雅居樂五虎老巢何文田

2014-10-23 NM

雅居樂地產（3383）近月衰到如跌入黑洞；主席陳卓林九月失聯，被內地檢察院執行「指定居所居住」，三十七億元債項亦於年底到期。陳氏唯有嗱嗱聲供股兼包底。

咁，小宗即管秤吓陳氏身家。佢哋共五兄弟，除了陳卓林，仲有陳卓賢、陳卓雄、陳卓喜及陳卓南，通通都係雅居樂董事，又齊齊攞晒香港身份證。最過癮係，原來佢哋鍾意聚居何文田豪宅「何文田山道1號」。呢個盤係單幢樓，只得百多伙；佢哋由○三年開始買，除了自住單位，仲買來收租，一共持貨八個，間間過千呎，市值二億五。聚居有咩好？黐吓飯餸食囉！而且住樓上樓下，要傾「大茶飯」，幾分鐘就齊人，方便好多！陳氏仲有一堆鋪位及西貢與坪洲地皮，有啲放售緊，以解燃眉之急。不過呢條數清咗，又有下一條數要還啫。唉，好似雅居樂呢啲咁有家族色彩嘅公司，搵生意借銀行，好多時都由家族成員「人頭」擔保，有時主席仲要借埋錢俾上市公司應急；故此一出事，往往如骨牌效應，衰埋一堆。嗱，好嘅時候就話冚家富貴；有難時咪……囉！

走得快好世界

近日689醜聞纏身，但就冇乜梁粉出來幫口，連第一把手林鄭，都以「局外人」自稱。見風駛舵，可見689冇乜真朋友。小宗老友話，689惡啃已非朝夕之事。九三年，689離開仲量行（現稱仲量聯行），成立梁振英測量師行，並挖走舊公司一班猛將，幫佢打江山，其中一個就係盧慶雄（Tony）。Tony當年幫689搵到唔少大刁，恒地、南豐、華懋都係佢嘅客。但最後二人都反面收場，Tony重投仲量聯行，更入稟法院，向已改名做戴德梁行嘅前僱主追數，涉及金額共一百四十多萬元。走得快好世界，戴德梁行喺689領導下，搞到要賣盤還債。Tony就愈撈愈掂，近年仲泊到泰國富商吳氏家族碼頭，喺吳氏旗下私募基金GAW Capital（基滙資本）任職董事總經理，負責投資部。基滙資本大疊水，創辦人係吳繼煒、吳繼泰兩兄弟，佢哋阿媽正是德昌電機（179）主席汪穗中胞姊汪靜宜。基滙管理資產近六百億元，今年四月，用七十二億，向李澤楷打骰嘅盈大地產（432），買入北京盈科中心。寧買當頭起，Tony識揀，仲幫緊689打工嘅人，學嘢啦！

朱太最愛一夜情

鴨脷洲長大嘅金利豐（1031）老闆娘朱太，佢囝囝Kingston最近在銅鑼灣Franck Muller錶行樓上開設一中、一西餐廳，唔少老友知道朱太對海鮮特別鍾情，送上不少來自五湖四海嘅魚、大閘蟹、刺身。唔講唔知，朱太對食魚別有一番學問。她最愛「一夜情」，淨係聽個名都香艷到流晒口水。原來，將條鮮魚用鹽醃過一晚夜，此為之「一夜情」。醃過後的鮮魚有鹹魚之香，又不失鮮魚之甜；能否嘗到朱太的「一夜情」，那就要睇同朱太之交情啦。

PermaLink: https://articles.zkiz.com/?id=116229