選港姐」朱千雪去年就同大台請假一年，去咗中大報讀企業傳播管理碩士，上月中千雪BB已經畢業喇！其實過往都有好多藝人，係佢事業方中嘅時候，毅然暫停五光十色嘅演藝事業，重拾書包，過回學子嘅生活。陳法拉法拉BB喺2013年，同大台約滿後，就走咗去紐約嘅茱莉亞學院（The Juilliard School）修讀戲劇碩士課程，呢間學校好巴閉㗎，已故喜劇巨匠羅賓威廉斯（Robin Williams）、金像影帝奇雲史帕西（Kevin Spacey）、已故「超人」基斯杜化李夫（Christopher Reeve）都係呢間名校嘅學生。今年法拉獲子華神召喚，返港演出舞台劇《前度》，之後法拉又返翻去讀書喇！徐子珊去年約滿大台後，子珊就話要專心供讀珠寶設計，去年年尾就為金星珠寶，設計其中一系列首飾，進軍設計師行例。今年佢就簽咗王祖藍嘅工作室，話工作室同佢傾緊啲電影、電視劇同真人騷節目喎！何超蓮貴為賭王千金嘅超蓮，除咗忙緊家族嘅澳洲搞酒店重建，前一排都見佢喺ig貼相「地盤妹」去視察酒店環境。日前仲俾《蘋果》見到超蓮BB，現身灣仔一間開辦會計課程嘅楷博教育(Kaplan)，據知超蓮在該處修讀ACCA，即係英國特許公認會計師公會嘅專業課程，一般都要花六、七年時間完成課程。陳慧嫻89年，慧嫻喺佢歌唱事業如日中天嘅時候，突然宣佈要暫別樂壇，到美國升到大學，95年完成學業後正式復出，推出大碟《Welcome Back》造出四白金（20萬張）的卓越成績。
來源:
http://hk.apple.nextmedia.com/entertainment/art/20161209/19860119
36E新咪神陳偉琪想做律師變做大台奀星
1 :
GS(14)@2016-12-11 14:12:50擁有36E上圍、25歲嘅無綫新咪神陳偉琪，無啦啦捲入床照事件，由「幫港出聲」周融旗下《HKG報》「獨家報道」，稱疑似陳偉琪同疑似民主黨中央委員、公共專業聯盟主席吳永輝嘅床照「網上瘋傳」，但其實兩人嘅交集，只係2012年吳參選建築、測量及都市規劃界議員時，陳已擔任其形象顧問，當時《蘋果》都有報道，更以「翻版楊采妮」形容陳偉琪添。陳偉琪回覆《香港01》時已否認自己係所謂網上瘋傳嗰張床照嘅女主角(邊度有瘋傳？)仲反問「點解可以爭咁遠都當係？」至於佢同吳永輝係點識嘅呢？陳偉琪就解釋係透過姑姐識佢。家陣陳偉琪成為無綫新咪神，郁下出招胸狠，其實佢來頭好勁，包括係2011年溫哥華華裔小姐亞軍，喺卑詩省大學主修政治系，更曾為溫哥華市長助選，幫手聯繫當地嘅年輕人組織，落區開會等等：「一個人嘅坐姿、衣着，都會影響到別人對你嘅觀感。參選，令我學識點樣面對傳媒、點樣自信咁表達自己。」志願其實係做律師嘅陳偉琪，返港後認為香港嘅政治氣氛「唔同晒」：「我好鍾意政治，但由細到大，我嘅志願其實係做律師。不過，無論政治抑或法律其實都同生活息息相關。選議員，佢入到議會，代我哋監察政府；法律呢？就保障我哋嘅權利。我希望利用我嘅專業知識，幫到有需要嘅人。」
來源:
http://hk.apple.nextmedia.com/entertainment/art/20161211/19861925
離開大台回歸現實劉俐做sales賣化妝品
1 :
