📖 ZKIZ Archives

有「股壇狙擊手」之稱、華人置業（127）大股東劉鑾雄的母親葉淑婉，上週四中午在瑪麗醫院離世，享壽九十四歲。葉淑婉這名字，不及「劉老太」這身份更為人熟悉。她經常出現於報章娛樂版，全因大劉常陪伴在側出入富豪飯堂福臨門，母子關係密切。劉老太早年打本大劉創業，令他賺取第一桶金，從而在股市地產乘勝追擊。孝順的大劉亦將一隻設有電梯、車庫及九個客房的「超級遊艇」，以母親名「Lady Lau」命名。揭開劉老太家世，原來她曾與「跛豪」吳錫豪友好，有「潮州婆」之稱，江湖地位比大劉更猛。

今年一月，劉老太曾出席尖沙咀崇光百貨的搬遷後開幕禮，二月亦跟大劉出入福臨門，當時精神狀況不俗，反而是大劉因腳患手拿枴杖，步伐不穩。有經常和劉老太飲茶的朋友透露，劉老太晚年患有老人病，機能退化：「佢近年身體已經差咗，以前成日同班朋友旅行同飲茶，近年已經唔認得人啦！」劉老太上週四在瑪麗醫院安詳離世，將於週五出殯，但在訃文「孝男」一欄中，大劉名字旁的配偶位，卻無寫上兩位紅顏知己呂麗君或陳凱韻（甘比）名字，相反其所有仔女通通有「名分」。不過大劉在本週一中午，仍一如既往，身穿深藍色T恤，與甘比及大女秀融等，到福臨門午膳。下午三時再與妹妹玉慧、玉珍及甘比到香港殯儀館，為母親喪事打點。甘比女兒秀樺還穿着校服，看來是大劉接女兒放學後再匆匆趕來，他逗留約半小時後獨自離開。

與跛豪是好友

揭開大劉家族的往事，其母過去扶了大劉一大把。劉老太是潮州人，和早年已過身的丈夫劉火榮，在潮州幫有一定地位，江湖人都稱她為「潮州婆」。○一年大劉曾與「老千商人」結怨，並懸紅三千萬美元，要搜羅老千商人的犯罪證據，兼且公開大數老千商人的「十大罪狀」，曾揚言：「我驚佢屎忽有牙呀？」據了解，大劉夠膽玩到盡，是因為背後有潮州幫支持，而劉老太更加是潮州幫核心人物「跛豪」的知心好友。「跛豪」吳錫豪生於汕頭，六十年代初偷渡潮中成功逃港，最初居於木屋區，曾在石硤尾開字花檔。跛豪所屬的「潮州幫」，是當年香港四大販毒集團之一，活躍於泰國、香港、台灣等地。跛豪七四年被捕，揭發在六十至七十年代販賣毒品超過三十噸，價值超逾三億。七五年被判入獄三十年，直到九一年，跛豪因健康問題提早出獄，但回復自由二十六日，便因肝癌病逝。跛豪身世傳奇，事跡曾被拍成同名電影《跛豪》，由呂良偉做男主角，曾創下三千萬票房佳績。「劉老太曾經借錢俾潮州幫，解燃眉之急。佢數口好精！」一名知情人士指。

風扇廠起家

劉老太是劉火榮的繼室，先後誕下大劉劉鑾雄、細劉劉鑾鴻及女兒玉玲、玉慧和玉珍。年輕時兩公婆已相當富有，根據資料，六一年以六萬五千元，購入跑馬地黃泥涌道單幢樓的五樓連天台，與不少中產為鄰。七四年大宅出售後曾成為銀主盤，大劉重新購入單位作留念，至八○年才再度出售。早年她曾與友人表示，要供養所有子女往加拿大讀書，大劉便於七四年在加拿大安大略省滑鐵盧大學畢業，更在當時認識了前妻寶詠琴，而跛豪的大女兒亦曾到加拿大留學。同為七四年，劉老太和丈夫、五名子女，以及朋友許義通（其後成為玉玲夫婿），成立友聯岳記吊扇廠，從事風扇製造。七六年加入友聯岳記做董事的姚成榮，曾向本刊表示：「大劉爸爸邊識做風扇，佢派人搵我去幫手，睇晒成間廠。佢女婿許義通做經理，後來劉鑾雄讀完書返來幫手。」風扇廠址初期設於土瓜灣浙江街十九號，廠房由劉老太於六十年代尾，以現金一百三十萬元購入兩幅地興建而成。八四年六月，劉火榮病逝於葛量洪醫院，終年七十一歲。而友聯岳記的吊扇生意，維持至九○年代初亦逐漸收縮。

愛美高時代

大劉當年畢業後即回港，初期在友聯岳記的風扇廠幫手。兩年後，寶詠琴亦畢業返港，雙方於翌年結婚，已經與家人同住渣甸山睦誠道十一號大宅。大劉幫屋企打工時，曾提出把風扇銷往北美洲，但遭到家族成員極力反對，於是他獲母親打本數百萬元，與寶詠琴在尖沙咀自設貿易公司。當時的數百萬已能買一幢渣甸山獨立屋。七八年二人在黃竹坑信誠大廈一樓開廠，成立愛美高電子製造公司。公司再於八三年上市，劉鑾雄亦因此被市場封為「風扇劉」。進身股壇的大劉，其後多次狙擊控股權不穩的上市公司，玩轉股壇。

