ZKIZ Archives


失落影帝 74歲許冠文個表情係…

1 : GS(14)@2016-11-29 00:14:38

每逢頒獎禮,識睇嘅,唔係睇邊個最終上台得獎,而係要將時間提早兩分鐘,望望鏡頭下嘅提名人個副表情--凝重、緊張、興奮定輕鬆,一覽無遺。憑《一路順風》成為今屆金馬影帝大熱嘅許冠文,前晚喺金馬獎歡迎酒會時,被問到想唔想攞金馬影帝?佢當時話:「梗係想攞啦!但睇翻今屆嘅實力又真係好難囉!自己好鍾意家輝,而學友又進步得好快。至於柯震東當年嘅《那些年,我們一起追的女孩》我都睇咗三次呀!至於另一位演員范偉我就唔太熟!但係獎項係好主觀……」賽果如許冠文所講,真係好主觀,結果就係由佢唔多熟嘅范偉奪得最佳男主角。未宣佈賽果前,鏡頭下嘅許冠文,緊張到坐直個身、五官綳緊,到結果揭盅,得悉飲恨嘅許冠文,面色變得一臉凝重,失望之情浮晒喺塊面上。雖則一代笑匠嘅演技,唔會因為一個獎而被抺殺,不過攞到影帝,又確實係會錦上添花嘅。74歲的許冠文,《一路順風》是其首部國語電影,亦是首次爭逐金馬影帝,對上一次是38年前入圍爭最佳導演。佢飾演一個喺台灣生活廿幾年嘅香港人老許,揸的士維生。老許在港一事無成,去台灣本想重新做人,可惜一事無成,就連老婆都睇佢唔起。一次誤載運毒宅男納豆,遭對方利用,陰差陽錯展開一段亡命黑幫公路之旅。語言是許冠文今次拍《一》片一大障礙,他曾接受本報訪問稱:「原本角色係應該講唔正國語嘅,但佢嚟咗台灣二十年,有啲台灣的士佬名詞無理由唔識,咁一定要跟足去講,唔能夠講陣間我上『高速公路』,要講『交流道』,大佬咩叫交流道呀?於是乎第一日真係拍咗100個take。」賽前許冠文奪影帝呼聲高唱入雲,豈料最後賽果竟然爆冷。




來源: http://hk.apple.nextmedia.com/entertainment/art/20161128/19847979
PermaLink: https://articles.zkiz.com/?id=317389

Next Page

ZKIZ Archives @ 2019