再續網友La早前問起努力係唔係可以到55歲有1000萬的問題。我講人生如營運公司，第一步如工作出色，你已經等如搞咗一間有好多現金流入的大公司。若然搞唔出大公司，開源無重大成功，節流就比較重要，講到第二步，要有儲蓄的習慣，唔好使晒，等如公司有保留利潤，可以投資增值，有機會透過過投資由小公司變番間中型公司(就係有1000、2000萬那一種)。若你做事又唔得，叫你做吓兼職搵多啲錢又嫌辛苦，叫你唔好咁大使又唔慣，咁你睇到呢度都可以停啦，我幫唔到你啦，呢個世界唔努力係無法得世間財架，你嚟睇我啲文章都花力啦，否則去睇吓動新聞睇吓港警如何北上叫雞肯定趣好多啦，想成功，一定要出力，呢個世界無不勞而獲。
講咁耐先至講到第三步:投資，要用營運一間公司資金的方式去投資。咁同一個人去投資有乜唔同? 最唔同的是心態，一個人有幾萬銀，好似網友La咁，去炒牛熊證，特別係年青人，唔使點諗，炒咗至算，無一個交數的概念，甚至唔去計數唔使理。但你營運一間公司，半年交次數，全年交一次數，你到交數時會比較緊張(美國公司仲每季都要交數)，要諗可以容忍輸幾多。
我經常講投資未諗贏，先諗輸，可以容忍自己輸幾多，你有10萬，忍唔忍到年結時輸晒? 若果你月入10萬，咁無壞啦，輸咗10萬下個月都可以搵番(雖然我都唔係幾贊成呢種千金散盡還復來的心態)，但若你月入1萬，儲咗3年才有10萬，你唔應該忍到自己一舖輸晒。假設你係一間公司，市值100億，有30億現金在手，你可唔可以到年底時輸清30億? 可以忍受輸1億，有可能輸1億的投資，可以忍受輸5000萬，有輸5000萬的投資。總的來說，要心中有數，唔好漫無目的。好似La那樣的年青人，用10萬、8萬去炒窩輪，多數只諗「如果仆中升一倍就正」，唔會諗「如果輸晒10萬我幾慘」，我都經歷過那個階段。
有人話「千金難買少年窮」，我加多一句「千金難買早來輸」，若你後生遇上大牛市，炒嘢唔輸仲贏大錢，到30幾、40歲才輸，你仲慘，後生贏錢自以為是少年股神，其實只是個市就，到30、40身家都多好多，人工儲埋或買樓儲起幾百萬，一舖輸晒，點翻身? 俾你揀啦，輸10萬好定係輸200萬好，梗係揀10萬好啦。關鍵係輸錢買唔買到教訓，唔好好似某網友老豆咁輸到70、80歲仲再賭輸。
投資首先唔係講冧把、講測市，係講方法，方法啱，唔會錯得去邊。控制風險係第一方法，定出合理回報目標的第二方法，分清「投資的我」和「投機的我」及其所佔比例是第三方法，「投資的我」和「投機的我」回報目標和風險都好唔同，如何定出兩者佔組合的比例，明天續談。
陸羽仁