成 日停牌復牌又停牌嘅意馬國際（585），原來行政總裁兼執行董事Douglas Glen喺前日已經離職，公司新聞稿冇解釋原因，淨係話Glen會轉做顧問，為期6個月。董事會已經開始物色接任人選，填補佢嘅空缺，目前暫時由董事 William Courtauld頂住先。睇番Glen嘅CV，現年63歲嘅佢喺06年9月加盟意馬，負責業務拓展同投資者關係；之前做過好多大公司，例如全球最大玩具 公司美泰（Mattel）高級副總裁，又喺Sega of America同埋Lucas Arts Entertainment做過，仲係麻省理工出身，真係唔少嘢。不過，個人勁還勁，但對意馬嚟講都已成歷史。屆指一算，足以決定意馬生死嘅電腦動畫電影 《小飛俠》10月上畫，而佢又做6個月顧問，即係上埋畫先走。咁放唔低，點解要走得咁急呢？