| ||||||
曾經喺麥肯錫做顧問七年嘅張震遠，走去創業搞商交所，結果搞到一鑊泡。商界傳聞，喺麥記做完consultant出來創業或教人創業嘅，都無咩好結果。唔只係張震遠，另一個麥肯錫出來嘅盧永仁，亦「去邊間（公司）、死邊間」。佢自九○年由麥肯錫出身，廿年來做過約十間公司高層，次次都胸懷大計，最後全部蝕入肉。在互動多媒體服務公司，蝕數億；三千萬入股正奇（336），蝕四千萬；做海域非執董，公司爆煲；入I.T大幅擴展業務，盈利大跌七成要辭職走人，因此盧永仁多咗個朵，叫「中環劏豬櫈」。佢一一年入咗南華傳媒，做副主席至今，暫時無出事，否則又多一筆賬。 另一個同樣命運、但無咁坎坷嘅，係倪以理。佢一樣係哈佛出身、再喺麥肯錫做暑期工。九九年佢就出來搞科網，○二年爆破失敗，結果返去麥肯錫香港做總經理；最近則被拉入搞到滿城風雨嘅金發局。做顧問，收嘅只係顧問費，當然不及拋個身出來賺大錢過癮；不過，除咗叻，成功要配合天時地利人和，仲要自己企啱位，係咪？ | ||||||