六合彩中獎後的部署 Home Blogger
http://www.homebloggerhk.com/?p=5227網民高登仔問及如果佢中左四千萬頭獎(按此refer 問題)，佢應該點部署? 大家平時所見，此做法同其他網友花時間詳細交代自己財務狀況去發問相比，高登仔「求其」打左句野就想人覆未免有點「膠登」。不過為左維持大部份人心中對中頭獎既盼望，諗樣交代下自己如果中左四千萬會點「部署」。
首先你要睇下中左幾千萬既人下場會點。筆者其中一個見聞真係否極泰來，佢幫襯左幾十年馬會仲要爭落成身債，終於比佢「仆中」條3T! 家中老婆幫佢湊住個腦退化症既老豆，第一時間就迫老公分一半錢比佢，用舊錢走去銀行買左張人壽，等個女18歲就將筆錢比個女。老婆自己就趕出旺角，去接番成日唔知自己行左去邊既老爺。中獎者自己呢，根據轉述佢話想買部的士收車租，可能同自己開貨櫃車有關，諗住可以過下車主癮收番租轉頭。最尾結果唔知，不過幾可肯定係大部份獎金派彩番比馬會，筆者亦未有人告知中獎者有幾部的士收緊租，或有樓收租咁樣。
另一位係生意人，獎金係佢間廠「幾唔掂」時出現，幫東主化解了一場危機。由於突如其來既資金令佢生意仲可以係淡市擴張，上埋位做左同業大佬。可惜獎金係化解唔到佢做生意不當既因素，佢之前間廠唔掂梗有原因。時間一長佢又打回原形。雖然冇話破產，但變回平凡生意人。
綜合所見，中左獎既人都有幾個煩惱，一係好多人會黎瓜分你既錢、二係中左獎既錢好多時因自身因素如爛睹、唔識做生意、或投資失利而輸返出去。筆者既見解係因中獎者只是有錢而冇打理咁大筆錢既能力，所以有錢到手好彩就敗返一半，唔好彩就打回原形。賺錢係一個能力、理財又係一個能力，homebloggerhk係想提升你理財能力。你係報紙見到大孖沙為富多年，原因係佢賺錢既時候同時學會守住佢現有既錢，避開人同佢建議既投資陷井，富不過三代，道理多為此。
不過現時城中富豪，已多被建議成立信託基金，減少稅項支出之餘更可按自己意願將基金入面既錢分配比親近之人。令二世祖永遠都係二世祖，冇錢既你再唔會再好似粵語殘片咁講有機會翻新。你要高攀二世祖唯有望你中左四千萬，然後梗係先幾百萬出黎開心下，淨低係奧運站買個兩房單位，話哂都「好聽d」。跟手將錢搵bank成立信託，三千萬始終銀碼細要比0.5%-2%年管理費。但你可以去除一般富豪order落既複雜分錢條款，就咁叫佢將三千萬既3%按月派比你，即年收九十萬，月入七萬幾。狠心既更可以係信託設立不可撤換條款，即係講明冇任何人可解散個trust出黎，包括你自己，派錢收一世。又可將派錢同美國國債十年孳息率掛勾，唔使驚通脹侵吞月入之可購買力。總之，係四千萬入面撥至少一半去成立個入門版信託，可保一世富足，不會打回原形。又有藉口唔使借錢比親戚攪生意或還債。等於雲佩斯入左四球咁，下一步梗係要鎖定勝局!
其實上述方法亦適合生意人，將自己早年賺到既錢同現有身家撥開，就算一日公司被人清盤都清唔到你筆錢。由於信託資產多在避稅天堂，你比人告都亦好難由法院強制收回款項。更進一步可考慮移民法制更健全既地方，例如「英國」搭「馬爾他」。所以你話有錢多好呢?? 問題你係識唔識咁諗。
講返轉頭，高登仔連中左獎既部署都攪唔清楚，好難叫個天比四千萬你，比左咪又係流番出去。凡事皆有因，只顧叫罵而不盡心充實自己既人最蝕底，願大家共勉之。