公關大姐大約吃午飯，搵埋蔣芸及食評家梁家權到希慎廣場12樓Rasupermen吃拉麵，見到梁家權在座，左丁山邊度敢講嘢，一於由佢品評晒、講晒，自己一味埋頭吃麵。上電梯之時，在前有四位OL，一位大大聲話：「星期三有半熟蛋送，行快啲入去攞位。」邊度有半熟蛋送呀？到咗十二樓，佢哋四位快步走入Rasupermen，顯然係熟客啦。左丁山行得慢，周圍望吓先，發覺呢層樓有間何洪記，門口排晒長龍，上一星米芝蓮星級榜，果然聲價不同，Rasupermen裏面就啱啱滿座，無人排隊，大姐大等已坐在卡位，坐下不久，有餐送到，四人分享，計開有拉麵漢堡包、櫻花木燻牛脷、沙律、大豚山丼，櫻花蝦天婦羅鹽味拉麵，葱花醬油豚肉拉麵、野菜豚骨豆乳湯麵配溫泉蛋，七味食品四人共吃，嘩，飽到脹卜卜，唔好問左丁山意見，梁家權又聞又索又食，說話多多，又與東京同類拉麵比較，好彩佢係讚多彈少箒，否則店經營家唔知會面紅成點！
公關大姐大請吃中產拉麵，闊佬T隔日請吃飯就果然有闊氣，入到佳寧娜私人房，闊佬T已在座，佢話：「唔好咁煩叫餸咯，潮州翅撈飯算數！你有冇意見？」吃魚翅撈飯，點會有意見呀，與闊佬T相識三十年，呢次係第二次兩人一齊吃飯，上一次係十幾年前佢在上海總會佢請吃蟹粉翅撈陽春麵。吃過撈飯及蒜蓉蒸鮑魚仔、清蒸馬友魚頭，闊佬T開始講古仔，呢次講及政壇秘辛及商交所，始知佢捧咗幾位人士入立法會成為尊貴議員，不過佢話有人成為「尊貴的」之後，就「醒目」到自己行路去西環，唔多睬佢喎。世事本是如此，做咗議員，身份完全唔同，那會繼續向闊佬T行弟子禮吖，講到商交所，佢話問題非今日始，敗象早呈，佢只係奇怪做乜梁特首要以張震遠為左右手箒，張震遠背景複雜，出身調景嶺，父親係國民黨在港要員，佢留學英美，回港後曾跟隨魔僧學藝，在北京眼中張震遠身份點都冇曾鈺成咁乾淨企理嘅，但點解受梁特首重用呢？闊佬T至今還是不明所以。 