| ||||||
| 記 得好耐以前，金融界紅人Y係公認嘅投資銀行界一流高手，佢自己讀經濟學出身，理論多多，幾乎讀埋博士，後來搵到份好工，索性放棄博士課程，果然係一個最有 回報嘅英明決定。左丁山問過佢：「你請助手，鍾意請邊一啲學系畢學生？」紅人Y話 ：「冇一定嘅，不過我有一個偏見，讀會計傾向呆板，受數字所困，讀法律嘅傾向於法規條文，樣樣都話唔做得，冇乜創意。」 廿一世紀嘞，大學生 問賓架W：「投資銀行係唔係偏重請Ivy League學生？」賓架W話：「名牌大學自然佔咗優勢，但啲畢業生未必個個叻，本地生亦有好醒嘅，但要慢慢揀。美國名牌之中，UP與UC學生做 iBank，表現相當唔錯。但今日投行見學生，往往會問一啲數量分析以至財務模型問題，唔識嘅學生就蝕底嘞。」 左丁山對此有回應：「此或者 係金融海嘯嘅成因之一。投資銀行過往十年過份集中發展結構性產品、衍生工具等等，鑄成禍患。如果佢哋依照英國商人銀行傳統，肯請啲文學系、歷史系學生入去 做而唔係鍾情於數學系、工程系、計量財務系學生，情況或者唔同晒。」賓架W其實係讀歷史嘅，佢十年來一直唔願推廣CDS、逃過一大劫，或與此有關。舊年 《華爾街日報》訪問以新加坡為基地嘅一位英國基金經理，此人從蘇格蘭去新加坡，開設分公司，由幾個人擴大至今天數百人，聲名顯赫，記者問到佢係唔係要請商 學院學生或MBA，佢嘅答案係：「我喜歡文學院學生，我加入呢行之前，唔識乜嘢叫做會計！」但佢係少數派，美國基金之中，Quant Fund大行其道，識少啲數都唔掂。 MBA課程近年有增加「人文味道」嘅聲勢，史丹福大學MBA課程要求學生到藝術學院修讀一兩科，到studio學吓畫畫及手工藝，以幫助MBA學生增強創意。外國如此，香港亦會跟風，藝術B最近就被邀與某大學進修課程傾談，研究吓有乜藝術課程適合啲廠家修讀。 | ||||||
| ||||||
| 肥 仔Ｋ奉老闆之命，周街行，視察各零售店之生意情況，突然收到母校中學老師電話，叫佢第二日返學校向學生演講，原來一位校友講者臨時有事，不能回校，故此老 師急忙搵肥仔Ｋ替補。老師叫到，冇法子推卻，惟有硬着頭皮，第二朝返學校早會，做其甚麼「經驗分享」，講述佢自己會考成績欠佳，往美國讀社區學院，轉入大 學，再到倫敦讀碩士，自倫敦得文部省獎學金往東京攻讀另一個碩士之故事，在外國九年，求存之道就係老子名言：一曰勤，二曰儉，三曰不為天下先。老師居然讚 佢講得好，肥仔Ｋ為之飄飄然。講完，校長請吃早餐，慨嘆如今學生必修通識，中國歷史已被揚棄，亦少學生選讀中國文學（其實據左丁山所知，好多中學已停開中 國文學課程），他日呢班九十中後（九五年左右出生）唔知點樣會識得中國國情。 肥仔Ｋ聽到，頗有所感。佢話在LA讀大學之時，一位智利學生見 到佢，猛同佢講少林詠春，叫肥仔Ｋ過番幾招Chinese kung fu，肥仔Ｋ話一啲都唔識，智利學生大失所望，對佢講：「我以為所有Chinese都識功夫嘅！」邊度係吖！只不過李小龍、李連杰太紅而已。上堂之時，老 師講起但丁，一位意大利學生猛咁吹水，點知吹穿窿，畀教授窒親。下課後，意大利學生對肥仔Ｋ講：「但丁係我國經典詩人，邊個意大利學生敢話唔識呀，為咗面 子，我雖然識少少啫，都一定要發言o架，唔通俾其他國家學生講晒咩。」