出手闊綽孝順母親

近年大劉轉玩遊艇、私人飛機及藝術品，大劉亦經常出手買入「大禮」贈送母親。例如一○年，大劉在「重要中國瓷器及工藝精品」秋季拍賣會中，以一點三億元，買入「清雍正御製掐絲琺瑯雙鶴香爐」送給母親祝壽，他當時向本刊指：「喺我心目中，就算係超過二億，都會照買！」一○年，大劉更以六億元訂造長逾二百一十三呎的巨型遊艇，遊艇共有五層，中間設電梯方便上落，室內面積達一萬呎，九間客房間間不同主題。大劉更以母親名義，改名做「Lady Lau」，盡顯孝心。去年有見遊艇有價有市，他以四點五億元將「Lady Lau」放售，但至今未有買家接貨。劉老太並曾對大劉惹官非憂心忡忡，想找舊朋友幫手，這時大劉的兩位紅顏知己呂麗君及甘比，便負責陪伴在側開解及用膳。不過據知，由於甘比懂得講潮州話，故較得劉老太歡心，因此甘比亦經常跟隨這位皇太后出入公開場合。連日來亦是由甘比陪伴大劉安排劉老太的身後事，足見甘比在劉家較為「入宮」。

福臨門本週三喺澳門銀河開分店，五哥徐沛均隆重其事，邀請港、九福臨門頭三十位VIP，以及佢嘅 「哥乎」波友，送埋來回船飛出席酒會，收到此英雄帖者都係福臨門大客，有飛士先有資格收帖，大劉一家猶如福臨門的icon，出出入入都有傳媒拍照，福臨門 好過俾錢賣廣告，但五哥今鋪都好難做，唔向大劉發帖，又驚話唔俾面，發張帖又怕令對方尷尬，叫大劉過澳門咩！其長子鳴煒又話最唔鍾意呢間酒樓，且看本週三 大劉安排呂麗君或甘比做代表啦。金融逍遙客快找搵食架生

逍遙客常年往返內地，知道大部分港人，對中國了解貧乏，中港矛盾之結的確很難解開。呢種結，不是香港獨有，國內的結更複雜內容也更豐富。所謂一樣米養百樣 人，14億人口的中國哪會例外，就是中國人本身，不同省份、城市甚至區域的人都有被標籤的歷史，多數被標籤族群當然以負面為主，屬「區域性歧視」。例如河 南人是騙子的代名詞，東北人吹多過做，山東人仗義、浙江人精明、福建人勤奮，這全是中國人共識。而地域性歧視，如北京城，自古就有東富西貴、南貧北賤之 說。上海一句透徹罵人話是：伊是蘇北人。因為傳統以來，上海從事下層苦力工作的都是來自江蘇北面，即使現在已過了幾代人，不是土生土長上海人，還是偶爾會 受正宗上海人歧視。呢種現實到處都有，正如八十年代大陸新移民被叫阿燦，估唔到三十年後風水輪流轉，香港人北上被叫港燦，台胞被叫台吧子。稍有閱歷兼肯用 腦獨立思考嘅人都知道，呢啲標籤並不反映全部事實，用此標準去判斷人肯定有欠客觀。就如在大家眼中所及嘅中國遊客，不是土豪就是農民，但其實內地一群精 英，在各自領域默默改變中國。我們這一代年輕人絕不能在安逸中自我閹割，不如諗吓點樣增強食力好過。憤世的年輕人，終有一天爭取到十張選票，但搵食架生一 件都冇。到時大家能記起的創業家仍是那個王維基，這才是香港真正的悲哀！

金牙大狀曾鈺成早晚嚟料

曾鈺成話由立法會退落嚟搞智庫，唔係為咗選特首鋪路；佢話自己知自己事，年紀唔細，而知識面窄，對經濟、金融更加係零認識，邊有條件做國際金融中心嘅特首 吖？智庫之設亦非為造王，乃係志在幫特首候選人提供切實可行嘅政綱咁講。驟耳聽嚟，好似言之成理；但諗深一層，則不由不令人懷疑佢是否言不由衷。試想想， 香港既係國際金融中心，特首候選人嘅政綱冇可能唔掂到經濟同金融嘅議題。若然曾鈺成對呢兩瓣嘢都係零認識，咁佢老哥又憑乜嘢去領導個智庫做呢方面嘅研究 呢，請問？於此可見，一係唔識經濟、金融就唔選特首之說係假嘅；一係佢真係唔識經濟、金融，但為咗選特首，整定個智庫研究呢啲題材以武裝自己。姑勿論點， 唔識經濟、金融唔選得特首之說，虛應一招而已；自己唔識啫，手下識咪得囉。到個智庫開檔肯定就嚟料矣。

中環寸嘴鑽石炒飯

早排約個老友喺九龍站Ritz Carlton 103層樓高嘅意大利餐廳Tosca吹水，嘩，星期六晏晝好鬼爆，唔係阿太嚟飲下午茶，係有後生情侶嚟拍拖食high tea；睇到啲港女同條仔好陶醉咁望住件蛋糕仔，唉，一句講晒貪慕虛榮，超，其實一份high tea都係幾嚿水，已氹到僆妹hi上腦，啲仔約女去五星級酒店，都係睇中「虛榮心」，唔好話我唔醒吓啲僆妹，小心啲仔，有型有款冇現款呀。嗱，又喺度 講吓古，有個private banker同我講，城中有位有朵嘅闊佬，同條女食飯，問佢想食乜，條女答：「鑽石炒飯。」哈，個闊佬真係去搵鑽石叫人炒飯，上枱時，碟炒飯冒煙，啲鑽石 閃閃發光，條女又點唔「臣服」呀，咁嘅炒飯，梗係打包啦，計我話碎鑽唔係好值錢啫，不過呢碟「鑽石炒飯」為金融界人士帶來唔少after taste。

