大家都做過辦公室新人，大家都有機會以舊人的身份看新人，辦公室需要的工作技術，甚至工作態度，待人處事之類，學校根本就無教，究竟一個人要在辦公室生存發展，需要一些甚麼基本技術呢？
電腦文儀
十幾年前筆者讀書時已經識用電腦及打中文字，點知第一日返工都被難倒，就是因為公司的電腦及軟件太舊。現在人人都用MS-Office，仲有無人記得WordStar、WordPerfect、Symphony、Lotus、dBase、國喬、倚天？筆者見過最經典的一部電腦，是在2000年時仲用緊英文Win98外掛Richwin轉中文，唔係話唔識用，而係好難用。
舊電腦同舊程式固然難用，都唔夠舊機器難用，例如筆者第一天上班便搞唔掂部全手動型打字機，即係仲有一條條鐵枝打粒字去中間果隻；Fax機未用過，好彩未至於好似某「大學生」笑話咁：有個大學生第一返工，佢老細叫佢Faxｄ野比客，跟住個客打比佢老細：你做乜野Fax左幾次比我？一問之下，大學生反問，點解Fax極份野仲嚮部機度？
當然，有一樣文儀到今日仍然唔識用的：打電報。以前做商品貿易一切以信件及電報作實，連Fax都不承認，看著同事用電報機，及上面的電報短語，完全不在行。當然，今時連e-mail都可以做呈堂證供，沒見過人用電報了！
公文應對
辦公室用的文字，與學校的形似而實質兩樣。格式尚在其次，原來很多人寫信用字有很多埋伏的，故意將內容寫得含混、迷糊，來達到某些效果。所以有時見到一些寫得很好的信，不妨影印記下。筆者多年來收到寫得最靚的信，是某大使館代表調職的告別信，居然可以用英文寫道：「我們的人生旅途相交，離別之後或再重逢」，可惜沒有留底。
同客戶講野固之然要小心翼翼，原來同同事也要留神。不單止講錯野會得罪人，有些人是最愛用言語來陰人，只要不小心地隨口應了「係」、「好」、「哦」，分分鐘比人過左一幢。聽電話也是，有些公司會在電話檯頭用紙寫著一些罐頭對白，諸如「ＸＸ公司，早晨／午安／晚安，有乜野可以幫到你」、「負責的同事傾緊電話／唔嚮位／行開左／做緊野／開緊會，方唔方便講底乜野事／留低電話」之類。但筆者發覺，很多接電話的小朋友是缺乏這方面的訓練，居然可以答「未返」、「唔嚮度」、「去左廁所」。門面說話一定是經過修飾的，當然要作一個好的理由。
以上所講是極之皮毛，但偏偏學校無教，很多人打幾年工都唔知唔識唔做，看起來聽起來，便活像山寨廠文員。