📖 ZKIZ Archives

常言道：「靚女唔屙屎！」此真的是大錯特錯，消化排泄為身體重要機能之一，如果靚女長期排不出糞便，會引發健康各種大小危機，分分鐘連靚女也做不成。曾經擔任連卡佛買手的林佩詩（Lisa）正是曾深受便秘之害，結果在朋友介紹及姐姐林佩芝（Pat）的鼓勵下接觸了發酵茶，大大改善了身體健康之餘，更改變了她一向鍾情時裝的方向，創立了「Taboocha大杯茶」，讓生產及推廣發酵茶變成她生活及事業之重要部分。時裝美女轉型教人正視身體問題

姐姐Pat笑說：「你睇我阿妹個頭再加佢嘅一身衣著就知佢有幾fashion啦！」沒錯，今年二十八歲的Lisa雖然身穿圍裙，身處充滿家庭式工廠味道的廚房，但她比Rocker更有型的剷青短髮及一身爛牛配布鞋的打扮，仍然散發着陣陣「潮味」。在美國修讀時裝課程的Lisa曾於國際品牌做採購，但原來在美輪美奐的靚衫靚鞋工作背後，真的是有苦說不出。「當時因為工作上各種原因導致壓力好大，結果最先浮面嘅問題就係便秘。」她指最嚴重那時要三、四天才能成功排便一次，而且過程還極之痛苦。「都市人壓力大，好多時都有便秘問題，但基於尷尬又唔敢講。」壓力大更令Lisa出現失眠問題，排不到便又睡不好令皮膚敏感，令她反思到要真正的「靚」起來，身體健康比一切也重要。在喝發酵茶及減少吃加工食品的幫助下情況才得以改善。「後來開始去到廁所，雖唔係每日都有，但至少兩日有一次，已經係好大進步，感覺都舒服咗好多！」目前她成為了全素食者，主張吃生機食物（raw food），即是以不高於攝氏42度烹調食物，以完整保存食物中的天然酵素。

營養價值受肯定但港人口味未摸清

飲用發酵茶成功為Lisa的健康帶來一場逆轉勝。「開頭係因為需要而飲，後來因為家姐好鍾意發酵茶嘅味道，先慢慢由需要變成欣賞。」發酵茶因帶有茶字而經常被冠上傳統中國茶的形象，其實是帶微酸的有氣飲品，具清香之感。發酵茶英文名字為Kombucha，一般被稱為「茶菌」，而菌種就是進行發酵的最重要主體。目前大杯茶在生產時會進行兩次發酵，主要以綠茶及紅茶作茶底，在第二次發酵時會加入果汁及香草等。現總共有七種口味，包括有茉莉花、杞子薑、青檸羅勒、紅菜頭、黃薑菠蘿、洋甘菊及香草味。「發酵茶嘅優勢就係有益生菌和酵素幫助腸胃消化，而呢樣係菜汁同果汁提供唔到。」為了讓更多人願意嘗試發酵茶，大杯茶在今年頭特意把批發價減百分之三十，並設建議零售價為三十八至四十四元，以更接近一杯咖啡的價格。「有人飲完後話好似菠蘿炒飯、咕嚕肉。不過我估係因為試咗我哋個黃薑菠蘿味。」雖然發酵茶的味道對港人來說有點太「新鮮」，但Lisa指茉莉綠茶口味的清新一直以來也很受男女歡迎。「男士可能比較多飲青檸羅勒，可能佢哋對酸味的接受程度較高。女士就鍾意杞子薑。」Pat指某些人會認為發酵茶太酸，她認為是因為市面上飲品含糖量較高，導致香港人口味普遍也偏向太甜。

