離婚方程式 人在中環
http://manincentral.blogspot.hk/2013/02/blog-post_18.html又聽到有認識既朋友搞離婚了。
其實對聽到呢類消息既反應，已經開始有一點習以為常。我其實朋友唔算多，但每年總會最少聽到一兩單。我估，結婚同離婚都有高峰期，響我二十到尾三十頭歲果幾年，我收到年齡接近既朋友、同學、同事所派既紅色炸彈，數量多到連自己都不敢相信。到左近兩三年，當日結婚既朋友，現在大都結左有六、七年左右，而我收到「離婚通知」既情況，亦同樣進入高峰期。
離婚既人好少會大鑼大鼓公告天下，而大部份既「離婚通知」，都係透過朋友圈裡面既「知情人仕」報料的。儘管這類消息聽過唔少，但當朋友們第一次接獲通知既時候，第一個反應多數係：「唔係下話，估唔到佢地兩個會離婚！」
是真的。離婚既couples，除非你同佢地熟得好緊要，otherwise一般普通朋友其實真係唔會睇得出先兆的。不過我發現我所認識既一啲離婚夫婦，其實都有一絲絲既共通點，也搞不清那是否巧合了。
朋友們對離婚夫婦們既comment係「估唔到佢地兩個會離婚！」，其實係有些原因的：「佢地拍拖果陣，好sweet架喎！」；又或者係：「阿邊個追阿邊個果陣，好夢幻架喎…」
唔知係巧合還是有跡可尋，近年我認識婚姻出問題既couples，幾乎清一式都係，拍拖既時候，充滿住「夢幻」般既氣氛的。佢地拍拖既日子，猶如愛情電影裡面既情節一樣。旁人睇可能覺得既誇張又肉麻，但當事人卻又樂在其中。而第二個巧合，則係佢地婚姻開始出問題既時間，好多時都係響佢地既孩子出生不久。
故事裡面既王子同公主結成夫婦，山盟海誓之後一齊面對新既生活。但我從來覺得，結婚生仔，其實係一大堆reality check。拍拖既日子如夢如詩，但結婚之後，太多事情其實需要面對現實。拍拖既時候，戀人一起營造夢幻浪漫氣氛，需要力氣同金錢。好多人話婚前婚後兩個樣，實情係組織家庭之後，責任隨之而大幅增加，從前用來製造浪漫既力氣，早以被各式各樣既責任用乾用盡，甚至透支。當浪漫變成奢侈品既時候，假如夫婦是但一方，仍活在結婚前既夢幻世界之中，婚姻怎能維持下去？人總會面對逆境，婚姻生活亦然。做過生意既人都明白，跟生意拍檔共患難很容易，共富貴卻很有難度。夫妻間既關係卻相反，共富貴既日子很易過，但一去到共患難既時候，雙方關係既根基就見真章。
有時我覺得有點搞笑，夢幻般既愛情故事，結局反而常常不太美滿。能夠白頭到腦既couples，其實唔少係大悶旦，由追求到拍拖到結婚，故事反而平平無奇。諷刺嗎？