大家到咗飯堂食薯條，聽見一位美國學生向一位香港學生請教Confucius，但香 港學生居然答：「我啲中文好渣嘅，唔識。」意大利學生大惑不解，問肥仔Ｋ：「點解香港學生話自己中文好差嘅，我死都唔會認自己啲意大利文好差！」肥仔Ｋ為 之臉紅。 肥仔Ｋ對佢啲師弟演講，如出外留學，最好讀番啲中國歷史、文學常識先，千萬不可在外用：「我啲中文好差嘅。」作為遮羞布。講就係咁 講，有冇人肯讀係另外一回事。香港中學生素來少讀中史與中國文學，施行三三四學制後，呢兩科更湮沒無聞，任特區政府與親中人士嗌破喉嚨講甚麼國情教育，邊 有人理會吖。 | ||||||
| ||||||
| 本欄寫「無國情教育」，一位讀者來郵云（讀者用英文名，譯音就係「香港人」）：「特區政府與親中人士嗌破喉嚨講嘅國情教育等於中史加中國文學咩？左先生真係純情？抑或人在江湖耶？」 「香 港人」兩項觀察都錯。左丁山自細到大都未純情過，亦非人在江湖。幾年前有位香先生主持公民教育委員會，要電視台在黃金時間新聞節目啟播之前，先播一段《義 勇軍進行曲》，作為公民教育一部份，起初有好多人鬧，但播咗幾年之後，o依家冇人嘈啦！好多中小學生每日聽一次，現在已有好多學生識用普通話唱「起來，起 來。」正合香先生之原意。 但只係識唱而不知道此曲之歷史背景，唔識得誰是聶耳與田漢，唱歌只是唸口簧啫，學生邊度會投入吖。另外，如中學生 不讀歷史，不識鴉片戰爭、甲午戰爭、八國聯軍與八年抗戰，香港學生邊會感受到「前進、前進」之勇悲壯？故此對中央與特區嚟講，脫離中國歷史談國情教育，只 係叫吓學生背書啫，毫不深入，好難入腦，點會如北京所願，成為愛國學生吖。 左丁山經常對有關人士埋怨中學改制為三三四好則 好矣，奈何同時改埋課程，廢除中史，將中國文學完全邊緣化，乃係一大失着。根本嚟講，將中國文學與中國語文分割成兩科，教中文如教第二語言，已是絕大錯 誤。我哋舊時讀「國文」，何曾分開中國語文與中國文學嚟讀？一位對考試、考評甚有認識嘅朋友向左丁山講過，北京其實對香港中學廢除中國歷史科，不滿之情， 溢於言表，但不便公開表態而已。好多老師為了維持飯碗，爭讀大學嘅通識碩士學位，教授講文化大革命，據左丁山所知，一啲老師（六十後、七十後）為之茫茫 然，皆因佢哋以前冇讀過近代史，成長時期亦無留意過十年文革浩劫。佢哋讀完學位，返到中學教通識，講到近代史、現代史，好可能係照本宣讀而已，點會教得深 入吖 | ||||||
| ||||||
| 西服成衣店贊助賽馬，令人耳目一新，好多馬迷入到場，都唔係幾識甚麼是K&C嘅，但場內有成衣出售，加上每場空檔之間，螢光幕有成衣店廣告，十場賽馬下來，想唔識都幾難。 K&C 在國金二期有專門店，除出售現成西裝外，還有裁縫為顧客度身定造，一套西裝閒閒哋要萬幾二萬銀，唔易負擔o架，但對大馬主嚟講就比較濕碎。呢日賽馬，兩位 大馬主，咁啱都係姓冼嘅，贏馬奪標，威風八面。「蓮華生輝」馬主冼鏡煜搵埋朋友苗僑偉戚美珍夫婦一齊捧走K&C香港短途錦標，由利豐集團主席馮國 經博士頒獎。見到馮博士，先至醒起K&C之香港業務，已收歸利豐旗下。在馮氏兄弟經營之下，百年老字號利豐已由一家典型華人洋行蛻變成為跨國大企 業，可講係全世界最大之「購貨」（sourcing）集團，最近又與沃爾瑪合組一間公司o忝，專門為沃爾瑪做sourcing，預計第一年營業額係二十億 美元，令到利豐股價在大跌市中不跌反升，的確值得馮氏兄弟牙擦，利豐之成就，亦香港華人企業之光也。 