有姐的孩子像個寶

Lisa主力生產及研究新口味，經常靜靜地站在「養」着無數母菌的數十個巨大玻璃樽前專心細看它們的情況，而Pat則不時因與記者討論得太興奮而七情上面，兩姊妹雖也留着短髮，卻有種另類對比。「佢成日話自己係總統而我則係佢嘅首相，負責有效咁實踐佢嘅想法。」Pat原先是事務律師，做了七年因而儲得一筆積蓄，在妹妹決定辭去正職創業時用以投資作支持。後來因父親快要退休而需接管家族建材生意而離開律師的本業，轉為學做生意人。「本身主要以投資者身份支持Lisa，後來睇到佢愈嚟愈忙決定喺家族生意中抽出時間幫佢。」由從中環打滾變成每天進出荔枝角；從於法庭為別人抗辯轉為在不同的市集向人介紹發酵茶，轉變實非一時三刻可習慣。「以前打工每個月都有一定現金喺手，但而家做生意唔係話幾日就可以回本有賺，成個生活方式都改變咗。」她笑指現在不能再像以前般隨便地在中環喝杯百多元的飲品，每使一分一毫都會「諗過度過」，但她指一切也值得，起碼換來和家人更多的相處時間。「我倆成日都嘈，始終我做了佢姐姐咁多年難免好易就責怪佢。」Pat指兩人其實是很合拍，認為妹妹是個很有創意、對產品很執着的一個人，所以相信她所作的決定。二人在訪問時不時「互表不滿」，笑對方笨手笨腳，但轉個頭又會攬作一團。Lisa得戚地說：「我就知道佢絕對唔會離棄我。」指正因為大家都夠坦誠，才不會有所謂心病，大吵大鬧後依然不會「分手」。

本土意識強小店互撐增銷量

目前大杯茶主要作批發商，每月生產二千多瓶發酵茶批發給香港約二十個品牌，總共有約四十多個零售點，當中位於上環的小店OHM HK就是其中一間。負責人阿珊指：「知道佢哋係用公平貿易得來的茶葉做茶底，大部分都係用有機及本地材料，覺得好符合我哋鋪頭嘅理念。」OHM HK每月也會購入四十支大杯茶放在店內寄賣。除了健康飲食外，二人也擁有很多相同理念，包括今次以大杯茶名義贊助萬五元予何韻詩的演唱會。「我哋支持好多嘢，例如收養流浪狗、支持本地音樂又或是言論自由及環保。」Pat指早前以律師身份參加過白皮書遊行，如果人們也不再發聲就沒有機會。「好多人睇今次贊助覺得有政治因素，但我哋睇嘅好簡單，就係支持每個人都有實踐自己計劃嘅權利。」

開業資料（05/15）裝潢及器材$250,000容器及雜費$70,000總投資$320,000

營業資料（07/16）營業額$50,000租金$10,000薪金#$17,000雜費開支$20,000盈利$3,000

#包括Lisa全職薪金及一名兼職薪金

專家意見：要小心發酵過程出現害菌

養和醫院營養師柳慧欣也認同發酵茶的益菌確實有利腸道健康，特別是對便秘或肚瀉的人有幫助。「某些人食少少乳糖都會肚瀉，又或係唔鍾意乳糖製品嘅味道，就可以用發酵茶代替。」不過她補充，若製造過程中處理得不好，不單會產生了益菌更會有害菌，加上發酵過程會釋放小量酒精，因此建議抵抗力比較弱的人如孕婦、老人家和小孩就要小心飲用。「如果想自己品牌更好，長期嚟講每一批貨都可以攞小量去化驗睇吓有冇害菌，以證明產品安全性達標。」

撰文：黃綺敏攝影：鄭樹清、關永浩攝錄：廖健昌[email protected]

今年，是新鴻基地產（16）洗去沉寂的一年。先是上月前主席郭炳江成功申請保釋，提早「放監」；再者是新地的重頭戲、元朗新盤Grand YOHO，於今個月低價開售，數日間已收票逾萬張，成為今年新盤之王。Grand YOHO所在的雞地，數十年前只是賣雞鴨鵝的市集，其後被新地睇中，並由郭炳江為首的收地團隊密密部署收購、補地價，經三十年改造，親力親為，變成現今升價十倍的「金雞地」。毗連的貴重地皮，亦由郭炳江兒子郭基煇拍板，慷慨捐出作慈善用途。據知郭氏對於捐地一向保守，四叔李兆基曾慫恿郭老太一同捐地，但被婉拒；今次則足見誠意及慷慨，而且地理位置比四叔所捐的更靚。郭基煇坦言：「是『官民商』合作的好開始！」無論是樓盤開價取態、又或是與政府的合作關係，新地都進入了新章節。