楊國佳工廈大王楊耀松長子，是各大有名食肆之VIP，喜歡研究城中有錢佬對食之要求，透過美酒佳餚，細味人生百態，讓讀者「嗒」落有味。

齊昕甩底 慳番！

大半個月前，齊昕應承出席喺迪士尼樂園舉行嘅海外學生仁濟慈善餐舞會，並安排她主持拍賣活動，有騷錢收o架；誰不知阿媽梁太致電同個女向大會「告假」，主 角甩底，度出以齊昕吸睛嘅主席林煒珊當然冇癮，但有善長話慳番，鑑於齊昕係特首家人，如她出席，迪士尼為此要動用額外保安人員，咁，梗係有額外收費啦，所 以話齊昕唔嚟，慳番！

大劉唔去福臨門，改以嘉道理家族旗下半島酒店入面嘉麟樓為「新飯堂」，識佢嘅人都知怕觸景傷情，母親葉淑婉去年過身，以往拖住阿媽入福臨門的溫馨情景已不復再，又有人搞搞震傳呂麗君離他而去，真係要贈大劉一首歌《相思淚》：情人別去後人消瘦……加上服侍開佢嘅福臨門廚師都退休，倒不如搵個新竇啦，揀嘉麟樓其實多少因為嗰度係大劉威水戰場。

持有半島酒店的大酒店（45），八十年代由嘉道理家族（佔12%）和梁昌兒子梁仲豪（佔30.4%）共同持有，梁氏負責地產，嘉道理掌管酒店業務，互有默契，相安無事；至八七年，梁氏把手頭30.4%大酒店股份售予大劉，繼而展開一場狙擊戰，大劉聲東擊西，要求加入董事局，嚇到嘉道理家族鼻哥窿都冇肉；最後嘉道理家族也息事寧人，假手第三者向大劉接下大酒店三成多股份才得以脫險，狙擊大酒店一役，大劉以新進梟雄之勢，令老牌家族跪低而響朵，所以坐喺半島酒店入面嘅嘉麟樓，緬懷吓過去威水日子，點都好過踎福臨門嘅。

中環寸嘴：唔係三次創作係N次創作

工廈大王楊耀松長子，游走高級酒店、銀行及知名食肆，與各路人士打交道，自認有jet set生活方式，透過美酒佳餚，察看人生百態，把「生平絕學」不吐不快與粉絲分享。

趁個老友個會籍快到期唔再續，再去多趟薄扶林中華廚藝學院，嗰度俾學生實習，料靚分量足，十五蚊一杯羅漢果茶，仲會不斷free flow任添，最衰唔就腳，假日冇得玩，照計呢個會抵入o架，都叫做俾個機會啲學生實戰一下，提升吓香港食肆嘅水平。咁啱線，美食車先導計劃班評判都喺中華廚藝學院食晏，準備公布入選美食車申請者，不過睇入選美食車菜式，唔夠國際化，全部都係延續本土特色，又唔夠創意，講到鋪天蓋地，攞晒頭彩嗰個「黯然銷魂漢堡」，真係仲抄緊周星馳廿年前《食神》條橋，早排已經有食肆用嚟包裝碗叉燒蛋飯去sell，真係天下文章一大抄，唔係三次創作，而係N次創作，其實咪又係菠蘿包夾住嚿叉燒同隻蛋，嗱，類似嘅嘢，跑馬地有間茶餐廳都有，叫特色菠蘿包餐，三十零蚊有得食，個菠蘿包夾沙爹牛又得，豬扒又得，乜「春」都得呀。請問在座諸君，有冇需要照顧洋人市場，呢個「黯然銷魂漢堡」英文點譯呢？點樣向外國旅客介紹呢？真係笑死人咩，官方英文譯做「BBQ Pork Burger」，咁譯法，又點叫旅客捉到「黯然銷魂漢堡」嘅神髓！

何必打外父工呢？

創科局局長飛鴿傳書，回應小宗上期《楊局長曾經滄海》，謂自己九九年把Kaifa賣給E-Tek後套現四億三，就離開外父間蜆売電器，公司之後投資與撇賬，豈能與他扯上關係，仲補充番自己履歷，如在JDS Uniphase Corporation做副總裁，又在華平創投（亞洲）任高級顧問。咁叻仔，就唔好同外父打工啦！

禮失求諸野

兩千幾年前，孔夫子慨嘆禮失求諸野；估唔到當今之世，搵電視藝人亦要遠走番邦，越洋去到加拿大。你睇，為咗《型•男家族》可以令觀眾耳目一新，無綫620不惜御駕親征，帶同手下去溫哥華揀蟀。揀唔揀到，係未知之數，但就有機會見識當地僑領馮永發間大宅——同埋佢尊夫人嘅插花藝術矣。

大劉轉場置地重溫梟雄歲月

呢期追劇，必睇大劉紅顏爭寵升級，幕幕高潮。佢近排唔去福臨門，改咗同甘比去半島酒店入面嘉麟樓食飯。樓底高風水好，大劉八十年代曾狙擊過持有半島酒店的大酒店（45），嚇到老牌嘉道理家族跪低。來到重溫舊日足跡，威水哦。

上星期五，大劉開飯再轉場，來到中環置地廣場嘅中菜廳唐人館。呢度，又有古講。話說87年，一眾華資策劃狙擊英資置地，食番鋪大茶飯。當時由鄭裕彤策劃、李嘉誠領軍，包玉剛、李兆基、郭得勝等實力雄厚的華資財團，與尚未進身巨富行列的劉鑾雄兄弟，齊齊狙擊置地。狙擊手大劉先與怡和大班西門•凱瑟克講數，提出以每股十六元，向怡和收購其所持百分之二十六置地股份，凱瑟克拒絕。鄭裕彤、李嘉誠繼之而上，以十七元一股之價，再與對方談判。最終因十月股災未能成事，華資亦回售股份予怡和策略，套現十八億元，並訂下七年內不再狙擊置地之盟。此事為商界中人所津津樂道；而家嘅大劉，連食飯都自怨論盡，想緬懷吓梟雄歲月，合理嘅！