GS(14)@2017-01-14 12:25:38「藍莓」劉俐喺2014年同大台約滿，消失咗一段時間，佢去年年頭簽咗新公司佐敦薈，希望搞個跳唱女子組合，但原來已經無聲無息解咗約。到底佢中間咗邊呢，現時又點呢？原來佢中間做過幕後化妝師，又賣化妝品。問到佢係咪自己開舖，佢就話：「喺朋友鋪頭幫手，除咗sale嘢，仲要學吓點埋數，點入貨、包裝，幕後back up嗰啲，所以好有滿足感嘅。」原來喺呢間舖喺銅鑼灣同旺角都有分店，佢仲話：「我要增值自己，有人覺得sales有乜好增值，但對我嚟講好唔同，我無掂過呢瓣，可能將來開鋪，雖然未知做咩都好，但學都係自己嘢。」而最近佢又幫朋友搞網上買賣生意o添！至於當年點解唔同大台續約，問到佢係咪心灰？劉俐就話：「完咗合約好耐，唔可以咁講，其實合約完咗都轉咗幾次唔同合約，有試過management，以部頭計一年一騷，有少少底薪。其實灰係覺得自己做得唔夠好，呢個世界公平，如果你做得好，佢一定畀機會你。」咁係咪識諗咗？佢就話：「正路住好方面諗，唔可以一直stay喺、活喺嗰個唔開心嘅環境。要向好方面諗。」問到當時佢係咪冇收入，劉俐仲話原來佢當時返過上海一陣，之後再返嚟香港，而呢份工仲係返港後第二份工。
來源:
http://hk.apple.nextmedia.com/entertainment/art/20170114/19896422
大台《宮心計2》10大女角歲數加埋超過450歲
1 :
GS(14)@2017-01-19 08:08:03大台古裝劇《宮心計2深宮計》昨日舉行記者會，呢套劇真係不得了，剩係講cast都夠晒吸引，米雪、謝雪心、康華、陳煒、張慧儀、張文慈、羅霖，全部都係熟女！大台今次仲係同大陸騰訊企鵝影業合作，劉家豪話呢個係「實力非凡」嘅平台，因為點擊率夠高咁話。其實《深》劇都係翻炒以前《宮心計》條水，將劇名啲字換下次序，玩吓同音字咁。雖然係用熟女做主角，不過都有胡定欣、劉心悠、周秀娜呢啲新臉孔俾大家睇吓嘅。無綫助理總經理杜之克話，《深》劇想拍到唐朝嘅氣氛，有綺麗嘅感覺。不過，套劇嘅服飾就有啲出事喇。啲娘娘同宮女全部都「封胸」，馬浚偉件龍袍又奄列加茄汁，果然「綺麗」。「老土嘢」點止咁少！馬國明同黃心穎嘅緋聞o依家傳得咁hit，梗係要擺佢哋上枱啦。馬浚偉話要賜婚俾馬國明，黃心穎就即刻衝出嚟撓實馬明。唔知做馬明妃子嘅周秀娜係咪「呷醋」，影合照嗰陣企到離行離迾。劉家豪回巢大台拍《深》劇，佢話好高興能夠同騰訊企鵝影視合作，又用唔鹹唔淡普通話講「肯定合作愉快」，梅小青聽到都話「嘩！普通話！」全場人拍仲拍晒手o添。劉家豪繼續話，騰訊企鵝影業係一個實力非凡嘅平台，佢哋嘅點擊率唔係億億聲，唔係十億十億聲，係百億百億聲；仲問演員們「所以你哋係咪真係要奮不顧身，不過唔需要粉身碎骨，做到最好？」梅小青仲和應「係，好好好！」真係夫唱婦隨。講到尾，大台都係要同大陸接軌搵出路，話晒上面有成百億點擊喎！香港市場咁細又可足掛齒呢？唔知遲下大台啲劇會唔會好似myTV SUPER播嘅《無間道》咁講普通話，各位觀眾就要醒水為接軌做準備喇！
來源:
http://hk.apple.nextmedia.com/entertainment/art/20170119/19902001
拍劇戲份被刪海報冇影肥媽呻笨拒接大台賀年節目
1 :
GS(14)@2017-01-21 03:36:4862歲嘅肥媽(Maria Cordero)，自從13年幫無綫主持飲食節目《搵食》後，每年都會幫大台拍攝《食平D》系列，節目大收旺場，仲帶挈埋契仔陸浩明入屋。去年佢仲幫大台拍埋劇集《味想天開》㖭！但昨日就有報道話肥媽覺得被大台搵笨，搞到肥媽好嬲豬要搵同朋友狂呻。是咁的，肥媽幫大台拍攝《食平D》系列，令到佢同契仔都人氣急升，做埋收視保證嘅福將，咁肥媽話晒都係唱家班出身，大台去年就搵埋佢幫手唱《味想天開》嘅主題曲啦，但報道話只係叫佢唱主題曲好似好怪咁，所以就游說佢拍埋劇，咁肥媽就諗住捱吓義氣，應承咗大台喇！點知做人有義氣，換來一肚氣，肥媽呢五年主持嘅《食平D》系列，但咁多年都冇攞過大台頒獎禮嘅「最佳節目主持」，今年輸俾鄭裕玲(Do姐)之餘，仲要三甲都唔入。