今年的七月十二日，相信是郭炳江最百感交集的一天。他因為許仕仁案、串謀公職人員行為失當罪成，已在赤柱監獄服刑了一年半。由於成功申請上訴，這一天他獲准許以一千萬元保釋，提早「放監」。滿頭白髮的他，步出法院後真情流露，第一時間激動擁抱兒子郭基煇，坦言能夠出獄如同發夢一樣，「唔信自己喺呢度，當你喪失咗啲嘢時，例如你嘅自由，就發覺對你生命有幾大影響。I can't control myself. So excited！（不能自控，非常興奮）」據知出獄後，他第一時間已歎過越南牛肉河及蛋撻；侍母至孝的他，經常與坐着輪椅的郭老太四圍試菜，「佢去過ICC嘅天龍軒食飯，又去吓四季酒店嘅龍景軒，中餐西餐都試。」該食肆的熟客指。九月份，他會繼續完成其神學碩士課程。他於獄中亦留意到新地於九月舉辦單車節，故他亦曾對外透露，要盡快跟兒子學踩單車。

捐地顯誠意

在郭炳江入獄期間，其子郭基煇除了替代處理公務，對慈善亦不遺餘力，兼且，是有過之而無不及。上年新地與恒基合作，捐出了一幅落馬洲的邊境地皮，讓政府興建邊境購物城，並提供二百零八個鋪位，交由非牟利機構營運，以疏導人流，解決水貨客問題。今年新地更放棄YOHO Midtown及Grand YOHO附近一幅一萬平方呎地皮，該地與港鐵元朗站只距離五分鐘路程，位置極靚，原定興建酒店，提供三百個房間，上月五日宣布捐出予聖公會興建十九層綜合服務中心，服務弱智、殘障兒童、提供安老服務及青年宿舍。郭基煇在新聞稿中坦言：「在市中心找一幅附有配套的地皮捐出作慈善用途，並不容易，期望今次是『官民商』合作的好開始。」捐地一向是四叔的招牌菜，一四年他率先表示要捐出石硤尾大坑西邨，配合政府房屋所需。同年警方不再調查天匯造市案。翌年他再捐出元朗馬田壆一幅六萬三千呎農地，以興建青年宿舍。「早年四叔曾叫過郭老太一齊捐地，但郭氏唔捨得，估唔到今次會捐元朗市中心咁靚地皮出來，比起四叔嗰塊馬田壆農地靚好多！」一名知情人士說。商界傳言，郭氏家族以往捐錢銀碼不合比例，多少受到來自中方壓力，自郭炳江出獄後，「底」「面」都會多多益善。新地淡化地產商賺到盡的霸權形象，今年亦籌辦「香港單車節」、以及「方舟小醫生」長者關懷計劃，都是找來下屆特首熱門人選、政務司司長林鄭月娥，出任主禮嘉賓。

掌管建築部

郭炳江雖然聲稱不再理會新地業務，但集團內部的命脈──建築部，仍然牢牢掌握在其派系手中。一二年廉署拘捕郭炳江，其妻子梁潔芹（Ingrid），仍掌管建築部，甚至內有獨立的會計、人事、電腦部門。一向負責財務的郭炳聯，曾安插兒子在建築部，引起員工「恐慌」。郭炳江的女兒郭曉妍也曾在建築部工作，後懷孕淡出，而郭基煇則臨危受命，成為父親的代替董事。根據年報資料，郭基煇原本是新地項目總監，負責香港及珠三角地區部分住宅及商業項目。一四年十二月郭炳江罪成當日，郭基煇由代替董事正式成為新地執董。其後新地發展元朗錦田北峻巒，並找來妹夫家族的呂元祥建築師事務所設計，可惜第一期銷情慘淡，開售近半年只賣出六成單位。換上老臣子、副董事總經理雷霆重新包裝，改名「PARK YOHO」，再推120%借凸按揭計劃，終超額認購近十五倍，成功沽約七百伙，並套現五十五億元。

三十年雞地夢

而緊接推出、郭炳江「雞地夢」的重頭戲Grand YOHO，亦最快於本週開售。這個盤毗連西鐵站，再加上有一百一十萬呎大型商場，首批價單折實，呎價平均只是萬二蚊，與離西鐵站更遠的YOHO Town及YOHO Midtown二手價接近，而最低呎價也不用一萬元，與廿三年樓齡的新元朗中心睇齊，此開價讓市場跌了一地眼鏡碎。郭炳江極睇重此YOHO系列；YOHO所處的元朗鳳翔路以東一帶，俗稱「雞地」，於上世紀六、七十年代以批發雞鴨家禽為主，原先只是一塊平平無奇的新界地皮，其後被郭炳江看中，陸續收地，希望大規模打造成另一個沙田新城市廣場，YOHO Town原名也就是新時代廣場。○一年他公布將投放一百至二百億元發展雞地，其間他多次親自視察地盤。○三年，第一期項目YOHO Town推出，郭炳江為求先聲奪人，以超筍價每呎千五蚊開售，首批單位中最平一個僅需七十四萬元，當時兩日間沽出八百伙。YOHO Town入伙後，郭炳江更特地到屋苑單位家訪，聽取買家意見，並指曾被街坊批評做得不夠好，會力求改進。到一○年，第二期YOHO Midtown開售，呎價五千多元。這兩期都吸引鄉紳入市，其中劉皇發家族掃入YOHO Midtown二十四個單位，兩年後放售獲利過千萬，若持貨至今，可能再賺多一倍！

