📖 ZKIZ Archives

少交稅十元 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121125/18078770
行出寫字樓去灣仔吃午飯，趁天氣轉凉，決定唔搭地鐵，一於行路去「喜萬年」，行經AON華人行，聽到一把熟悉聲音大聲叫途人「來簽名參加交稅少交十元運動，逼政府高官辭職」，唔駛睇，淨係聽都知道係長毛議員在此開檔，至於有冇人、有幾多人參加交稅少十元嘅運動，最好由長毛等人公開宣佈。香港目前大約有一百二十萬薪俸稅納稅人，其中十至十一萬個繳交嘅稅款佔去政府薪俸稅收絕大部份，包括所有大公司CEO、財務總監，等等在內，相信起碼有百分之九十日日在中環出沒。長毛在中環可唔可以吸納到呢類高級打工仔參加運動呢？相信機會不大。
去到喜萬年，見到一班前輩與同輩，講起此事，外匯G話：「長毛等人發起如此抵制交稅運動，每張稅單交少十元，相信已考慮過晒法律程序，知道稅局冇佢哋符，事實上，一月交稅三萬八千元，你交稅三萬七千七百九十嘅話，稅局要追你繳交餘款十元，行政費用都唔止十蚊啦，或者索性唔追呢？」咁樣，政府咪有金錢損失？但即使有一半納稅人，當有六十萬人，每人交少十元稅，政府短收六百萬元啫，濕碎啦！如果只得幾千至一萬人參加運動，政府收稅少十萬八萬，可完全不放在眼內，唔追收仲慳回成本！
不過數還數，路還路，不交稅款法律上點都會追究啩？飯後行上香港公園返中環，碰到一位物流公司職員，因送貨幾次到左丁山公司而彼此認得，佢對左丁山講：「我頭先在中環聽到梁國雄講抵制交稅，交少十蚊，如果我係咁，禮拜六上深圳之時，會唔會俾移民局職員截停，要我交欠款十元㗎？」不虞有此一問，一時之間答唔出，以前係有過呢類個案，逃稅人士會在機場過關時被出境關卡人員截停嘅，但欠交稅款十元嘅人士會唔會遇上同一命運呀？物流S話：「左生你識得人多，唔該幫我問吓，我想參加運動，玩吓都好，但如果會在羅湖出關被移民局官員截停，容乜易俾佢哋玩兩三小時呀，咁就咪搞我咯！」咦，係噃，如果在機場有如此阻滯，上唔到機而誤了旅程，仲杰。不過左丁山真係唔識點答，要搵稅務專家問吓先。理論上，稅務局係有權申請阻止欠款人離境，禁止離開香港嘅。
PermaLink: https://articles.zkiz.com/?id=40081
Next Page
ZKIZ Archives @ 2019