📖 ZKIZ Archives

藍領薪水 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121219/18106100
親戚過身出殯，左丁山走去殯儀館夜祭，三鞠躬，上香，瞻仰遺容之後，與一位同鄉兄弟燒元寶。久不見面，問呢位鄉音未改嘅同鄉阿哥最近喺邊度開工，佢話：「在離島為一間獨立屋豪宅做裝修囉，你表弟做判頭嗰單呀！」哦，表弟好耐以前講過，乜仲未做完咩？同鄉說：「業主系大陸佬，好講究，亦唔計較，裝修咗近一年咯，仲未完工，我都未試過喺一個地盤做咁耐嘅！」真好，長做長有，多謝內地業主有咁多錢做裝修啦。同鄉系泥水技工，是晚走嚟殯儀館向佢師傅拜祭，想當年，佢攀山越嶺游過梧桐河來港，無依無靠，幸得同鄉收留，遇上師傅教佢學泥水，帶佢到地盤開工，想不到一做幾十年，憑一技傍身，衣食唔錯，最估唔到嘅系愈老愈吃香，臨老不愁失業。同鄉話：「呢行好缺人，行得走得嘅泥水佬，不論年紀，都有工開，啲細路都唔肯入行嘅，到職訓局上完堂，攞埋證書都唔肯做，怕辛苦喎！」點同呢，上培訓課程時唔使俾學費仲有錢攞，真系要去地盤做嘅話，唔好搞哥哥仔啦。
同鄉話佢每日日薪一千，釘板師傅就千幾兩千，次日睇報紙，有報導話燒焊師傅日薪八千，好過做副局長。三行人士薪水高成咁，皆因全行缺人，澳門地盤搶人，香港工會唔准輸入勞工所致。明年三行工人加薪由5.3%（泥水）至30%（模板）不等，系全港加薪幅度最高嘅行業，與佢哋相比，國泰空姐為咗2%加薪，大吵大鬧，幾慘也。冇法子啦，建造業工會話建造業還有黃金十年，薪水職位不愁，而全球航空業面對高油價及全球經濟不穩定嘅大形勢，航空公司職員想話大幅度加薪，不如轉行，等航空公司請唔到人嘞（好似地盤請唔到人咁款），薪金自然會另計。白領藍領薪金差距拉近，會系香港未來大趨勢，主因系在一個服務型經濟及人口老化社會，青年人一定系鍾意做服務多過做勞工，變成勞工求過於供，文職人員供過於求（例如新聞記者），肥仔Ｋ有一位同學在本港讀完副學士走咗去做電梯安裝行業，因學歷較高，好快升做「掃把」，人工不止高過一位碩士去咗一間名校做教學助理（月薪一萬），仲不愁炒魷㖭！
PermaLink: https://articles.zkiz.com/?id=41788
Next Page
ZKIZ Archives @ 2019