帶挈埋街坊發達

這塊金雞地，由郭炳江一手湊大，YOHO入伙後，大批中產夫婦、新移民搬入，人口急增帶挈附近商鋪，可謂火乘風勢，附近街坊都有得益，例如是經營地產代理三十年的邱太，九八年已經以一千六百萬買入大馬路同福大廈地鋪，其間多次高峰都忍手不沽，九九年、○四年、一○年，三次更趁銀行估價上升拿去轉按套現再炒，一○年以八千萬放售，勁賺六千四百萬。邱太現時仍持有十多個鋪位收租，她指自己現已退休歎世界，不再理江湖事。而打冷店老闆許文標，更由經營餐廳，改為全職瞓身炒鋪。家住天水圍嘉湖山莊的他，五年前曾接受本刊訪問。他經常腋下夾個黑皮包，搭西鐵到雞地巡視業務。○四年他睇好YOHO Town效應，當時發現雞地地鋪才二千至三千元一呎，於是把心一橫，將餐廳頂手予鄉里套現，掃入多個只是百多萬元的鋪仔，現時每間鋪仔的市價已肯定多一個「零」。於雞地打滾多年的許文標，已有一段時間沒有再買鋪，「元朗鋪位好貴喇，元朗那些橫街窄巷，而家都要上千萬。大街鋪位五、六萬蚊呎，何況依家買鋪只有兩釐幾息。」他短期內沒有再買，反而賣走了又新街一個鋪位，其他鋪位則等收租。他雖然無入市，但都有留意Grand YOHO開售，認為地段好，今次價單開價略低，「呢個盤搏得過，佢質素好過長實的世宙好多，平均萬二蚊真係抵，所以呢一輪應該收很多票，第二輪就會加價。」

谷盡購買力

連日來，Grand YOHO已吸引大量不同臉孔，前來參觀位於九龍站商廈（ICC）的示範單位。場內人龍要延伸至大廈的下層，入場起碼要等一個鐘，有經紀帶着睇樓客想「搏大霧」打尖，但失敗收場。除有父母推着BB車拖着小孩前來，也吸引了新生代以此入市一圓「上車夢」。「本身我都係住元朗，覺得呢個盤夠貼市又啱價。」年約三十歲的嚴先生目標是兩房單位，望能與女友上車結婚。記者留意到睇樓現場不乏新地的「捧場客」，有現居新地出品的將軍澳天晉居民金小姐說：「預咗六百幾萬，其實都決定咗買o架啦。」她指希望購入三房單位作自住。同場亦有元朗區居民，見證同系樓價多年來只升不跌，望購入一兩伙作投資。住了錦綉花園二十多年的劉太，向記者訴說後悔上次無買YOHO Town如同「走寶」。「之前就係有睇到同系列嘅樓，但最後無買到。」她指有足夠現金在手，俾首期及供樓也絕不成問題。久未露面的內地炒家亦過關「出籠」；住在深圳的內地人莊小姐稱，是首次到香港買樓投資，笑笑口指首期也已準備好，對香港後市極有信心。對於後市，紀惠集團CEO湯文亮認為，Grand YOHO在區內有指標性，對二手市場具影響力，「始終係新樓，佢賣得平，二手單位會賣唔起價。另外新地新價單唔減優惠，無加價，即是個市唔好佢要盡快去貨。」他認為價單亦反映新地對後市不感樂觀。另外，他指新地提供供款計劃有兩個目的，第一當然是出貨，第二若然業主供不起單位，退還給新地，新地便不用遵守一手樓條例，能夠再當二手樓賣！