騰訊亮劍

講開狙擊，被盯上嘅上市公司大股東，隨時嚇到鼻哥窿都無肉。係咪無得防範？又未必。上市公司有把尚方寶劍，可以引用《證券及期貨條例》第329條，調查邊個揸緊貨。小宗發現剛公布業績嘅滙控（5）好鬼勤力，過去一年有成198份權益調查報告，幾乎日日有記錄。而同樣被基金搞到頭都痕嘅東亞（23），亦都有104份。最離奇係「股王」騰訊（700），都有成90份權益調查報告，行內人話並唔尋常。騰訊解釋，係想了解股東地理分布及投資風格，計劃路演行程。咁信不信由你！

中環寸嘴：太古城月供100蚊

太古集團有個歷史檔案庫，收埋唔少寶物。其中包括太古城翠湖臺洞庭閣樓書。76年開售。最平單位1樓D室，十一萬二千元，本週一小宗搵滙豐估價，現值四百五十七萬元。當年仲有香港建屋貸款，供15年每月只係一百一十一蚊。而家食餐飯分分鐘都唔止，呢啲歷史印記，有賴有心人保存。

南豐改名馬鞭草

上星期隔涉嘅屯門新盤「豐連」熱賣，扑中八九十後心態，發展商南豐攞晒彩。「豐連」除咗由南豐發展，仲有間叫豐資源嘅公司參與。豐資源即係以前嘅南豐資源，由陳慧慧私人擁有，佢囡囡張添珞幫手打理。小宗搵吓公司註冊記錄，發現喺今年2月26日，呢間公司連同南豐集團、南豐中國實業，都向公司註冊處通報改名。其中「南豐集團」擬改名「豐資源集團」；英文名就最離奇，由Nan Fung變Vervain。Vervain即係馬鞭草，以抗憂鬱聞名，希臘文係「祭壇植物」的意思。據講喺17世紀，經常被法師用作施法的材料，認為可淨化靈魂，歐洲人特別是法國女性，更加愛不釋手。身為陳廷驊次女嘅陳慧慧，今年以近400億身家進身香港女首富。Vervain呢個名，有啲似慧慧洋名Vivian，又夠國際化；唔通想甩咗浸守舊嘅味道？

近排坐住輪椅四圍出巡嘅大劉，體形消瘦咗連髮型都唔同，但鬚根好似多咗啲，何解呢？

原來未坐輪椅前，大劉經常幫襯舊文華酒店二樓The Mandarin Barber，嗰度有好幾個年過八十嘅上海老師傅，淨剪$440，洗剪$520，大劉例牌要book間私家房，咁就另加30%；大劉幫襯呢間理髮店志在刮鬚，嗱，收費分兩隻，Mandarin Shaving收$495，刮足兩次包保乾乾淨淨，平價啲就係Wet Shaving $380。要招呼大劉唔易o架，來到好勞嘈，好鍾意鬧人，不過文華酒店視大劉為Very VIP，員工預咗俾佢鬧，只不過自從以輪椅代步後，大劉已冇再幫襯，師傅真係想俾大劉鬧都難喇。

中環寸嘴：尿兜翅之父格言

工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。

特首跑馬仔開始熱身，CY同林鄭都密密同慈善團體喺佢閣下官邸搞飯局同cocktail party，搞呢啲party都要講心思，唔知啲友可唔可以old dog with new tricks，還是old dog with no tricks喇，記得當年唐英年做政務司司長，喺白加道Victoria House官邸，同公益金搞咗紅酒拍賣慈善dinner，條條友仆到去門口個布景板同唐英年影合照，我就特登叫攝影佬影多幾張「風水池」嘅相，啲燈光打上去都幾有氣勢，嗱，林鄭入主後，呢個「風水池」好似話填平咗咯。同我齊齊投咗支Chateau Latour 1971 Magnam，係我世伯，「尿兜翅之父」Uncle Peter（註解：鏞記酒家有一客名為振邦翅，其盛載翅的器皿由這位世伯設計，須注入熱水保溫，恍如尿兜，因而被謔稱尿兜翅），佢成日同我老豆講唔好咁孤寒，買啲朱義盛級數嘅珠寶俾老婆，雖然以其standing，人哋唔敢話係假嘅，死鬼老豆就話：「我鍾意買一幢幢嘅舊樓，寫老婆個名，等佢得閒隨時拎啲租去買珠寶，咁就以戰養戰，否則買完一次，啲珠寶佬有排都唔識你。」所以每次買重火數珠寶，我都帶埋「尿兜翅之父」去，等佢知道我呢位世姪將佢啲至理名言發揚光大。

郭炳聯識欣賞大佬之作

新地家變之前，大佬郭炳湘都喜歡到尖沙咀帝苑酒店旗下「稻菊」，同紅顏知己Ida Tong撐枱腳，事關呢間日本料理係水哥當年親自引入香港，估唔到同佢唔多啱傾嘅細佬郭炳聯都識欣賞，前週六晚，阿聯同一名年約五十、衣著樸實嘅女子（小宗落足眼力，肯肯定唔係郭夫人劉寶賜），晚上在中環IFC開張冇耐嘅稻菊開餐，此處望維港景，情調OK，雖然稻菊由新地旗下帝苑酒店管理，呢餐飯由阿聯親自簽信用咭找數，仲好識做喺荷包攞「茄薯」俾貼士，好gentlemano架！

何夫人替夫擋煞

俗語有云：中年喪妻好過中小搖彩，咁就要問吓港澳兩位梟雄。大劉被澳門官司精神折磨得身體暴瘦，其「宿敵」大鼻也不好過，兩個月之間母親陳瓊及妻子劉渭楨相繼離他而去，尤其妻子只有五十多歲，令人唏噓，六月份還露面出席奶奶的喪禮，據知何夫人去得如此倉卒，與大劉前妻寶詠琴同病相憐，被癌魔奪命；何厚鏵選特首時說過：「我呢個人點樣，對感情負唔負責任，佢（劉渭楨）好清楚。你話結咗婚咁耐，有冇做過一件兩件對唔住太太嘅事？絕對有！」可見何夫人擁有非一般女人之器量。今天先行一步，有說是替其夫擋煞。