呢啲都算，肥媽幫佢拍嘅劇集《味想天開》，要安排喺新年嘅炮灰檔播放，更令肥媽谷氣嘅，係佢喺劇入面嘅戲份大幅刪減，戲中飾演波斯公主嘅佢，仲要安排到中段先出場，搶鏡度又點及由頭帶到尾嘅配角李國麟同蔣志光吖！肥媽除咗嬲戲份被刪之外，最令佢chok住條氣嘅就係連宣傳海報都冇佢份呀，真係so sad！報道入面有知情人士話，肥媽搵咗啲老友狂呻，仲爆粗話覺得俾大台搵笨X，要佢幫手佢就冇托手踭，利用完人就多謝都冇句！最後報道仲話，肥媽嬲到話明以後唔幫大台拍劇，仲推埋大台嘅賀年節目，喺農曆年出埠登台搵真銀㖭！
來源:
http://hk.apple.nextmedia.com/entertainment/art/20170120/19903258
張振朗被稱大台花王陳瀅龔嘉欣都中過招
1 :
GS(14)@2017-02-05 10:39:40「翻版Cool魔」張振朗近年被大台力捧，雖然喺《愛．回家2》擔正，不過都未係算一線，所以佢避忌講起同34C陳芷尤嘅感情事，就算次被影到都否認；當然陳芷尤都係統一口徑話：「張振朗未係我男友。」不過講番轉頭，其實張振朗喺大台有個「大台花王」嘅朵，點解？皆因佢由入訓練班開始好有女人緣。有傳張振朗仲喺訓練班嗰陣被指似黃宗澤，得女高層曾勵珍、余詠珊歡心，所以《愛．回家2》就畀位佢上。除咗得女高層歡心，張振朗喺拍劇嗰陣同對手傳過緋聞。有傳佢同陳瀅拍劇時過電，因為當時撞啱陳瀅被猷亨飛甩，所以「花王」就乘虛而入，大獻殷勤。到《愛．回家2》入面，張振朗同龔嘉欣差唔集集都孖公仔現身，而且仲有咀嘴戲份，唔知係咪啜出感情，有傳龔嘉欣刻意等埋對方先收工，喺社交網絡上面成日「晒恩愛」，激到正印陳芷尤忍唔住，要喺上年東華籌款上演一場「天若有情」宣示主權呀。
來源:
http://hk.apple.nextmedia.com/entertainment/art/20170203/19916811
大台拍劇阻街擾民經常出現人車爭路
1 :
GS(14)@2017-02-18 09:51:480依家啲觀眾對睇劇嘅要求越嚟越高，唔單止劇本要有質素，靚人靚景已經必然嘅選擇，惟有盡量搵實景拍攝，所以年中無綫有唔少劇都會走出去拍外景，一啲大堆頭嘅陣容同場面梗係會事先申請，但係遇上啲普通場口，有時會採取呢個快閃嘅方式去做，不過有時為咗貪方便，對市民都有某程度上影響。《愛我請留言》黃翠如拍《愛我請留言》嘅時候，劇組有一晚接近凌晨時份喺石硤尾開工，本來只拍一場講翠如落的士嘅戲，點知因為啲工作人員好大聲咁叫，搞到啲街坊冇覺好瞓，之後仲打電話去報館投訴！《殭》陸永同黃又南喺拍《殭》嗰陣，劇組喺兩星期內曾經四次喺西環第三街開工，因為發電車發出聲響，再加上現場不斷有射燈射出強烈白光，搞到啲居民覺得滋擾，最後決定報警求助！又稱拍攝時會檢點。不過主角鄭嘉穎同謝安琪因為嗰場冇戲份，所以唔喺現場！《拆局專家》錢嘉樂同洪天明喺中環拍《拆局專家》，嗰陣佢哋喺街頭拍攝打鬥戲，當時除咗啲射燈影響附近啲民居之外，仲因為人數眾多塞滿狹窄嘅街道，搞到有不少車輛都要被逼慢駛，有的士因不滿拍攝團隊阻街，突然加速直衝向攝製隊，然後停低入空波發出「??」巨響，最後工作人員即刻讓路！《我瞞結婚了》洪永城拍《我瞞結婚了》，劇組喺西環開工，因為佔用咗其中一條行車線，令巴士難以埋站，結果乘客要冒險喺馬路落車，再加上因為佢頻頻NG令拍攝時間延長，唔少途人圍觀，搞到啲街坊受到影響。事後洪永城同啲街坊say sorry，仲話有機會去西環同啲街坊影相補番數。《一屋老友記》「長腳蟹」呂慧儀同張穎康為咗《一屋老友記》喺中環必列者士街拍一場嗌交戲，雖然嗰陣已經一段雙程路，之不過有幾部crew車佔咗一邊馬路多個車位，冇耐有兩架消防車要駛入嗰段路做救援工作，結果因為條路大窄，搞到要消防員落車睇位兼指揮，擾攘15分鐘，左退右退先成功通過。