「蓮華生輝」係世界短途馬王，贏馬係意 料中事，估唔到嘅係林大輝議員隻「極奇妙」，七歲老馬今季如脫胎換骨，竟然可以壓倒「同一世界」，與「蓮華生輝」串Ｑ，實在令人意外。同樣意外嘅係冼為堅 博士嘅「友誼至上」贏咗「好爸爸」與「自由好」，奪得董事盃，賽後只見冼博士與太太拖住一位女孩子與年輕男士，似係佢哋嘅孫兒輩，灑開大步走出草地拉頭 馬，氣派不凡，一位馬迷評論曰：「做馬主當如是也！」 個個馬主都想咁威，但只有極少數人有此幸運，唔好以為有錢一定掂，在第五班角逐嘅現役 馬，有唔少都係身價二三百萬元嘅。更多身價六七百萬元嘅馬，冇法子贏到一場大賽，只在二、三班浮沉！雖然如此，美夢不滅，人人有個夢想，馬主協會成員十餘 人於上星期六晚出發往紐西蘭參加今個星期嘅卡拉卡拍賣會，人人都希望買到一隻「蓮華生輝」、「友誼至上」、「好爸爸」之類好馬來港作賽，香港賽馬事業需要 有人肯出錢買馬，賽事方才吸引，香港馬主樂此不疲，對賽馬貢獻至大。 | ||||||
| ||||||
| 奧 巴馬推出新預算案，財赤數字以萬億美元計，大到令人麻木，普通人根本數唔到，以美國GDP一年有十三萬億美元計，財赤佔GDP接近10%，高過葡萄牙，之 所以仍然未發生賴債危機，皆因美國即是美國，全世界冇人敢挑戰佢。奧巴馬話要凍結大部份國內支出，係咁意慳番幾百億美元，係做姿勢而已，實際上於事無補， 但有一樣值得留意嘅係，即使美國周身債，奧巴馬仍然增加教育與科研支出，絕對為美國長遠基本競爭力打算。反觀特區政府受九七亞洲金融風暴打擊後，立即削減 大學經費，當政者之視野與奧巴馬有段距離。 奧巴馬如果唔係咁做，美國大學就好難維持競爭力，耶魯大學校長近日講及中國大學有資格躋身世界十 大，英國政府大削大學撥款極為不智。佢講得有道理呀，一個國家之長期競爭力取決於教育及科研能力，整個歐洲與英國已跌入長期下降軌，將來好難同美國、中國 與亞洲爭雄。自金融海嘯之後，中國趁機推出一個「千人計劃」，就係趁歐美裁員減薪之時，去歐美挖一千個華裔專家返回大陸，最初本來係針對華爾街人才嘅，現 在已擴大至全方位搶人。 呢日中午吃飯時份，碰到多年不見嘅學長教授L，互換名片之後，先知道佢已經係中國科學院院士，為之肅然起敬。要做中 科院院士，非常困難，香港人當中科院院士，難上加難，理由大家心照。與教授L傾開人才及科研發展，教授L話中國啲大學爭取「千人計劃」配額，拿到之後就去 美國招募優秀華人專家，條件係：（一）薪酬照美國，有增無減；（二）房屋等完全供應晒；（三）科研基金照額撥足；（四）博士級助手數目，你夠膽開，佢夠膽 畀。教授L話：「呢啲大學只係省級大學啫噃，開出條件優厚到得人驚，話唔定內地大學遲啲嚟香港挖角，扯走我哋最優秀嘅科研人員！」挖角無錢不行，唔使等內 地大學來港搶人，最老牌最有錢嘅香港大學去年已從中大挖走呂大樂，從城大挖走海水環保專家胡紹燊及科大生化專家Maria Lung，壯大港大科研力量，其他大學冇咁多資源，好難還以顏色。 | ||||||
| ||||||
