租客榮升業主方法(答) Home Blogger
http://www.homebloggerhk.com/?p=5875以我睇你個case，應該賣出新樓(即一房單位)而買入現元朗居最為合適。有以下原因:
1. 首先你倆夫婦收入尚可，但手上cash唔多，人工亦唔可以幫你好快手咁儲到另一舊cash，所以不宜在旺市持貨過多。至於如何界定你持過多定少，多得你留意諗樣網，用筆者分享過了的方法計了出來。
2. 我自己會咁計，75000家庭入息除2即37500。$37500就係假設你出面冇其他借貸後得出你可用盡黎供樓之金額。如你同一時間供兩層樓即負債5.60mil，每月還約20000，僅僅超出盡借(=盡還)金額之一半(20000/37500=53%)。
3. 換言之以你地人工供哂兩層樓都唔過份。但基於幾個原因諗樣諗為你上年年中買左樓花應該趁SSD就完好快手放。第一係你買左個一房，近排細價樓升得癲但此情恐不再，居屋大把細價樓。第二係新樓最正送裝修，裝修自用梗係好，但比租客住你只係得到頂多收多一千月租，可以的話都唔想比個靚裝修予租客催殘。第三，你係上年買樓花，如果跟發展商正常個套，你既SSD已過了一年有多，再過半年賣可以唔使比SSD，或只5%。
4. 即筆者建議你趁高賣出一房，而賣樓時間最好係SSD剛完。另外都支持你買現居，難得你鐘意加上免傭。方法係如業主講自己好想買，但後生仔要等錢番，可唔可以比個半年成交期你，過哂農曆年(現時2013年1月)簽約。
5. 此時間上之佈置，係為左盡量避免你連HOLD兩間樓之時間。希望你三月買現居而九月成交，可以趕及係年中約六月即出售一房樓宇
6. 留意，你個樓花盤肯定有不少人想賣樓，好勤力搵多幾個AGENT未收樓先做定野，平些少都走左佢。除非你個新盤係九龍城或地段獨特之幾個，否則大家一齊收樓肯定令樓價升唔起。名城都要放左一排先至有得升。
7. HKMC 如發現違規者租出樓宇，除非違規者答佢自己係蓄意隱瞞事實，否則筆者未見到除左CALL LOAN補水外更高之罰則。
8. 元朗有一半機會係未來第二個沙田，至少筆者荒謬地認為係。至於點解係一半，我要到homebloggerhk每日一萬個瀏覽量先答你啦!
9. 因人工始終未可以高到飛出外太空個隻，你唔可以心急。要比耐性等低位先再買另一間。畢竟你GOOD左新盤件貨應該有「半百個」落袋了。是的，我真係覺得係香港買賣樓房如睇對時機，家庭可以和諧，身體毛病會少、婚都可以唔使離。小心處理。