ZKIZ Archives


航運中心難保 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130409/18221018

曾蔭權時期,提出香港經濟四大支柱理念,航運是其中之一。今年一月嘅梁振英第一份施政報告,重申航運重要,佢在城大做校董會主席時,已提出建設香港成為航運船泊中心,與倫敦看齊,中央亦曾經不斷放出訊息,支持香港作為航運中心。
昨日講過,日本管理大師大前研一曾經向呢個想法大潑冷水,如果我地睇近年數據,大前研一似乎係啱嘅噃,香港貨櫃碼頭吞吐量,曾是世界第一,2005年世界十大碼頭順序係香港、新加坡、上海、深圳、釜山、高雄、鹿特丹、洛杉磯、漢堡、安特衞普。到咗2012年,前四名係上海、新加坡、香港、深圳,但因近年嘅香港碼頭吞吐量增長,常低於深圳,故此一至兩年內香港會跌到世界第四位,想重返世界第一,時勢冇晒咯。
香港碼頭排名下跌,主要係受到深圳競爭,上海盡享長三角之利,新加坡雄霸東南亞。幾年前麥肯錫公司發表咗一份香港碼頭競爭力報告,指從東莞工廠運一隻貨櫃到洛杉磯,若在香港上船,會比在深圳上船貴近三百美元,原因係(一)香港船期航班雖多,但貨櫃船運費更高(船公司收取),(二)從東莞送貨來港,須僱用香港貨櫃車,香港司機,在深圳過關,每日只能走一轉,單位成本比用大陸車,大陸司機,唔駛在深圳過關,在鹽田上船,每日可走兩至三轉車,高出好多,(三)香港貨櫃碼頭嘅處理費(handling charges)(由碼頭收取)比深圳高。
三樣嘢加起嚟,香港在成本上毫無競爭力,但點解仍有咁多貨櫃來港?主因係香港船期密、上落貨快,效率甚高,深圳遠遠不如,但呢個所謂Competency Gap(能力差距)只會隨着內地工人及程序進步而收窄,如果收窄到差距只係10%左右嘅話,你話美國買家例如Walmart會點揀?當然係在F.O.B.報價上揀取在深圳上船嘅啦,何況深圳貨櫃碼頭嘅經營者與葵涌貨櫃碼頭基本相同㖭?今日香港碼頭之罷工,無論是否早日解決對大趨勢毫無影響,如果罷工持續糾紛難解,付貨人短期內更會加快向深圳碼頭靠攏!


PermaLink: https://articles.zkiz.com/?id=54729

Next Page

ZKIZ Archives @ 2019