| 有 事去澳門一行，素來好食嘅秘書V叫左丁山去××樓買半打乳鴿打包回港，話「好美味，好好食o架」。左丁山極少去澳門，從未去過××樓，位於何方都唔知，點 去買呀，況且已約好晒，去到澳門碼頭就有司機接去開會，開完會就坐原車返回碼頭上船回港，邊度有時間去搵××樓啫。秘書V大嘆可惜，指左丁山唔識美食。 佢 講乜都好啦，我哋一行人到咗澳門，見到好多「娛樂場招牌」，英文就寫係Casino，點解中文唔寫賭場呢？司機話：「中文唔准寫賭場o架，英文就可以，我 哋澳門有娛樂場，冇賭場，但有Casino！」認真虛偽，乜中國人咁弱不禁風，見到「賭場」呢兩個字就會嚇到昏倒？同行嘅教授T話新加坡開賭場，但對本地 人要收一百坡紙入場費，一般平民負擔唔起，即係只准富人入內，此外，家庭成員如認為家內有人嗜賭，可申請禁制令，禁止好賭家人進入賭場。新加坡政府開賭， 純為刺激旅遊，但又怕國人因而輸錢，故此訂下奇怪規條，盡力阻止新加坡人入賭場，此乃「社會工程」（social engineering），是否有效呢？教授T話：「未必得嘅，會製造家庭糾紛o忝。以前新加坡為鼓勵三代同堂，強化家庭關係，提供特別大嘅公屋，近二千 呎，畀一家三代人一齊申請，但反應不佳，現已停止。政府嘅願望，未必一定受人民歡迎嘅！」 新加坡開賭，會否搶走澳門生 意？JP摩根發表報告，估計新加坡金沙賭場可以到咗2011年每年產生二十六億美元收入，比金沙嘅拉斯維加斯賭場足足多兩倍。係唔係咁好景呀？眾所周知， 大陸人係澳門常客，澳門娛樂場先至咁好景啫喎，新加坡周邊嘅印尼人，馬來西亞人，以至泰國人，冇咁多錢去賭吖嗎？澳門仲有一個特點，黃賭並存，與拉斯維加 斯不遑多讓，而賭仔係鍾意靚女雲集嘅地方嘅。新加坡咁鬼乾淨，唔通去新加坡嘅賭徒特別純情？教授T講：「你有所不知，新加坡嘅黃色事業係合法嘅，由政府嚴 密管制，專為低收入外勞而設，十二坡元有交易，新加坡政府照顧居民生活，係無微不至o架！」 | ||||||
| ||||||
| 今 日年初三，例牌節目就係去拜車公，不過車公廟一定人山人海，適逢今年環境好轉，金融海嘯已過，正好到車公廟還神或祈求轉運。但每年此日例必有十萬人以上湧 至沙田拜車公，唔想人逼人嘅話，延遲幾日都得嘅啫，譬如年初六、年初九、年十二、正月十五元宵日皆宜祈福，其中又以元宵節（二月廿八日）為星期日，晨早九 時至下午三時都係吉時，大把時間畀大家去還神祈福、轉運。 講起轉運，馬圈中人久唔贏馬，就會去拜車公。據一位心水清馬友講，今季開始之時， 四個馬房──霍利時、胡森、薛達志與鄭偉俊獲馬會分配最新型馬房，就係在○八年奧運馬術賽場地嗰邊，稱為奧運馬房。點知四位練馬師之中，除咗鄭偉俊嘅成績 唔錯之外，其他三位南非、德國、英國練馬師嘅成績大倒退，與○八/○九年馬季同期相差好遠。有人話奧運馬房嘅設施太先進，馬兒好吃好住，太舒適嘞，故此上 陣比賽就毫不起勁，輸多過贏！但當然亦有人話，奧運馬房係唔係同洋人唔夾風水呀，佢哋應該趁新年到車公拜一拜先至得，霍、胡、薛三位如果仲未去過，都怕要 入鄉隨俗嘅嘞，尤其是德國人薛達志o忝，唔好令馬會德國人行政總裁難做吖。 沙田風水邊處好，地產經紀有嘢講，大編輯話趁新年去睇吓樓，學吓 嘢，好過到處拜年，於是打電話搵相熟經紀預約，經紀對佢講：「新春行大運，不如到沙田行個圈，沙田最好嘅風水樓就係御龍山、銀禧花園、駿景園，對正馬場呢 個聚寶盤，一定正，銀禧就舊啲，不如專睇御龍山與駿景園。」哦，原來想sell豪宅，大編輯故意講：「城門河另一邊嘅碧濤花園夠對正馬場啦，又唔見你 講。」經紀乾笑兩聲：「一啲客話唔知有冇人種過生基喎！」一聽到種生基，大編輯即刻打個突，覺得都係咪攪咯！惡佬明聽到，為之大笑，因為佢在地盤要掘窿之 時，工人齊齊話掘窿唔好聽，改為叫「種生基嘞喂！」 | ||||||
