ZKIZ Archives


金管局有任務 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130330/18211222
梁振英先生答記者問,用英語講一次,話推出種種措施後,樓市開始冷卻及穩定下來,but(講呢個字特別大聲一啲)政府唔會relent(軟化)。唔,好清楚啦,政府就係要樓價下跌,不再升。在咁重印花稅之下,還未計SSD或BSD,買樓成本增加,易手困難,樓市當然買賣兩閒,更何況金管局加緊干預銀行嘅按揭貸款,令銀行煩到死?
銀行分析師L對金管局強行提升按揭貸款之「加權風險資產」(Risk-weighted Asset)一事,覺得完全無道理,根本就係想銀行放緩按揭貸款,令買樓人士借錢困難,知難而退。按揭貸款之RWA原本係5%,現在提高至15%,如必需資本充足比率係8%,即借出一百萬之按揭貸款之「需要資本」(required capital)就係8%×15%,即是一萬二千元,而之前只係四千元,增加咗八千元,增幅係200%,變相大大降低按揭貸款之ROE(Return on Capital,資本回報率),銀行必須諗過度過,有一筆資金,做按揭貸款好吖,還是做貿易融資更好,或者乾脆買中國政府人民幣債券更好?左丁山因此問過賓架W,佢話銀行已決定減做按揭,多做其他貸款或投資喎。
如此一來,銀行之資產組合嘅風險效應上升咗喎。分析L指香港銀行嘅按揭撥備低之又低,按揭貸款(借七成)已經好安全,現在金管局發出一連串指令後,實際上新做按揭貸款係平均借五成,安全度更高,更穩陣,偏偏金管局一邊要降低按揭成數,一邊要提高RWA,簡直矛盾兼荒謬。
金管局當然知道係荒謬,你估陳德霖係儍公乎,不過此乃政治任務,習主席講關鍵在如何落實,梁振英要逼降樓價,趕絕投資者,阻止用家買樓,係要金管局迫令銀行配合嘅。財務R在辣招宣佈前,買多一層樓收租,佢已退休,但在銀行買入不少債券,債券利息被視為固定收入,故此財務R有資格借按揭。另一位朋友在差不多同一時間向銀行借錢買樓收租,朋友亦係退休隱形富豪,在銀行證券戶口持有過億元藍籌股票收息,而股息「據金管局指引」不是固定收入,故此銀行依足規矩,唔肯提供按揭貸款!朋友一怒之下,將億幾元嘅銀行戶口結束,搬去另一間銀行!
PermaLink: https://articles.zkiz.com/?id=54074

Next Page

ZKIZ Archives @ 2019