就快到七月咯，不少年青大學畢業生夠叻或者夠運嘅，已經搵到工做，有啲六月上班，有啲七月返工，但有啲仍然等呀，等呀，等收公司HR來信，希望收到好消息。一位新紮師兄去年升咗做營銷經理，今年第一次負責面試大學畢業生，為公司聘請推銷員，佢在浙江軒食午飯，碰到左丁山，請教請人之道，點樣揀蟀先至啱，左丁山話：「香港老闆好鍾意睇沙紙，睇學校名氣，睇申請人主修甚麼科，譬如以左丁山所知，一啲大行愛請英美名校學生，本地大學畢業生只選港大中大科大，科系就以經濟金融商科為主，素來都係咁，但係睇吓人地美國，真正用人唯才，一個史諾登咁低學歷嘅人，中學未畢業嘅都可以入到Booz Allen，領取20萬美元年薪，NSA嗰位亞歷山大將軍仲喺國會面對質詢時，稱讚史諾登嘅電腦技術高超。做營銷呢行，唔係淨係讀過營銷學（Marketing）先至掂嘅，要有不少街頭智慧，為人外向，說話醒目，但同時又要老實唔好造數砌數呃公司噃，你試吓面試一啲非名校學生，非商科學生，比較吓啦！」
幾日後，新紮師兄回報：「出咗廣告之後，收到好多信，不少係在美國讀大學嘅，從東西岸回流香港搵工，又有好多本地畢業生，但冇中大港大科大人申請，大概嫌我地公司細，人工唔多啩，依家真係花多眼亂，冇咁多時間逐個見，只揀咗十零個英文求職信寫得唔錯嘅學生嚟見。唔好彩，冇本地生在內！」
後來見到一位世姪，今年中大畢業，問佢搵到工未，佢話正在苦苦地等政府佳音，考咗政府工，就快有回音。佢好似非政府工不做咁款，問佢：「啲公僕嫌加薪唔夠，影響士氣，你點解鍾意入政府？」畢業生話：「政府工好處多到極，我申請緊份工，月薪三萬，高過晒在中環班同學，他日成為長工，福利多，終身有保障，唔會炒魷魚，幾好呀，個個同學都想考入政府呀！」唔係啩，考入滙豐，話唔定三十年後成為另一個鄭海泉呢？畢業生話：「30年？耐唔耐啲呀，或者中間俾銀行炒咗幾次呢！」政府工原來咁渴市，在職公僕仲話加薪幅度小㖭，似乎佢地是但一位行開，大把人爭住填位噃！ 