雖然今年股市冇話「五窮」，但恒指萎縮不振，股民亦冇啖好食，試睇吓，去年年底（十二月三十一日）恒指收市報22656點，今年一月二日急升至23311，即2.89%，展開升浪，點知好景不常，升浪只係一個月貨色，到一月三十日升到23822，已經係半年高峯，隨即回落，到四月十八日見21512最低點，跟住反彈，好快升到五月一日嘅22737點，大把人話唔駛Sell in May，果然，恒指到咗五月二十日，升到23348，比一個月前（四月十八）嘅低位足足升咗一千八百三十六點，即8.5%，開心啦，點估到之後十日之間，恒指又回落到五月三十一日嘅22392點，換句話說，成個五月得個桔，月底衰過月初，難有回報。
總結頭五個月炒股，波幅甚大，無法突破24000點，只係炒上落市，跌到22000點樓下可以撈股票，到咗23000點以上就獲利套現，但普通人不能拿揑得咁準，不炒不買並無機會損失。六月份又點，全年如何？諗唔通，索性打電話問天真許（許沂光），佢話恒指今年一月三十日應該已經係全年巔峯，現在情況不妙：（一）日本股市爆煲，債市堪虞；（二）梁振英政府整死咗地產股；（三）自由行概念已經玩完，如果禁止一簽多行，更死快啲；（四）銀行股因樓按生意急跌，盈利難有可觀增長，中銀和廣北已講過；（五）內地Ａ股軟弱無力，難以帶動本港Ｈ股上升。
唔，不妨加多一樣：伯南克成日嚇人，退市消息傳之不絕，分明係製造心理氣氛，等大家慢慢適應真正退市來臨之日。呢樣就意味着股市不穩，時起時跌。
本來想問多啲，但天真許話：「喂，欲知詳情，請參加六月十日星期一晚上七點至十點在灣仔VTC（職業訓練局）舉行嘅金股地產論壇，我講股，施永青講地產，馮志堅（前金銀業貿易場理事長）講金。收錢㗎，每位盛惠350元。」係要尊重知識產權嘅，總不能每次聽講都免費。免費講座必有銀行/投資公司贊助，天真許搞講座不找贊助，暢所欲言，故此夠膽唱淡，心水清者當會明白免費講座與收費講座之微妙分別！ 