ZKIZ Archives


扼殺香港神話 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20131111/18501898

保險界元老孖吉叔請食飯,席設佳寧娜,孖吉叔與泰國R都係潮州老鄉,喜食潮州菜,兩人做東請食飯之時,佳寧娜一定係佢地首選,坦白講,左丁山平時少去,但佢兩位在佳寧娜請客嘅話,一定好食到加零一,難以錯過。吃到甜品時,閩南C突然醒起十一月係吃芋頭好季節,要求加多一款「反沙芋」,呢味甜品係佳寧娜拿手好戲,泰國R話好食過汕頭市嘅名店產品。好則好矣,但今人重視健康,見到厚厚一層白糖包實件芋頭,不禁猶疑一啲,泉州N就教我地:「敲散啲糖先至食啦」,但無糖芋頭邊度好吃㗎,於是人人只敲掉一半,左丁山想起美食家遜哥講過:「凡是好吃美味的都是不健康的。」
吃過不健康,含糖太多的潮州美食反沙芋,個個都飽晒,飲杯潮州功夫茶,就講起免費電視發牌事件,惠州客家W與梅州客家W都係銀行界資深人士,左丁山特登問一問:「申請者財力與其控股公司的市值是否有關?」兩人都笑出嚟:「銀行貸款ABC啦,除非控股公司為子公司或附屬公司(申請者)向政府提供無上限財政擔保,否則兩者之財政並無必然關係,如申請者只得資本十億,蝕清光就計數,唔好指望控股公司代佢還債。」這個當然,否則「有限公司」有何意義?呢啲咁淺白嘅財務常識,政府難道不知?如知道,仲要拿出來在那五頁紙說明,就有侮辱大眾智慧之嫌啦?如果政府沒常識竟然真係咁諗,那麼以後凡是申請與公眾有關嘅商業牌照(例如免費電視、電台),申請者唔該諗吓自己是否大財團公司或是大富豪第二代,布衣出身之白手興家富翁(有三十億現金都嫌你財力不夠呀),死咗條心好過。梁振英政府搬出呢條理由,實際上係踐踏及謀殺中環神話(即由無到有,由住板間房至成為山頂豪宅業主)。假若王維基父親是世家第×代,父親財力深不可測,王維基是否會得到牌照?佢來自普通家庭,憑創意與衝勁成為幾十億元富翁原來都不能衝破玻璃天花板,與大財團競爭,以後此等人物不如索性退休,將筆錢交俾私人銀行管理,自己走去打高爾夫球好過!

PermaLink: https://articles.zkiz.com/?id=82028

Next Page

ZKIZ Archives @ 2019