📖 ZKIZ Archives

王維基深謀遠慮 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20140111/18587339

香港電台選2013年聲音檔案，由聽眾投票，結果選出王維基嘅「究竟香港係法律大？政策大？還是特首大？」為第一名。
王維基好識掌握sound bite，十月十五日政府宣佈發出兩個免費電視牌照俾電訊盈科及有線電視旗下子公司之後，王維基召開記者招待會向記者講：「法律大、政策大，還是特首大」，造成轟動效果。
其實政府即使發牌俾王維基，以王之使錢手法，要打倒無線慣性收視壟斷，點都要蝕足三四十億元先至有些少眉目，好多資深電視元老就曾對左丁山講過，王維基搞電視，死梗，梁振英唔俾佢死，實在係惜住王維基嘅荷包。左丁山就以為，有人要蝕大本為追求佢嘅商業意念，有佢嘅自由，唔到政府理，政府以電視廣告收益不足以支持五個免費電視台為理由，又傳出消息指王維基嘅香港電視財力不如電盈及有線，故此不發牌俾香港電視，根本係多餘嘅，人地有蝕本嘅自由即，何況佢又未必真係輸實。
不發牌事件突顯咗「特首大」，但中移動之香港子公司賣盤俾香港電視，又有消息話梁特首事前唔知，港澳辦、中聯辦事前都唔知，我地先至知道係「中央大」，中央國企要挺王，一男子也無可奈何。但突然之間，中移動母公司話要調查交易事件喎，係唔係真的「特首大」？是否佢不忿落面，背後向中央投訴，逼中移動集團做醜人呢？睇番事件日程，原來王維基早在2013年8月16日（即宣佈發牌前兩個月）已與中移動子公司簽訂收購協議，交易在12月20日完成，即係話，王維基夠曬深謀遠慮，一早已有Plan B，並且保密工夫做足，雖在10月15日之後，被記者追訪，仍然可以鎮定到極，瞪大眼講大話，話自己無Plan B，令一男子不以為意。如此看來，王維基俾人一個印象就係主攻急先鋒，實在係錯誤形象。此人滿肚密圈，一早估計到最壞情況，及早向中移動子公司洽購牌照，真高手中之高手也，梁振英政府完全唔係嗰皮。如果佢好老實咁在10月15日承認咗有Plan B，恐怕真係特首大咯，佢會老早向中央申訴，搞喎王維基嘅收購㗎。
PermaLink: https://articles.zkiz.com/?id=88244
Next Page
ZKIZ Archives @ 2019