來源:
http://hk.apple.nextmedia.com/entertainment/art/20170218/19932409
【動畫●大台是旦】馬明亂講「冷靜啲」真心理專家：聆聽最重要
1 :
GS(14)@2017-04-22 10:50:40馬國明在電視劇《心理追兇》對住嬲到想打人咁滯的人講：「冷靜啲！」其實不太合適。
情境題：閣下好嬲好㷫好火滾，已經掃跌枱面所有嘢，忽然有個人走來同你講：「冷靜啲！」你會點？
A.0.38秒冷靜下來
B.扯起更大把火，反問：「我夠想冷靜啦，我真係好嬲呀！」
世上萬千種人，情景當然不只兩種。不過代入其中，我肯定揀B。弔詭嘅係TVB現正播放的電視劇《心理追兇》（Mind Hunter）中，飾演心理學家的馬國明竟然多次對住情緒激動甚至想自殺的人講：「冷靜啲！」我真係冷靜唔到。合該擅長安撫、知道講呢啲唔多見效的「心理學家」竟然咁講，TVB係咪貫徹是是旦旦精神呀？真‧臨床心理學家杜嘉兒點睇呢？「當我哋講『冷靜啲』時，可能會令對方覺得佢自己唔應該激動，但其實情緒係有作用，對方咁嬲也一定有原因。我哋唔希望令對方覺得有呢個情緒係錯。」她認為我哋最緊要係打開耳仔聆聽對方感受，代入對方處境。「你可以反映情緒，講『我留意到你好唔開心、好嬲喎。』但有時未必需要講好多嘢，安靜地聽都得。好多時一個人的感受被認同時，情緒已有舒緩。」馬國明在劇中的角色認真踩界，為了查與女友的死有關之案件，竟然不顧身份，用盡方法迫兇殺案倖存者、懷疑有創傷後壓力症的王君馨回想案件，搞到佢當街崩潰。「為了戲劇效果，相對上激啲、誇張啲我理解，但就同我哋現實工作有出入，我哋做臨床心理學家，須遵守好嚴格嘅專業操守，一旦有利益或角色衝突，我哋都會諗自己係咪仲適合為對方服務。」馬國明有自己目的，想向王君馨套料，又經常主動提出要幫佢，治療佢，完全無視操守夾硬來喎！杜嘉兒補充：「心理學家及受助者是合作關係，我哋會尊重對方意願，佢預備好，我哋又對治療內容有共識先會循序漸進地做。」套劇有神化馬明之嫌，佢好似有透視眼咁，識得睇穿人個心，對人的性格特點、心理狀況好快就能下判斷。杜家兒笑謂：「我都好希望自己係咁。我明白只係劇情需要，套劇某程度上都有做資料搜集嘅。」心理學家有好嚴謹嘅評估程序，必須與對方多次深入面談，再借助問卷等標準化工具，才會接近真實情況多啲。「呢啲一切都做晒，我哋係咪就看透世事呢，都唔一定！」心理學家的工作包括評估及心理治療，心理治療主要提供給情緒或精神有困擾人士。「想找合資格心理學家，可以上我哋香港心理學會臨床心理學組網頁，上面有名冊提供。」她又補充市民有需要也可向醫管局求助。
臨床心理學家杜嘉兒表示心理學家當然都有情緒，但提供服務時必須客觀，可以大膽假設，但必要小心求證。
馬明係咁逼懷疑有創傷後壓力症的王君馨回想案件，令她崩潰，不合心理學家的專業操守。
記者：葉青霞攝影：張志孟2017果籽繼續認真知味。識買惜用。行以求知。好事多為。重修舊好。緊貼果籽報道，即like：
http://fb.me/AS.AppleDaily緊貼「蘋果VR」熱潮，打開雙眼隨意門，讓「蘋果VR」陪您探索新世界：
https://goo.gl/b5RQAB「蘋果VR」App
App store下載：
https://goo.gl/0kW2cK
Google Play下載：
https://goo.gl/4K7EHw
來源:
http://hk.apple.nextmedia.com/su ... t/20170422/19997680
Next Page