📖 ZKIZ Archives

完美時機 - 翠華控股 (1314.HK) PARTIPRAL 派得好

http://partipral-hk.blogspot.hk/2012/11/1314hk.html
放風足足半年有多, 翠華 (1314.HK) 終於正式踏上上市之路. 當恆指成份股有過半數為內地企業, 港股市場逐漸大陸化之際, 有一間真正屬於香港人故事既公司上市集資, 比多十間內房掛牌感覺更良好. 加上翠華賣既係一個由地道茶餐廳做起既神話, 本地文化更為濃烈.

成立23年既翠華現時於香港, 內地, 澳門分別擁有21間, 4間及1間分店. 餐廳總數只不過26間, 但2012年總收益竟然達到7.6億. 港澳分店平均收入3千1百萬; 內地分店亦達2千萬以上. 換化成日常生活可以接觸到既概念, 即係平均每日做到超過8萬蚊生意, 以茶餐廳而言, 效率高得令人咋舌. 能夠做到如此高效, 除左餐牌要賣得夠貴之外, 同一張檯換客亦要夠快, 達到車水馬龍, 絡繹不絕之象. 根據招股書第4頁透露, 翠華截至今年六月底三個月整體每張賬單平均消費額高達81港元; 而保薦人德銀報告亦指出香港分店每日每張檯換客次數高達25次, 即代表平均每人坐唔夠一個鐘就要俾81蚊!

基金經理林少陽指出此現象屬人類極限, 我同意, 翠華現時之經營效率, 其實已達到完美境界. 餐飲業面對三大敵人食材, 租金以及人工, 要走高檔茶記路線, 事實證明集團單單靠"翠華"兩個字, 純粹品牌效應已經可以將單價以及翻檯次數推至完美, 食材成本可以成功完全轉嫁至食客身上, 我並無半點懷疑.

翠華現時全數餐廳皆非自置物業, 而且根據招股書第157頁餐廳網絡資料顯示, 除左位處山頂, 將軍澳以及機場既共4間分店之外, 其餘門店選址均以街舖為主. 街舖相對商場店最大分別在於租金議價空間, 將店舖多元化乃商場業主選擇租客其中一個重要因素, 業主租客之間處互惠互利狀態, 坐埋檯傾租約, 大家都會較容易傾到計. 相對而言街舖業主考慮租客則"單純"得多, 能夠同舊客續約, 減少煩惱當然好, 但講到底最緊要都係俾得起錢. 黃金位置面對有其他潛在租客加入競爭, 業主對舊客唔會有太多感情分可言. 翠華2012年租金佔收入比例只有約12.6% (2010年: 10.6%; 2011年: 12.5%), 屬相當健康水平, 但值得留意既係集團旗下絕大部份租約皆會於未來4年內陸續約滿, 而單單今年亦已經為其中5個分店續租, 但管理層拒絕交代新約租金加幅水平. 仲未計及未來擴大店舖網絡既情況, 我擔心12.6%既租金收入比好可能只係起步點, 未來幾年很難繼續保持.

集團目前僱用近2,200個員工, 近數年員工成本佔收入比一直維持27%左右水平, 如果跟已上市餐飲公司如大家樂, 大快活, 稻香等比較, 屬正常水平. 不過有去過翠華食野都可能會感覺到, 店舖員工係比一般茶餐廳多. 當開一間新店要請多近80人, 當中涉及培訓, 管理等環節並非簡單. 翠華經過23年既努力先慢慢達到26間既分店網絡,  管理層擴張大計如此克制, 員工團隊過份龐大相信乃其中一個原因. 僱員開支比重現時仍處健康水平, 乃因為上市前既翠華正處完美狀態; 當上市後要向股東交代, 追求增長, 加大分店擴張力度後又是否仍然可以保持水準? 管理層透露3年內要分店網絡增至60間, 用23年經驗管理26間分店係一回事; 而用26年經驗去管理60間分店則又係另一回事.

再順便講講翠華既增長大計, 目前於港澳共有22間分店, 招股書158頁既分店地圖清晰顯示目前翠華餐廳其實只佔據整個香港好細既範圍. 香港島主力灣仔及中西區; 九龍則主力油尖旺; 不計機場, 新界分店竟然只得5家而當中荃灣已佔其3. 分店選址如此集中, 乃由於翠華走高檔茶記路線, 要打進元朗, 葵青, 北區, 沙田, 大埔等普遍消費較相宜既區域, 難度相當高; 就算完全捨棄新界, 亦唔見得九龍城, 觀塘, 深水埗等等會容得下太多間翠華; 回歸主力據點香港島, 東區地道美食太多, 人均年齡亦較高, 性價比翠華完全無優勢可言; 反而南區值得多加開發, 目前只得一間分店實在係太少. 就算係本地市場, 表面證供已經如此困難, 我開始明白為何翠華23年內只能於本港建立得21間分店.



或者未來重點發展應該係中國市場, 翠華目前於內地只有4間分店, 人均消費高達RMB 190, 每日每張檯換客轉數高達8次 (數字取自德銀報告), 營運數據一絕咁靚. 我不否認港企品牌於大陸有一定吸引力, 但最奇怪在於此等吸引力原來有機會因為品牌擴張而逐漸減少. 大家樂, 大快活, 稻香等北上開始遇阻, 引伸至其他零售品牌如I.T, 包浩斯, 莎莎等"港仔"亦有出現類似情況. 翠華三年前內地只得一間分店, 管理層做大陸生意方面明顯經驗尚淺. 未來三年內將26間變60間, 當中38間新店應該有起碼有三份一來自中國, 即代表管理層要比目前打理多3倍分店, 我有多少擔心翠華呢個中國夢是否吹得太大. 更何況強如上述早已站穩陣腳既港產品牌, 都不能避免做大後反而出現退步既問題, 十三億人口既中國市場實在太難計數.

翠華中港兩地業務擴張上皆面對一定不明朗因素, 幸好目前翠華經營上狀態大勇, 選擇今日上市, 大賣增長故事, 時機掌握可算係完美. 上市前大派過億股息, 以招股價上限$2.27計算, 可以集資超過7.5億港元, 而上市後市值大約30億. 根據保薦人德銀預測, 翠華2013年純利將增至1.57億, 按此推算, 估值方面P/E 19倍, 息率1.5%, 偏貴.

翠華國際配售反應相當熱烈, 早已超購; 同公眾冷淡反應形成相當大對比. 單就未來一兩年, 翠華要向繼續投資者證明既東西實在太多, 以偏貴價錢加入IPO搶購的確並不理智; 不過如果純粹講短線供求因素, 太少散戶參與, 翠華上市後股價表現可能會比想像中好. 今次翠華招股我做個簡單總結: 捧場可以, 長揸則免.

我會記得我寫過呢篇文, 一年後對答案, 我希望我睇錯.