2010-02-17 AD
| ||||||
| 新年前睇電視，揸住遙控亂咁㩒，無意中睇到一個有線唔知十五定十六台，好似係TTV亞洲，平時都唔知係乜台，全部係普通話對白，究竟係大陸台還是台灣台呢？睇真吓，中文字幕全部係繁體字，當佢係台灣嘅衞星電視啦。 一 個主持人加四個嘉賓，討論戰狼成吉思汗，全部得個講字，無畫面配合，以為係沉悶脫口騷，但聽落非常正斗，知識性豐富，諗唔到香港有乜人識講得咁好聽。四位 嘉賓從蒙古人行兵時間、養馬打獵、騎兵西征之飲食、騎射、弓箭以至成吉思汗之個性，全部講齊，講到津津有味，左丁山一聽就入神，一路聽落去，唔願轉台。香 港嘅電視台，點都唔會炮製呢類節目嘅。 原來成吉思汗好識得收斂脾氣，決不衝動發火行事。嘉賓專家話蒙古人好打獵，出門必有養鷹隨行，成吉思 汗少時有一次打獵，越行越遠，水袋內已無飲水，於是急謀水源，見山邊岩石有水滴下，於是用水袋載之，逐滴逐滴咁裝，好耐先至裝夠半袋，佢隻鷹就在頭頂高空 飛行徘徊。裝滿半袋，想飲用之際，飛鷹俯衝而下，撞翻水袋，倒瀉晒！成吉思汗無奈，再裝過，點知到半滿之時，飛鷹再衝落嚟，撞翻水袋，成吉思汗大怒，揮手 趕鷹，再嚟過，飛鷹第三次衝落嚟，水袋第三次倒瀉，成吉思汗忍無可忍，舉起弓箭，一箭射死隻鷹。隨即後悔，於是爬上半山岩石尋鷹屍，屍在一個細水池內，池 內有條已死毒蛇，毒蛇液滲在水中，水沿山岩流下，滴落山下成吉思汗裝水之處，如果飲池水就會中毒。成吉思汗恍然大悟，知道飛鷹在空中見到蛇屍，驚住主人飲 滴水中毒，故此俯衝落嚟撞跌水袋，護主情深也。 成吉思汗深感飛鷹之忠誠，誓言以後唔再衝動發脾氣，告誡自己按捺不住之時，就由一數到十、數 到一百以至數到一千，將怒火壓下。嘉賓專家話成吉思汗領軍攻打西域，絕對冷靜行事，將蒙古人嘅日常生活習慣與調兵遣將融合為一，故能屢戰屢勝，橫掃對手。 左丁山亦有發脾氣時候，以後要學吓成吉思汗數羊仔至得，就從虎年開始。 | ||||||
| ||||||
| 財 務總監Ｗ約吃午飯，傾吓兒子入學問題。此日睇新聞，知道有婦人因女兒不獲英基學校取錄，與丈夫口角，憤而自殺一事，大家談起來，不勝感慨。總監Ｗ結婚數 年，兒子在○三年出世，因是年有沙士，出生嬰兒數目比較少，根據政府統計署數字，有47,687人，係過往十年最低紀錄，故此佢位公子嘅入學競爭，比較冇 咁劇烈，譬如○七年嘅出生嬰兒數字大增至70,394人，入學競爭就大好多咯。○七年數字包含內地婦人來港分娩嘅數字，呢批內地嬰兒究竟有幾多來港讀書， 係一個好大嘅未知數，如果教育局根據○三年數字嚟部署殺校縮班，但四年後又要加校加班，咪攪到教育界大亂？諗吓都頭痛。 總監Ｗ素來精於數 字，為要送兒子入國際學校，前年已買定國際學校債券（debenture），據佢講，漢基國際學校CIS債券已炒到三百幾萬元，咪話唔得人驚，中產階級買 唔起。