📖 ZKIZ Archives

大老山隧道加價 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121212/18098135

大老山隧道申請加價，平均升幅為11%，私家車及的士收費由15元加至17元（加幅13.3%）、貨車收費由26元加至28元（加幅7.7%）、雙層巴士收費由32元加至34元（加幅6.25%）、輕型貨車收費由22元加至24元（加幅9.1%），換句話說，私人（包括的士乘客）津貼巴士及貨車，不知是何道理，難道私人好蝦啲，唔會集體抗議？以佔用隧道行車空間及時間嚟計，重型車（巴士及貨車）比私家車及的士用隧道用得更大空間，更慢行車時間，理應加費多啲，私家車收費與的士收費加少啲，先至合乎邏輯，但從大老山隧道之申請加價結構看，顯然係欺善怕惡，用意希望減低反對聲音，希望政府批准。
任何公用事業申請加價，政府與社會聲音例牌反對，不在話下。好多人逢係聽到加價，就要求政府回購，十分simple and naive，最怪嘅係居然有議員支持，可見水平之低。樣樣都由政府收回、回購，不尊重合約精神，香港不如改行社會主義啦，等香港經濟向下沉淪。大老山隧道去年賺一億八千九百萬元，平均每日車流五萬三千架次，今年頭十個月每日五萬五千架次，但要害在於公司在投標時，預計內部回報率係13%，三十年經營權到2018到期，因隧道經營至到07/08年先轉虧為盈，目前內部回報率只有6.1%，故此要加價追番回報率。
如此理由，比較簡單，政府只要翻查經營協議，查下有無IRR保證條款，而保證IRR真的是13%，如果有，基於合約精神，政府簽咗約要認數，應該准大老山隧道加價，如果協議無此條款，內裏只提及類似「合理而不過份」嘅IRR嘅話，哦！大老山隧道母公司就唔好彩咯，三十年基建計劃必有營運風險，願賭服輸，點可以在零息時代，要求有13% IRR呀。房屋及運輸局唔該立即翻查當年文件，從速向公眾說明，不要講甚麼商業機密，阿吱阿咗。（按：一條隧道，一個政府，還有甚麼商業機密可言。）大老山隧道未來幾年會受惠於所謂「起動九龍東」政策，新界車往來九龍東用大老山隧道最為方便，即使加價，亦難以改行獅子山隧道，一定愈賺愈多。不過加價多少，在乎當年政府有無保證13%回報率啫。

PermaLink: https://articles.zkiz.com/?id=41785
Next Page
ZKIZ Archives @ 2019