ZKIZ Archives


你中產啲! 人在中環

http://manincentral.blogspot.hk/2013/02/blog-post_28.html
預算案之後,財爺話自己係中產,惹來各方鬧爆。今次我有些少「同情」財爺,事實上,我估佢係真心覺得自己真係中產人仕,並唔係有心講風涼話挑起民憤的。怪就怪,香港地既物價同生活指數高得太過份,三十幾萬月薪之下,仍然讓人充滿「中產」既感受,與及香港既富豪們真係太過富有。月入三十幾萬既打工仔,舉頭望一望比自己高一格嘅果個階層,驚覺自己同佢地既距離原來係天同地,點會唔覺得自己「只係」中產?

根據維基百科既定義,中產階級泛指擁有一定程度的經濟獨立,例如有安定、較高薪酬的工作。呢個詞語,常常會用於專業人士、學者、知識分子,或大企業、公營機構、政府部門的中級管理層,或中小型企業東主,中學、小學、幼稚園校長、教師、社工和護士等。我睇維基既解釋時,比較惹起我「關注」既,係百科所定義「政府部門的中級管理層」為中產人仕的其中一個「樣板」。我響度諗,以財爺既職位響特區政府裡面,點計都唔止係「中級管理層」咁削啦,咁樣佢話自己係中產的話就唔啱數啦。不過諗諗下,又唔係喎,家陣香港回歸咗啦嘛,「一國一制」底下,一個只有幾百萬人既「地方官」,芝麻官黎既遮,話佢係「中級管理層」都可能比高咗佢。而且拍埋果班時不時落澳門耍樂,動不動都億億聲身家既國內大官身邊,曾司長,其實真係很中產的。

廢話講完,預算案之後我有一個疑問。三十幾萬月薪既人,如果不能稱為「中產」既話,咁應該稱佢為乜野階層呢?我一向覺得社會上對中產既定義,來得有點唔清唔楚,而且個range亦都太大了。「區區」三十幾萬月薪,一年只得三百幾萬收入,以香港既水平黎計,更加冇可能稱得上係富豪啦掛?但係一般對中產既定義係;只要你唔係「基層」,又唔係「富豪」,馬虎地講就已經統稱為「中產」。月入兩萬係中產,月入十萬又係中產,月入三十萬都算係中產,財爺自認中產儘管好鬼難聽,但我卻覺得其實有點吹佢唔脹。

印像中曾經睇過有文章都講過同樣問題(千祈唔好問我邊度睇返黎,我真係唔記得),中產既range太過大啦,好容易惹人誤會,呢個term甚至因此容易被政客利用。所以佢將社會既階級再細分一點,由下到上係咁樣分既:

1) 基層; 2)中產; 3)小資產階級; 4)資產階級; 5)富豪; 6)超級富豪

印象中既排列大概係咁上下啦。然而「中產階級」呢個詞語一直予人既感覺,係位處於社會既「中層」,上流社會唔到你之餘又餓你唔死咁啦,文雅些少既講法係「比上不足,比下有餘。」總之做人都係「知足常樂」啦。然而當各位中產人仕都自以為自己係身處社會既「中層」之時,大家不妨睇真啲上面果個排列?中產,只係代表以財富計,比基層僅高一格。以為自己處於社會既中間地段,恐怕只是個美麗既誤會。
PermaLink: https://articles.zkiz.com/?id=53165

Next Page

ZKIZ Archives @ 2019