ZKIZ Archives


39億會議費 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130728/18352244
星期二科技F帶佢位公子嚟見左丁山,請左丁山評估佢嘅國際學校成績,是否可以申請中大醫學院,原來內地已經有一間醫科大學收咗F公子,不過佢想入中大,人之常情啫,話晒他日做咗內地醫生,好難返港做醫生嘅噃。科技F駐過上海北京,佢位公子跟隨佢到處走,入讀不同國際學校,回到香港亦係讀國際學校,睇落所讀課程成績雖好,弊在缺乏核心,入讀中大醫學院有難度,左丁山勸佢慳番時間,準備北上好過,順便勸告佢:「他日成為醫生,唔好收紅包先醫病人呀!」
科技F聽咗,為之失笑,佢話:「左先生,大家無謂天真,內地入醫院睇醫生,無紅包不行,我在北京時送一位親戚入院,得知情人士通知,一早準備咗厚紅包俾專科主任醫生,親戚家人就打點其他,包括埋病房阿嬸,真係派少一封都唔得。入院後,主任不在,來咗一位年輕醫生,佢初作檢驗,就批示親戚驗腦、驗心、驗血、驗這驗那,每樣檢驗都係錢,親戚家人不知所措,我急call主任,一邊拖延時間,主任來到,即刻否決咗十樣八樣檢驗,只係做一兩樣小檢驗,細細聲同我講,俾少少面子呢位小醫生。我好彩還有錢在身,咪又送一封紅包嗰位小醫生,多謝佢關心病人,關心得好仔細囉!」
咁講法,他日世姪F咪會收到盤滿缽滿?科技F嘆一口氣:「自己不貪污也會俾上司逼收錢,以示同坐一條船。」大家由此講到GSK在中國涉嫌賄賂事件,科技F話:「既然醫生護士收紅包,你話醫院買藥部門識唔識收吖,外國大藥廠知道中國係世界上最大藥物市場,佢地會唔會入鄉隨俗呀?派完紅包跟住加價咪得囉。還好,外商不賣假藥,賣貴藥不會害死人。醫生不收紅包不醫人就會害死人。」GSK藥廠涉嫌內地違法一事匪夷所思,一間上海旅遊公司Shanghai Linjiang International Travel Agency(紐約時報報導)為世界上最著名嘅大藥厰GSK,Merck,Roche,Sanofi,Novartis做旅遊代理。單係一間GSK,由2007年至今,用咗700間旅行社,營銷顧問公司搞「會議(conference)」就用咗5億美元,搞會議用接近39億港紙?簡直係天文數字,明眼人心裏有數。但呢間Linjiang點解咁有把炮,做晒大藥廠嘅「旅遊生意」呢?又是一個謎。
PermaLink: https://articles.zkiz.com/?id=69634

Next Page

ZKIZ Archives @ 2019