威靈頓街鏞記對面間翠華茶餐廳，日間生意好到不得了，人客不限於本地人，講得誇張啲，紅黃藍白黑人種都有，聽一啲愛蒲夜店嘅人士講，呢間翠華深夜時份亦旺得交關，仲威到有中環五星酒店「特派員」來此為外來遊客買外賣，夠晒巴閉，唔怪得可以搞上市。至於上市新股是否值得認購，要研究清楚先，獅子山學會重臣李兆富在爽報專欄話翠華新股嘅P/E去到27倍，好貴噃，想認購嘅話，不妨諗清楚。
獅子山學會在十一月七日搞咗一個經濟研討會，曾財爺親自到場，可見重視，但次日全港幾乎全無報道，極受忽視，可見得香港傳媒報道經濟消息新聞，甚有偏差，偏愛即食、八卦，對較為嚴肅啲嘅，就略過不提（或者唔識？）可哀也。
呢個研討會由獅子山學會與德國Friedrich Naumann Foundation（東南亞支部）聯合主辦，主題係福利主義如何破壞經濟繁榮：民粹主義與自由經濟的挑戰，來自加拿大Fraser Institute嘅Fred McMahon評論香港最近引入BSD抑壓樓市，佢指出好多香港人在多倫多與溫哥華買入大量物業，如果加拿大省政府突然引進BSD，香港人是否高興？外來投資者來港投資，希望投資法規不會輕易改變，假如香港以後經常一聲命令，一夜之間更改規則，外國投資者點會對香港有信心？香港目前在經濟自由度方面佔世界第一，新加坡佔第二，香港唔想自毀長城呀嗎？
The Atlas Economic Research Foundation執行副總裁Tom Palmer博士就話香港解決樓價高企之道在於增加樓宇供應，放寬土地使用限制，開發更多土地，BSD係短期政治措施，長遠損害市民利益。中國社會科學院：馬興元教授認為BSD影響香港自由港嘅形象，以北京為例，政府徵取高稅，但房屋價格仍然很高，主要係北京市有吸引力，若沒有吸引力房價自然下降。左丁山就希望香港對全世界、全國投資者都有吸引力嘞，如果冇咗吸引力，香港人點可以收咁高人工呀！
