| ||||||
| 大學師姐睇完星期六本欄「切戒招積」之後，打電話嚟教訓左丁山：「喂，你同研究K都係我嘅師弟，不妨贈你幾句，雖說人生得意須盡歡，但不可忘記，有風駛盡『巾里』之時，可能觸礁；袋裏有幾個幸運錢，收埋咗先，o依家時勢唔好，慳錢好過亂咁花錢。」 多 謝大師姐教誨。講多幾句，方知金融海嘯打到埋身，高級中產隨時冇工做，重演亞洲金融風暴時期嘅慘痛歷史，師姐知道好幾位師弟妹已經失業，正努力搵工，師姐 亦幫手。電話收線後冇幾耐，佢已經傳來電郵，內附一份CV，一睇，應徵人自小到大讀一級名校，畢業後無風無浪二十餘年，點知到咗兒子入讀美國大學之年，方 始失業，實在令人緊張。 飲茶時候，與餐飲M講起，餐飲M話愛莫能助，佢只能關心自己持有兩隻大藍籌股票，AIG與美國銀行，美銀跌到三個幾 美元，AIG跌到五毫四，我見猶憐。但賓架D更慘，去年曾以三十美元買入AIG，聲言退休前博一博，鎖埋股票五年後，AIG應可重復舊觀，起碼睇六十美 元。唉吔吔，o依家已經蝕咗九成八咯，股價返回十元已經要多謝上帝眷顧喇，點算好？ 收完CV，飲完茶，成個人緊張晒，與在IFC利苑清蒸東 星斑之日相比，心情完全唔同。返到公司，睇吓電郵先，刪除大批垃圾郵件之後（點解咁多無聊「偉哥」推銷嘅呢？）剩番十幾件，其中一件係在美國大學做教授嘅 校友L傳來嘅，就係哈佛大學校長給哈佛人嘅公開信，講及哈佛面對經濟嚴峻局面，哈佛必須下困難決定，因為哈佛嘅○九/一○年預算案要假設哈佛發展基金虧蝕 三成！嘩，蝕三成？哈佛人好叻嘅噃，天才如此，我們凡夫俗子怎麼辦？ 校友L在美國做教授，屬中產階級，係奧巴馬最少理會嘅 階層。一啲美國守法守規矩嘅人民專心打工，不炒樓，不先使未來錢，點知海嘯一嚟，房價大跌，o依家奧巴馬要動用七百五十億美元救苦業主，但守規矩、定期供 按揭之人毫無得益，無怪向《華爾街日報》大發牢騷。守規矩嘅中產就係咁淒凉，拿政府錢永遠冇份，失業威脅就日日面對，美國如是，香港亦然。 | ||||||