上個禮拜，《壹》仔喺中環撞到黃秋生同助手喺沾仔記食下午茶，坐咗半個鐘，黃秋生不停篤住部電話，忙到食碗麵都唔安樂。
新戲《葉問：終極一戰》香港復活節檔上畫，假期第一日（二十九日）收百一萬，兩日累積一八八萬，但大陸就好唔掂，（三月二十二日上畫）累積八日票房一千萬人仔都唔過。大聖劈卦嘅黃秋生扮詠春葉問老年，無宇宙最好打加洪金寶度招，又唔似得王家衞，水源不絕，可以拍到啱睇先收手。仲要因為葉問，甄子丹事業片酬人氣全線推高；亦令大導王家衞刷新個人香港票房紀錄。貨比貨，黃秋生再努力，守尾門，始終頭痕！