佢當時因自己持有加拿大護照，考慮之時在兩張約莫同價嘅債券（八十萬元左右），捨棄咗數碼港嗰間（高錕教授創辦），要咗加拿大國際，點知時至今日， 唔知係唔係與高錕教授有關，該校債券市價已升咗一倍咁滯，而佢揀選嘅加拿大國際學校債券價格停頓不動，於是大嘆走寶，以走勢睇，高教授創辦之學校債券，大 有機會與CIS看齊，有升冇跌。 左丁山就話，如非真係富貴，無謂追逐天價學校債券咯，入到CIS，人哋阿爺係福布斯香港富 豪排名榜上嘅人物，同學仔出入有保鑣跟隨，自己仔女返嚟問你：「新年同學Ａ去瑞士滑雪，同學Ｂ去摩納哥別墅休息，我哋去邊呀？」即使你有一億身家，都好難 同人比較喎！不如慳番啲昂貴債券、昂貴學費，叫仔女讀本地免費小學、中學，將相等學費儲蓄起嚟，送佢哋去外國讀大學。財務Ｗ計慣數，即刻話：「係嘅，計 NPV（淨現值）就着數晒，一個每年不斷使錢，另一個不斷儲錢，十二年後，儲錢嗰位會剩番好多，如投資得宜，留學費用都賺到啦，唔使動用本金o忝。」數就 係咁計，但好多人驚死讀本地學校執輸，仔女英文會差CIS學生幾皮，好蝕底。唔係嘅，請英婦補習會話/寫作，每年暑假送佢去外國英語夏令營，仍然可以慳番 好多（與國際學校學費比較），中產階級無謂充大頭吖！ | ||||||
| ||||||
| 財 務R出席高盛主辦嘅經濟講座，成個四季酒店宴會廳坐滿人，多數係高盛客戶，財務R話睇落去，內地人佔咗一半以上，可見今天大行之客戶群，以內地人為主，唔 識講普通話嘅私人賓架（private banker），返鄉下可也。高盛首席經濟師奧尼爾話中國經濟增長驚人，十七年後GDP總額可以追上美國，雖說語出驚人，但睇數字係可以推算出嚟嘅，假設 中國每年增長8%，GDP十年可以翻一番，○九年中國GDP約係五萬億美元，二○一九年會係十萬億美元、二○二九年係二十萬億美元；○九年美國GDP約係 十三萬億美元，複式增長速度頂多每年兩個幾百分點，遲早會被中國追過，大前提係中國GDP增長率須二十年內每年超過8%。 西方人對中國前景 如此牛，於是逐漸將投資重心移到以中國為主嘅亞洲，佢哋對日本睇法好熊，於是紛紛搬離東京，搬去邊呢？去上海，暫時好似時辰未到，歐美高級行政人員未有長 居上海傾向，十年八年後或者唔同，目前嚟講，首選係從東京搬到香港。基金F講：「以我所知，跨國集團目睹日本衰咗二十年，同時間中國興起，覺得再留在日 本，只會嘥時間。一間有二百五十間分店嘅連鎖店將結束全部日本業務。一間法資銀行嘅亞洲總部撤離東京，今年移居香港，會有二百五十個行政人員與家人來港搵 住宅。東京之失去國際金融競爭力，跌落長期下降軌，對香港嘅直接影響就係高檔住宅租金與樓價，有一股強大支持力，易升難跌，國際學校債券價亦然！」 上 海未完全崛起之前，香港仍然會係一個世界城市，至於能否持續、保持，不致十年後變成另一個東京，好難講。基金F就堅持睇好香港。財務R最近與歐洲某國總領 事碰頭，總領事話該國國民在港人口急升三倍至二千幾人，以前僑民多數在銀行/保險公司工作，但新到香港僑民就以七十後、八十後青年為主，佢哋有感於歐洲暮 氣沉沉，要到亞洲闖蕩，首先就係到香港搵機會，到中國搵機會。呢批白人多數住在港島，當然冇錢住在中半山與太古城啦，好多住在西營盤一帶喎。 | ||||||