麵包變奏曲

澳門呢間勝記認真犀飛利，俾個麵包過佢哋，可以出神入化，變出bread、bun、eat、saturation、sandwich，同埋more，共六大類款式，少啲功夫都唔掂，最難得者，係冇一隻字串錯，點到你唔服？不過咁，芝士包若是Cheese bread，何以鮮油包即係Fresh Oil Saturation呢？以Saturation為包，當中有何玄機，真係要過大海請教高明。

坐擁七百億身家的華人置業（127）前主席劉鑾雄（大劉），上週宣布與紅顏甘比結婚，讓後者真正跨入豪門，成為第二任劉太。大仔劉鳴煒仍未表態，其親母、第一任劉太與大劉的恩怨，是不少人的「集體回憶」。本刊知悉，當年劉鑾雄得以自立門戶，有賴外母、亦即寶詠琴媽媽鍾全英，將自住物業多次抵押科水給他，完成大劉春秋創業大夢。現時鍾全英仍然在生，隱居於外孫劉鳴煒名下物業，由對方打點照顧。至於大劉，寶詠琴姐姐寶詠華向本刊直言，與前妹夫已沒聯絡二十年，不想評論對方再婚。本刊亦查得，劉鑾雄另有六個同父異母的兄弟姊妹，包括大哥劉鑾成，大姐劉鑾娟等，但他們既無公司、亦不見有私人物業，其中妹夫顏利漢只是居住鑽石山龍蟠苑，同是劉家親戚，真是蚊髀同牛髀！

大劉與甘比結婚的消息傳出後，除了成為全港熱話，亦傳到了住在多倫多的前妻寶詠琴親朋戚友的耳邊。越洋傳來，他們知道消息後都相當錯愕，並對大劉向女朋友「豪使」的作風有點感慨：「嗰時大劉都好冧得掂個外母，按埋筲箕灣層樓借錢俾佢創業，好似話每月俾番五萬銀外母，不過同大劉俾女朋友幾廿億，冇得比！」本刊曾聯絡寶詠琴在澳洲的姐姐寶詠華，她移居澳洲布里斯班已五十年，亦是寶詠琴的遺產執行人。聽她語氣並不喜歡大劉：「我同佢（大劉）二十幾年嚟都無對話。我們與劉鑾雄沒有來往，（全家都沒有？）沒有沒有。」她多次重複：「我哋同佢二十年來，一啲來往都沒有。二十年來一點交往都沒有。你最好問劉鳴煒，（你與劉鳴煒比較熟？） 你自己與劉鳴煒說吧！」

由劉鳴煒照顧

劉鳴煒與寶家關係仍親密，而曾經有恩於大劉的寶詠琴媽媽、亦即大劉前外母鍾全英，現時在生亦有賴外孫劉鳴煒照顧。事實上，大劉早年曾說過：「我外母真係有功勞！佢按過層樓俾我做生意，如果講到有功勞都係我外母！」翻查記錄，鍾全英於五九年以兩萬多元，購入筲箕灣樂群大廈一個高層單位自住，並曾多次抵押按揭。其中七五年按予恒生銀行，當時大劉正醞釀自立門戶；到七八年按予渣打銀行，大劉同年創立愛美高（Ever Go）生產吊扇。該單位已經轉售，而鍾全英手頭亦無任何物業。鍾全英並沒怎樣讀過書，寶詠琴未發跡前，曾靠車衫幫補家計。現時她居於大坑豪園，為寶詠琴於○一年以近一千三百萬元買入，現時由劉鳴煒持有關物業公司的股份。據悉劉鳴煒小時候亦曾住過該單位。其後他回港發展，於○七年斥資二千萬元，買入同一屋苑另一單位，與外婆為鄰。上週記者到豪園探訪鍾全英，兩名外傭把門微微打開，記者探見白髮蒼蒼的鍾老太坐在客廳，記者對外傭說明來意，鍾老太緩緩把頭轉過來，但外傭立即把門關上。其後一名少女再度開門，索取記者卡片，五分鐘後馬上有隱藏號碼的電話打來，對方指：「我係寶太嗰邊打嚟，寶太老人家休息緊，費事打擾佢了。」電話中人先指自己屬寶太辦公室，再說自己是劉鳴煒公司。其後記者再訪，樓下保安即指：「收到指示，呢個單位係唔會有訪客。」

兄姊不離不棄

劉鳴煒一向緊張外婆，他過往曾指最憎去大劉至愛的福臨門食飯，但卻曾多次被發現帶同外婆到福臨門飲茶。當年寶詠琴生病時，劉鳴煒及細妹劉秀融，都是由外婆家照顧。寶詠琴○三年去世，根據遺囑，遺產都分給兩名子女及兄弟姊妹。估計她遺下十億，四成給兒子劉鳴煒，四成半給劉秀融，另一成給姪兒寶天泓。餘下的百分之五，予劉鳴煒決定，並付予其弟弟寶德志、姊姊馮寶詠嫻及其他家人作生活和緊急開支。寶詠琴曾在報章專欄表示：「（患病期間）哥哥馬上前往醫院介紹的apartment……若我不是在金錢方面比一般人富裕點，就不能帶着跟身工人、哥哥及二姐服侍我。」寶詠琴生前亦十分照顧兄弟姊妹，九七年她與友人以四百九十萬購入元朗錦綉花園獨立屋，於九九年由其弟寶德志購入部分業權，有指是寶詠琴藉此給弟弟收租，之後金融風暴樓價下跌，寶詠琴再以原價購回所有業權出售。○一年，寶詠琴聯同哥哥寶德銘，以每股兩毫的價錢，購入中國星（326）一億股，再以一元半的價錢賣出，從中帶挈獲利一點三億元。

