ZKIZ Archives


朝偉冷落 劉嘉玲買醉惹禍

2013-02-14  NM
 
 

 

蒲癮極深的劉嘉玲結婚超過四年,有意為老公梁朝偉生個B的她,一度變乖,可惜造人造極唔成。無得做媽咪,嘉玲的花蝴蝶性格再度復活,去年更多次傳出她背夫偷會內地百億富豪景百孚。

未有安守本分做梁太,近數月跟老公關係又再次進入冷戰期。偉仔甚至撇甩老婆,只帶媽咪到外地度歲,孤獨嘉玲唯有單拖飛台北開party劈酒自己happy。雖然有財男舊愛William包場陪飲安慰,但晚晚醉爆,有酒有事!其中一晚酒後,嘉玲被一名台灣老粗強拉上車,令跑慣江湖的她也招架不住,要匿入酒店半句鐘,最終由友人幫拖,才成功甩身。

嘉玲離開國賓飯店派對,其間在大堂遭一名惡男強拉上車,她嬲爆fing開對方,最後要朋友解圍才甩到身。

景百孚甩底

日前,梁朝偉起程往柏林出席影展,為電影《一代宗師》做宣傳,此行帶埋阿媽,丟低老婆,兩母子順道往歐洲度歲,一改往年陪嘉玲北海道滑雪慣例。據了解,忍耐力高強的偉仔,因老婆爛蒲爛玩性格復萌,開始有微言,才決定撇妻過年。老公顧住做孝順仔,嘉玲於是自行安排節目,有指她約好了密友景百孚在台灣聚舊,不過男方臨時甩底;但有不少台灣幫朋友的她依然大把節目,連續兩晚做穿花蝴蝶,出席富豪party夜蒲直落。

不醉無歸

二月二日晚,著住皮草貴婦打扮的嘉玲,現身台北富豪孫道存前女友顏寧,在台北W酒店舉行的富豪生日派對。席上客包括台灣首富蔡衍明,以及郭台銘胞弟郭台強等強勁嘉賓,富人開P,現場保安分外森嚴,保鏢守住入口外,主人家更用大紅布遮住大門出入位,確保絕對私隱。接近十二點,飲到腳部浮浮的嘉玲,孖住跟她傳過緋聞的台北太平洋SOGO百貨TB太子女孔孔(孔菁萍)離開,二人本來打算到十樓的poolside party繼續飲,但因週末人多逼爆場,二人改與來自上海的夫婦朋友,搭的士到附近食消夜歎麻辣火鍋。消夜繼續飲,離開餐廳時,嘉玲已經醉到行唔到直線,在街上跟友人傾偈愈講愈大聲,要由「觀音兵」孔孔送返酒店。

舊愛攬腰撫慰

第二晚轉場落Spark,飛台會合她的舊相好William見嘉玲落車,即跑上前迎接,之後攬實她入場。

嘉玲抵達台北第一晚,跟她傳過緋聞的TB孔孔(戴眼鏡),陪足全程,去完生日party再直落食火鍋。

霸王硬上弓

翌日黃昏六點半,著住七彩花花外套的嘉玲再出動,登上負責接送她的寶馬坐駕,到國賓大飯店開派對。當日除了鐵腳孔孔外,曾經跟她傳過緋聞的前台灣副總統連戰長子連勝文,亦有在場。玩到十一點,嘉玲由友人簇擁離開,行到門口,卻被一名打扮老粗的惡男用手攔住,要強行將她拉上自己的平治房車。嘉玲不肯就範,對方依然霸王硬上弓,經過一輪糾纏,嘉玲終於fing開對方,黑晒面轉身避走酒店大堂,一班朋友見勢色唔對,隨即幫手拆彈,但依然擾攘了接近半句鐘,嘉玲才甩到身,轉場到台北近期最hit蒲點,101大樓Spark再劈。

