| ||||||
風 水佬或者呃你十年八年，之但係，爭奪已故華懋集團主席龔如心千億遺產嘅神秘風水師陳振聰，佢隻宏霸數碼（802）嚟香江掛牌只係兩日，就冇花冇假帶挈捧場 客進賬萬金，繼前日升咗四成八，噚日更逆市喪升，高峯時有兩倍之多，令股民睇到眼凸凸，臨尾埋單都仲升1.3倍，收報23蚊，榮膺升幅榜首，市值高達 53.4億元，巴閉過藍籌股中信泰富（267）。 軍師朱偉民執三億 忽然高調嘅陳振聰，揸住 宏霸6200萬股，噚日副身家就進賬咗8.2億銀，若果以首日開市價6.61蚊計，兩日賬面賺咗10億銀，真係好搵過睇風水。被稱為陳振聰軍師嘅宏霸主席 兼行政總裁朱偉民，手執1830萬股，前後都增值咗3億銀。至於陳振聰兩兄弟舊年入主嘅環球工程（8192），噚日都踢高咗12.8%。單遺產官司將會喺 4月開審，兩隻股仔走勢，未知點樣配合事態發展呢？睇番宏霸交投，噚日都係一兩千股細細注為主，唔知係咪貨源歸邊，捧場客出價都好進取，股價突破咗廿蚊 後，5毫又5毫咁砌上去，想搭順風車都唔係咁易o架。若然你有過人膽識兼驚人判斷力，幸運喺首日低位跟手買入一手1000股宏霸，又喺最高位30蚊放咗， 華華除咗寫個「服」字，亦恭喜你喺24小時內賺咗兩萬三蚊。之不過，宏霸前日淨係錄得149宗成交，每單平均size只有3000幾股，噚日成交增加到 953宗，但平均size降至1500股，相信有錢賺嘅人寥寥可數。李華華[email protected] | ||||||