📖 ZKIZ Archives

買樓講升值 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130519/18264105

雍澄軒在2月18日發售，大受歡迎，呎價大約係5200元，每個房三百幾萬左右。點解咁多人爭住買呢？想落係長期收租者居多，例如中信證券董事林一鳴就話取消買賣合約十分可惜，每年每房間收息約4厘多啲，今時今日已經幾好。同類酒店房間出售項目，在海外十分多，台灣三十幾年前已有，就係繁盛區之「財神飯店」，即敦化南路大圓環附近，距離遠東香格里拉飯店好近，不過台灣財團管理呢類項目十分不濟，後來引起紛爭。講到管理，幾十年來都係香港勝台灣一籌嘅。
香港人買樓，最緊要係講升值，價錢次要，居住環境亦非重要考慮。小G住在居屋屋苑，有五百幾六百呎，鄰居同類單位最近售出，樓價五百六十萬元，但佢一位朋友住在沙田某屋苑，小G去過，認為無論環境，建築質素，屋苑交通配套都好過晒佢嘅居屋，但比較之下，朋友屋苑嘅七百呎單位與佢間居屋六百呎單位，樓價居然相差不遠，小G驚奇之餘，向相熟地產版記者及代理查問，得到嘅答案係一致嘅：市區居屋有人炒，繼續看好，沙田屋苑係純住宅居民，好少搬走，難炒，故此一向低水，如果你想大大改善居住環境，可補地價出售市區居屋，搬入沙田私人屋苑。
講係咁講啫，鍾意銀紙者多，鍾意居住好啲嘅少，此乃本地文化。
本地文化與本土主義不同，前者乃本地人（香港人）習慣之生活態度習慣，行為準則及喜好，例如炒樓賺錢係本地文化，輸打贏要，樣樣問政府亦逐漸成為本地文化，飲早茶食蝦餃燒賣叉燒包、飲下午奶茶食雞尾包菠蘿包當然係本地文化，而本土主義就係以本土為優先，有封閉，排斥外人，保護主義傾向，此乃左丁山不會認同嘅。想唔到，本土主義已成為社會問題。比較保守嘅「香港發展論壇」，會在5月29日假會展S421會議廳舉辦論壇，討論「面對本土主義冒起的反思」；由發展論壇召集人陳啟宗主持，講者有梁文道，劉兆佳，葉劉淑儀，雷鼎鳴加上北京大學法學院教授/港澳研究中心執行主任強世功，似乎有啲瞄頭噃。


左丁山
PermaLink: https://articles.zkiz.com/?id=55857
Next Page
ZKIZ Archives @ 2019