日捱夜捱打江山

現時寶家絕大部分親人，都已移居加拿大多倫多，遠離香港的是是非非，只有寶德志在香港有間新義投資公司，劉鳴煒亦為董事。寶詠琴九二年和大劉離婚時，並未有打官司要求更多身家。當時她與大劉協議，拿取到數億元贍養費，每月十萬子女生活費，及十萬大宅營運費，其時大劉身價約二十億，現時當然已暴漲至天文數字。對於大劉曾狠批寶詠琴只懂「斟茶遞水」，兩人的好友為寶詠琴平反，「劉寶（指寶詠琴）係好肯認低威嘅女人，佢老公係比較優秀，好大男人，朋友上大劉屋企，劉寶好識做入廚房整嘢食，仲會話係女人應該做嘅！」對內認低威，對外工作就是女強人，「佢俾足面大劉，生意上都幫得手。通常大劉諗大方向，由劉寶去執行。劉寶話過買到銅鑼灣皇室堡，有銀行借錢好開心，佢做咗人生最大嘅生意。」他續道，大劉與寶詠琴離婚，對雙方有好處，「劉寶可以分到錢照顧爸爸媽媽。因為啲錢始終有細劉（劉鑾鴻）份，離婚可以名正言順分錢。嗰陣三、四億係好多！」

同父異母親戚

大劉與寶家的人無聯繫，其實他與自己的同父異母兄弟姊妹，一樣關係疏離。大劉早年有「大哥Joe」之稱，但其實他還有一個大哥，叫劉鑾成。而且除「細劉」劉鑾鴻外，另有兄弟鑾強、鑾武及三個姊妹。此因大劉媽媽葉淑婉是繼室，大劉父親劉火榮另有元配李悅卿一家。祖籍潮州的劉火榮，有兩位太太，共同為他生了五名兒子及六個女兒。其中由繼室葉淑婉誕下的，包括大劉、細劉、玉玲、玉慧及玉珍。有傳大劉母親有「潮州婆」稱號，與「跛豪」稔熟，六一年劉火榮已能與繼室一家，購置黃泥涌道一百四十七號五樓連天台。該單位有一千三百呎，以六萬五千元購入，反映劉家早在六十年代，家境已不錯，而且能供大劉及四個弟妹往加拿大升學。七四年劉火榮與友人成立友聯岳記吊扇廠，從事風扇製造。大劉學成歸來後，與寶詠琴加入家族生意，後來提出把風扇銷往北美洲，遭家族成員極力反對，才自立門戶成立愛美高。由葉淑婉所出的子女，都富貴榮華，除大劉外，劉鑾鴻報住山頂Coombe Apartments、玉慧報住半山璈珀、玉玲報住渣甸山等。反觀由正室李悅卿所出一家，相當草根。本刊翻查這家人資料，各人並無任何公司或物業記錄，相信只是尋常家庭。其中大女劉鑾娟的丈夫顏利漢，只是報住居屋鑽石山龍蟠苑，而此單位是他媽媽留下。記者下午到訪，雖然無人應門，但當晚顏利漢據記者留下的電話回覆，並斬釘截鐵指：「你千祈唔好嚟搵我，（同大劉無乜聯絡？）呢啲嘢我唔會答任何一個字。」他曾有間「安文餐飲」公司，但一二年已解散。

化身股壇狙擊手

至於大劉另一妹夫蘇偉能，為正室二女劉鑾貞的丈夫。本刊於公司註冊處，找到一個蘇偉能記錄；他報住屯門居屋富健花園，但本刊記者多次造訪也無人應門。劉火榮另有一個契仔游德生，一樣無公司無物業。據大劉的好友指，大劉絕無提及這批同父異母的兄弟姊妹；其實上，其父雖供書教學及設廠，但大劉現時豐厚財富，由其個人才智得來。大劉離開家族生意搞愛美高，適逢七十年代中東石油危機爆發，各國為節省能源，吊扇再度受捧，令愛美高迅速發展美國市場，其後公司業務擴展至燈飾、電子滅蟲器及火水暖爐生意。八三年愛美高在港上市，並獲得李嘉誠作為基礎投資者，可見誠哥當時也看得起同屬潮州人的大劉，市值短短五年間急增至五億港元。大劉在八五年開始涉足股壇，化身股壇狙擊手，專門狙擊那些控股權不穩的公司，先後狙擊過莊氏家族的能達科技，李樹福家族與馮秉芬共同控制的華人置業及中華娛樂、李兆基的煤氣（3）和嘉道理家族的大酒店（45），全部得手，除了華置及中娛留作旗艦外，其他則高價賣回給大股東，大賺一筆便鬆人。而他狙擊英資置地時，連環購入皇室大廈及灣仔夏愨大廈等貴重物業，成就今天的規模。

