📖 ZKIZ Archives

王維基疑案 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20140110/18586007

王維基的香港電視「發牌事件」，是近年商界新聞故事之中最有懸疑性嘅，左丁山滿以為自己見過不少光怪陸離事件，太陽之下那有新事，點知梁振英政府封殺港視（或者係梁振英一男子封殺王維基），劇情峰迴路轉，王維基搞電視由滿懷信心至走上斷頭台，以為不得超生，點知有巨型中央國企雪中送炭，伸出援手，以蝕本價賣出一個流動電視牌照，讓王維基逃出生天，敗部復活，一時之間，人人以為央企唔俾面，不賣賬，令一男子激氣踢腳之餘，又無可奈何。於是上星期五（一月三日），通訊事務管理局經一番研究之後，宣佈決定唔調查香港電視收購中移動子公司連流動電視牌照事件，港視表示歡迎，立即重新徵聘人手，發展電視節目，事情至此，一月四日個個以為係大團圓結局啦，王維基攞唔到一個橙，得番一個大橘，憑佢嘅堅持與創意，在普遍睇淡之下，香港電視或會殺出一條血路，如果港視蝕本執笠咯喎，係商業事件啫，與其他人士無干。
點知還有下文，中移動集團於一月五日在官方網站公佈，決定就有關香港電視嘅全資附屬公司Talent Asset Ltd收購中移動集團子公司CMHKCL全部股權一事，啟動內部調查，包括是次交易是否符合國務院國資委之相關決定。唔係呀嗎，香港子公司賣盤，事先難道北京母公司唔知，被蒙在鼓裡？如果係咁，中移動嘅內部公司管治系統實在兒嬉到極，管理能力好差啫。如果事先已知道嘅話，依家要反盤，肯定同政治有關啦。按照一般公司併購流程，Talent Asset Ltd收購CMHKCL係在8月16日簽署協議（即在10月15日政府宣佈發牌結果之前），並於12月20日完成（completion），既然交易已經完成，中移動即使有內部調查，根據香港法律，該項交易已不能反盤，中移動要與王維基打官司，另作別論。美國曾有類似事件發生，反悔一方要賠巨款俾交易對手，如果中移動恃著身家太厚（市值起碼高過香港電視三百倍），賠錢當作小事一宗，另作別論。
王維基一直小心避免將發牌事件涉及北京，但事情到此，想話冇政治干預？難咯。

PermaLink: https://articles.zkiz.com/?id=88243
Next Page
ZKIZ Archives @ 2019