📖 ZKIZ Archives

新城廣告勝商台 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20131126/18523751
此日遇到即將退任嘅醫院管理局主席胡定旭，佢極力主張輸入醫生，以解燃眉之急，佢話香港只要有醫生，醫管局隨時可以加多一千張病床，大嶼山醫院唔使半廢武功，威爾斯醫院急症室斷唔會出現病人等夠26小時先至見到醫生嘅情況。
醫生從何而來？胡定旭話有兩個暫行辦法，第一係准許所有持有香港身份證嘅英聯邦大學醫科畢業生，取得當地執照後，回港行醫，第二係效法星加坡，准全球排名前五十名嘅大學醫學院畢業生，取得當地執照後，來港掛牌。呢兩類醫生先要在公立醫院工作一段時間。
呢兩個辦法幾好吖，香港大把學生在英國讀醫科，但畢業後只能在英國醫院工作，返港不得，實在荒謬，不少醫生嘅子女在英國、加拿大讀中學，本想在當地讀醫，但考慮到將來回不了家鄉，逼於無奈，唯有用IB非聯招資格申請中大港大醫學院，變相擠出部份香港文憑試考生，原本外國大學可補香港醫學學位之不足，外國大學替本港培養醫生，係一件大好事，偏偏香港制度不容許，反而驅使啲學生返港爭學位，實在十分荒謬。胡定旭話佢任主席九年，爭取唔到輸入醫生，十分失敗，落任後會繼續爭取，橫掂早已俾保護主義者視為「頭號敵人」咯，唔介意將來萬箭穿心吖。左丁山知道絕大部份中環精英都不反對輸入醫生嘅。因為大家都習慣咗在金融市場踢世界盃嘅啦！
臨別之時，胡定旭話：「乜商台廣告嘅市場份額已經低於新城喇咩？」佢嘅消息來源係鄭經翰之「大班人語」（信報十一月二十二日），大班話當年商台賺億元，擁有七成的廣告市場份額，新城只得三成，時至今日，風水輪流轉，商台的廣告市場份額已被新城超越。
為咗回應胡主席之問及檢證鄭大班之言，左丁山問一位廣告人攞料，佢傳來部份資料（Source：Admango），2012年全年，新城佔電台廣告份額53%，商台佔47%；2013年1至8月，新城之電台廣告份額係54%，商台得46%。數字證實鄭大班所言非虛，商台廣告正處於下風，陳志雲要救亡咯。
PermaLink: https://articles.zkiz.com/?id=83386
Next Page
ZKIZ Archives @ 2019