紅顏知己逐漸掌權

近年甘比得寵，家人甚至逐漸走入華人置業的權力核心。甘比姐姐陳詩韻，於○二年加入公司，一二年升做執董。而現年三十二歲的妹妹陳諾韻，亦於○八年加入華置，任職銷售及租務部，曾負責化妝品包括「雙妹嚜」業務。於上年七月，再尾隨姐姐加入董事局。除了紅顏知己，大劉則相當照顧同父同母的弟妹。一向與大劉感情要好的細劉劉鑾鴻，曾在九十年代初出任華置主席，在拍賣會上多次與大劉一起出現，「拍住檔搵食」。大劉早年很照顧細劉，教他做生意及交際。在科網股時代，細劉快人一步投資科技業，更曾打本與妹妹劉玉珍丈夫袁子春，成立駿升科技，發展錄影機預錄設備，成功打入美國市場。之後科網泡沫爆破，幸他及早抽身重投地產行業，對他影響輕微。至二千年崇光百貨賣盤，鄭裕彤夥拍大細劉，以私人名義斥資三十五億元，購入整幢共五十萬呎百貨大樓。而經營崇光的利福國際（1212）在○四年掛牌，由細劉出任董事總經理、大劉出任非執行董事，現時細劉大女劉今蟾與細仔劉今晨，亦先後加入利福，擔任執董。至於劉玉慧，為牙科醫生，在加拿大安大略省執業，自○四年起為華置及利福的非執董。事實上大劉「愛恨分明」，他所愛護的對象，都能盡享榮華富貴。

寶詠琴講孤獨的「劉太」

「一生獨來獨往…生孩子、割盲腸及一切婦科疾病，都是一個人入院、一個人出院，丈夫永遠也不在身邊。」「我只想做回自己，一個很自由的自己，如何稱呼甚麼也可以，劉太還是我的稱號。」「如果我還在那段婚姻中，我不會去檢查身體，到發現有癌症也會是末期了。就像上天冥冥中有安排，我的苦難還沒完結。」「劉先生在女人方面，是非常的bad taste。」「我無佢，我無今日，佢無我，佢無今日。」「假如有機會和劉生一起，我想是事業的，因為我和他的確是最佳拍檔。」「從前劉先生單純點，大家都很欣賞對方性格。」「我值60分，他是40分，因我比他努力。」註：節錄自寶詠琴過往訪問及自傳《琴心集》

寶詠琴談兒子劉鳴煒

「他是我的心肝命椗，有什麼事，我都會考慮他的感受。」「我要保護仔女。他們在家要行後門的，不可以用正門，因為我常收到恐嚇信，問攞錢。」「每天等待兒子放學，談到升學問題，很擔心他的用功，實在太辛苦了。他大學畢業時才十九歲。兒子勤儉生性，使我自豪。」「生病時兒子和我手拖手，令我感覺不再孤單。」「兒子溫馴、老實、勤力、低調、節儉，自小我已能帶他出外見客。」「兒子從加拿大來探我病，他一向是感性的，很易下淚，我就由得他哭個暢快。」註：節錄自寶詠琴過往訪問及自傳《琴心集》

撰文：財經組攝影：財經組[email protected]

大劉近排出入養和醫院覆診，雖然離開佢渣甸山大宅路程不遠，不過去醫院都要保持氣勢，坐住部車牌11號Maybach 62S型號超級富豪坐駕；大劉唔單只愛女人，仲好愛車同識車。

Maybach副偈出名，喺德國二戰時嘅坦克車引擎，都係出自Maybach，在○四年被平治收購後推出Maybach 57和Maybach 62，自然成為大劉囊中物，仲帶領潮流，富豪堆中搏上位嘅也緊貼大劉買Maybach，咁Maybach嘅sales又點會唔好招呼大劉呢？Maybach 62車長六米二，內籠寬敞無比，但六、七百萬一部車，外形又太似平治因而影響銷路，勞斯萊斯後來出部Phantom撼低Maybach，Maybach終於在二○一二年停產，但大劉對Maybach情有獨鍾，停產前仍以八百多萬購入Maybach 62S，可謂絕代之作，呢部Maybach 62S係最後期的高性能版，馬力更大，加速更快，可見大劉仲有團火！

花旗總部被除名

鬍鬚曾宣布參選特首，揀選「冠君大廈」舉行記者會，呢幢商廈名聽上去好陌生喎！其實嗰度係花園道三號，以前叫Citibank Tower（花旗銀行大廈），呢個世界好現實嘅，銀行業呢幾年都好艱苦，花旗銀行香港總部租嘅樓層縮減了，租唔夠數連個「命名權」都冇埋，最冇癮嘅梗係花旗嘅員工，以前大大聲同人講喺Citibank Tower返工，家陣要改口喺花園道三號囉！

中環寸嘴：「我都唔知個貴字點寫！」

年近歲晚，約個老友交收年貨，中環啲地方踎到熟晒，帶個老友去娛樂行間Mercedes me食個late lunch見識吓，老友話：「嘩，間嘢好貴喎！」唓，我都唔知個「貴」字點寫，Don't be silly！嫌貴唔去，呢世都去唔到乎？我淨係要知值唔值，你唔去睇過、食過，唔交吓學費，點知係咪貴得有道理吖？以我觀察，呢間餐廳多洋人或半唐番嘅非金融界食客幫襯，由食品到裝修都係新一代嘅品味，想進步就要靠嘗試。睇林鄭出嚟選特首，又話老公同兩個仔最初勸退佢，後來又支持佢，婆婆媽媽咁，超，仲停留喺粵語殘片時代，國際化欠奉，而家香港搞《家、春、秋》呀？同Donald Trump對壘就蝕晒章，可能鬍鬚曾以四兩撥千斤仲有得周旋吓，慢吓手為國爭光。林鄭都係搵佢嘅東廠西廠——馬會慈善基金同埋贖罪基金（註：陳啟宗曾炮轟關愛基金如額外繳稅，形容是商界贖罪券，並表示不會捐款，故關愛基金被謔稱為贖罪基金），透過東廠西廠，同佢派錢嚟收買人心，話就話搞福利，實情係揼商家佬心口，工商界準備任佢魚肉。個西九故宮對經濟冇乜幫助，鍾意文化藝術嘅人係使唔起錢！唔係財大氣粗嗰啲高端消費旅客，個人認為商業藝術就有出路，如品牌推廣，不過呢家嘢，以林鄭班底的土炮質地，心有餘而力不足！只不過香港冇一個男人可以同佢匹敵，此乃香港一大悲哀。