睇樓客心聲

「雞地」變新地天下

2001年，時任新地副主席兼董事總經理郭炳江公布，投資逾100億元落實在元朗發展住宅及商場的「十年發展計劃」，翌年完成雞地項目補地價2.465億元，當中以新地兩朝老臣子、前董事陳鉅源的功勞最大。其在收地上為與元朗原居民達致「同聲同氣」，特意找來荃灣鄉紳陳國鉅作「朝中人」向鄉親埋手、連同政府出口地擺平收地問題，成功令新界西北區成為新地最大勢力範圍。

十五年過去，要令街市之地變成遍地黃金，新地於1995年有份興建的大欖隧道也貢獻不少，其成功打通了元朗「經絡」，一改當區交通不便之形象。去年八月，新地更以較估值上限高出25%的93.2億元投得西鐵元朗站項目，並投資約200億元主力發展中小型單位，進一步鞏固其元朗「一哥」之地位。

撰文：孫樂祈、黃綺敏攝影：鄭樹清攝錄：財經組[email protected]

跑馬地乃是富貴師奶雲集之地，有條集祥街都幾巴閉，嗰檔大興食品公司，專賣「正菜」，住喺香島道嘅周凱旋以及跑馬地嘅馮佩明（Helen）都經常幫襯。

呢度賣嘅菜係幾有菜味嘅，伙記仲幫你拎埋上架車，服務周到，裡面仲有雜貨及高級生果賣，老闆娘會教埋客仔點煲靚湯，又係嘅，唔識煲番煲靚湯，又點氹得掂個男人呢？有名你叫「阿二靚湯」，有錢佬為咗留肚同個大婆食，故只能於飯前飯後的時段同阿二短聚飲碗湯，所以先有「阿二靚湯」，不過呢家老牌湯水店家陣已銷聲匿跡，想飲靚湯要親力親為。

誠哥俾面派對

郵儲銀行（1658）個生意模式唔夠sexy，郵政加埋匯錢，冇乜睇頭，不過誠哥都參與俾面派對，表面上「入股」一成一，上市逾兩星期只是企住招股價$4.76，其實並非誠哥支魔術棒失靈，呢手股份以ELN（Equity Linked Notes）股票掛鈎票據入股，並非直接「科水」做基礎投資者，口痕banker話齋：「誠哥揸ELN收高息等跌落嚟先接貨呀！」揸咗郵儲銀行股份嘅股民，自己執生啦！

中環寸嘴冚家就好容易富貴

上個禮拜香港搞Formula E，我衰衰哋都班到兩張飛去睇吓，一句講晒，有啲似「唐人煮西餐」咯，不過有洋鬼子搞嘅玩意，都冇乜人狠狠地批評吓，通常有外來元素，本地薑都不知所措，計我話係啲友都唔識點批評呀！大會仲話出年搞大佢添，人哋新加坡同澳門都做到唔做咁滯，香港好在搞嘅係電動賽車，都未成熟，啲國際級車手如果唔係為咗錢，香港啲賽道暫時都滿足唔到佢哋。出年搞的話，要將條賽道伸延，由IFC伸延到去數碼港再喺沙灣徑返轉頭，人家新加坡條Formula 1賽道，都係封咗金融區Marina Bay得出嚟，企喺酒店或者公共空間都睇到比賽。唔似得香港咁，好似淨係elite group先撲到飛睇，普通人想撲張百五蚊飛入去感受吓氣氛，數量都非常有限。家陣係promote環保電動車，唔係promote貴族玩意！我叫做識得人多有着數，有幸入去Emotion Club打個白鴿轉，撈番個環保袋紀念品去街市買餸，入面見到唔少富二代坐住包廂，歎住冷氣睇比賽，有時「富」又未必有「貴」氣嘅，但俾人媽「冚家富貴」就好容易咯！

楊國佳工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。

富豪密室引蛇出洞

城中那位package超正嘅富二代，一向對個老豆有意見，因為（女人多）激死個阿媽，誰不知羽翼漸豐，都有乃父嘅DNA，都留咗唔少種在海外，老父近排病到足不出戶，雖然廣布線眼都未能掌握情報，於是使出一招引蛇出洞，同阿仔講：「其實我仲有幾多個孫o架？等我容易啲分配嘢（身家）吖！」又係嘅，呢位富豪鐵漢柔情，前妻臨終前，也到醫院陪伴幾個鐘頭傾吓偈，緬懷一下後生時兩公婆一起走過的日子，亡妻臨終前同佢講：「最緊要睇住我哋生嗰個仔呀。」