📖 ZKIZ Archives

貝索斯奇人奇招 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130101/18119187
肥仔Ｋ應邀去演講，事先得到指示，要寫多幾張power point，以示有料，另外亦向聽眾展示演講重點，等人哋有得抄嚇，否則容易俾人批評冇料到，唔知講乜。今時今日，學當年牟宗三一站上誠明堂講台就隨口無稿無字係咁演講一個幾小時，學生冇人敢行開、較腳嘅場面，已是上古歷史。今日之普通聽眾或學生嘅注意力有限，聽十零分鐘議論就會覺得悶㗎嘞，要設法每五至十分鐘搞一次爛gag，講一個黎文卓式笑話，先至會有人讚番幾句。冇得講，今日是power point世界，偏偏左丁山唔識做呢樣嘢，蝕底咯。前幾日睇報紙，睇到中大政治與行政學系副教授周保松（新亞哲學95）教書不喜用PP，沿用老方法，講講講就掂，果然後生可畏，若非有料之人，焉敢如此。
假期之前，出版Ｍ傳來一份《財富》雜誌特稿，講亞馬遜網站創辦人Jeff Bezos，自喬布斯死後，呢位創業家係美國科技界最令人敬畏嘅人物，連華爾街分析師都怕咗佢，視之為創意奇才，《財富》雜誌話：「如果你問一百個新創業企業家，佢哋最敬佩邊一位CEO，九十五人會答係Bezos（貝索斯）。
貝索斯創辦嘅事業，以賣書為核心業務，每年營業額高達一千億美元，全世界出版社及書局都怕咗佢，既然賣書，必是愛書，愛閱讀之人，《財富》透露，貝索斯召集高層行政人員開會之時，首先齊齊埋首閱讀「備忘錄」（memos），呢啲管理摘要長達六頁，每一位高層悉心閱讀，用筆在每頁紙寫下評語、註解、心得，全部人讀完嘞（需時至少三十分鐘），貝索斯先至准許大家開口討論。亞馬遜拚命賣電子書，但實際管理上，在最重要嘅會議，就要用紙筆，唔准用PP，貝索斯話：「寫memo要用完整句子，要用動詞，每段落有標題，要寫六頁紙嚟講清楚一個題目，冇可能冇清晰思維！」嗱，係咁寫幾行PP，未必顯露清晰思維與邏輯推理㗎，貝索斯就唔喜歡嘞，無論用中文或英文，寫六頁紙喎，作者有冇材料，見曬底啦。左丁山以前在大公司，公司規定寫memo不准超過兩頁，因為過長就冇人有時間睇喎，現在回想起來，只係話事人無耐性，無思考啫，貝索斯有此「六頁紙」奇招，其他大公司唔知敢唔敢學習？
PermaLink: https://articles.zkiz.com/?id=42336
Next Page
ZKIZ Archives @ 2019