楊國佳工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。

恒地路邊盤搭波會順風車

恒地位於上水青山公路邊嘅一個地盤，名為高爾夫•御苑Eden Manor，為推此樓盤搞gimmick，整咗個全世界最大高爾夫球藝術雕塑，列入健力士世界紀錄；其實又何需大費周章呢？航拍一睇，此樓盤最吸引之處，梗係可以高高在上，𥄫住啲富貴會員打高爾夫，仲可以free ride隔籬粉嶺高爾夫球會嘅設施；嗱，話晒政府只象徵式收年租一千蚊，梗係要開放讓公眾享用吓，唔一定係會員先踩得入高爾夫球會嘅，揸香港身份證或者外國護照，都可以訪客身份，喺平日星期一至五，俾二千一百蚊就可以入球會，扮吓尊貴富豪打場波，其中兩百蚊仲可以用來享用餐飲，正所謂近水樓台先得月，行兩步路入高爾夫球會沾吓貴氣，所以話呢個盤「筍」位在此！又何須靠健力士呢？

《福布斯》香港富豪榜出爐，人稱「大劉」的華人置業（127）前主席劉鑾雄，以$1,200億港元身家，打入排名榜第4位，揮低了新鴻基地產（16）的郭氏家族。近日，大劉為了讓新任劉太「有個倚靠」，將尖沙咀全幢「The One」送出，造就甘比成為香港女首富。

豪氣、疏爽、如梟雄般的性格，是劉鑾雄給人的印象。但他的背景、身世，卻從未由他口中透露半句。單單是網上流傳他肄業於哪間大學，竟有兩個版本，而大劉從無澄清。想知原因，要由他父親劉火榮和母親葉淑婉的發跡講起。

侍母至孝的大劉，過往常帶母親葉淑婉出入福臨門；老人家一身名牌，手挽Hermes手袋，由女兒或大劉當時女友甘比結伴前來，相當富泰。大劉日後的成就，母親擔當着重要角色。葉淑婉祖籍潮州，在圈內有「潮州婆」之稱，與潮州籍的「大毒梟」跛豪（吳錫豪）相識。丈夫劉火榮有兩頭家，葉淑婉是繼室，先後誕下鑾雄、鑾鴻（細劉）、玉玲、玉慧及玉珍。六一年，劉氏以六萬五千元，購入黃泥涌道一百四十七號五樓連天台單位自住，面積有一千三百呎。據附近街坊指，三十多年前能夠住在該處，都算是很「巴閉」。這個單位劉家早年已賣出，後來曾購回緬懷昔日歲月，最終再出售。

大學鬧雙胞

劉父財政鬆動，能夠供所有子女往加拿大升學。第一個出國的，是劉鑾雄。他前往加拿大溫莎大學（University of Windsor）修讀數學。不過網上亦廣泛流傳他畢業於滑鐵盧大學（University of Waterloo），但對比外間指他對女友呂麗君孤寒便大動肝火，大劉從未對學歷作出澄清。睇睇排名便知，滑鐵盧大學的世界排名，是一百五十，而溫莎大學只是排六百多，「級數」有所不同。反而弟弟劉鑾鴻，畢業於更頂尖的多倫多大學（University of Toronto）；其後大劉透過妹妹劉玉珍（Mary），結識當時在滑鐵盧大學修讀社會學、青春逼人的寶詠琴，開展大劉年少時的溝女歲月。一如其做股壇狙擊手，當時盡顯了「快、準、狠」本色。一名舊校友回憶指，劉父當時「揸緊」大劉的生活費，零用錢未匯到時，他也要問朋友「度住」一百幾十元加紙，「話就話借住嚟入油，但一缸油打爆都係廿蚊，剩低就用嚟做溝女經費，揸住架二手車直剷上去寶詠琴就讀嘅Waterloo大學。」

風扇起家

七十年代出國留學的「港女」相當矜貴，事關父母通常供仔不供女。當時溫莎大學靠近美國的「車城」底特律（Detroit），故大劉不僅玩車也識車，「集郵」個性也盡顯於此，二十多歲時曾在一個星期之內，連買四部不同款式的法拉利，回港後更會叫伙記駕駛其名車到吐露港兜風，對車的要求更由車類延伸至車牌，其在政府車牌拍賣會上多次購得車牌，包括1L0VE U、1LOVEU2、1M1SS U等，由頭威到落腳。近排他出入養和醫院覆診，都要保持氣勢，坐住車牌11號的Maybach 62S型號超級跑車。大劉除了開車風光，識人同樣架勢堂，其一家與香港毒販「四大家族」之一的「跛豪」牽上關係。七四年大劉畢業歸港，同年十一月，屬潮州幫中「義群」的領導人大毒梟「跛豪」，在九龍塘根德道二十八號家中被捕，並被控於六九至七四年五月間販毒。當年的檢察官曾指出，其為國際販毒集團的首要人物，販毒出售逾十六公噸重的毒品，價值高達三億二千萬至四億五千萬元。七五年七月，四十五歲的「跛豪」，因罪成被判三十年徒刑。「跛豪」出事前幾個月，六十一歲的劉火榮在友人支持下，斥資五百萬，與葉淑婉、大劉五兄妹，以及許義通（其後是葉玉玲夫婿）成立友聯岳記吊扇。對比現時五百萬只能買到一個兩房的美孚新邨單位，此筆錢當年足以掃入一百六十個該邨單位，可見金額之巨。友聯岳記吊扇廠初期設於土瓜灣浙江街，八十年代大劉從大會堂拍賣買入柴灣利眾街地皮，把吊扇廠搬進該十四層高的工廠，請了百多名工人，把吊扇外銷到中東地區，大劉「風扇劉」之名正緣於此 。

撰文：財經組