舊愛結伴返港

在台灣狂歡後,上週一(二月四日),劉嘉玲起初單獨現身松山機場,之後與舊愛William會合,結伴坐私人飛機返港。

前度攬慰

老公唔理,密友放飛機,仲要遇着惡男夾硬嚟!心情麻麻的嘉玲,去到Spark見到專程由香港飛台,任職瑞銀投資顧問的舊相好William Lau,即時開心番!任由前度攬實入場,William當晚更包起全場,飲到凌晨兩點半才散。結婚四年多,爛玩嘉玲始終未有安分,一○年更被踢爆跟內地身家過百億富豪景百孚勾臂摸髀,態度親密。有指一直對老婆採「忍字訣」的偉仔終於頂唔順炒大鑊,為讓老公下火,嘉玲戒煙戒蒲勤做運動,又嘗試接受人工造B,可惜努力一年冇聲氣。無緣做媽咪,嘉玲放低生仔念頭,重拾原有生活。去年開始,再多次被目睹孖住景百孚出現私人機場,以及雙雙夜遊上海。

飲爆喊唔停

據了解,由於嘉玲過於我行我素,令偉仔再有微言,近幾個月更對老婆愛理不理,被老公冷落的她,多次飲大幾杯喊到收唔到聲,要朋友輪流安慰。「嘉玲呢幾個月心情都好差,飲多兩杯就會喊到好厲害,又話偉仔對佢好冷淡,兩個冇交流,全世界都知佢最愛最care就係偉仔,但兩公婆性格根本唔同,佢又戒唔到去玩,同景百孚根本就冇斷來往,本來景百孚答應陪佢去顏寧個生日party,不過臨時有事甩底。嘉玲識好多台灣朋友,即晚就搵到人出嚟攝,好似孔孔咁,佢對嘉玲特別殷勤,一叫即到,仲有前度William都係。聽講話雖然今次景百孚人冇到,但都安排咗私人飛機接送嘉玲往返香港台灣,照顧周到。」知情者說。

分頭睇

雖同住一屋,但劉嘉玲同梁朝偉各自分開兩晚捧黃秋生主演的舞台劇,關係令人充滿遐想。

欲 斷 難 斷

除正印梁朝偉,多年來劉嘉玲緋聞男友幾乎無斷過,即使08年劉嘉玲正式做埋梁太,但跟緋聞男友關係依舊。

景百孚

09年,已為人妻的劉嘉玲被指跟坐擁過百億身家,比她細六年的內地富商景百孚夜遊上海,表現親暱。10年更遭傳媒刊登面貼面,男方摸住她大髀的親熱相,二人又一連兩晚被發現在北京密會,偉仔為此大動肝火,婚姻一度亮紅燈!但嘉玲未有收斂,去年繼續孖住景百孚同遊上海,並齊齊搭私人飛機返港。

鈕承澤

講長情,劉嘉玲同台灣導演鈕承澤的友情維持14年之久。97年二人合拍台劇《儂本多情》後傳撻着,並經常互飛台灣、香港密會,常在公開場合借工作為名,十指緊扣現身。前年鈕承澤來港為電影《艋舺》宣傳,劉嘉玲更熱情招待這位十多年的舊相好。

胡軍

04年與已婚的胡軍在上海拍戲,有指二人食麻辣火鍋後直落唱K,其間表現親暱,胡軍輕攬嘉玲纖腰,緋聞轟動中港台。之後二人齊齊出席活動亦肆無忌憚,劉嘉玲神色自若任由對方將手放在她的玉臀上,又十指緊扣現身上海電影節。之後劉嘉玲在上海開酒吧,有指胡軍儼如主人家主持大局。

微博有暗示

嘉玲跟偉仔就算兩人同在一屋生活,依然各顧各,感情有變在微博有跡可尋。

老公無影

Boxing day,嘉玲將跟朋友去郊外BBQ相放上微博,雖然她一臉enjoy,但冇偉仔份。

同屋各有各玩

去年除夕,就算同老婆一齊慶祝,偉仔亦只跟老友杜德偉、阿B及呂方等合照。

買醉發洩

早前劉嘉玲在微博以一張酒塞相,說明接受目前生活,看似暗示經常買醉尋開心的現況。

朝偉 冷落 劉嘉玲 劉嘉 買醉 惹禍
PermaLink: https://articles.zkiz.com/?id=44031

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019