| ||||||
早排華華落中環，撞到個喺歐資投行做嘢嘅部門董事H。當時，佢間行風聲鶴唳，華華一向關心朋友，所以就問佢擔唔擔心飯碗不保。點知呢位資深嘅青年才俊，以大俠式笑容答話：「都就嚟做公務員，有鐵飯碗使乜驚？」 我即諗，唔通特首搵佢做副局長？原來唔係，話說金融海嘯，唔少外國政府都向銀行注資，政府做咗大股東、銀行被國有化，咁喺裏面做嘅員工仲唔係公務員？董事H咁講，係預計自己打工間投行遲早加入伸手黨行列，要政府拯救。點知真係畀佢開口中，佢間行後嚟真係國有化咗。 問責制唔掂即炒 不過，唔好以為公務員真係鐵飯碗，因為董事H嘅部門近排好似被中子彈襲擊一樣，啲枱凳仲喺度，但啲人就蒸發晒。雖然董事H保得住飯碗，但佢話勢估唔到，銀行被國有化後，唔掂嘅員工就要落台，喺政府部門裏面，都算國有化銀行最問責嘞！ 做得越掂回報越縮 睇到美國總統奧巴馬限制啲華爾街banker花紅，好多人feel到「將快樂建築喺人哋痛苦身上」嘅快感。不過喺心凉之際，小心他朝君體也相同。 限制banker花紅，原意係當銀行唔掂要搵納稅人救時，冇理由仲派花紅。問題係，花紅原本係獎勵啲做得嘢嘅員工，而唔知係巧合定天意，好多出事嘅銀行，叻叻部門都集中喺香港。 夠高級冇花紅 華 華有個喺投行做小頭目嘅朋友，呢幾年管嘅部門越做越掂，生意越做越大，某啲瓣數甚至香港第一。點知母公司出事，要向政府伸手，母公司就宣佈全球喺某個職級 以上嘅員工，一律冇花紅。朋友已經預期花紅會大縮水，所以過年自己開心，都只係買隻冇金冇鑽嘅錶戴吓。點知返到公司，上司話佢夠高級，「有份」冇花紅。 難怪佢同上司呻：「第一年花紅攞咗去買層樓、第二年買車，今年就買得隻錶。喺度做嘢就算越做越掂，都係越撈越霉！」李華華 [email protected] | ||||||